الموضوع: حوار من القلب للقلب - الجزء الأول

المشاركة الأصلية كتبت بواسطة bee

الف شكر على الردود الجميلة يا رنا ..
واتمنى مكنش تقلت عليكي ههههههه

العفو يا Bee أنا تحت أمركم
قال تقلت عليا قال
متقولش كده انا اتشرفت بأني جاوبت على أسئلة حضرتك يافندم

بس ليا ملاحظة (رأي شخصي)
انا اي حد ممكن يبقى صاحبي .. زبون عندي في المكتب .. صاحب دراسة .. صاحب شغل ..
لكن الصديق لاااااااااااا
الاصدقاء يتعدوا ع الصوابع ..

أاااااااه تصدق فعلا المفروض يبقي الفرق كده منطقي اكتر
يبقي انا بقي عكست المعنيين في اجابتي
لكن فعلا هو ده اللي انا اقصده أن الصديق أقوي من الصاحب فعلا بس واضح إني اتلخبطت
شكلي هنجت من كتر الأسئلة

حبيت اوضح وجهة نظري ..
عموما ميرسي على التوضيح والتصحيح يافندم وانا متفقة مع حضرتك في وجهة نظرك وشكرا ليكي مرة تانيه ومع ان التتر منزلش بس كفاية كده
نورتي البرنامج

العفو يافندم دا انا اللي بشكرك على الأسئلة القوية دي

المشاركة الأصلية كتبت بواسطة M.Mokhtar

مقابلة جميلة جدا

شكرا ليكى يا رنا
وشكرا لكل الاعضاء اللى شاركوا بأسألة الجميلة جدا

العفو ياأستاذ محمد وميرسي جدا على ذوقك

فكرة ممتازة
يارييت تحطلها بعض النقاط الرئيسية في الحوار
عشان المضيف يحضرلها كويس

يااااااااه :10D5C8~1107:
بشمهندس سبعاوي مرة واحدة هو اللي مشرفني بأسئلته
طبعا هاجاوب رغم اني كنت قفلت الحلقة وانتزعت التتر من فم الأسد ونزلته بالعافية إلا إني هاعيد فتح الحلقة تاني عشان خاطر حضرتك بس

المشاركة الأصلية كتبت بواسطة sab3aawy

الاخت العزيزة رنا -بيردى سابقا
برغم عدم قدرتى على متابعة المنتدى نهائيا طوال الفترة السابقة لانشغالى الشديد فى العمل، لكن مقدرش افوت الفرصة دى انى اسألك كام سؤال كدة انا واثق ان رأيك فيهم هيضيف الكثير للمحتوى الحوارى للموضوع الشيق ده:

1- عايزك تقولى لى رأيك فى الجملة دى: "انا عارف مصلحتك اكتر منك"

أعتقد ان الجملة دي مش واقعية بالمرة
إلا في حالة معينة وهي إن الشخص اللي متوجهله النصيحة يكون غير قادر عقلياً وذهنياً على إدارة شئونه بنفسه ودي ممكن تكون في مرحلة الطفولة أو المراهقة مثلا لإننا في المرحلة دي بنسمع الجملة دي كتير من أبائنا وأمهاتنا وساعات بيكون عندهم حق من منطلق إنهم مرَوا بنفس المرحلة دي قبلنا وبيقولوها من باب الإسترشاد بخبرات الأخرين السابقة.
لكن تتقال لشخص ناضج عقلياً ونفسياً صعب
لإنه المفروض وصل لمرحلة يعرف مصلحته فين أكثر من الأخرين هو أدرى بشئون نفسه ومحدش هايخاف عليه أكتر من نفسه.

2- ايه رايك فى وضع بلدنا ازاء الثقافات المستوردة من مجتمعات اخرى، وهل الحلم فى مستقبل افضل لبلدنا يتمثل فى نسيان ماضينا والتمسك بثقافات الأخرين التى يرى البعض انها افضل مما لدينا، ام التمسك بهويتنا وثقافتنا، ام خلق مزيج من هذا وذاك
طبعاً الموضوع ده سبب ازدواجية في مفاهيم كتيرة اوي نتيجة لإستيراد مفاهيم اجنبية لا تتماشي مع دينا ولا عاداتنا ولا تقاليدنا وخللى الناس مبقتش عارفة الصح من الغلط فين وايه العيب من اللي مش عيب
للأسف احنا اخدنا كل ماهو اجنبي وغربي وطبقناه بدون تفكير وبدون ماننتقي منه اللي في صالحنا أو يناسبنا وبس وده اللي خللي حالنا وصل للمستوى ده بقينا بالضبط زي اللي رقصوا على السلم لا اللي فوق شافوهم ولا اللي تحت سمعوهم
لااحنا عارفين نبقي متقدمين ومتحضرين زي الغرب
ولا طايلين نرجع نتمسك بعاداتنا وتقاليدنا الأصيلة وطباعنا اللي كانت بتميزنا عن دول كتيرة
للأسف اتحول مجتمعنا لمجرد مسخ مشوه الهوية
طبعاً لو احنا بنفكر صح المفروض ناخد منهم مايتناسب معانا ومع دينا وعاداتنا وطبعانا وبس من غير ماننسي اصلنا وهويتنا وثقافتنا يعني المفروض يكون في مزيج مابين الإتنين بدون التأثير السلبي علينا كعرب ومصريين يعني لإنا مينفعش أصلا ننسي ماضينا تماماً خصوصا إنه مشرَف مش ماضي نستحي منه واخيراً
"من لا ماضي له ليس له حاضر ولا مستقبل"

3-كواحدة من الفتيات المتعلمات الذين يقمن بدورهن فى مجال العمل وتقديم قيمة مضافة للمجتمع، شايفة ايه اللى لسة المراة لم تحصل عليه من حقوقها فى هذا المجتمع

