أحالة مرسيدس مصر للنيابة لتلف الموتور من البنزين - يعني كدة بلاش مواتير تربو في مصر؟؟

**hany63** · 25-10-2014 02:22 PM

المشاركة الأصلية كتبت بواسطة 2alb

طب الكلام كلوا هنا على المواتير التربو طب انا جايب e200 واعذروا جهلى برضوا بينطبق عليها نفس الكلام ارجو اهل الخبرة يفديونى

اطمن يا باشا ال e نظام تاني و شغاله زي الفل بال ٩٢ المهم يبقى من محطه محترمه

**الجنرال** · 25-10-2014 02:25 PM

طيب ما نعمل حركة .. نعمل حملة تحليل للبنزين من معظم المحطات وبكده:

1- هنعرف احنا بنحط بنزين ايه .. ولو مغشوش هنطلع كلنا طلعة واحدة على الحكومة
2- ولو في محطات بتغش يبقى هنرسم خريطة البنزين النظيف في مصر ونوجه الناس عليها ونولع فى المحطات اللى بتغش
3- هنساعد فى الضغط على التوكيل لو البنزين فعلا مزبوط ومفيهوش مشكلة
4 - اخيرا هنعرف الحقيقة فين بدل ما كل طرف بيلعب بينا

كل المطلوب .. اننا كل ناس فى منطقة واحدة يتفقوا على المحطات اللى فى محيط المنطقة بتاعتهم وكل واحد يروح بنزينه مختلفة ياخد عينة بنزين ويحللها ويصور التقرير بتاعها .. ممكن نعمل سيستم للموضوع ده وينشر النتائج اول بأول

الموضوع طالع فى دماغي جدا لان عاجلا او اجلا هيجي قدرنا ونلبس زي اصحاب عربيات مرسيدس

**banzai** · 25-10-2014 02:27 PM

مرسيدس بتقول بنزين 95 مغشوش .. و الحكومة بتقول انه مش مغشوش

الدنيا كلها عارفه ان بنزين 95 بتاع مصر هو فى الحقيقه اوكتان 91 , حتى فى المنتديات الاوروبيه و الامريكيه
هو فى حد يصدق الحكومه برضه الناس دى نحلت وبرنا و فرتكتنا و احنا بنقول كمااااان
معروف عننا اننا شعب بيحب اوى يتقرطس

**2alb** · 25-10-2014 02:51 PM

المشاركة الأصلية كتبت بواسطة hany63

اطمن يا باشا ال e نظام تاني و شغاله زي الفل بال ٩٢ المهم يبقى من محطه محترمه

ياباشا طمتنى تسلم اديك انا اساسا الشيطان بيلعب فى دماغى من ساعتها وخصوصا مبلغها محترم وخصوصا بعد مازادةت 20000 الف

**Land_Cruiser** · 25-10-2014 04:36 PM

انا من رأيي ان المتضررين لازم يعملوا شكوي جماعية لمرسيدس في المانيا لإيجاد حل للمشكله دي و علشان توصلهم المشكله في حجمها الطبيعي و يتصرفوا و كمان يشكلوا جماعات ضغط علي الوكيل لمحاوله الوصول الي حل سريع بدون الهروب من المسئوليه بالشكل الرخيص ده بس المشكله ان الموضوع ده ممكن ياخد وقت و لذلك لازم يبقي في حل علي المدي القصير ... انا فكرت في محسنات الاوكتان بس حاسس انه مش هيبقي عملي قوي انه يتحط مع كل تفويله لانه هيغلي سعر لتر البنزين زياده ما هو غالي اصلا
في اجهزه بتقيس نسبه الاوكتان زي ده مثلا
http://www.shatox.com/octanetester.html
بس اكيد الناس مش هتمشي به و هي رايحه تحط بنزين كل مره و كمان سعره اكيد هيكون وهمي

**K.Ossama** · 25-10-2014 08:06 PM

المشاركة الأصلية كتبت بواسطة hunting_eagle

و ايه المشكلة في الكلام .. انا مش فاهم

مرسيدس بتقول بنزين 95 مغشوش .. و الحكومة بتقول انه مش مغشوش

ليه اصدق مرسيدس اللي من الطبيعي انها ها تحاول انها تلقي بالمسئولية على اي حاجة غير ان الموتور فيه مشكلة .. و في نفس الوقت اكذب الحكومة اللي اولا بنزين 95 بتاعها عمرنا ما سمعنا على مشكلة منه .. و حتى بنزين 92 اللي كل الناس بتقول عليه مغشوش طول عمر العربيات التيربو و غير التيربو بتستخدمه و عمره ما بوظ موتور عربية بالسرعة دي

