الموضوع: حوار من القلب للقلب - الجزء الأول

المشاركة الأصلية كتبت بواسطة bee

علا .. دينامو الاجتماعي

وقعتي ومحدش سمى عليكي ..

كام سؤال خفيف كده ..

خفيف؟ دول اسمهم خفيف؟ كام كيلو طيب؟ :k44:

*زدني بيمثل إيه لعلا ؟؟؟؟

- بارقة الأمل ان لسه في أمل
- البيت الكبير اللي بيجمعنا و يحتوينا
- حب و أخوة في الله
- أحلى جو عمل ممكن حد يتواجد فيه
- طوق نجاة ربنا بعتهولي في الوقت المناسب تماما.. ما أحكمك يا الله.

*زدني زود علا في ايه ؟؟

- ثقة بالنفس
- علو همة
- إحساس بإني ممكن أعمل فرق ملموس في حياة ناس ممكن أشوفهم لمرة واحدة بس في الحياة.

*سيارة أحلامك إيه ؟؟

انا لسه حديثة العهد بالسيارات و ماليش فيهم طموح اوي. يمكن انا تفكيري محدود بالطرق أكتر من السيارات، يعني لو في نفس طرقنا دي هافكر في طيارة مش سيارة :D

تعليق على بعض الكلمات في المصطلح العلاوي

الحب
مش كلمة تتقال، ده حياة بكل تفاصيلها، حلوة و مرها و زي الدهب لازم يمر على لهب النار عشان يبقى دهب، فيا إما يطلع دهب او هو ما كانش دهب أصلا.

الغيره
لو المقصود بيها الغيرة المرتبطة بعلاقة حب بين طرفين يعني مش الغيرة في العمل او النجاح و خلافه، فهو شعور طبيعي ناتج عن حب طرف للآخر، انما لو زاد عن حده من طرف المرأة فبيبقى سوء تقدير منها للأمور أو عدم نضوج و فراغ زايد عن اللزوم، و لو تحول لشك من طرف الرجل يبقى العلاقة كلها محتاجة لمراجعة.
الشجن
إحساس كان بيتملكني في فترة من الفترات، ماكانش بيبقى له سبب واضح، بس ماكانش مزعج بالنسبة لي، يعني غير تماما احساس الحزن او الاكتئاب عافانا الله منهما.
الاخوة
من أكبر النعم في حياتي.. حوالية كتير باعتبرهم إخوة لية قريبين و بعيدين، ليهم في قلبي مكانة خاصة و لما تيجي سيرتهم باحس بالسعادة و الامتنان اوي ليهم انهم جنبي و باحمد الله حمدا كثيرا انه اختارني يكون حوالية الناس الرائعة دي :)
الغدر
معرفوش
الكبرياء
صفة مش غلط انها تكون في النبي آدم، بل بالعكس المفروض ان الإنسان يبقى عنده كبرياء و عزة نفس و كرامة، طبعا ده غير الكبر أعاذنا الله منه.

بيت أحلامك .. (متحطيش حدود) .. نفسك يكون فين ؟؟؟؟؟؟؟؟؟؟؟؟؟؟

في الجنة ان شاء الله. يا رب أكون من أهلها.

لو علا خيرت ما بين منصب كبير وفلوس قليلة والعكس .. تختار إيه ؟ ؟وليه ؟؟

ده يعتمد على المنصب نفسه و هل بيحقق لي الهدف اللي انا حاطاه من تقلده و لا لأ، ساعتها بأه نبقى نشوف موضوع الفلوس ده :)

أحب الالوان لقلبك ؟؟
السماوي و النبيتي
وأكره الالوان .. ؟
المستردة و الكاكي.

كفاية كده دلوقتي وبي رايت باااااااااك

باك يا سيدي باك آدينا قاعدين

المشاركة الأصلية كتبت بواسطة OlaOsman

اما بيت الشعر اللي باحسه أوي و باحس انه حقيقي اويه هو جزء من قصيدة مغناه مش عارفة مين الشاعر بس بتقول: إذا الإيمان ضاع فلا أمان، و لا دنيا لمن لم يحيى دينه.

