الموضوع: لكل مشكله و ليها حل ادخل و شارك

ياريت اى حد يكون مختص فى كهرباء السيارات يفيدنا فى الموضوع دة . لانى بصراحه شايف ان موضوع اللمبه دة هو مجرد اختبار للدينامو فقط خاصه ان حضرتك ذكرت ان العيب هو عدم إضائه لمبه الدينامو وليس عدم اغلاق إضائتها مع دوران المحرك . ثانيا الكهربائى قال لحضرتك تكمل علشان لمبه الاختبار لما تنطفئ دة معناة ان الدينامو له خرج وصل مقدارة انه يقاوم فولت البطاريه ( يعنى الدينامو مش قاطع خالص ) شغال و اكيد هيشحن مع ذيادة عدد لفات الموتور خاصه فى السفر .
لكن بصراحه موضوع اللمبه تشتغل مقاومه و فيوز دة كلام غير صحيح من وجهه نظرى وخاصه ان اللمبه تتحرق لما يعلى عليها الفولت مش الامبير .
وشكرا جزيلا لصاحب الموضوع . و أسف انى عارضته فى الرأى بس دى وجهات نظر ( الاختلاف فى الرأى لا يفسد للود قضيه ) .

الاخ الكريم

اود ان اشكرك علي مشاركتك الجميله و لا احب انك تبدي الاسف مطلقا علي معارضتك لاي راي لان الموضوع للحوار و التجربة التي نمر بها في اي مشكلة قد تحتمل الخطأ او الصواب لكن تعالي نناقش كل نقطه و انا ارحب بمعارضة سيادتك في اي وجه نظر

1- ما معني اختبار للدينامو ؟؟
الاختبار هو معرفه الشئ يعمل او لا يعمل صح ؟؟؟
اذا متفقين علي انها لمبه اختبار و الدينامو و الحمد لله قد اجتاز الاختبار يعني شغال و الدليل ان اللمبه انطفئت

طيب لما هو شغال يبقي اكيد بيطلع شحن - يعني فولت و امبير - و لانه موصول بجسم السياره يبقي عندنا طرف تاني اللي هو الموجب و بيتوصل عن طريق اللمبه مباشرة للبطارية يعني معني كده انه بيشحن

و سبق و ان شرحت ان في سياره الانشيا امبير زي عداد السرعه مقسم بارقام ( 0 - 12 - 15 ) ليبين مستوي الشحن و كان الحمد لله طوال الـ 1300 كيلو ثابت علي 12 فولت حتي مع الاضائة الليليه .
يعني اكيد بيشحن و مستوي الشحن ثابت ( بالاضافة الي اني كنت بافحص اللمبة الخضرا بتاعة البطارية و كانت خضرا علي طول.

طيب نيجي لنقطه مهمه حضرتك ذكرتها ان اللمبه مش بتنور في الطابلوه اصلا يعني بدون حتي دوران المحرك و دا معناه ان مفيش توصيل بين الطرف الموجب للدينامو و البطارية و كمان لما ادور العربيه الاقي مؤشر الشحن قرب من الصفر مما يعني انه لا يوجد شحن و السياره تعمل علي البطارية فقط .

فيه بقي حاجه مهمه كمان حضرتك قولتها : ( ثانيا الكهربائى قال لحضرتك تكمل علشان لمبه الاختبار لما تنطفئ دة معناة ان الدينامو له خرج وصل مقدارة انه يقاوم فولت البطاريه )
هانفترض وضعيه تانيه و هي عمل نفس التوصيه بدون لمبه - ماذا سيحدث ؟؟؟
شرز او قفله او ربما احتراق في اجزاء من الضفيرة طب نفكر ليه لمبه و ليه بتنور اصلا ؟؟

اللمبه بتنور في حاله واحده انها تاخد سالب و موجب غير كده مستحيل تنور طبعا

يبقي معتي انها تنطفي لما بتدور المحرك يبقي معناه انها مش واخده غير تيار واحد و هو طبعا الموجب
مما يدل ايضا علي ان الكتاوت الخاصة بالدينامو تعمل و الا لن تنطفئ اللمبة .

