الموضوع: قالك العربية مش في الضمان فماذا نحن فاعلون ؟؟

سلام عليكم :)
حأحكي قصة صغيرة حصلت النهاردة ..
ومنتظر رأيكم وتوجيهاتكم في ما ينبغي فعله ..
=====
خرجت بالسيارة byd f3 موديل 2012 من منزلي لمقر عملي اللي علي بعد 30 كم تقريباً ...

ولاحظت أن البنزين قرب يخلص فقلت مش مشكلة بعدين ونا مروح بقي علشان متأخرش بقي عيني جت علي العدادات كلها

مكنش فيه اي شيء ..

وصلت الشغل وركنت ومشيت وبعد 5 دقايق تقريباً كنت جنب العربية بشيل حاجات خدت بالي ان فيه بخار

مية شديد طلع من قدام ( وهي مطفية ) ..

وطلعت لقيت بخار مية شديد ومية تحت العربية كده .

فتحت عشان ابص

1- بخار المية مغرق الموتور ومتكثف علي كل شيء وده سبب المية اللي نقطت ع الارض

2- الريدياتير مليان مية ..

3- القربة مليانة عند العلامة ..

4- الغطاء البلاستيك اللي علي وش الريدياتير مشقوق من الامام ومن الخلف شق حوالي 6 سم وده كان

سبب انبعاث البخار الشديد ..

قلقت سبتها لحد ما بردت خالص .. وقلت اطلع بيها علي التوكيل .. وعيني علي مؤشرالحرارة ..

المؤشر مزادش عن النص وبعد بالضبط 5 كم وانا بهدي في مطب العربية وقفت مني ولمبة الزيت نورت !!!

نزلت وبصيت علي الزيت .. مضبوط

القربة مضبوط

الريادياتير تاني مضبوط

مفيش حاجة بتنقظ لا مية ولا زيت ..

بس ريحة السخونية مع الشحم والاحتراق قلقني .. قلت بلاش افتري ..

طلبت ونش عشان ياخدني ع التوكيل ..

وقد كان ..

وصلت التوكيل شرحتلهم اللي حصل ..

دخلوها وقالي مدير الصيانة انت قرصت عليها ومشيت بيها وهي سخنة ..

قلت له الكلام ده محصلش .. مؤشر الحرارة معليش ..

وانا اول ما بطلت شلتها علي ونش وجبتهالكم ..

فسكت شوية كده وقالي لا ازاي امال هي عملت كده ازاي ؟؟

قلت له ما انا جاي لكم علشان تقولوا لي ايه اللي حصل ...

وبعدين بقوله حتغيروا الوش ؟؟

قالي لا حنغير الريدياتير كله ..

قلت له : طب العربية لسة في ضمانها ..

قالي لا لا كده برة الضمان !!!!!!!!!!!!!!!

قلت له ليه ازاي يعني ؟؟

فقالي حنشوف بس الاول ونقولك ..

سكت الصراحة وقعت افتكر اني مخرجتش العربية برة التوكيل مرة واحدة احتراساً لحاجة زي كده في يوم

من الايام .. وضغطي علي الصراحة ...

يعني انا استحمل المصنعيات الغالية والوقت الضايع .. مقابل ايه في الآخر ؟؟؟

وبعدين قالي ثم حضرتك رخصة العربية 2011 مش 2012

فقلت له ده كتيب الضمان اهو 2012

والرخصة الحبر مش مضبوط بس عامة هي 2012 وممكن تتأكد ..

فسكت وقالي : انت عملت اي صيانة برة ولو مرة ؟؟

تمالكت نفسي وقلت له : لا محصلش .. ممكن اجيبلك الفواتير كلها لو عاوز

دخلنا الحسابات وطلب كشف بيان عن العربية المحاسب قاله كل الصيانات هنا ...


فسكت ...

قالي حنشوف فيها ايه ..

بعد ساعتين ..

جه مهندس قالي العربية حيتغير فيها الريدياتير والسنسور والثرموستات ...

ليه ده كله ؟؟

قالي الريدياتير مخروم ... ممكن زلطة او طوبة !!!!!!!!!!

طبيعي يعني معلومة اي طفل يعرفها .. لو مليت حاجة مية وهي مخرومة حتنقط وحتفضي ...

وده محصلش ...

بس انا معلقتش ..

كام يا حج الكلام ده كله ؟؟

تيك تيك تيك 1500 بالمصنعيات !!!!!!!!!!

قلت له عامة انا في الضمان .. ومعتقدش اني ارتكبت اي اخطاء جدول صياناتي بالكامل مضبوط وحملت

العربية علي ونش وجبتها ممشيتش بيها ..

فقالي بص .. مش عاوزك تحط امل علي موضوع الضمان ده ..

ليه يا بشمهندس ؟؟

قالك ايه اصل حضرتك العقد شريعة المتعاقدين ..

وجابلي كتيب الضمان وشاورلي علي المتعلم بالأحمر ده

وبعدين قالي ..

حضرتك بقي معملتش الصيانة بالشكل المطلوب ...

اللي هو ازاي .. راح جايب اول صفحة اللي في الكتيب المثبت فيها صيانة ال5 الاف ..

وقال : حضرتك شاري العربية يناير 2012 .. ومكتوب هنا صيانة الخمسة اما بعد مرور 5 الاف او 3 اشهر ايهما اقرب .. !!!!!!!!!!!!!!!!!!!!!!!!

قلت له مش واخد بالي يعني !!!!!

حضرتك بتلزمني اعمل 5000 في 3 اشهر او يسقط الضمان عني ؟؟؟؟؟ ده في اي عرف ده ؟؟؟

افرض انا مسافر ؟؟؟ افرض مبعرفش اسوق وبتعلم واحدة واحدة .. طالما مفيش استهلاك يبقي خلاص ..

قالي بلهجة المنتصر :) هو حضرتك الزيت اللي انت بتحطه مش بيخش الكارتيرة .. وركنته بتأثر علي المحرك !؟؟؟؟

يا سيدي الفاضل احنا بنتكلم في دورة تبريد مش دورة زيت .. المية اما بتتركن مش بتبوظ والله !!!!

ودخله ايه ده بالريدياتير ؟؟؟ وشق الوش ؟؟





خلاصة القول .. موصلناش لحاجة ...

هو مصر علي كلامه .. وانا الصراحة مش عارف اعقلها بشكل منطقي ..

ولقيت اننا حنخش في جدل بيزنطي ... بس اللي أنا متأكد منه اني مش غلطان في أي شيء ...


انا مش حأسكت ورايح بكرة الفرع اشوف القصة ... بس حبيت اتشارك معاكم الأراء ..

فايه رأيكم ؟؟

ايه الحل ؟