بصراحة انا عاجبني تقرير الحكومة

المشكلة ببساطة يا فندم إن وظيفة الحكومة هى انها تحكم.....
التقرير عمل إيه؟ قال كله تمام مرسيدس جايبة البنزين من مصدر مجهول (مش فاهم يعنى إيه) وانهم مسؤولين عن البنزين لحد لما يتوزع على المحطات، بس كدة.
امال مين اللى مسؤول بعد كدة......؟ مش الحكومة برضو
ولا كل واحد فينا يمشى بجهاز كشف الأوكتان ويختبر البنزين قبل ما يفوول.

العربية نازلة بقالها شوية فى أوروبا وأمريكا وما حصلش مشاكل منها. يبقى ايه المشكلة؟
مرسيدس نزلوا الموتور الجديد بأعلى موصفات الانبعاثات الأوروبية euro 6 وده غالباً له علاقة بالمشاكل اللى حصلت عندنا فى مصر. وهى الشركة الوحيدة اللى نزلت المواصفات فى مصر حتى الآن.

بالنسبة لموضوع إننا ما سمعناش مشاكل قبل كدة من البنزين، فبالعكس بس مشاكل صغيرة، كركرة وسحب وحش، والقصة دى من ٤ سنين على الأقل. وده بﻻضو علشان عربيات كتير فى الفترة دى نزلت بمواتير جديدة euro 5

يبقى فى مسؤولية على الحكومة من وجهة نظرى المتواضعة.....على البنزين وعلى المحطات وعلى مرسيدس نفسها. مش تخلى مسؤوليتها وخلاص وتسيبنا إحنا نولع فى بعض

**Karim Alaa** · 25-10-2014 09:42 PM

خلاص يا شباب كلنا شتمنا و كله تمام و البنزين كله بايظ و هيييييييييييه :)

طب المنتدى ده كله عارف من زمان جدا ان فى بنزينات البنزين بتاعها معفن و بيبوظ العربيه و اكتب بس فى البحث برجله فى العربيه ولا بنزين مغشوش هتلاقى من سنين طويله و اول نصيحه بتتقال ابعد عن البنزينه دى خصوصا الحكوميه منها عشان بنزينها وحش

و نفس الاشخاص بنفس العربيات ماشين بيها حتى الان او باعوها و محصلش اى مشاكل بعد كده يعنى لا بنزين البلد كله مغشوش ولا هو موضوع جديد فهياثر علينا كلنا و عربياتنا كلها هتبوظ و ما الى ذلك الا اذا كان فى حد هنا مصدق اننا من 10 سنين العربيات الى بتمشى ب 92 ماشيه ب 87.5 و عادى ميبحصلهاش حاجه خالص :) و كلنا عارفين انه مش صح

فى بنزينات معينه فى البلد خربانه و زباله و معروفه مسؤليه الحكومه طبعا بس للاسف هو ده حالنا و عايشين معاه لحد ميقفلوها و لا يغيرو بقيت النظام ماشى عادى و التجربه بتاعه السنين هى الى بتقول لا انا ولا انتم و لا اى معمل

نيجى بقى للمشكله انا قريتها على الفاس ان البنزين الى فى العربيه ده كان 92 و التحليل طلعه 87.5 و انتم بتقولو ان التحليل ده ل 95 انا اقصد الورقه دى

و اخيرا كلنا عارفين ان فى كل العربيات المتوسطه و العاليه فى الف نظام حمايه من الاوكتان القليل تقدر تقولى ازاى النظام ده ساب العربيه ماشيه ب 8 او كتان اقل طول الوقت بلا انذار لحد مجابت جاز و ازاى محدش حس ان العربيه بتبرجل جامد اوى تحتيه ده تيربو عالى و اوكتان تعبان يعنى

