جمارك جمارك جمارك جمارك !!!

**borio1704** · 09-10-2014 12:35 AM

المشاركة الأصلية كتبت بواسطة ENG.MaRk

مفيش حل أو نهاية للجمارك ؟!
أصحابي في دبي راكبين Lexus LS 460 و أنا معايا بيكانتو !!! (الحمد لله علي كل حال)
طبعا الموضوع مش إني باتبتر علي النعمة أو حاجة بس ليه إحنا البلد الوحيدة اللي فيها جمارك زبالة بالشكل ده ؟!
عرفت مؤخرا إن الجمارك في مصر و الضريبة 247.5% من تمن العربية الأصلي لو أعلي من 2400 سي سي !!!
و 141% لو أعلي من 2000 سي سي
-بصراحة أنا شايف إن البلد حالها مش هينصلح غير لما الجمارك تتلغي

معلش.. عندي تصحيح صغير

العربيات اللي أقل من 1600 cc إجمالي جماركها حوالي 66% من ثمنها الأصلي
العربيات فوق 1600 لحد 2000 cc إجمالي جماركها حوالي 221% من ثمنها الأصلي
العربيات اللي فوق 2000 cc إجمالي جماركها حوالي 270% من ثمنها الأصلي

وده اللي مخلي عربية زي التويوتا الكامري (عربية الشعب في الخليج) اللي ثمنها حوالي 90 ألف درهم (180 ألف جنيه) تتباع في مصر بحوالي 670 ألف جنيه.

...

**borio1704** · 09-10-2014 02:33 AM

المشاركة الأصلية كتبت بواسطة ENG.MaRk

حضرتك متأكد من الأرقام ديه يا باشا ؟!
أصل أنا واحد صاحبي شغال في غبور ماسك قسم الجمارك و هو اللي قالي الأرقام ديه و ده كلام أكيد لأن التوكيل جاب قبل كدة 2 أزيرا و واحد اكيوس (سنتنيال) و كانت هي ديه ضريبتهم !!!
مش قصدي أعدل عليك لأنك خبير أكتر مني و لكن انا حابب أتأكد :)

اللي أعرفه إن قانون الجمارك مقسم العربيات 3 فئات

أقل من 1600 cc
أقل من 2000 cc (يعني أكتر من 1600 لحد 2000)
أكتر من 2000 cc

طريقة الحسابات معقدة .. وبتبين لك قد إيه اللي حاطط القانون ده أقل ما يوصف بيه إنه يهودي.

بص يا سيدي:

الرسوم الجمركية نفسها عبارة عن 3 حاجات

أول حاجة إسمها "سيف وارد".. ودي تعتبر نسبة الجمرك الصريحة على البضاعة الواردة.. وبتتحسب كنسبة من ثمن العربية.

تاني حاجة إسمها "ضريبة المبيعات"... ودي بتتحسب كنسبة من "إجمالي ثمن العربية + قيمة سيف الوارد" مع بعض

يعني لو العربية ثمنها 100 ألف.. ونسبة سيف الوارد 40% (يعني 40 ألف).. يبقى ضريبة المبيعات تتحسب على قيمة 140 ألف (100ألف + 40ألف)

ثالث حاجة إسمها "رسم تنمية"... ودي بتتحسب على إجمالي "ثمن العربية + قيمة سيف الوارد + قيمة ضريبة المبيعات"

يعني بنفس المثال السابق.. ولو ضريبة المبيعات نسبتها 15% (يعني 21 ألف).. يبقى رسم التنمية يتحسب على قيمة 161 ألف (100 ألف + 40 ألف + 21 ألف)

بالنسبة لقيم الحبشتكانات دي في التلات فئات بتوع السيارات.. فهي كالتالي:

أقل من 1600 cc : سيف وارد 40% .. ضريبة مبيعات 15% .. رسم تنمية 3% ... يعني الإجمالي 65.8%
أقل من 2000 cc : سيف وارد 135% .. ضريبة مبيعات 30% .. رسم تنمية 5% ... يعني الإجمالي 220.8%
أعلى من 2000 cc : سيف وارد 135% .. ضريبة مبيعات 45% .. رسم تنمية 8% ... يعني الإجمالي 269.7%

القانون المنيل ده ساري بقاله حوالي 10 سنين بآخر تعديل (لما ضمو فئة الـ1300 والـ1600 على بعض)

وقبل كده كان فيه كمان فئة أقل من 1000 cc .. وفئة أقل من 1300 cc

على حسب علمي لسه ما حصلش تعديل على القانون..