الشاعر هو "محمد إقبال" أول رئيس لجمهورية باكستان ، وطبعا المطربه هي أم كلثوم .
تحياتي ومتابع باهتمام وإعجاب

المشاركة الأصلية كتبت بواسطة muslimah_dentist

علا رجعتلك بكام سؤال؟؟

بما انك بتعملى فى العمل الخيرى .أكيد قابلتك مواقف كتير استوقفتك كانسانة و ممكن تكون أثرت فيكى كمان ، يا ريت تحكيلنا على موقف منهم؟

انتي متأكدة انك عايزة تسمعي القصة دي؟ فكري شوية يا بنتي الموقف اللي هاحكيه ده كله نكد x نكد :(
طيب.. انتي اللي طلبتي.
هو موقف حصل لي في آخر زيارة لية لمركز علاج الأورام و الطب النووي بالقصر العينيي و جيت هنا فعلا يومها حكيت عن الموقف ده بس مش لاقية الموضوع دلوقتي، فهاحطه هنا بعد إذنك كوبي و بيست من نوت كنت كاتباها ع الفيس بوك باحكي فيها الموقف اللي أثر فية اوي.

النهاردة كنت في زيارة لمعهد الأورام في اليوم اللي منظمه جمعية روح مع هاند إن هاند. بالنسبة لي دي مش أول مرة أحضر اليوم ده في نفس المكان.. آخر مرة كانت من سنة تقريبا و شفت فيها بعض الوجوه المألوفة.. منهم اللي اتحسن كتير بفضل الله عن السنة اللي فاتت و منهم اللي توفاه الله و منهم اللي حالتهم بتسوء.. ربنا يعفي عنهم يا رب.

اليوم فضل النهاردة ماشي عادي لحد ما بدأت فقرة التلوين.. كل متطوع المفروض انه ياخد مجموعة من الأطفال و يقعد يلون معاهم اللوحات المرسومة و في الآخر الأطفال ياخدوا صورة مع اللوحة بعد ما أتلونت و معاهم المشرف. و انا بالف بين الأطفال و اشوف حد محتاج حاجة لقيت بنت قاعدة على كرسي متحرك و في إيدها اللوحة و الألوان بس مش متحمسة لإنها تلون.. سألتها مش بتلوني ليه قالت لي كلام ما فهمتش منه اي حاجة بس بدأت أشجعها على انها تبدأ تلون و فعلا لونت اللوحة كلها و سألتها اسمك ايه قالت لي شيماء.. قعدت انا مع شيماء حوالي ساعة نلون و نرسم لحد ما جت فقرة الصلصال مامتها جت كملت معاها و انا قمت اعمل حاجات تانية.

و انا باسلم شيماء لمامتها شبهت على مامتها اوي و افتكرت اني فعلا شفتها في المكان ده قبل كده و لاحظت كمان ان شيماء رجلها التانية مش موجودة.. حاولت أربط في دماغي مالقتش أي رابط.. رحت للدكتورة اللي منظمة اليوم و سألتها عن حالة شيماء قالت لي انها حالتها متأخرة اوي و اضطروا يبتروا رجلها بس دلوقتي الورم وصل للنخاع فمش نافع معاه علاج.. قلت لها هي شيماء دي احنا قابلناها السنة اللي فاتت؟ قالت لي آه بس كانت حالتها احسن من كده بكتير و كانت بتمشي على عكاز.. انا بأه ساعتها كل الخيوط اتربطت ببعضها في دماغي و افتكرتها..

شيماء السنة اللي فاتت كانت بنت قمر زي البدر.. عينيها خضرا و وشها مدور و كانت كلبوظة شوية.. وقت الدي جيه السنة اللي فاتت قامت و شقت الصفوف و اتكأت على عكاز و سندت التاني بكوعها و رقصت على شخبط شخابيط.. رقصت و هي في الحالة دي و كلنا عينينا دمعت من التأثر.. البنت مريضة و ماشية على عكازين انما زي أي طفلة عايزة تفرح و تنبسط مع الأطفال.. كانت بتضحك و مبسوطة ان الناس وسعت لها الدايرة و كانوا بيسقفوا لها.. كانت بتقوم و تقعد على عكاز آه بس كانت بتتحرك.. انما اللي شفتها النهاردة دي مستحيل تكون شيماء.. انا قعدت معاها ساعة و معرفتهاش.. مع اني من الناس اللي بتحفظ الوجوه جدا من أول مرة.. انما دي مافيهاش حاجة من شيماء.. النهاردة اللي شفتها دي بنت حزينة كسيرة الخاطر.. خلقها ضيق و مش بتبتسم لما حد يهزر معاها.. خاسة جدا لدرجة النشفان.. عينيها اللي كانت خضرا و بتلمع من الشقاوة و الرغبة في الحياة بريقها انطفى و عين منهم نصف مقفولة.. انا أخدت لها صورة مع الرسمة بتاعتها.. لما هي شافت صورتها قامت بعدتها بإيدها بحزن.. ساعتها ما كنتش فاهمة.. ما كتش عارفة أد ايه هي كانت جميلة و كلها حيوية.. ما صدقتش ان هي دي شيماء اللي صورتها فيديو بموبايلي السنة اللي فاتت هي هي شيماء اللي قصادي دي إلا لما جبت الدكتورة هبة من إيدها و وريتهالها.. هي دي يا هبة؟ قالت لي هي دي.. و طبعا اتأكدت انها هي لما افتكرت مامتها.. أصل شيماء شبه مامتها اوي.. أقصد كانت شبهها لما كانت شيماء بتاعة السنة اللي فاتت.

