الموضوع: انا بكره ابويا

متستغربوش الموضوع حقيقي بس خلوني احكى لكم وافضفض معاكم وعلى فكرة دي اول مرة تقريبا اتكلم مع حد في الموضوع ده بالصراحة دي .
انا عضو قديم معاكم بس مقدرتش اتكلم بشخصيتي الحقيقية .
مش عارف بتكلم ليه بس اتعودت انكم زي أخواتي .
انا شاب في اواسط العشرينيات ولد وحيد وعندي اختين بنات .خريج كلية التجارة وشغال فى شركة رائدة فى مجالها براتب كويس . ابويا عنده حوالى 62 سنة
الموضوع ده بدأ من وانا صغير طول عمرى بكره ابويا لأسباب كتير حقولهاكم

ابويا طول عمره عنيف جدا جدا جدا

طول عمر ابويا بيضربنى من وانا صغير جدا بعنف شديد جدا تخيلوا مثلا طفل 10 سنين يضرب لغاية لما جسمه يزرق و يبقى مش عارف يحرك جسمه والموضوع ده عالطول يعنى أي مرة يضربنى فيها بيحصل كده وياريت الضرب كان بيكون على حاجات ليها قيمة كلها حاجات تافهة مثلا باكل وانا بطلع صوت يضربنى ويقولى متطلعش صوت وانت بتاكل مع انى لاحظته ساعتها كان بياكل باكتر طريقة مقرقة وبيطلع صوت جامد جدا .

افتكر مرة ضربنى جامد انا حوالى 4 او 5 سنين في بداية حياتنا كان الحالة المادية قليلة شوية فجدتي ام امى كانت عندنا وكانت جايبة لينا على ما افتكر ديك رومي فاحنا قاعدين بناكل وأمي بتوزع علينا فانا قلت لها لأ انا عاوز حته كبيرة اشمعنا اختى ساعتها كان عندي يمكن 6 او 7 سنين ساعتها ضربنى ضرب شديد جدا وقالي اللي يتحط تأكله وانت عينك فارغة وكلام كتير لدرجة ان عماتي نزلوا من شققهم يهدوه ( احنا عايشين في بيت عيله ) ورمى الاكل في الشارع وحكم على امى متعملش أي فراخ او لحمة لمده شهرين تقريبا .

العنف بتاعه ده مكنش ليا لوحدي طبعا كان بيضرب أخواتي البنات كمان لإخطاء صغيرة وكان كمان بيعاقبنا بطرق غريبة زي مثلا اننا نقف نرفع ايدينا و وشنا في الحيط واللي ينزل ايده يضربه و ده مثلا لمدة ساعتين .

ده طبعا غير الشتيمة و الاهانة لينا كلنا بما فيهم امى اللي هي ست محترمة وخريجة كلية من كليات القمة بس مش بتشتغل . افتكر بعد لما كان بيضربنى وجسمي كان بيزرق امى كانت بتقعد تدهن مرهم على مكان الاصابة وتعيط وتبوس فيا .

عرفت برضه موضوع من فترة ان اختى الكبيرة و هي عندها تقريبا سنتين كانت بتاكل طعمية من غير عيش و كنا احنا معناش فلوس فقال لها الاحق عليكى فلوس منين . فحبسها في الاوضه وهى قعدت تعيط و تخبط على الباب و تنده على امى وعليه . امى كل ما تفتكر الموضوع ده بتفضل تعيط .

ابويا طول عمره فاشل في حياته ابويا خريج كلية من كليات القمة وكل زملائه عملوا حاجات لنفسهم الا هو فضل في شغل الحكومة اصحاب ابويا اللي سافروا دلوقتى معاهم ملايين اصحاب ابويا اللي فتحوا اماكن عمل خاصه دلوقتى معاهم ملايين اصحاب ابويا اللي اشتغلوا في شركات خاصة دلوقتى مرتباتهم في حدود 15000 جنية شهريا ابويا اكتفى بشغل الحكومة و مساعدة اهلة ليه لغاية لما والده مات وساب له فلوس معقولة حوالى نص مليون جنيه في البنك غير الشقة غير الارض الزراعية بتاعتنا واحنا بنأجرها وبناخد ايجارها .
من الاخر عمرى ما شوفت من ابويا حاجه كويسه طول عمره زعيق وضرب واهانة وذل بس .
حتى عمره ما اهتم بتربيتنا ولا عمره اهتم بالدين ابويا مدخن . ابويا عمره ما صلى صلاة الجمعة امى ربنا يكرمها هى اللي علمتني الصلاة وهى اللي ودتني المسجد احفظ قرأن .

