شكرا يا باشا و الاسعار فى المعقول من كلام مهندسين هناك بالنسبة لعربيات كورى فيها قطع غيار بقت اغلى من الالمانى و مش معمرة زيه و قريب هحاول اجيب اسعار القطع انشاءالله
عرض للطباعة
الله يبارك فيك يا باشا بخصوص الكاميرا هى بتنزل برة بس بالنسبالى مسألتش الصراحه تنفع و لا لا انا مركب سنسور و شايف انو كافى جدا و هى هاتشباك و ابعادها مريحة
بخصوص السيفيك انا كان معايا سوبارو و زى ما قلت المقارنة بعدها كانت بين يابانى و المانى بس الهوندا اول ما تركبها تحس انها بلاستيك و الخامات مش حلوة ابدا و الكاسيت مش تاتش زى الليون و مش معقول تدفع فوق ال ٢٠٠ الف فى عربية لا فيها زينون و لا تاتش و خامات سيئه جدا على عكس الليون اللى فيها كل دة و زينون ليد سيستم مش زينون عادى و بانوراما و تاتش و تربو و قوة و فخامه انا مش شايفها فى الهوندا اللى مش منتشرة اصلا و نادر انك تشوفها عكس الليون اللى بقت ناجحه جدا و انتشارها كويس
حاجة كمان فى الهوندا موضوع صوت البنزين فى التنك اللى تسمعة و انت مفول العربية و بيروح على نص التنك يعنى الصراحة لا تعليق و فكر فى الليون و الالمانى عموما و مبروك مقدما
تشكر على الرد وانا اساسا ميال لليون جدا
بس عندي تعقيب بسيط على رايك فالسيفيك ﻻنها عربية محترمة جدا
السيفيك اداء الموتور الفي تك بتاعها جبار والتسارع تقريبا زي الجولف 7 ال 1400 تربو
البلاستيك فيها كتير فعلا بس مش رخيص ابدا انما اكيد الليون اعلى
السيفيك الجديدة فيها شاشة الأي ميد فالتابلوه بتعرض الكاميرا الخلفية ومتصله مباشر بالكاسيت وبتعرض كل حاجة والتحكم فيها مش تاتش صحيح بس من المالتي فنكشن بتاع الطارة وكمان بتشتغل بخاصية سكرين ميرورينج زي اللي فاﻻندرويد يعني اي حاجة على تليفونك بتعرضها عليها زي الميديا والخرايط وكله وفيها تحكم حتى في اعدادات اضاءة الصالون الداخلي ولون الخلفية وحاجات كتير وكله تحكم مالطارة
اخيرا انتشار السيفيك اكيد اكتر من الليون بس هموما هما اﻻتنين صيانتهم غالية وانتشارهم قليل وليهم زبونهم
هروح انشاء الله اخلص فالليون وربنا يكفينا شر الدي اس جي:majd(4)::majd(4):
اه صحيح
متنساش السيفيك ضمان 5 سنين او 125000 كيلو
الليون سنتين
السيفيك مش بقول انها وحشة بس صعب التسارع بتاعها يكون زى الجولف ٧ التربو
الجولف اكيد تسارع و تجميع اعلى و انا شخصياً جريت مع سيفيك الشكل اللى قبل الفيس ليفت و ماشفنيش ماتنساش يا باشا التربو مع ال سبورت مود بيحول العربية تماما و لو حصل نصيب و جبتها هتشوف دة بنفسك بخصوص الانتريور هى اذواق بس انا مش مقتنع تماما بالسيفيك جرب اركب سيفيك و بعدها ليون و ارجع للسيفيك هتحس بفرق كبير و موضوع الضمان ابسط حاجة من كلام ناس فى قسم الهوندا ان التوكيل مستنى لما تبقى الشكاوى زادت عن حدها عشان يشوفو تغير للتنك و انا ساعتها اكون بعت العربية احسن