اللي نكد علية بأه زيادة هو وقت الدي جي النهاردة.. البنت قاعدة تتفرج على العيال و همه بيطنططوا مع العرايس و يرقصوا على الأغاني و تعيط.. انا كنت عايزة أطلعها فوق في الوقت ده بس مامتها قالت لي هي عايزة تقعد تتفرج.. انما انا طبعا اختفيت ساعتها من المكان خالص لحد ما الدي جيه خلص.. لسه فاكراها كويس و هي بترقص بالعكاز و كإنه امبارح.. و النهاردة هي نفسها تقوم معاهم بس مش قادرة.

معلش يا جماعة نكدت عليكوا، انما الموضوع موجع اوي و النهاردة حسيت أد ايه احنا متمرمغين في نعم ربنا و مش حاسين.. أد ايه احنا متدلعين اوي و مرفهين اوي و ممكن حاجة هايفة تنكد علينا عيشتا و مهموين اوي بهموم شخصية تبان فعلا عبيطة قدام اللي شفته النهاردة.

يا رب اللهم لا تحرمنا من نعمتك..
يا رب اللهم ارزقنا شكر نعمتك..
اللهم اعف عن شيماء و اللي زيها
اللهم اعف عن شيماء
اللهم اعف عن شيماء
اللهم اعف عن شيماء.

ده الموقف يا دنتست.. حصل من كام شهر.. معرفش حاجة عن شيماء.. خايفة اسأل لا يقولوا لي ماتت.

المشاركة الأصلية كتبت بواسطة muslimah_dentist

شايفة بلدنا رايحة على فين؟

رايحة على طريق كله خير لو أهلها قاموا بيها.. و رايحة في طريق اللي يروح ما يرجعش لو أهلها كل واحد فيهم قال و انا مالي.

مش قادرة أعصر دماغى أكتر من كدة ....كفاية عليكى الأسئلة ديه

كفاية.. ما تعصريهاش أكتر من كده

نورتيني يا دينتست :)

المشاركة الأصلية كتبت بواسطة Chicco

علا باشا غنية عن التعريف طبعا و ما شاء الله زعيمة الحركة النسائية في المنتدى و ملكة النوستالجيا بدون منازع

و كمان خلتني زعيمة؟ هو انا ناقصة تهم يا دكتور؟

- لماذا دائما الحنين إلي الماضي ؟

مش عارفة و الله يا هشام.. فعلا مش عارفة.. باحن لماضي عشته في فترة الثمانينات في الطفولة و سعادتها، و باحن لأيام التسعينات و سنوات الدراسة في الكلية.. و باحن لماضي ماعشتوش، أيام الطرابيش و المنشة و الموظف اللي كان له شنة و رنة و البيه و الباشا و الأمرا و الملك و البرلمان اللي كانت له شنة و رنة و شوارع القاهرة الفاضية النضيفة المنظمة و الشجر اللي مالي الشوارع و الخضرة و الناس الرايقة اللي كانت همومها بالتأكيد مافيهاش هاروح البيت النهاردة في ساعة و لا ساعتين زي امبارح؟ و يا ترى الطريق هايبقى عامل ازاي؟ و سواقين الميكروباص النهاردة هاعرف اسلم من أذاهم و لا هاينوبني من بلطجتهم جانب؟ طيب لو ركبت مواصلات هاتبهدل اوي زي الأسبوع اللي فات و لا هاتبهدل أقل؟ و لا هاتبهدل بطريقة تانية مبتكرة عن كل مرة؟ و قس على ده الكثير من همومهم و همومنا.. مش عارفة ليه باحس ان دنيتهم كانت أحلى.. لأ، هي أهدى.. بس همه أكيد ما كانوش أسعد مننا، لإن كل واحد بياخد حظه في الحياة من السعادة و الشقاء بالتساوي، ربنا مش بيظلم حد و على هذا الأساس فمايصحش التفكير انهم أسعد حظا مننا انهم عاشوا في العصر الماضي و احنا عشنا في هذا العصر. ساعات بافكر في كلمة الماضي الجميل و باسأل نفسي ليه جميل؟ يمكن عشان عدى؟ طيب اكيد هناك في حاضرنا ماهو جميل برضه، بس احنا نرضى :)