طول عمرى ند لابويا مش عارف ليه طول عمرى بتناقش معاه ورأينا يكون مختلف فيفضل يتريق عليا في النقاش و في الاخر يضربني او ياخد قرارات ضدي . مع انها بتكون حاجات تافهة او بيكون هو فعلا غلط .

ابويا شخص مش نضيف في عاداته عالطول بيتف على الارض في البيت مش بيستحمى خالص تقريبا وده من حوالى سنتين . ومع كده بيقول انه بيقرف من عدم النظافة وبطالب الناس انها تبقى نظيفة .
ابويا طول عمره الاوضه بتاعته زي الزريبة ولما امى تحاول تنظفها يزعق ليها جامد ويقول لها انتى كده بتحركي الحاجه مكانها و بتلخبطى الدنيا .
موضوع النقاش معا ابويا قل جدا لما انا كبرت وتقريبا مش بتكلم معاه خالص دلوقتى نظرا لظروف العمل وانى بقيت مسؤول عن نفسى .

برضه في موضوع الدراسة مع ان ابويا معاه فلوس بس طول عمره بيقول لو مجبتش مجموع حتدخل أي حاجه وخلاص مع انه كان يقدر يدخلني كلية خاصة . ابويا بخيل بدرجه رهيبة الا على نفسه حاجات كتير اساسية مكنش بيجيبها لينا زي مثلا الهدوم ابويا طول عمره شايف الهدوم شيء مش أساسي جدتي ام امى الله يكرمها كانت بساعدنا في الموضوع ده واحيانا امى كانت بتحوش من فلوس البيت وتجيب لنا وتقول لابويا ان جدتي هي اللي جايباه لينا .

اما موضوع كرهي لابويا مبدئش من الاول خالص بدأ تقريبا وانا في اولى ثانوي بعد لما الظلم والقهر بتاعه كتر اوى اوى وشفت الابهات بيعملو ايه مع ولادهم اللي هما أصحابي .
بجد انا بتمني موت والدى . مش بس موته اتمنى اشوفه بيتذل قدامى ويتعذب لأنى بكره اكتر من أي حد في الدنيا كلها .
متتخيلوش مدى الضغط العصبي والنفسي اللي كلنا عايشين فيه بسببه .
الكره تجاه والدى من أخواتي و والدتي بدأوا يحسوا بيه برضه من حوالى 7 سنين لما ظلمه و جبروته كتر اوى .
افتكر برضه لما كان بيتخانق مع امى على اتفه الاسباب ويشتمها مع انها معملتش حاجه خالص والله امى من افضل الزوجات اذا مكانتش احسن واحده على الاطلاق ادب واحترام عمرها ما علت صوتها عليه طول عمرة بيقل ادبه عليها وهى اللي بتعتذر له وتصالحه كمان واستحملت ذل واهانه علشان تحافظ على البيت وعلينا .


اللي يجنن بقى انه شايف انه المضحى انه بيعمل حاجات كتير علشان خاطرنا ان اللي فى ايده مش له مع ان تقريبا 1/2 دخلنا هو اللي بيصرفه على نفسه . قال كلمة كده بالنص (( انتو عايشين فى الدنيا بحسى )) مع ان والله هو اللي بيعرنا فى الوسط بتاعنا لان مع السن ابتدى عقله يتأثر و بقى يغير فى الكلام و يعمل مشاكل لأتفه اتفه الاسباب و يهزقنا كلنا .

ابويا معملش أي حاجه ليا خالص . انا اشتغلت فى اماكن كتير قبل ما اشتغل فى الشركة اللي انا شغال فيها دلوقتى
وكانت وظايف فى اماكن كويسه مع ناس محترمين جدا وكل الوظايف دي انا اللي جبتها لنفسي من معارفي انا الشخصية حتى لما قلت له عاوز اعمل مشروع ويساعدني قالي منين . يعنى انت تعمل مشروع واحنا نموت من الجوع .

انا اول مرة اكلم حد فى الموضوع ده بالطريقة دي . ياريت اسمع وجه نظركم فى الموضوع واقسم بالله ان كل كلمة قلتها حقيقية اذا كمان مكنش الواقع أسوء .