طب لو الكتاوت ايه لازمتها ؟؟ تنظيم الفولت و الامبير لما يحس ان البطارية مش محتاجه بيفصل عنها الدينامو صح و الا غلط ؟؟؟ - طيب هانفترض بقي ان الفولت او الامبير علي مره واحد نتيجه هبوط حاد في اداء الكتاوت يعني بيقي يطلع 15 فولت مثلا هل تعتقد ان اللمبه ستتاثر ؟؟؟
اعتقد عقليا لا - لكن علميا اعتقد اه هاتتاثر - طب ايه الدليل العلمي علي كده

لو حضرتك جبت افوميتر و قيست اي لمبه علي اختبار المقاومات - من المؤكد انك هتلاقي كل لمبه و ليها مقاومه للتيار تختلف من واحده لاخري - طيب اي مقاومه ليها حد اقصي و بعدين تتحرق و دا اللي انا متوقعه لو زاد الشحن - عشان كده انا قولت انها علي ما اعتقد انها تعمل كفيوز

( خاصه ان اللمبه تتحرق لما يعلى عليها الفولت مش الامبير )

هنا خطا في كلام حضرتك - ليه بقي ؟؟؟ - لان احنا اتفقنا في اول الكلام ان بعد انطفاء اللمبه و دوران المحرك - هنا لم تعد تعمل كلمبه مطلقا و الدليل انها مش منورة و اصبحت مجرد موصل للموجب و تحولت بشكل كامل الي سلك توصيل ذو مقاومه .

كمان فيه حاجه هات لمبه 12 فولت من لعب الاطفال و شغلها علي بطارية السياره و شاهد ماذا سيحدث لها - انا معاك ان الاحتمال الاكبر لاحتراق اللمبه هو علو التيار لكن احب اضيف ان اللمبات بتسخن نتيجه ارتفاع الامبير و جرب كمان تجيب لمبه السيارة و شغلها علي 12 فولت من محول ذو نصف امبير و لاحظ درجه السخونه في الحالتين .

و هاتشتغل فيوز لانها مقاومة ليس الا .

عموما كل ما سبق هو اجتهادات خاصة تحتمل الصواب او الخطأ

و اشكر كل من شارك و سيشارك

الاخ الفاضل خالد
اولا : شاكر ليك حسن اخلاقك و تقبلك للنقد وهو شئ اصبح مفتقد فى هذا المجتمع وهو مايدل على شخصيه محترمه وذات خلق عالى .
وثانيا : نفسى فعلا ان يقوم بالرد مهندس كهرباء او مهندس متخصص فى السيارات ويقوم بشرح كامل دائرة الشحن . خاصه ان الواحد دلوقتى مش فاكر هو أكل ايه امبارح ( الزهايمر بقى من الاكل فى الالومنيوم ) .
ثالثا : كويس اننا اتفقنا على انها لمبه اختبار لحاله عمل الدينامو و ان الدينامو إجتاز الاختبار . اى انها لم تكن الاصلاح الفعلى لعطل الدينامو الذى هو عبارة عن تأكل فى الاسلاك . أعتقد بيها او بدونها كان الدينامو هيتصرف نفس التصرف .
ورابعا : هو على حسب معلوماتى وخبرتى ( مهندس ميكانيكا باور ( غلايات ) واصلا خريج صنايع قسم سيارات ) فإن اللمبه تتحرق لما يعلى عليها الفولت مش الامبير لا هى هتسحب الامبير اللى محتاجاة فقط والدليل على كدة انك ممكن توصل نفس هذة اللمبه على البطاريه مباشرة بكامل امبيرها والنتيجه استمرار إضاءة اللمبه حتى نفاذ شحن البطاريه .
خامسا : انا بنصح اى حد ( وطبعا باب النجار مخلع ) بإن لما بطاريه عربيته تتلف و هيشترى بطاريه بأنه يجيب بطاريه دييب سايكل Deep cycle من أى نوع ( بدون ذكر انواع علشان ما يبقاش إعلان ) ودى بأذن الله لو مسافر السعوديه بالعربيه والدنامو قاطع خالص بردة هتوصل وهتشغل النور والكاسيت وكل حاجه . هى بس غاليه شويه لا شويتين .
وشكرا جزيلا .