- كيف تصفين الحاضر ؟

ممكن يكون فعلا أحلى من أي ماضي تخيلناه حلو أو تخليناه أحلى من حاضرنا.. ممكن جدا :)

- ما هو احساسك عن المستقبل ؟

حاسة انه هايبقى أحلى و أحلى بإذن الله، و حتى لو ماكانش، آديني عشت 33 سنة من حياتي في نعم متدفقة، و لو ربنا أراد يبتليني البقية الباقية من عمري يبقى له الحمد و المنة و راضية تماما بكل اللي يقدره لي.

- لو فرضنا امكانية رجوعك بالزمن أي الفترات تختاري للعيش في القرن العشرين ؟ و اذا رجعنا بالزمن أكثر أي الفترات تختارينها ؟

لما شفت مسلسل الملك فاروق حبيت أعيش الفترة اللي هو حكم فيها، يعني من منتصف الثلاثينات كده لحد سنة 50، و باقول لحد سنة 50 بس عشان هو بدء من سنة 50 بدأ يفقد السيطرة تماما و ياخد قرارات مش في محلها نهائي. يمكن ده يكون تصور سطحي للفترة اللي باتمنى اني كنت اعيش فيها، بس أهي على الأقل نوع من الحياة شفته موثق و لو على شاشة التيليفزيون، يعني فترة عندي بيها خلفية و أقدر أقول انا عايزة اعيش في الفترة دي و لا لأ. طبعا مش كل فئات الشعب كانوا عايشين في عز و نعيم، عشان كده لو اخترت أنتمي لأنهي طبقة وقتها هاختار طبقة الموظفين، كان ليهم احترامهم و درجتهم و مرتب أيامها كان يفتح بيت محترم و يجيب شغالة كمان (راجع فيلم معلهش يا زهر و فيلم في بيتنا رجل و لا تراجع فيلم أم العروسة)

- كيف ترين وضع المرأه المصرية حاليا ؟

مافيش وضع للمرأة في مصر زي التانية، في نساء واخدين حقهم كويس اوي برضا الطرف الآخر او غصب عنه و فيه نساء المجتمع حاطط عليهم ضغوط من جميع النواحي و الله وحده أعلم الفئة دي لو انفجرت هايعملوا ايه.

- ماذا تتمنين للمرأة المصرية في المستقبل ؟

يسيبوها في حالها
للأسف المرأة بتتعامل على انها فاقدة الأهلية و غير مسئولة عن قرارتها الشخصية و محتاجة دايما حد ياخد لها قراراتها و ده ينطبق على الأهل و الناس اللي في محيط معارف المرأة و الحقوقيين أيضا ممن يبحثون عن حقوق المرأة برضه عاملين عليها حصار و بيفرضوا عليها قناعاتهم بدون داعي.

- اذا اتيحت لعلا فرصة السفر خارج مصر ... أي البلاد تختارين ...يسمح باختيارات متعددة

الأول ازور مدينة رسول الله صلى الله عليه و سلم و ربنا يكتب لي عمرة و بعديني اروح اي بلد تاني مش هادقق :)
بس عموما أحب أزور بلد ذات حضارة، يعني أي بلد ليها تاريخ و ده يشمل بعض الدول الأوروبية زي فرنسا و إيطاليا و انجلترا.

بجد يا علا باشا أنا و مسز شيكو تشرفنا و سعدنا بمعرفة شخصية زيك ربنا يصلح لك أمرك كله و يوفقك إلي ما يحب و يرضى دائما

بجد بجد يا هشام انا اللي شرفت بمعرفة ناس زيكوا و كان نفسي فعلا أشوفكوا و انتوا في مصر.. انما زي ما بيقولوا، اللقا نصيب :)

المشاركة الأصلية كتبت بواسطة bee

باك يا علا ...

