الموضوع: هو ايه الغرض من الخطوبة يا جماعة ..؟!

المشاركة الأصلية كتبت بواسطة أبو آسر

ده راجع لثقافة الناس الخاطئة بخصوص الخطوبة
الخطوبة شرعا حسب علمي مش بتبيح أي حاجة للطرفين سوى انهم محجوزين لبعض لحد ما يكتبوا العقد لكن ده مش بيترتب عليه أي حاجة من اللي بتكون بين الزوجين وبالتالي هي ما زالت أجنبية عنه ولا يحل ليه انه يخرج معاها ولا يشوف وشها لو هي منتقبة مثلا ولا يختلوا ببعض حتى لو في بيت أهلها أقصى حاجة انهم يتكلموا مع بعض في حضور محرم وده برده مش كل يوم ده ممكن يكون في المناسبات مثلا وبالتالي مش من حقها انها تطلب منه أي حاجة لا هدايا ولا يشتريلها هدوم ولا يصرف عليها علشان اترفدت من شغلها !!
طبعا لأن فسخ الخطوبة سهل وبيحصل كتير والواحد ممكن يخطب 10 بنات ويختلفوا فيفسخوا لكن العقد بيبقى زواج رسمي ومش من السهل فسخه لأنها هتبقى مطلقة وبالتالي لو كل واحد خطب واحدة قعد يجيبلها هدايا في كل مناسبة يبقى مش هيتجوز لأنه هيصرف كل ما يملك على الهدايا اللي بيعطيهم لخطيباته !
تصحيح المفاهيم بتسهل الأمور
أنا على سبيل المثال كانت خطوبتي عبارة عن إني روحت شوفت زوجتي رؤية شرعية مرة واحدة بس في وجود أبوها واتكلمنا مع بعض لحد ما حسينا ان في راحة وقبول وبالتالي أصبحت خطيبتي لكن مشوفتهاش تاني ولا كلمتها حتى لحد ما كتبنا العقد بعدها بحوالي شهرين أو تلاتة وبعد كده قعدنا مع بعض براحتنا وزيارات وهدايا عادي ما هي أصبحت زوجتي خلاص والحمد لله مفيش شهر وتم الزواج .. اللي بيتحرى الحلال والسنة بيستريح واللي بيحاول يماشي العادات والتقاليد والأعراف الخاطئة اللي الناس بتفتكسها علشان مصالحهم بيتعب

ده الصح وده اللي مقتنع بيه ,,, لكن تعمل ايه بقى في 90% من شعب مصر ...!!!

نفسي الاقي ناس كده , محترمين ومتدينين ...

ربنا يسعدك

المشاركة الأصلية كتبت بواسطة 7oda

هل انت بتتكلم عن تجربة شخصية ولا ده كلام بتسمعه من اصحبك او نقله من فيس بوك الكام الى ات بتقولو غريب و اعتقد بيعتمد على بيئة البنت و تربيتها فمتقدرش تعمم
بصراحة اعتقد ان البنات الى بتتوقع انفاق مادى من خطبها تبقى مزوداها اوى
بكترها هديه عيد ميلاد
اما بلنسبة ل ٦ و ٩ فهوا فعلا البنات بتحب الى يكلمهم كتير و بتحب تحس بالاهتمام من خطيبها و ده راجع لطبيعة الامراة انهم بيحبو الكلام

لا مش تجربة شخصية ... الكلام ده خليط من حاجات حصلت لأصحابي أو لناس اعرفهم مع حاجات من على منتدى اسمه فتكات لقيته بالصدفة ...

واكيد مفيش تعميم لكن نسبة كبيرة من البنات كده للأسف ...

المشاركة الأصلية كتبت بواسطة mesaharaty

معظم البنات بتبقى شايفة نفسها حبتينفى فترة ما من حياتها .
وهنا نجد الشيزوفرينيا فى أبهى صورها .
تلاقى البنت قبل الزواج بتبقى مهتمية بنفسها وبتحاول تبقى موجودة فى إطار يتيح ليها التعرف والإختيار (علشان تتخطب طبعا) .
بمجرد الإنتقال إلى الطور التاريخى الآخر (الزواج الفعلى) كل شىء بيبان على حقيقته وتتحول المسألة إلى علاقة أسميها بـ ATM Card Relationship (واضحة طبعا)
ولنا الله هو الولى والنصير

طيب وايه اللي يحوجنا لكده ... الواحد عايش زي الفل اهه , بلا جواز بلا قرف

المشاركة الأصلية كتبت بواسطة Y a r i s

موضوع جميل وفي الجون ... وبصراحة دحكتموني .
وعاوز ابسط لكم الموضوع بس مش عارف ازاي ... بس بص يا معلم دلوقتي لو انتا وهو حاجز عربية في معرض ... مش بيجي احياناً بتاع المعرض. يقولك ايدك على ١٠٠ جنية تيجي انتا تقولوا بتوع ايه دول يقولك دي مصاريف الواد الي بيغسلها مثلاً .