اخيرا المشكله لو فى البنزين و كل بنزين البلد مغشوش ليه اصحاب العربيات دى عايزين الشركه تصلحها و ياخدوها تانى ؟؟ المفروض يبقى كل همهم هو الريكال لانهم مش هيقدرو يمشو بيها لان مفيش بنزين نضيف

و المفروض ان دى عربيه B-class ناس بتقول المشكله فى 10 عربيات منهم عربيات C180 طب و بقيت العربيات هل مرسيدس باعت 10 عربيات C and B بس ؟؟؟ لا و غالبا مش هتشوف المشكله بالنسبه الى بتتكلمو عليها الا لو فى مشكله حقيقه فى المواتير

اخيرا انا شايف غباء من مرسيدس بغض النظر الموضوع كان فى ايه 10 عربيات و محدش سامع عنه بغبائهم سمعو الدنيا كلها و محدش هيشترى مرسيدس تانى لحد ميعرف ايه العيب و لو العيب فى البنزين يبقى محدش هيشترى مرسيدس خااااااالص لان محدش يقدر يغير البنزين غباء اوى

**Hunting_Eagle** · 25-10-2014 09:59 PM

المشاركة الأصلية كتبت بواسطة k.ossama

المشكلة ببساطة يا فندم إن وظيفة الحكومة هى انها تحكم.....
التقرير عمل إيه؟ قال كله تمام مرسيدس جايبة البنزين من مصدر مجهول (مش فاهم يعنى إيه) وانهم مسؤولين عن البنزين لحد لما يتوزع على المحطات، بس كدة.
امال مين اللى مسؤول بعد كدة......؟ مش الحكومة برضو
ولا كل واحد فينا يمشى بجهاز كشف الأوكتان ويختبر البنزين قبل ما يفوول.

العربية نازلة بقالها شوية فى أوروبا وأمريكا وما حصلش مشاكل منها. يبقى ايه المشكلة؟
مرسيدس نزلوا الموتور الجديد بأعلى موصفات الانبعاثات الأوروبية euro 6 وده غالباً له علاقة بالمشاكل اللى حصلت عندنا فى مصر. وهى الشركة الوحيدة اللى نزلت المواصفات فى مصر حتى الآن.

بالنسبة لموضوع إننا ما سمعناش مشاكل قبل كدة من البنزين، فبالعكس بس مشاكل صغيرة، كركرة وسحب وحش، والقصة دى من ٤ سنين على الأقل. وده بﻻضو علشان عربيات كتير فى الفترة دى نزلت بمواتير جديدة euro 5

يبقى فى مسؤولية على الحكومة من وجهة نظرى المتواضعة.....على البنزين وعلى المحطات وعلى مرسيدس نفسها. مش تخلى مسؤوليتها وخلاص وتسيبنا إحنا نولع فى بعض

يا سيدي الفاضل

انا مش هنا علشان ادافع عن الحكومة او اني اهاجم مرسيدس

الهدف من كلامي .. ان في مشكلة .. و في طرفين .. وكيل مرسيدس اللي انا شايفه بيتهرب بخسة و وطيان من تصليح عربية لسه زيرو .. و حكومة زي ما حضرتك قولت بتخلي طرفها و خلاص

يعني الاتنين أسوأ من بعض .. ليه انا اصدق تحليل مرسيدس للمشكلة انه خاص بالبنزين .. و اكذب الحكومة .. مع ان الاتنين هدفهم الأول عدم تحمل المسئولية

بين الطرفين بقى .. في واحد مسكين اسمه الزبون .. و غالبا حقه هيضيع

و بعدين تاني يا جماعة .. احنا اول مرة نسمع عن مشكلة في بنزين 95 .. طول عمر الكركرة و التسقيف و بطأ التسارع جاي من ال 92 ..

و انا ها امشي معاك ان محركات مرسيدس الجديدة ليها متطلبات خاصة .. الوكيل في مصر ايه ؟؟ أعمى القلب و البصيرة .. هو مش واخد باله انه بيبيع أغلى عربية بتنزل في مصر .. و ان الناس بتدفع تمن العربية الفعلي مرتين .. هو مش شغال في المجال ده بقاله سنين و عنده مراكز خدمة و عارف مشاكل البنزين في مصر ؟!

