بتعلم السواقه ومش عارفه انا كده بتحسن ولا ايه ؟

**ام حنين وجودى** · 23-09-2014 09:36 AM

السلام عليكم ورحمة الله

بداية كده انا روحت اتعلم السواقه فى اكاديميه سموحه بالاسكندريه

انا اصلا جبانه واى مواصله بموت منها وممكن لو حسيت ان السواق متهور انزل على طول حتى قبل ماوصل المكان

وقررت وقولت لزوجى نتعلم بس مش حنجيب عربيه الا لما احس انه انا وهو بيقنا الحمد لله اد التكلمه

بس انا بقالى تقريبا ست حصص

حصه ببقه نفسيا كويسه وحصه الدبرياج كل شويه يفصل اذا كنت انا او زوجى

لغاية ماحسيت انى بنام احلم بالدبرياج

انا الى حد ما مش حاسه وخايفه اخد قرار بأنى مش حاعرف واسكت

فيه شوية نقط مضايقانى
انا اولا حكاية الخوف قلت شوية
بس فيه هاجس ان ممكن اعمل حادثه والموت والكلام ده مش ببطل افكر فيه

وحاجه تانية انا اتعودت على المدرب فبالتالى مطمنه لو غلطت خايفه لما اكون لوحدى

حكاية الدبرياج النهارده كويس الحصه اللى جايه الاقيه يلخبط معايا بالتالى احبط

امتى اخد قرار اننا مننفعش نسوق

وايه اللى ممكن اعمله عشان اتخلص من النقط اللى ذكرتها

جزاكم الله كل الخير

**amr011111** · 23-09-2014 10:04 AM

كل الناس تعرف تسوق ان شاء الله
وموضوع فصل الدبرياج بيبقى منه سبب كبير من اللى بيعلم انه مش بيعرف يوصل المعلومه صح لانه غالبا بيبقى تعليمه على أده
المهم علشان العربيه متفصلش منك
فانت اعملى الاتى
دورى العربيه واتأكدى انها على المور قبل ما تدوريها او الاحسن انك تبقى دايسه دبرياج وتدورى العربيه
المهم بعد ما تدورى العربيه هتدوسى دبرياج للاخر وتجيبى الأول وبعدين تدوسى بنزين لحد ما صوت العربيه يعلى عن ما يتدوريها وهى مموره
وتقومى رافعه رجلك من على الدبرياج مش كلها هترفعى رجلك لمسافة التلت مثلا وتبقى دايسه بنزين وماشيه بالعربيه لحد ما تاخد سرعتها ساعتها بقى شيلى رجلك من على الدبرياج
الموضوع ده هيخلى العربيه مش هتفصل منك ان شاء الله
وبعدين مره على مره هتلاقى نفسك بتطلعى بالعربيه بسرعه وبتشيلى رجلك من على الدبرياج علطول من غير ما تثبيتها

حل الموضوع ده لو انت ناويه تجيبى اتوماتيك انك تتعلمى على اتوماتيك ومش هتشيلى هم لا دبرياج ولا فصل العربيه
الحاجه التانيه لما تخدى حصص السواقه وتجيبى عربيه هتطلعى كل يوم الصبح الساعه 6 مثلا فى شوارع فاضيه وتجربى تمشى بالعربيه وتفرملى عند علامات معينه بحيث لو حد فاجئك تبقى متعلمه الاساسيات كويس
وهتطلعى فى شوارع فاضيه صباحاً وساعتها هتلاقى مستواكى بيتسحن واحده واحده
كلنا كنا كده فى الأول
وبالتوفيق

**drcobra** · 23-09-2014 10:14 AM

الخوف شعور طبيعى
السواقة ممارسة يعنى لازم تتعلمى فترة طويلة وبعدين تطلعى بالعربية مع حد فترة طويلة وبعدين تمشى فى اماكن فاضية فترة وبعدين تمشى جوة البلد ومعاكى حد فترة وتمشى بسرعة قليله علشان لو غلطتى العربيات اللى حواليكى تلم نفسها