بص ياباشا العريبه دي مكنتش فبالي وبعد ما قريت موضوعك امبارج وسرشت عليها دخلت دماغي جدا بس المشكله دلوقتي اني مش هقدر على بنزين 95 علطوول , دلوقتي العربيه دي ببنزين 92 هياثر على الماتور ولا وموضوع الرجه دا علطوول يعني كاني راكب تاكسي شاهين ولا كل فين وفين ؟ , وحضرتك بتقول انها موفره مع بنزين 95 يعني تفويلتها هتمشيك كام تقريبا وبتفولها بكام بعد رفع الدغم انا ممكن افولها كل 3 او 4 تفويلات تفويله 95, انا مكنش فبالي العربيه دي عشان الdsg بس من الواضح ان الناس كلها بتشكر فيه مع السيات يتبقى بس موضوع البنزين دا لان شفت واحد عاوز يبيعها وبيقول فيها رجه غلطوول وبتكركر لو حطيتلها 92 , سرال تاني معلش هيا اعلى فئه مبتنزلش مرايات ضم ؟ وحضرتك اشتريتها منين فين توكيلها الي الاقي عنده متاح جميع الالوان ؟
انا هقولك على اللى عملتة بالضبط
اول ما اشتريت العربية كنت بحطلها ٩٢ و ماشية تمام مفيش اى مشكلة و مش حاسس بأى صوت او رجة كان صيف و دايما قافل الازاز ومشغل تكيف المهم فى مرة بليل الجو حلو قلت بلاها تكيف و فاتح الازاز لاحظت بقى صوت الرجرجة دة بيحصل بس فى طلعة العربية يعنى من الاول للتانى بعد كدة مفيش صوت فى باقى النقلات ... طبعا انا كنت مستغرب جدا بس فى نفس الوقت احترمت العزل الرهيب بتاع العربية دى اللى طول ٢٠٠٠ كم ممشيها ب ٩٢ و الصوت دة موجود و انا و لا حاسس بية :majd(4):
المهم من بعدها قررت افولها ٩٥ و الصوت راح و العربية سحبها بقى اقوى
تفويله ال ٩٢ بتكلفك حوالى ١٤٠ جنية و لاحظت ان العربية بيتاكل فيها اسرع من ال ٩٥ كنت بفولها كل ١٣ يوم مرة
دلوقت مع ال ٩٥ نفس اللف و المشاوير و التكيف و الزحمة لاحظت ان كل ١٠ ايام بحطلها ربع التنك يعنى مش بتكون نزلت للنص و افولها ب ١٤٠ بردة بس ٩٥ يعنى كأنك بتحط تفويلة ٩٢ و انا مش بخليها تقرب للنص و بفولها فمش حاسس بسعر ال ٩٥ و بعتبر نفسى كنت هفول ٩٢
بخصوص التوكيل انا جبتها من فرع العبور و هما ناس محترمين جدا و بيقولك الالوان الموجودة و لو عايز لون معين بيحاولو يوفرولك اللون دة و احسن حاجة ان التسليم فورى بسعرها الرسمى و بتبقى ضامن العربية منهم مش من معرض كان جايبها سواقة و طلع عينها .. انا استلمتها ماشية ٦ كيلو
و هى للاسف مش بتنزل مرايات ضم فى اى فئة بس دى حاجة بسيطة جنب كل المميزات اللى فيها
هو ينفع نحط 92 على 95 ولا غلط .. ولو نويت اغير واحط 95 .. لازم التناك يفضى من 92 ولا عادى.. وسؤال مهم جدا جدا .. دلوقتى لو غيرت وحطيت 95 .. وفضلت ماشى عليه كتير يعنى سنتين او اكتر .. وحصل ظرف .. مثلا خلانى ارجع ل92 .. او بعت العربيه لواحد المفروض والغالب انه هيستعمل 92 .. العربيه هتبقى ايه حالتها لما ترجع 92 .. طبيعى هيقل السحب ودا عادى ..لكن يعنى هتبقى عاديه ولا ممكن يأثر ويسبب اضرار لاقدر الله عليها
تسلم عالتقرير وربنا يباركلك فالعربية
بالنسبة لل ٩٢ التأثير هو السحب بيقل و هتسمع صوت رجة فى طلعة العربية فى النقلة الاولى بس و موضوع التخليط مش عملى الصراحة لأن البنزين ال ٩٥ فى مصر عموما مش بالكفائة المطلوبة يعنى لو خلط هتحس انك حاطط ٩٢ بس و هتحصل الاعراض اللى قلتلك عليها و انا جربت الموضوع دة قبل كدة و حسيت انى شغال ب ٩٢ بس.. و اعتقد ال ٩٢ على المدى البعيد هيأثر على كفائة الموتور .. بس عموما هى هتمشى عادى بال ٩٢ و انا اول ٢٠٠٠ كم كنت ممشيها بال ٩٢ عادى
الف مبروك يا باشا ربنا يديك خيرها و يكفيك شرها.
