الموضوع: حوار من القلب للقلب - الجزء الأول

المشاركة الأصلية كتبت بواسطة MoToRiZeR

مادة " الإجتماعي "

السؤال الأول (إجباري) : ماذا تفعل علا عثمان في الويك إند و إلي أين تحب أن تخرج بعيد عن الشغل و العمل الخيري ؟

موتو باشا.. رفيق سيريونتي الحمرا.. يا هلا و غلا

لو مافيش زدني او روح و مش هاقعد في البيت استرخي باخرج مع أصحابي و أصحابي اللي يتخرج معاهم حاليا عرفتهم برضه عن طريق العمل الخيري بس ممكن نخرج مع بعض نروح الأزهر بارك أو نقعد في نادي الصيد اللي أكتر من حد منهم أعضاء فيه. ممكن بأه زيارت عائلية و دي غالبا بتكون لأختي، انما أحب الخروجات لية هي أي مكان ع النيل أو التمشية في وسط البلد و دي باحب فيها أكون لوحدي عشان باعمل حاجات مجنونة صعب حد يستحملني فيها، بس باكون في أقصى لحظات استمتاعي بالحياة :)

السؤال الثاني (إجباري برضه) : هل تذهب علا عثمان إلي الحفلات الموسيقية ؟ مع الإستشهاد بمثال مما حضرته .

عمرها ما حصلت، مع انها مش مرفوضة بالنسبة لي كمبدأ، انما طبعا مش حفلات موسيقية صاخبة اللي فيها رقص و هرج و مرج، ممكن حفلات دار الأوبرا المصرية، بس برضه مش محمد منير عشان سمعت مساخر بتحصل في حفلاته ماحبش اكون متواجدة في اماكن زي دي.

السؤال الثالث ( ده بقي .. إجباري ) : ماهي نوعية الأفلام التي تفضلها علا عثمان ؟ و هل متفرجة قوية ناقدة متفحصة متوغلة في السينما أم لا ؟ مع ذكر ثلاث أفلام مفضلة عربياَ ، و ثلاثة أخري عالمية .

هو كله ضرب ضرب مافيش شتيمة؟
مافيش سؤال مش إجباري؟

شوف، هو مافيش نوعية معينة من الأفلام، كل حاجة بتبقى على حسب مودي، يعني من حوالي اسبوعين كان مودي اوي اني اشوف فيلم من كلاسيكيات الأدب الانجليزي، باقلب في القنوات لقيت فيلم Sense & Sensibility شغال على MBC2 ساعتها فرحت اوي و قعدت شفته للآخر و فضل سايب في نفسي أثر للبهجة ييجي لأسبوع بعدها.

اما بالنسبة لمتفرجة ناقدة يمكن دراستي للأدب الانجليزي و المواد المتبحرة في الأدب و النقد اللي كنت باخدها خلقت عندي الحس ده. متفرجة ناقدة و مملة في النقد كمان و باتحمس جدا للعمل اللي فيه فكرة و متعوب فيه، و باقرف جدا من العمل الدرامي اللي بيستخفوا فيه بعقول الناس و بيستسهلوا.. دول مش بيقدموا فن و لا يستحقون عناء النقد من أساسه.

أفلام عربية:
1- يوم مر و يوم حلو
2- الزوجة الثانية
3- سلامة في خير (نجيب الريحاني)

أفلام عالمية:
1- فورست جامب
2- جرين مايل
3- إمبراطورية الشمس (ستيفن سبيلبرج)

