الموضوع: اضرار الغاء حساس الشكمان

طبعا غلط جدا ومتقتنعش بكلمه صنايعي يقولك مالوش لازمه لأن لو مالوش لازمه ماكنتش الشركه عملته وطبعا فصل حساس الشكمان بيأثر على استهلاك البنزين ويخلي العربيه غول بنزين واستهلاكها يقرب معاك من الجيب وهيا 1600 لأن الحساس ده عين الكنترول في الشكمان علشان يشوف الحرق مضبوط ولا لا والا الاستهلاك هيبقى عالي لأن مفيش حاجه بتشوف الاحتراق مظبوط ولا لا وانا أفضل انك تجيبه استيراد لأن أغلب الجديد مضروب وغالي والأصلي غالي اوى فخليك في الاستيراد وعلى التجربه وسعره هيبقى فى حدود 500 أو 600ج استيراد ممكن يقل وان شاء الله خير

ياباشا تحت أمرك

المشاركة الأصلية كتبت بواسطة m07mad

طيب ازاي اعرف ان الحساس دا بايظ و عايز يتغير لان انا كشفت العربيه و قالولي ان الحساس مش مظبوط و محتاج تغير رغم انو مش مسجل خطأ على الجهاز ؟!؟!

منين عرفوا انو مش مظبوط علي الرغم ان مفيش اعطال مسجله لحساس الشكمان خد بالك كلام مش راكب علي بعضه لو الميكانيكي قاللك الكلام ده يبقي بيفتي الحساس لما بيعطل بيدي انه عاطل وبيتسجل error علي الكنترول ولما بتكشف ببرنامج الاعطال VCDS او ال Vas بيطلع انه عاطل غير كده يبقي شغال تمام وكمان لما بيعطل الاستهلاك بتاع البنزين بيزيد وبرضه بيسجل عطل لو مش مسجل يبقي شغال تمام ومافيهوش مشاكل يعني الحساس ده ياصالح يا عاطل ومتخفش متمشيش ورا كلام الميكانيكيه لان نص كلامهم فتي

المشاركة الأصلية كتبت بواسطة m07mad

لا هو المشكله عندي في العربيه انو مسجل خطأ cylinder 2 و cylinder 3 miss fire فا غيرت بوبينه و سلوك بوجيهات استيراد و بوجيهات و لسه المشكله هيا هيا و نفس الخطأ بيرجع يسجل تاني فا لما رجعت للمكانيكي قالي يبقى كده حساس الشكمان هوا السبب و راح فاصلي فيشتو و انا مقتنعتش بصراحه و رحت مركبه تاني و مش عارف بقى ايه الحل انا بقالي فالموضوع دا اكتر من ٦ شهور و مش لاقي حل و العربه بحس فيها برعشه خفيفه كده فالسالنسيه بس يمكن هدية شويه لما غيرت البوجيهات الاصليه من عند الشهاب فأرجو المساعده

بص ياباشا اعطال ال missfire كلها مالهاش دعوه بحساس الشكمان بص انا هقولك اعطال الmissfire بالترتيب وانت راجع عليها كلها ومش هتخرج منهم
1-فيوزات الرشاشات ودول بيبقوا من فيوزات الكنترول يعني رسمتهم في علبه الفيوزات رسمه الكنترول
2-بوجيهات وسلوك بوجيهات ودول انت مغيرهم
3-رشاشات ضعيفه او قاطعه
4-موبينه
5-ضفيره
6-كبس ضعيف في السلندر وده مستبعد شويه
7-كنترول موتور

دول اعطال الmissfire ومفيش غيرهم عموما نضف الرشاشات علي جهاز التراسونيك لو تمام ركبهم وشوف مش الرشاشات شوف الموبينه ممكن تكون ضعيفه ودي حصلت معايا في عربيتي الباسات نفس موبينه الجيتا اللي معاك وعين واحده قطعت ودي مش بتحصل خالص لازم عينين تقطع ده العادي بس حصلت معايا وعين قطعت وغيرتها وظبطت الحمد لله شوف كده وقوللي وعموما لو عايز تجرب الرشاشات فك الغطا الفبر وشيل فيشه فيشه لكل رشاش لو فيشه بتاعت رشاش شيلتها وماتأثرش يبقي المشكله من هنا وعموما انا هبعتلك رقمي علي الخاص واتصل بيا هقولك علي طريقه تختبر بيها الرشاشات وان شاء الله توصل للحل وانا في انتظار مكالمتك وان شاء الله خير