ليا بعض التحفظ علي الردود سواء من مؤيد او معارض و تحفظ برضو اني شايف قليل من التحيز اللي مش في مكانه و انا عن نفسي و بطبيعة شخصي مش بحب اتكلم غير بالارقام و الدليل و البراهين , و عشان كدة هسجل اعتراضي علي الاتي :
1. كلمة خليجي و كباس احسن و بوهية احسن ده ما هو الا وهم كبير عملوه التجار الجشع المصريين عشان يسوقو بضاعتهم في مصر اللي بياخدوها بسعر بخس حوالي 100 الف مصري من السعودية لعربية انتهي موديلها من سنتين و تيجي تتباع هنا ب 200 الف !! الكباس هو هو مفيش فرق و البوهيا بتتعمل في المصنع بنفس الطريقة و المواد و عدد الطبقات الكلام ده مني شخصيا امتلك كورولا 2011 هاي لاين مواصفات خليجية و كورولا 2014 و مجرب التكييف كذا سنة و مجرب و شايف الدهان و قوته كذا سنة يعني مش سمع ده واقع لا جدال فيه .
2. الكورولا المصري مش بتنزل ب 4 ايرباج ده كلام غير سليم بتنزل في الهاي لاين 7 ايرباج .
3. الكورولا المصري مش بتتفوق و لا ضربت الخليجي في الكماليات فقط ابدا ابدا دي ضربتها في كل شئ عربية مختلفة تماما :
# من فتيس رهيب CVT-IS مقارنة بفتيس جار عليه الزمن في سنة 2015 عربية بفتيس 4 سرعات !!!
# بالنسبة للعفشة المختلفة كليا في السيتب بتاعها عفشة رياضية معدلة يكفي ان الخليجي بتنزل بالمساعد جوة االسوستة وده طبعا بيقلل الثبات مقارنة بالمصري اللي مساعد خارجي بزاوية و سوستة داخلية تصميم بيدي ثبات اعلي بكتير
# وسائل امان ضعيفة جدا جدا لعربية في سنة 2015 الخليجي بينزل بدون عوامل الامان الاساسية التالية :
1. نظام الثبات الالكتروني VSC+
2. نظام الجر TRC
3. نظام التنبيه EBL
4. نظام Follow me home
5. نظام HAC مساعدة في المرتفعات
6. عدد 7 ايرباج
7. اماكن تثبيت بالكراسي Isofix
8. الفوج لايت الخلفي
9. اضاءة نهارية DRL اجبارية جميع الفئات
طبعا كل مواصفات الامان دي قياسية و اساسية في اي عربية امنة سنة 2015 و الخليجي بعيد كل البعد عن المواصفات دي
اما بقا بخصوص الاوبشنز اللي بتتفوق فيها الكورولا فحدث ولا حرج لا يوجد وجه للمقارنة مبينهم في الكماليات و النقطة دي واضحة مش محتاجة اتكلم فيها.
4. بالنسبة لتعليق الاستاذ سامح الكورولا المصري بينزل فيها Smart Key و شاشة طبعا بس شاشة اصلية مش متركبة اكسسوار صيني زي اللي في الخليجي .
5. برضو بالنسبة للاستاذ سامح حضرتك قولت "اخطر عيب موجود و اللي بدأ مشاكله تظهر عن بعض المستخدمين هو الفتيس الجديد" طيب يا ترا ممكن تحدد لي حالة واحدة فقط في مصر حصلت لها مشكلة من الفتيس و هستني من حضرتك الرد و ايه هي طبيعة المشاكل اللي بدأت تظهر عند بعض المستخدمين عشان ده كلام غير سليم مع احترامي لشخصك الكريم .
6. بالنسبة لنقطة الرساوة علي الطريق و الملف عشان بس ارد رد قاطع هنقول
# مجازا و عكس الواقع ان العفشة اللي في عربية سبور المعدلة اللي في النسخة المصري اقل ثباتا من العفشة السوفت الطرية اللي تصميمها المساعد داخل السوستة و (ده كلام اكيد غير سليم)
# و برضو مجازا هفترض ان العربية الاتقل في الوزن ثباتها اقل (و ده برضو مش صح) و بالمناسبة الكورولا المصري اتقل من الخليجي في الوزن بحوالي 50 كج
# شوقت الافتراضات دي كلها اللي في صالح ثبات المصري عن الخليجي هاجي اقولك اعتربهم مش موجودين خالص , يا راجل يا طيب ياللي بتقول العربية في الملفات مش راسية و بتلعب جدا امال فايدة ال ESP وال TRCايييييييه؟؟ طيب ادام المصري اللي فيه ESP بيعمل كدة امال الخليجي اللي من غيره بيعمل ايه بقا !!!!
7. سؤال عجيب يعني ايه الخامات الاوروبية زي المصرية !!! اللي اعرفه ان النسخة الاوروبية هي النسخة المصرية اللي بتنزل مصر !!!
8. حضرتك قولت "الماكينه مصصمة علي حرارة اقل زي اوربا انما الحرارة في مصر اصبحت اعلي شوية" ده كلام غير سليم الموتور واحد اسمه 1ZR-FE و بيصمم و يصنع في اليابان من نفس المصنع و نفس الخامات و نفس ال part number ولو حضرتك عندك اسم الموتور المصمم خصيصا لدرجة الحرارة قولنا عليه (ده برضو كلام التجار المغلوط اللي نشروه في مصر)
و علي فكرة هو هو نفس الرقم بتاع الموتور بتاع عربيتي ال 2011 الخليجي بنفس الرقم و كل شئ موجود في عربيتي 2014 و مش مختلف ولا حاجة و زي اللي بينزل في الخليجي 2015
9. " عامة الخليجي الخامات الصناعية احسن شوية" اختلف معاك بشدة الخامة مش ملمس و لا شكل الخامة هي تحمل و تبص علي العربية بعد 5 سنين و ياما عربيات فخمة اوروبية الناس موهومة بشكل خاماتها و جلد الفتيس والدركسيون شققو في اول سنة و اجزاء من التابلوه اتكسرت و بدون ذكر اسماء و بالصور اللي عاوزها ممكن ابعتهالو علي الخاص ده اولا
ثانيا نفس المواد و الخامات واحد و كل بلد مصنع بيدخل نسبة صناعة و مواد محلية في التقفيل زي الكراسي او الجلد حاجات بسيطة و من المنطلق ده بسأل حضرتك سؤال : هل خامة الخليجي اللي بتصنع في تايوان (الصين يعني ) افضل من المصري اللي بتصنع في تركيا !!!!
10 . اخر تعليق كان قوي جدا "بعد ما جربت اركب عربيات خليجي مش هفكر اصلا اني اركب مصري لاني بصراحة لا اثق في التقفيل ولا الصناعة المصرية"
هو الكورولا المصري بقت صناعة و تقفيل مصري !! بنفس المنطلق الكورولا الخليجي هي صناعة و تقفيل خليجي .
اتمني اكون وضحت وجهو نظري بكل حيادية من واحد معاه عربية كورولا 2014 مصري مواصفات اوروبية و عربية كورولا خليجي 2011
المفضلات