علل لما يأتي :
- سيريون
- نايل موتورز
-فتيس أوتوماتك

سيريون: لما بدأت أدور على عربية كنت بادور على حاجة هاتشباك ما تكونش صغيرة من جوه و تكون اوتوماتيك (هجاوب على دي في إجابة السؤال بتاعه) و كانت عجباني الهيونداي أتوس و بعدين صرفت نظر عنها عشان سوء معاملة التوكيل، و بعدين فكرت في البيكانتو، انما لما سألت على أوتوماتيك اجيب ايه نصحوني هنا بإني لو عايزة حاجة اوتوماتيك يبقى أفضل لي أبعد عن الكوري و أجيب يا اما ياباني او ألماني أو فرنساوي، و لما قريت مرة مقارنة بين السيريون و البيكانتو عجبتني السيريون اوي و دخلت قسم الدايهاتسو و قريت كل ما يخص السيريون و لقيت ان مافيش واحد مالك للعربية مش بيشكر فيها و واقع في غرامها كمان، فتحمست ليها جدا و كنت كل يوم تقريبا لمدة شهور أدخل النت ألم كل ما يمت للسيريون بصلة من صور و فيديوهات و لما أشوفها في الشارع قلبي يتخطف مني خطف كده لما تعدي.. يعني من الآخر وقعت في غرامها رسمي

نايل موتورز: مكان محترم بأعضاءه و إدارته و فيه دفء الأسرة و ناس باحس انهم اخواتي بجد و انا مش عايزة مكان ع النت أقضي فيه الساعات الطوال يكون فيه من الصفات أكتر من كده :)

فتيس أوتوماتيك: جربت المانيوال و ما ارتحتش فيه، طريقي من و إلى الشغل رخم و فيه توقفات كتير، مش طالبة علة في الدبرياج و النقل كل شوية، كفاية زحمة الطريق و قرفه و غتاتة البشر في الشوارع و استعجالهم المجنون عشان يوصولوا بيوتهم عشان يناموا.

مادة "سيريون"

أحلى مادة دي

السؤال الأول (مش محتاج أقول إجباري) : إيه كان إحساسك أول مرة شفتي السيريون، و أول مرة ركبتي السيريون، و ساعة ما تعاقدتي عليها، و ساعة ما ركبتي السيريون الخاصة بيكي بتاعتك، و ساعة ما الإكصدام إتخبط ؟

أول مرة شفت السيريون على الحقيقة، في الشارع يعني مش صورة ع النت كان في المهندسين، و انا مروحة شفتها راكنة في شارع كنت باعدي منه كل يوم، و كنت بافضل ملووحة عليها و انا ماشية لحد ما يبقى خلاص لو زودت عن كده هامشي بضهري
أول مرة ركبتها كانت في المعرض و اتمنيت لو آخد بيها لفة
ساعة ما اتعاقدت عليها ما كنتش مصدقة و لا مستوعبة.
أول مرة ركبت عربيتي السيريون كنت خايفة.. خايفة منها و خايفة عليها.
ساعة ما الإكصدام اتخبط كنت زعلانة عليها و فضلت كده لحد ما الناس هنا طمنوني انها بسيطة ان شاء الله و الحالة مش محتاجة عملية و لا حاجة

السؤال الثاني : بماذا تشعر علا عثمان و هي تقود السيريون الحمراء في شوارع القاهرة؟

بالتميز

السؤال الثالث : بماذا تشعر علا عثمان عندما يقود أحد غيرها السيريون بتاعتها ؟

باكتشف فيها إمكانيا معرفش انها فيها أصلا

السؤال الرابع : أين كانت أول خروجة بالسيريون ؟

للمرور عشان الترخيص

السؤال الخامس : ماهو مدي إعجاب المقربين من علا عثمان بالسيريون ؟

همه مالهمش اختيار أساسا، عجبتهم من كتر هوستي بيها

موتو.. كفااااااااااااااية الخمسين سؤال اللي فوق دول خليك حلو

المشاركة الأصلية كتبت بواسطة muslimah_dentist

بصراحة يا علا أنا مش بقالى كتير فى المنتدى بس احترمت كل كتاباتك فى المنتدى و بما انى خيبة فى الأسئلة فسأكتفى بالمتابعة بانسجااااااااااااااام

و انا عن نفسي سعيدة بانسجامك يا مسلمة و يا رب أطلع في الآخر باقول كلام مفيد