ولو انتا حاجز شقة ... مش كل شوية المقاول يقلك ايدك يا حبيبي على الف ولا الفين كمان تيجي تسئلوا بتوع ايه دول يقلك هنركب سلم ولا هنركب اصانصير ولا اصل المواسير اتكسرت وعاوزين نركب مش عارف ايه ... (( يبقى القصد )) : ان الانسان لما يحجز اي حاجة في الدنيا يجوز انوا يصرف عليها كنوع من انواع البروفه والتجربة انها تشوفوا كريم ولا بخيل وجلدة .

طبعاً بتفرق من بنت لبنت يعني اذا كانت البنت عينها ملياااانه او عقلها كبير ولا لسه طفلة صغيرة ، فأم عين مليانه مش هتبص لمصروف ولا عيدية ولا حتت جيبه وبين وحده معفنه ابوها معيشه على حتت طقم بتخمس بيه مع اختها ... على فكرة ده نوع من انواع العفانه انك تلبس لبس على اللحم مش بتاعك .

طبعاً انا هنا كرجل بعذر العريس لان في الفترة دي بالذاااااااات بيبقى الشاب بيستنزف كل جنيه في توضيب شقه او شرى عبش او بيحوش كل ربع جنيه علشان لما يطلع معاها يعزمها عزومة حلوة ... لكن هيا هتفكر على طول بانك بخييييل ... لانها طفله وبالنسبه لها انك انتا بعد باباها. ... عارفين زي ايه ... فاكرين لما كنا صغيرين واي ضييييف اي ضيف غريب او قريب يجلنا في العييييييييد كان بيبقى بالنسبه لنا هدف سهل علشان تاخود منوا عيدية .... احنا بالنسبة لنا كاطفال بتبقى عيدية وده دليل كرم او بخل للضيف وبالنسبة للضيف. انها ايتااااااوة ونوع من انواع البلطج والفردة وبيقلبوا الضيييييف . لذلك الناس بطلو يزوروا بعض في العيييد .

ولو حد فكر يزور واحد صاحبوا فبيرن عليه ويقلوا انززززل انا تحت البيت قاعد مستنيك على القهوة تحت ههههههه خاصةً في العيد .

لذلك في فرق بين البت الي بتخطبها وهتبقى مراتك وملزم انك تصرف عليها زي بنتك ... وبين وحده زميلتك كنت بتتفسح معاها ايام الجامعه فتصور لو وحده صديقتك بتقولك عاوزة فلوس ولا عاوزة مصروف هتقول عليها سنكووحه ... ويا ما اكتر السناكيح في الزمن ده زي مالبت تقولك اصل ماما بتموت في المستشفى وهنعملها عمليه وناقصني ١٠٠٠ جنية من مصاريف العملية . وعاوزه تشوفك جدع ولا لأ .

وطبعاً هتاخود الالف جنيه من هنااااا ... وانساهم من هنا يامعلم ... أقولك انتا اعتبر الالف جنية دول كانوا على متن الطيارة الماليزية الي اختفت ومش عارفين اختفت فين لغايت دلوقتي .

المهم انتوووووو فاكرين الجواز ايه ... ترجع من الشغل تلاقي وحده تاخدك بالحضن والبوس وتقلك وووحشتني يا حياتي وانتا تقولها منىىىىىى وهيا تقولك أحمااااااااااد زي في الافلام . لا ياحبيبي انتا وهو الجواز انك اول ما تخوش البيت هتلاقي وحده جميله ولا مش جميلة بتقولك هااااااااااااااات (( طبعاً مش هات بوسة !! )) لأ دي بتقولك هااااااااااات فلوس... ولو هيا بنت اصول ومهذبة ومحترمه ... هتلاقيها تصبر عليك شوية لحد ما تقلع هدومك واول يا دوبك يادوبك ما تشطف وشك وتريح كده على السرير هتقولك باباااا بااباااا (( ما انتا خلاص بقيت ابوها وبدل ابوها )) كنا عاوزين بس فلوس علشان فلان حد من عيالك طبعاً عاوز كزا كزا كزا كزا . او بتاع الكهربا جه النهرده او بتاع الغاز جه النهرده ... او بتاع اتحاد ملاك العماره. ولا البواب خبط وكان عاوز فلوس فلوس فلوس فلوس .

طبعاً انا هنا مش هعمل زي جعيدي في فيلم شمس الزناتي وهقولك (( أهررررررب يا ولد ... اهرب يا شمس هههه )). لا ، بس بنورك وعلشان الشباب الي قاعد يبص على البنات ويقول ياسلالالام لو دي تبقى مراتي وتعدي وحده تانيه ويقول لا لا بلاش دي خليني اخود التانيه اموا عنين زرقه وانصع بياضا. من الأولانيه نضافة تايد :) ... او يشوف وحده متجوزة ومشيه مع جوزها ولا شايله عيل وتلاقيه يقعد يبص على مرات الراجل ويقول يا بختوووو دي اكيد مهنيااااه ... البت سمككككه ... اهو يا حبيبي السمكه هتطلع ايمناتك مصاريف .