يا مراحب :)

المشروب المفضل عند علا .. بما انك شغاله شرب بعد كل إجابة :)

الشاي باللبن عندي قيمة في حد ذاته
باحب كمان مشروب الشيكولاتة الساخنة، طبعا في الشتا بس :)
الشاي بأه ده مشروب كل زمان و مكان، بس هي كباية شاي واحدة في اليوم بس :)

رأيك في السجاير إيه ؟؟ وهل تعاملك او انطباعك بيختلف عن الشخص المدخن ؟

باكره التدخين.. بانفر من شكل السيجارة في إيد الرجل او المرأة.. باتنرفز جدا لما حد يدخن في مكان مغلق و بابقى لازم أعمل اي حاجة عشان الوضع ده ما يستمرش.. لحد فترة قريبة كنت لما اتكلم مع حد و ابدأ أكون رأي إيجابي عنه، يتغير الرأي ده عندي 180 درجة لما يطلع سيجارة او اعرف انه بيدخن.. انما دلوقتي اتعلمت ما احكمش على حد من خلال حاجة زي دي و افتكرت ان عبد الوهاب مطاوع رحمه الله، الإنسان الرائع ده كان مدخن، و مدخن شره كمان، و بدأت مؤخرا الاحتكاك بناس في منتهى الاحترام و مدخنين و أصبحت النقطة دي لا تنقص من احترامي لهم شيئا، كل اللي بيفضل نوع من الزعل على الناس المحترمة الكويسة اوي دي انهم يبقوا بيعملوا حاجة حرام زي التدخين من آن لآخر.

مكان علا المفضل وقت الهروب من نفسها ؟؟

مافيش سبب يخليني أهرب من نفسي، انا ممكن اهرب من الناس.. ساعات ضغوط الحياة اليومية في الشغل و الخروج من البيت كل يوم و الاحتكاك بالناس في المواصلات سابقا و في الطريق حاليا و الدوشة و الصوت العالي، كل ده أحيانا بيوصلني لحالة اني مش عايزة أسمع صوت.. مش عايزة حد يكلمني و لا يدخل علية أوضتي.. محتاجة شوية هدووووووووووووووء

علا قالت لنفسها برافو عليكي امته ؟؟

كل لما أغصب نفسي على إني اعمل حاجة بتكون دي آخر حاجة عايزة اعملها في الدنيا.. باعملها عشان ماما تنبسط، عشان هاخدم بيها حد، أو ببساطة عشان المفروض اعملها، لما باتغلب على دي عندي بانبسط بنفسي أوي :k32:

وقالت ايه الي عملتيه ده ؟؟

لما أزعل حد مني بدون قصد

علا بتعتذر ببوكيه ورد ولا هدية قيمة ؟؟

باعتذر بإحساسي :)
لما باجي أصالح حد زعلان مني باكون صادقة أوي في اعتذاري و في رغبتني انه يسامحني، كفاية ان الطرف الآخر يبص في عينية و انا باعتذر و ساعتها بيسامح من غير أدوات تانية. انا ماكنتش اعرف دي فية لحد ما صحبتي الأنتيم مرة قالتهالي، كانت زعلانة مني في حاجة و انا بصالحها مسكت أيدها جامد و ضغط عليهم جامد و كنت باصة في عينيها أوي، انا طبعا ما كنتش قاصدة ده كتكنيك مصالحة، انما لقيتها بتقول لي بعدها ايه يا بنتي ده؟ ده انتي بتصالحي بكل جوارحك و الواحد ما أخدش في إيدك غلوة من كتر الصدق اللي بيشع من عينيكي.

الصوت العالي والغضب من صفاتك ؟؟؟

غضب؟ آه باغضب، دمي حامي و مش باعرف اسكت لما اشوف حاجة غلط.. انما صوت عالي؟ مش عندي أصلا :o
يمكن عشان في بيتنا محدش بيزعق.. مش متعودين على الزعيق.. مش بنزعق لبعضينا و لا بنتكلم بصوت عالي.. عشان كده بانزعج جدا من الصوت العالي و بيتشتت تركيزي بسهولة لو فيه جنبي أي صوت عالي. انما خناق بصوت عالي.. مبعرفش خالص

يوم الاجازة عامل ازاي عندك ؟؟ احكيلنا

نشاط خيري أو زدني او زيارة عائلية لأختي او هي عندنا. لو مافيش اي حاجة من دي بافضل اني أقضي الجمعة في البيت و انطلق بأه يوم السبت، يا اما خروجة مع أصحابي أو اروح سينما انا و أخويا.