و اللي يدل على الخسة و النتانة أكتر انه بيمضي الناس اللي بتشتري على اقرارات .. يعني تمضيني اني احط بنزين 95 .. و اروح احط 95 تيجي تقولي لا مش نافع ؟

اعذرني على حدة كلامي .. و لكن لأني حزين من اجل الناس اللي اشترت و سياراتها عطلت .. انا قرأت عن واحد محتاج موتور ب 150 الف .. تخيل ؟!

تحياتي لسيادتك

**Hunting_Eagle** · 25-10-2014 10:14 PM

الدنيا كلها عارفه ان بنزين 95 بتاع مصر هو فى الحقيقه اوكتان 91 , حتى فى المنتديات الاوروبيه و الامريكيه

لا الحقيقة مش الدنيا كلها ولا حاجة عارفة ان بنزين 95 هو في الحقيقة 91 ..

و المنتديات الآوروبية و الأمريكية سابت كل المواضيع اللي تهمهم .. و بيتكلموا دلوقتي في بنزين مصر ال 95 المغشوش .. اللي هو في الحقيقة 91 ؟!

انا اعرف ناس بريطانيين و امريكيين ما يعرفوش مصر دي فين أساسا ..

معروف عننا اننا شعب بيحب اوى يتقرطس

ما هو ده حقيقي اننا شعب بيحب بيتقرطس ..

بدليل اننا عمالين نلاقي طريقة للوكيل علشان ينصب بيها علينا و بنلتمس له الأعذار

تصدق اننا طلعنا شعب بيحب يتقرطس و ...

و لا بلاش

**K.Ossama** · 25-10-2014 10:27 PM

المشاركة الأصلية كتبت بواسطة hunting_eagle

يا سيدي الفاضل

انا مش هنا علشان ادافع عن الحكومة او اني اهاجم مرسيدس

الهدف من كلامي .. ان في مشكلة .. و في طرفين .. وكيل مرسيدس اللي انا شايفه بيتهرب بخسة و وطيان من تصليح عربية لسه زيرو .. و حكومة زي ما حضرتك قولت بتخلي طرفها و خلاص

طبعاً توكيل واطى ولا يليق بالعلامة اللى ماسكها

المشاركة الأصلية كتبت بواسطة hunting_eagle

يعني الاتنين أسوأ من بعض .. ليه انا اصدق تحليل مرسيدس للمشكلة انه خاص بالبنزين .. و اكذب الحكومة .. مع ان الاتنين هدفهم الأول عدم تحمل المسئولية

سبب تصديقى للتحليل انه معمول فى معامل مصر للبترول. يعنى معمول فى معمل حكومى مش حتة خاصة

المشاركة الأصلية كتبت بواسطة hunting_eagle

بين الطرفين بقى .. في واحد مسكين اسمه الزبون .. و غالبا حقه هيضيع

كلام سليم تماماً وهو ده اللى حارق دمى.....

المشاركة الأصلية كتبت بواسطة hunting_eagle

و اللي يدل على الخسة و النتانة أكتر انه بيمضي الناس اللي بتشتري على اقرارات .. يعني تمضيني اني احط بنزين 95 .. و اروح احط 95 تيجي تقولي لا مش نافع ؟

برضو كلام سليم.
مافيش حاكم للسوق.....البقاء للاقوى و الاوطى

المشاركة الأصلية كتبت بواسطة hunting_eagle

اعذرني على حدة كلامي .. و لكن لأني حزين من اجل الناس اللي اشترت و سياراتها عطلت .. انا قرأت عن واحد محتاج موتور ب 150 الف .. تخيل ؟!

تحياتي لسيادتك

وباشا ولا حدة وحاجة
هو موضوع يحزن ويحرق الدم الصراحة كلة على بعضه كدة

الموضوع: أحالة مرسيدس مصر للنيابة لتلف الموتور من البنزين - يعني كدة بلاش مواتير تربو في مصر؟؟

LinkBack

أدوات الموضوع

عرض

-

-

-

-

-

المواضيع المتشابهه

يعني ايه الموتور خفيف

مرسيدس c180 ولا باسات تربو 1400

شماسة نايل موتورز وب لوجو مرسيدس وب 30ج ...يا بلاش ....

يعني ايه الموتور خفيف

يعني إيه تربو؟

الكلمات الدلالية لهذا الموضوع

المفضلات

المفضلات

ضوابط المشاركة