...

**borio1704** · 09-10-2014 03:18 AM

المشاركة الأصلية كتبت بواسطة hamaad

وسوال صغير فئة قبل 1000 سى سى كان جمارك كام قبل ذلك؟

جمرك السيارات تحت 1000 cc كان نفس جمرك الفئة الحالية تحت 1600 cc

وكان جمرك ال1300 حوالي 60% سيف وارد .. أما ال1600 كانت جمركها 100% سيف وارد

للأسف مش فاكر نسب ضريبة المبيعات ولا رسم التنمية للفئات دي.

الكلام ده كان ماشي لحد منتصف التسعينات أو أواخرها على ما أذكر..

بس بعد كده ضموا ال1300 على ال1000.. وبقى كله تحت 1300

وبعد شويه ضموا ال1600 على ال1300.. وبقى كله تحت 1600

وبعد التعديل ده تحديدا بدأ انتشار العربيات المتوسطة زي الإيلانترا والسيراتو .. ﻹنهم ما كانوش بينزلوا بمواتير 1300.. وكمان بدأنا نشوف الكورولا بتنزل بمواتير 1600 بعد ما كانت بتنزل بمواتير 1300 بس.

...

**Hosam_Optrawy** · 09-10-2014 04:06 AM

المشاركة الأصلية كتبت بواسطة ENG.MaRk

-أتمني فعلا تبقي ديه أقصي قيمة للجمارك
-الطرق هتتصلح بطريقتين ... الأولي الشعب نفسه و التانية هيئة الطرق و الكباري
-العربيات القديمة إحنا نعيد صناعتها ... ليه مثلا مانشغلش تاني مصنع نصر و نعمل عربياتنا مبنية علي شاسيه عربيات تانية حلوة ... إعادة تصنيع و ده هيبقي حل يوقف مصر تاني علي رجليها و يحولها لدولة صناعية !!!

ماقصدش ان الطرق مكسره ، اقصد الطرق اللى تستحمل عدد العربيات الزياده بعد ما الجمارك تتشال , هانبقى عايشين في جراج كبير :) هانمشى الكيلو في ساعه

تانى حاجه ماقصدش برضه بالعربيات القديمه ال 128 وال 504 ، أقصد أي عربيه قبل موديل 2000 مثلا

الموضوع معقد وفى حاجات كتير لازم تتحسب

يتعمل قانون يمنع تجديد ترخيص اى عربيه يعدى عليها 20 سنه مثلا ، هل كل الناس هاتتقبل قرار زى دا ؟ وهل من حقهم يعملوا قانون زى دا أصلا ؟ العربيه دى ملكيه خاصه ، بس في نفس الوقت مفيش طريقه تانيه لأن محدش هايتخلى عن عربيته القديمه ببساطه كدا ، هايمشى بالقديمه والجديده ، ومستحيل الشوارع تشيل كميه العربيات دى

والمصانع اللى بتقفل هنا زى شيفروليه وهيونداى ونيسان واسبيرانزا وجيلى وبى واى دى وغيرهم ، هانعمل فيهم إيه نقفلهم ؟ ماهو مش هايبقى ليهم لازمه

وغيره ...