هي المرأة تقريباً حصلت على كل حقوقها لكن حصلت عليها قهراً وليس برضا الرجل وده نتيجة عدم إقتناع بعض الرجال بإن المرأة ليست كائن أقل منه في التصنيف وإنها تقدر تدير شئون كثيرة بنفسها وتكون مسئولة عن امور تخصها وتخص بيتها وإنها كائن قادر على التفكير والإبداع وله الحق في إبداء رأيه زيه بالضبط.
ولنا في امهات المؤمنين اسوة حسنة الرسول عليه الصلاة والسلام كان بيستشير زوجاته في بعض الأمور وطبعا عارفين المشورة الشهيرة لأم سلمة رضي الله عنها في امر المسلمين في الحديبية.
على عكس مايردده بعض الناس ويقولوا "شاوروهن وخالفوهن"
وعلى فكرة الحديث ده موضوع وغير صحيح بالمرة ولم يأتي على لسان الرسول صلي الله عليه وسلم أبداً.

وطبعاً نتيجة ممارسة بعض جمعيات حقوق المرأة نشاطها بطريقة جعلت الموضوع يبدو وكإنه صراع بين الرجل والمرأة أو خناقة أثر بالسلب على المجتمع الذكوري لدرجة إنه أساء فهم حقوق المرأة وتخيل إنها مجرد ند أو عدو ليه بيحاول يغتصب منه حقوق مش بتاعته وليس مخلوق مثله ربنا خلقه عشان يسانده في مهام الحياة ومسئولياتها لكن تضخيم الموضوع بالشكل ده خللى بعض الرجالة عايزة تنتقم
يعني مثلا يقولك مش هما بيطالبوا بالمساواة خلاص خليها تتعب وتتقرف في عيشتها ونضغط عليها عشان تقول حقي برقبتي وتعرف انها مينفعش تعمل حاجة في عيشتها خالص بدون الراجل وابتدي الموضوع يوصل لمرحلة الإستغلال من بعض الرجال يعني في رجالة بتشغل زوجاتها لمجرد إنها بتطالب بالمساواة ويقولها خلاص يبقي تشاركي في مصروف البيت غصب عنك والا مش هاتشتغلي (رغم إن الدين مش بيقول كده خالص) وفي رجالة بتمنع زوجاتها من حاجات ربنا اباحها عشان يكون معاند لموضوع حقوق المرأة وحرية المرأة دي وفاكر إنه بكده بيسترد كرامته اللي هو شايف إنها بقت مهدورة بسبب إن المرأة بقالها حقوق وكمان الموضوع دخل في عند وكل مشكلة تحصل لبنت أو ست تلاقي بعض الرجال بتتخلي عن مساعدتها ويقولوا وانا مالي مش بيطالبوا بحقوقهم وحريتهم خلاص خليهم يتحملوا النتيجة خليهم يشربوا بقي .
ونسيوا إن البنت أو الست اللي بيتكلموا عنها بمنتهي القسوة دي هي الأم والأخت والزوجة والإبنة (رغم إن الزوجة ساعات بتُستني من التعاطف عند بعض الأزواج المعقدين أصلا من موضوع المرأة ده)
لكن الراجل العاقل الناضج لو فكر شوية ودرس دينه كويس هايلاقي إن المرأة ليها حقوق زي ماعليها واجبات وهو برده عليه حقوق زي ماليه واجبات
وإن الإتنين مكلفين بتعمير الأرض وإنهم يتحابوا ويكون في بينهم مودة ورحمة وليس صراع أبدي.

4- لما ان شاء الله ربنا يكرمك بزوج عن قريب، ايه الصفات اللى انتى شايفاها سائدة فى ازواج اليومين دول ومتحبيش انها تكون موجودة فى شريك حياتك

1-الجهل بأمور الدين وتأويل بعضها ليخدم مصالحه الشخصية فقط
2-التسللللللللللط في الرأي سواء صح أو غلط (أنا شايفة إنها طالما مش حاجة حرام يبقي من حقي يسمع لرأيي ويناقشني وبعدين يقبله أو يرفضه مع توضيح الأسباب مش هو كده وخلاص وهاتنفذيه غصب عنك)
3- الأنانية في الحقوق بمعني أنه اهم حاجة عنده نفسه وبس واحتياجاته وبس ، بغض النظر بقي عن ظروف الطرف التاني وهل هو برده مستوفي إحتياجاته ولا لأ
4- عدم إحترام الكلمة أو الوفاء بالوعد: بمعني إن طالما قاللي كلمه فهو ملزم ينفذها وان تعذر التنفيذ فالإعتذار واجب يعني مثلا هاتصل بيكي النهاردة الساعة 9 باليل
وتلاقيه لحد الساعة 9 تاني يوم ولا اسبوع حتى مفيش اتصال ولا حتى رسالة اعتذار ( ممكن فعلا يكون في ظروف منعت الإتصال لكن الإعتذار شئ اساسي في الحالة دي)
5- سوء الظن: افتراض الإحتمال السئ دايماً وعدم إعطاء الطرف الأخر الفرصة لتبرير موقفه أو فهم حقيقة الأمر
6- السطحية في التفكير وضيق الأفق وعدم إعطاء كل أمر من أمور الحياة حقه في التحليل
دول اللي فاكراهم دلوقتي

ياللا الامتحان فى مستوى الطالب المتوسط اهه وزمن الاجابة ربع ساعة بعد كدة هنشد الورق، مع تمنياتنا بالتوفيق

معلش أسفة على التأخير في الرد بس كان عندي شغل كتير الصبح وأول ماخلصت رديت اهوه
وميرسي جدا ياإستاذ سبعاوي على الكلام الجميل في حقي ده