**ام حنين وجودى** · 23-09-2014 10:38 AM

المشاركة الأصلية كتبت بواسطة amr011111

كل الناس تعرف تسوق ان شاء الله
وموضوع فصل الدبرياج بيبقى منه سبب كبير من اللى بيعلم انه مش بيعرف يوصل المعلومه صح لانه غالبا بيبقى تعليمه على أده
المهم علشان العربيه متفصلش منك
فانت اعملى الاتى
دورى العربيه واتأكدى انها على المور قبل ما تدوريها او الاحسن انك تبقى دايسه دبرياج وتدورى العربيه
المهم بعد ما تدورى العربيه هتدوسى دبرياج للاخر وتجيبى الأول وبعدين تدوسى بنزين لحد ما صوت العربيه يعلى عن ما يتدوريها وهى مموره
وتقومى رافعه رجلك من على الدبرياج مش كلها هترفعى رجلك لمسافة التلت مثلا وتبقى دايسه بنزين وماشيه بالعربيه لحد ما تاخد سرعتها ساعتها بقى شيلى رجلك من على الدبرياج
الموضوع ده هيخلى العربيه مش هتفصل منك ان شاء الله
وبعدين مره على مره هتلاقى نفسك بتطلعى بالعربيه بسرعه وبتشيلى رجلك من على الدبرياج علطول من غير ما تثبيتها

حل الموضوع ده لو انت ناويه تجيبى اتوماتيك انك تتعلمى على اتوماتيك ومش هتشيلى هم لا دبرياج ولا فصل العربيه
الحاجه التانيه لما تخدى حصص السواقه وتجيبى عربيه هتطلعى كل يوم الصبح الساعه 6 مثلا فى شوارع فاضيه وتجربى تمشى بالعربيه وتفرملى عند علامات معينه بحيث لو حد فاجئك تبقى متعلمه الاساسيات كويس
وهتطلعى فى شوارع فاضيه صباحاً وساعتها هتلاقى مستواكى بيتسحن واحده واحده
كلنا كنا كده فى الأول
وبالتوفيق

جزاك الله كل الخير
انا تقريبا من كتر الرعب انها تفصل بحس ان رجلى مابتنزلش من على الدبرياج وواخده وضع الاستعداد انى فى اى وقت حطه رجلى ومش بشيلها

انا بروح مع مدرب انا وجوزى وهى مشكلتى انا وجوزى الدبرياج بيفصل واحنا اصلا ناووين على ماينوال

فربنا يستر وتتحل من عند ربنا

المشاركة الأصلية كتبت بواسطة drcobra

الخوف شعور طبيعى
السواقة ممارسة يعنى لازم تتعلمى فترة طويلة وبعدين تطلعى بالعربية مع حد فترة طويلة وبعدين تمشى فى اماكن فاضية فترة وبعدين تمشى جوة البلد ومعاكى حد فترة وتمشى بسرعة قليله علشان لو غلطتى العربيات اللى حواليكى تلم نفسها

جزاكا الله كل خير

انا مش ناويه اقرر اجيب عربيه غير لما نبقى ادها وانا بحاول بصراحه
بس شعور اننا مش حانعرف مسيطر حبه

**swimmer25** · 23-09-2014 11:07 AM

أولا السواقة مش دبرياج خالص...التحكم في الدواسات دا المفروض يكون تلقائي بدون تفكير..لو محصلش يبقي تتوقفي بحيث إنك لازم تختبري نفسك أو المدرب يختبرك بإنك تكوني علي مطلع وتتحركي للأمام بسهولة بدون لخبطة وبدون رجوع السيارة للخلف والعكس في الخلفي

ثانيا ممكن تتجهي للأتوماتيك وهنا السواقة تتفرع لحاجات كتير منها
القدرة علي المناورة وتغيير الحارات ودخول الملفات والركنة وإستخدام المرايات بإستمرار في كل فترات السواقة + أهم نقطة وهي التصرف في الحالات الطارئة والضغط المفاجئ للفرامل