**ehabouf** · 09-10-2014 07:07 AM

المشاركة الأصلية كتبت بواسطة hosam_optrawy

ماقصدش ان الطرق مكسره ، اقصد الطرق اللى تستحمل عدد العربيات الزياده بعد ما الجمارك تتشال , هانبقى عايشين في جراج كبير :) هانمشى الكيلو في ساعه

تانى حاجه ماقصدش برضه بالعربيات القديمه ال 128 وال 504 ، أقصد أي عربيه قبل موديل 2000 مثلا

الموضوع معقد وفى حاجات كتير لازم تتحسب

يتعمل قانون يمنع تجديد ترخيص اى عربيه يعدى عليها 20 سنه مثلا ، هل كل الناس هاتتقبل قرار زى دا ؟ وهل من حقهم يعملوا قانون زى دا أصلا ؟ العربيه دى ملكيه خاصه ، بس في نفس الوقت مفيش طريقه تانيه لأن محدش هايتخلى عن عربيته القديمه ببساطه كدا ، هايمشى بالقديمه والجديده ، ومستحيل الشوارع تشيل كميه العربيات دى

والمصانع اللى بتقفل هنا زى شيفروليه وهيونداى ونيسان واسبيرانزا وجيلى وبى واى دى وغيرهم ، هانعمل فيهم إيه نقفلهم ؟ ماهو مش هايبقى ليهم لازمه

وغيره ...

:zb_sor1[1]:

زي ماحضرتك قولت - دي ملكية خاصة ولايمكن ان تمس
هو ممكن يشترط حالة للعربية مش عمر؟؟
بمعنى ممكن يكون حالة الموتور لاتقل عن 80% مثلاً - عدم وجود لحامات في الشاسيه - نسبة العادم لاتزيد عن كذا %
الكلام ده ممكن يرخص عربية معدية ال 30 سنة (زي المرسيدس الزلموكة مثلاً) ويمنع ترخيص عربية موديل السنة الي فاتت وعملت حادثة وبقت خطر استخدامها

**Ahmed Selim** · 09-10-2014 07:46 AM

إنسى يا مارك :-).............معلش الأيفيه حكم

بص يا هندسة......الموضوع مستفز فعلاً لدرجة كبيرة أنا معاك.

بس تخيل بكرة الصبح صحيت على خبر أن الجمارك أتشالت و العربيات اللى حالتها أقل من 80% مثلاً مش هتترخص.

القاهرة من فترة أتقال أن فيها 2 مليون عربية مرخصة.....هنفترض أن اللى مش مرخص مش داخل فى الحسبة

عندك نص الشعب عربياته حالتها أقل من 80%.....الناس دى هتلبس أسود وش......لأن عربياتهم على أقصى تقدير هتتباع قطع غيار ده لو لقو حد يشتري أصلاً.

طبق الكلام ده على القاهرة......هيتبقى عندك مليون عربية مرخصة......و تعالى بقى شوف عدد العربيات الجديدة اللى الناس هتشتريها.....مش هيقل عن 2 مليون عربية كمان من مختلف الفئات......منهم ناس عربياتها القديمة مش هتترخص و ناس هيكونو عاوزين يركبوا عربيات 2000 سي سي فيما فوق.

يعني القاهرة هيبقى فيها 3 مليون عربية بدل 2 مليون.....يعني زيادة 50%......هيمشوا فين ؟

عاوز أضيف أن الجمارك كانت محطوطة لحماية الصناعة الوطنية اللى مش موجودة خلاص
و بعد كده تم تعديلها حسب السعة اللترية علشان دعم البنزين اللى ابتدى يترفع

يعني السببين اللى علشانهم فيه جمارك......الأتنين بلح......و تبقى الجمارك قدرنا.

الموضوع: جمارك جمارك جمارك جمارك !!!

LinkBack

أدوات الموضوع

عرض

-

-

-

-

-

المواضيع المتشابهه

جمارك

حد هنا متخلص جمارك بيشتغل في جمارك السيارات

جمارك

جمارك الشاشات

جمارك أ Bmw X5

الكلمات الدلالية لهذا الموضوع

المفضلات

المفضلات

ضوابط المشاركة