عارفين زي ايه ... زي لمن تشوف واحد راكب بي ام دبليو ... ولا حتى همر اخر موديل وتقعد تنق عليه وتقول يا بختوا ... ياريتني كنت مكانوا اوعدني يارب بحته بي ام كده ... طب تعاله يا حبيبي يالي عاوز البي ام. تعاله كده قولي هتركنها فين ... في الحارة تحت البيت عندكم ... طب ماهي هتتحك ومش بعيد يجلك واد سواق توك توك مبرشم وقوم هوووووب يخشلك في الباب ولا الفنوس وهيا متغطيه ويقلك انتا الي غلطان ايه الي خلاك تركن هنا .

او هتلاقي العيال بيلعبوا كورة جمبها وكل شوي ديييييب في الرفرف او دييييب في البرافيريز ... وشوف بقه مصاريف الصيانة بتاعت او ل ١٠٠٠ كيلووو ولا صيانة العشر تلاف. ولا مصاريف بانزين ٩٥ وغيروا وغيروا حجات كتيرررر مش هتعرف تصرف عليها ولا حتى ترخصها وهتطر تبيعها وتطلقها ... وهتفضل عايش على الصور والذكريات وتقول للناس كااااان عندي بي إم ... وتوري الناس صوركم يوم الفرح يقولولك ياعمي دي كانت عربية راكنه في الشارع وانتا وقفت اتصورت جمبهاااااا . ههه

لذلك حب على قدك واعرف ان الجواز مسؤولييييه فاستنضف عروسة يعني متروحش تتجوز بت شحاته ومقضياها على الشحاته وعماله تقلبك في فلوس. زي البت نوسه أخت مليجي حبيبت لمبي . ... وتحياتي وبالتوفيق

أنا معنديش مشكلة اني اصرف عليها بعد الجواز لأنها مسئولة مني

انما في الخطوبة اصرف عليها ليييييه ... ما انا او هي ممكن نسيب بعض في اي وقت

هي للأسف البنات المحترمة اللي عينها مليانة بقت عملة نادرة في الزمن ده ...



موضوع الجوار ومصاريفه دي بقى حاجة تانية خااااااااااالص وربنا يعيننا عليها ...

المشاركة الأصلية كتبت بواسطة misry

السلام عليكم ...

أنا كنت فاكر اني عارف الغرض من الخطوبة لكن الظاهر اني غلطان فياريت

تشوفوا الكلام ده وتقولولي رأيكم ...

الكلام ده من بنات مخطوبة ::::

1- واحدة كانت بتشتغل ورفدوها أو سابت الشغل وعاوزة من خطيبها مصورف شهري بدل المرتب اللي كانت بتاخده ... ولما ما وافقش بتقول عليه بخيل

2- واحدة خطيبها مسافر وزعلانة انه لما رجع كان جايبلها جيبتين وكام حاجة كده والتانية بترد عليها انه المفروض يجيبلها شنطة مليانة هدوم وانه كده بخيل

3- واحدة عاوزة خطيبها يجيب لها هدية يوم عيد ميلادها وفي الاعياد والمواسم ويوم عيد ميلاد امها وابوها

4- واحدة زعلانة ان خطيبها فتح عليها 3 مرات في شهرين مع انه على طول بيكنسل ويتصل هو وبتقول هل يا ترى هو كده بخيل

5- واحدة يا حرام زعلانة انها كانت ماشية مع خطيبها وعجبتها بيجامة بيت ب400ج وخطيبها مرضاش يجيبها

6- واحدة عاوزة خطيبها يكلمها كل يوم ويخرجها كل اسبوع ويجيلها في البيت كل شوية ويجيبلها هدايا علشان يبقى شكلها حلو قدام صحباتها

7- البنات اللي بتبص لبعض في الهدايا وكل ما واحدة خطيبها يجيب لها حاجة تقوم التانية تضغط على خطيبها علشان يجيبهالها

8- واحدة زعلانة ان خطيبها بيصرف على أهله وبيديهم فلوش ومش بيديها

9- واحدة لو خطيبها كلمها اقل من ساعتين في اليوم تقعد تعيط وتقول انه مش بيحبها

10- واحدة خطيبها بيجهز الشقة وطلعان عينه وعماله تعيط وتقول انه اتغير من ناحيتها ومش بيخرجها ولا بيصرف عليها زي الاول

11- واحدة زعلانة ان خطيبها ادالها 100ج في العيد مع ان خطيب صاحبتها ادالها اكتر من كده وجابلها فستان وخرجها

اللي اعرفه ان فترة الخطوبة هي فترة تعارف لا أكثر وان الهدايا اللي بنجيبها دي بتبقى بمزاجنا وكرم اخلاق مننا مش حاجة مفروضة علينا ... هل ده صح وللا غلط ..؟

أنا مش خاطب ولو البنات كده يبقى قلتهم احسن ده خراب بيوت مش خطوبة ...

الغرض من الخطوبة حضرتك انك تلبس في الحيط
وتمضي علي قايمة و تجيب شقة و عفش و تعمل فرح
و بعد ماتتجوز تقعد هي في البيت مستنية الدليفري :]
كل ال انت كتبة فوق مش يتحسب علي البنت
يتحسب علي الحم#$ر ال خطبها :]