الاخ الكريم / م. عمرو

اولا : احب اشكر لسيادتك ذوقك الرفيع و الذي ان دل علي شئ فسوف يدل علي تربيه عاليه و اخلاق ما شاء الله عليها .

ثانيا : و انا ايضا و الله نفسي يكون فيه مكان للمنتدي يكون فيه شرح لاجزاء مهمه في السيارة منها دائرة الشحن و غيرها طبعا لكن علي وعد باني سوف ابحث مع عمو الجوجل عن مثل تلك الامور .
و بعدين يا باشا انت لسه شباب علي الزهايمر دا ( بعد الشر عليك طبعأ )

ثالثا : و علي فرض الاتفاق علي انها لمبه اختبار - اتفق مع سيادتك انها ليست الاصلاح الفعلي و لكن كما ذكرت في اول مشاركه هي مجرد حل مؤقت لحين الذهاب الي دتكور الانف و الاذن و الحنجرة .
لكن هل تعتقد انه بدون هذا الكوبري ( االمبه ) هل يمكن ان يعمل الدينامو و البطاريه تشحن ؟؟
بل اعتقد انه سيحدث اسوء من ذلك لو انا لم اوصل هذا الكوبري ( احتراق الكتاوت و هو مالا يحمد عقباه )

رابعا : مقدرش اعافر و اناقر في موضوع الامبير و الفولت لاني محتاج راي خبير كهربائي و لحين الفت في هذا الموضوع اتفق معاك لحين ظهور العكس او اثبات كلامك .

خامسا : نصيحه ممتازة طبعا لكن علي المستوي الاقتصادي الحالي اعتقد ان معظم ملاك السيارات بيفكروا في شراء عجل او اسكوتر .

سادسا و دا بقي الاهم :

كل عام و سيادتك و كل الاعضاء بخير

المشكله التانيه :-

و انت ماشي في الطريق علي باب الله لا بيك و لا عليك

امبير الحرارة يقفز للتسعين تبصله باستغراب شويه

يتحداك و يكمل المشوار و متجه للـ 100

قلبك يدق و الاعصاب تسيب هاتعمل ايه دي مصيبه !!!!


ننتظر الاجابات و بلاش نبص في ورقة اللي جنبك

بعض الاسباب هي:

1. الماية ناقصة من غير اعراض تانية وطبعا قبل ما تشيك لازم تركن و تبرد الموتور الأول كويس و بعدين تدور و تزود و اوعي تزود مياة و انت مبطل علشان العربية ما تجبش وش سلندر.
2. في حالات كتيرة بيكون السبب وصلة خرطوم كاوتش مقطوعة من مكان الرباط و لو الخرطوم ابن حلال مش غلس فحضرتك بتبطل الموتور و تسيبه يبرد شوية و بعدين بتاكل من الخرطوم العقلة اللي فيها قطع بالكتر أو بنسة و بعدين تربط الجوان و تزود مية و انت مدور و تشوف لسة فيه تسريب و لا لأ.
3. ممكن المروحة تكون مفككوكة أو ترموستات الكوعة مبيفتحش و دا نادر يبقي اما تطلب ونش أو تسوق علي مراحل (اركن-برد-دور-اركن و هكذا) علشان العربية متسخنش منك لحد أقرب ميكانيكى.

و شكرا لأحياء الموضوع و نفسى رجالة فيات برضه تشارك.