في موضوع البنزين دة جربت تحط 92 مع Octane booster مع كل تفويلة؟
تاني حاجة و انت سايق في الزحمة لازم تخلي الفتيس عل سبورت أو ستيب ترونيك؟
الف مليون مبروك على العربيه ربنا يباركلك فيها وهى فعﻻ تستحق
تسلم ياباشا انا شفت العربيه النهارده في المصريه بس هما معندهمش غير اول فئه وفعلا شنطتها واسعه وحلووه جدا كانها مش هاتشباك ان شاء الله بنسه كبيره هجيب العربيه دي , بس معقوله فعلا فرق الاستهلاك بين ال92 وال95 للدرجادي على كدا انا افولها علطوول 95 ولا هحس ان فيه فرق ! ربنا يباركلك فيها ياباشا ويديك خيرها ويبعد عنك شرها , طيب عند حضرتك معلومات عن الوانها ؟ في لون رمادي او درجه من درجات ال grey ؟ واخبار الdsg ايه في الزحمه بتمشيها ستيبك ترونك وسبورت ولا عادي انا مقتنع بالجير دا جدا بس خايف من مشاكله وسرشت كتير عليه والي توصلتله ان المشاكل اغلبها لحد 2012 ربنا يستر
الله يبارك فيك يا باشا
موضوع الاوكتين سألت مهندس فى التوكيل قالى بلاش الموضوع دة عشان بيبوظ طرمبة البنزين
بالنسبة للزحمة انا بمشي على السبورت مود و اول ما الدنيا امشى بمشى على ال d
و المريح فى الموضوع دة ان النقل بين الاتنين تاتش بس يعنى مش لازم تدوس على الزرار للنقل بين الاتنين زى فتيس الابيزا و انا شايفها ممتعة جدا فى السواقة و النقل بين النظامين.
مبروك يا باشا مقدما و انا موضوع البنزين دة بجد زى ما قولتلك هى ١٢٠٠ يعنى توفير رهيب مع بنزين ٩٥ كمان حرقة ابطئ من ال ٩٢ يعنى من كل ناحية انا بعتبرها صفقه رابحة بجد و بخصوص الالوان فى الابيض اسود ازرق احمر رمادى نبيتى و هى فى كل الالوان شكلها حلو و ملفت.
الفتيس انا واصل ل ٧٠٠٠ كم دلوقت و بجد مستمتع جدا بسواقتها و مفيش اى مشكلة الحمدلله قابلتنى فى الزحمة سبورد مود و الدنيا فاضية على ال d و النقل بين الاتنين تاتش
+11111
انا جربت موضوع Sport Mode في الزحمة بس المشكلة في حاجتين و عشان كده بفضُل أقلبها Step Tronic
أول حاجة إن وانت واقف و إبتديت تتحرك, اول مالسرعة توصل 5KM/h (لو مشغل عداد Digital) هتلاقي العربية بتنقل من 1 لي 2 على طول, حتى لو بتطلع طلعة مسافة صغيرة في الزحمة.
تاني حاجة أوقات كتبر بمشي في زحمة بيبقى أخري ماشي على 30KM/h مثلا لفترة قصيرة فا Sport Mode بيبقى واخد الغيار التاني وال RPM على 3 و طبعا لو زودت السرعة عشان تاخد الغيار الثالث هتخبط الي قدامك, و لو مشيت براحة لحد ماتوصل للعربية الي قدامك وتقف هتلاقي 9 بيتخانقو على الي يكسر عليك عشان يدخل قدامك في الحارة الي انت ماشي فيها.
ال Step Tronic ميزتو إنك وانت واقف بتنقل من 1 لي 2 لما تحس إن الطريق فتح شوية مش اول م تشيل رجلك من على الفرامل, و في نفس الوقت بتقدر تنقل براحتك في الزحمة على حسب انت شايف الطريق إزاي.
المهم بس إنك متنساش الفتيس وانت معلي الكاسيت عشان ممكن تلاقي ال RPM 4 و واخد اول غيار وانت مش حاسس :)
بخصوص موضوع البنزين, انا ساكن في 6 أكتوبر جنب الحصري و شغلي في أخر صلاح سالم يعني حوالي 100 KM كل يوم رايح جاي و بفاول كل 8-9 أيام عمل يعني تقريبا كل إسبوعين, بس ببقى ماشي براحتي و مش بحرق, و معدل الإستهلاك بيبقي في حدود 6L/100KM, و ساعات يوصل 7L/100KM لو زحمة أوي و حرقت شوية. المهم العربية موفرة في البنزين بشكل عام.