غير كدا يبقى بلاش سواقة وإرحموا من في الأرض يرحمكم من في السماء
نقطة أخيرة...ممكن توصلي لكل النقاط في إجادة السواقة بعد فترة طويلة من التدريب... بس المهم إنك متنزليش الشارع غير بعد الإجادة
يعني اللي عايز يتعلم هيتعلم بس المهم ميسوقش غير لما يتعلم مهما كلفه من مجهود في التعلم

**د.محمود صلاح** · 23-09-2014 11:30 AM

مش اقل من 6 اشهر تدريب متواصل و 40 ل 50 حصة حرصا على سلامتك وسلامة اسرتك وسلامة سيارتك

**J A G U A R** · 23-09-2014 04:04 PM

على فكره الموضوع سهل جدا جدا جدا ومفيهوش اى حاجه بس حضرتك اللى مكبره الموضوع زياده عن اللازم بسبب الخوف والقلق المسيطر على حضرتك ده

عاوز اقول حاجه بس مش احباط نهائى ان اسهل حاجه هتقابلك فى السواقه بعد ربنا ما يكرمك وتتعلمى السواقه وتبقى محترفه ان شاء الله موضوع التحكم فى الدواسات والدبرياج اللى مزهق حضرتك ده

الصعوبه اللى بجد واللى يتقال عليها صعبه لما تكونى ماشيه فى زحمه بين 20 فرد حواليكى فى الشارع او تكونى معديه تقاطع لأربع اتجاهات او تكونى ماشيه فى خمس حارات وسط العربيات ده غير الناس الرخمه اللى بتاخد الحاره بتاعتك او تكونى معديه بالعربيه فى مكان ضيق وسط عربيتين مثلا ويدوبك المكان هايعدى عربيتك بالعافيه وممكن مرايات عربيتك تحك كمان ولازم تتقفل ..... دى امثله للصعوبه بجد فى السواقه ..

يا ريت الكلام ده يكون ايجابى مش سلبى ويخلى حضرتك عندك عزيمه تتعلمى وتحطى فى دماغك لغايه ما تبقى محترفه سواقه زى باقى البنات

**J A G U A R** · 23-09-2014 07:48 PM

لو هاتمشى بمبدأ اقف وبلاش تعب يبقى فى حياتك عمرها مش هتتعلمى
وعلى فكره لازم تغلطى وتصححى غلطتك مش تحبطى نفسك

على فكره انا بسوق عربيات من الابتدائى والحمد لله مفيش حد علمنى السواقه واتعلمت مع نفسى وكنت حاطط فى دماغى اتعلم السواقه علشان كنت عاوز اتعلم وكان نفسى اتعلم وبقيت بمشى بالعربيه فى اسبوع تعليم ... ده كله علشان عاوز اتعلم وكنت بغلط وصحح غلطتى وطلعت رخصه فى اول شهر كملت فيه 18 سنه

العمليه كلها عزيمه واصرار مش احباااط

الموضوع: بتعلم السواقه ومش عارفه انا كده بتحسن ولا ايه ؟

LinkBack

أدوات الموضوع

عرض

-

-

-

-

المواضيع المتشابهه

يعنى ايه مواصفات السواقه ؟هى العربيه بتحس بطريقه سائقها فى السواقه

سؤال من مبتدئ في السواقه بخصوص السواقه والعربيه((ليجانزا 2002

سؤال من مبتدئ في السواقه بخصوص السواقه والعربيه((ليجانزا 2002

سؤال من مبتدئ في السواقه بخصوص السواقه والعربيه((ليجانزا 2002

بتعلم السواقه ...ممكن شوية مساعده ؟؟

الكلمات الدلالية لهذا الموضوع

المفضلات

المفضلات

ضوابط المشاركة