الاخ الكريم أ / ياسين
اود اولا ان اشكر سيادتك علي شكرك لاعاد فتح الموضوع و الذي اعتقد انه من المفترض ان يكون من اكثر المواضيع سخونه نظرا لما قد يحتوي علي عديد من المشاكل الشخصيه التي تقابلنا و اضطررنا لحلها باي وسيله و بذلك سيكون المضوع شبه مرجع لاعطال خارجه عن الارادة و كيف يمكن التصرف فيها

ثانيا : انا مع سيادتك في كل كلمه حضرتك ذكرتها و بما ان سيادتك تقريبا جيبت كل الاحتمالات تقريبا و ربما ينقصنا احتمال آخر ربما يكون بعيد و هو ان طلمبه الميه قد توقفت او اصابها عطل ما او حتي بتكون بتسرب
لكن خلينا نتناول كل احتمال و محاولة علاجه

و اسمحلي اقتبس من كلام سيادتك الاتي :

1- وطبعا قبل ما تشيك لازم تركن و تبرد الموتور الأول كويس
( تتراوح الفترة الزمنيه ما بين 10 دقائق الي 20 دقيقة طبقا للصيف او الشتا )


2- في حالات كتيرة بيكون السبب وصلة خرطوم كاوتش مقطوعة من مكان الرباط و لو الخرطوم ابن حلال مش غلس فحضرتك بتبطل الموتور و تسيبه يبرد شوية و بعدين بتاكل من الخرطوم العقلة اللي فيها قطع بالكتر أو بنسة و بعدين تربط الجوان و تزود مية و انت مدور و تشوف لسة فيه تسريب و لا لأ.

( طبعا دا كلام مظبوط جدا و يتم بالكشف عن طريق النظر في الحوض و من اسفل الحوض لاكتشاف اي مصدر تنقيط او مياه تحت الحوض )


3- ممكن المروحة تكون مفككوكة أو ترموستات الكوعة مبيفتحش و دا نادر يبقي اما تطلب ونش أو تسوق علي مراحل (اركن-برد-دور-اركن و هكذا) علشان العربية متسخنش منك لحد أقرب ميكانيكى.

( المروحه تكون مفكوكة اعتقد ان حضرتك تقصد التوصيلات الكهربائية و دا هايتم بالرجوع الي الاسلاك الموصلة للمروحه و هانستبعد ترموستات الكوعه في حاله واحده ان الخرطوم اللي خارج منها يجب بالضرورة ان يكون ابرد من باقي الخراطيم و بكده هايبقي الشك منحصر في الكوعه )


لكن خللينا نضع فرضيه اخري لم تضعها في الحسبان و اعتقد انها بتكون اساس المشكله بنسبه لا تقل عن 60% الي 80% و هي ترموستات الحرارة ( نظرا لعدم وجود قطع غيار متقنة في الوقت الحالي )

اذا ركنا لاقينا فيه ميه في القربه - مفيش وصلات مقطوعه - الكوعه طلعت براءة

نعمل ايه و قلنا قبل كده بلاش نبص في ورقه اللي جنبنا


ننتظر المزيد

أستاذ خالد

انا بشكر حضرتك جدا على ذوقك و روحك الايجابية اللي قلت قوى فى قسم الفيات بعد ما كان من انشط الأقسام.

حاجة تانية احب اضفها لأنها حصلت معايا شخصيا اوعي تحط نوع مياة غير موصى به و علي سبيل المثال مية خضرا بدل الحمرا لأ ده ادي لعمل سدد في مجارى المية في الريداتير و اضطريت اسلكه عند واحد بتاع ريداتير و الحمد لله انها جت علي قد كده.

محدش يسمع كلام حد من بتوع البنزينات الله يكرمكم بتوع الكشف المية و الزيت دول لأنهم ممكن يودوك في داهية عن قصد او جهل يقولك نغسل و يدلقلك أى حاجة و الازازة بكذا.