بخصوص موضوع البنزين 92 و Octane Booster أنا "شخصيا" لا أرجحه تماما ل أسباب كتير, و دي بردو حسب كل واحد مقتنع ب إيه.
في معلومة صغيرة احب أضيفها وهي إن معظم أو أغلب معارض السيارات بتشيل ال Sticker الأصلي الي ملزوق على تانك البنزين والي بيبقى مكتوب عليه min. 95 RON / ROZ Super Premium و شوية كلام بالألماني كده و بيحطو Sticker كده مكتوب بالعربي والإنجليزي إن يجوز إستخدام بنزين 92, وكل ده طبعا عشان يعرفو يبيعو.
هحاول في مرة أرفع صور توضح بين ال Sticker الأصلي والعادي وده لينك لكتالوج العربية الأصلي (User's Manual) وفيه شرح عن معنى كل حاجة مكتوبة على تانك البنزين
http://www.seatcupra.net/files/Leon5...eon%20MY13.pdf
تعديل: شرح البنزين في صفحة 206.
الف مبروك يا باشا أختيار جرئ ... انا بس كنت عاوز اعرف هل ينفع يتحطيلها بنزين 92 ولا 95 بس ورأي التوكيل ايه في الموضوع ده
ممكن تقولنا اخبار العربيه دلوقتي معاك ايه و عامله كام كيلو لاني بفكر اجيبها
انا لحسن الحظ لقيتها مع واحد صاحبي وعملتلها تيست درايف وبصراحه رووعه وان شاء الله هجيبها في خلال اليومين دول بس انت متاكد من موضوع مصابيع الانعطاف دي انا عارف انها موجوده في الجولف بس هوا بيقولي مش موجوده في الليون الي موجود ترفع النور وتنزله بس مفيش يمين وشمال مع الدريكسيون هوا معاه اعلى فئه برضوا كلمت الوكيل من يومين ولقيتهم رفعوا سعر ال2015 ل 190.900 وتقريبا مفيهاش فرق بين ال14 ونفسي افهم ازاي اعلى فئه مبينزلوهاش بسينسور يبقى مظبوط مع الشاشه بدل ما نركب برا , اخبار السينسور الي انت ركبته ايه وياترى ركبت اي نووع ؟
بارك الله لك في سيارتك، ولقد لاحظت أنها بدأت تنتشر في الشارع عن ذي قبل.
هي العربية بينزل فيها خاصية التتبع للمنزل زي برا مصر ولا لا يا باشا و المرايات و السقف بيقفل لما بتقفل العربية بالريموت ولا لا ؟!
موضوع مصابيح الانعطاف دة مكتوب فى البرشور و معانا ابيزا موجود فيها انا مش فاهملة مرة يشتغل و عشرة لا و فى الصيانة الجاية هشوف الموضوع دة و لو فى جديد هكتب هنا و موضوع السنسور هما بيحاولو مايطلعوش بسعرها عشان الجمرك و هى فعلا كدة سعرها منافس جدا و انا مركب سنسور عادى كلة واحد اللى فى السوق مفيش اى اختلاف و شغال تمام معايا
ما المقصود بخاصيه التتبع للمنزل
تمام شكرا ياباشا
شكرا علي الرد .. بس بعد اذن حضرتك يا باشا سؤال تاني هل خاصية التتبع بتشتغل لما تفتح العربية بمعني ان الفوانيس تشتغل لما تفتح العربية بالريموت بالليل ولا هي بتفضل شغالة فترة بس بعد ما تنزل من العربية و تقفلها ؟
تقرير ممتاز ... ربنا يباركلك فيها و بعدك عن شر طريقها :)
كان لية استفسار
الفتيس بتاعها هل وجد فيه مشاكل ولا حاجة ؟ ولا عدلوه و مبقاش فيه مشاكل ؟؟
شكرا يا باشا لذوقك
بخصوص الفتيس الحمدلله مفيش اى مشاكل لحد دلوقت بالعكس مستمتع جداً بالاداء القوى للفتيس و انظمة القيادة المختلفة فيه و المشاكل عموما كانت لحد ٢٠١٢ بعد التعديلات مفيش اى مشكلة و محدش بيشتكى من الفتيس
و الموضوع مش اكتر من فوبيا بقت عند الناس من الفتيس اللى فى رأى الشخصى هو فتيس عبقرى بمعنى الكلمة
حضرتك اطمن و سوق عربية ترضيك و تستمتع بيها مش ترضى الناس و اللى يطمنك ان من ٢٠١٣ محدش اشتكى منه و لو حصل حالات فردية فى ضمان يضمنلك حقك