يارب تساعدوني في الاختيار بين الكفاءة والقوه والاعتماديه وقطع الغيار المعمره
يارب تساعدوني في الاختيار بين الكفاءة والقوه والاعتماديه وقطع الغيار المعمره
الاتنين أحسن من بعض بس بصراحة أنا ميال أكتر للكورولا
انا هاخد الاسترا :)
مشكور طبعا للناس اللي رديت عليا بس اتنين بس بعد 33 مشاهده فين الردود يا رجاله
Opel astra
اعتقد سواقه و اداء و متانه و متعه سواقه استرا .. كورولا زي اي ياباني جميله و ناعمه و ريسيل محترم .. بالنسبالي اوبل اشيك بس لو هاتبيع قريب يبقي كورولا .. اتمني يكون رايي صائب
ممكن اعرف ليه سكودا a7 مش في حسابات حضرتك .. دلوقتي كمان في جيتا بقيت ب 200
كورولا
الكورولا اسهل كالعادة
والتصميم والاختلاف لصالح الاوبل
لو بتدور علي الشكل ومش فارقة معاك سعر البيع وا سهولة البيع هات طبعا الاوبل بس اعمل حسابك علي ان قطع الغيار و الصيانة غالية
الكورولا غالية في مصر على الفاضي انت بنفس الثمن ممكن تجيب امكانيات اعلى في انواع اخر الميزة الوحيدة للتويوتا عموما ان الموتور صوته ناعم
كورولا ناعمة واوبشن اعلى وسحب احسن واكتر اعتمادية واعادة بيع احسن بس الاوبل اكتر ثبات وصاج اقوى
الاسكودا a7 الفتيس بقى 6 سرعات مش dsg و الموتور 1600 مش تربو
المقارنه فأي حاجه لصالح الاسترا طبعاً الا اعادة البيع للأسف لو بتدور علي عربيه تركبها اتوكل علي الله في الاسترا
دخل الرينو الفلوانس في حساباتك عربيه فوق الممتازه.
هقول لحضرتك شئ من وجه نظرى التواضعه لانى فى نفس الحيره بس بعد اللف والتدوير و المعاناه ارشحلك التويوتا لييييه بقى
اولا : التويوتا فعلا عربيه محترمه جدا وتصميمها ممتاز
ثانيا: التويوتا فعلا زى الاخوه ماقالوا اعاده بيعها ممتازه زى التجار ما بيقولوا فلوسها فى شنطتها رغم ان فعلا ممكن تكون فى عربيات ركوبتها احسن منها وده بدون تحيز ليها بس المشكله ان فى مصر طريقه تفكير الناس عندنا ان التويوتا سعر بيعها عالى فكده ولا كده الاوبل والاسكودا والهوندا والجيتا كمان بيعهم عمره ما هيكون اسهل من بيع التويوتا رغم انهم عربيات محترمه يعنى المشكله فى طريقه تفكير الناس يعنى كل اللى يعجبك والبس اللى يعجب الناس عشان متخسرش فلوسك فلو العربيه هتخليها معاك شويه خلاص خليك فى الاسكودا او الهوند اانما الاوبل لاء انما لو بتفكر تغير بعد شويه طبعاااا التويوتا انا عن نفسى هشترى التويوتا وان شاء الله و لينا نصيب نعيش يعنى اقل شئ هخليها 10 -15 سنه وممكن اخليها لابنى واجيب عليها لانها عمليه فعلا ارجوا انى اكون افدك
نسيت اقول لك الجيتا جميله بس بتحك فى المطبات انما الصراحه ركوبه
اوبل استرا طبعا كفخامة وجودة خامات وثبات وعوامل امان وتصميم ساحر كل سم مدروس الالمان ما بيهزروش خصوصا في معيار الجودة حتى لو هايخسروا مقابل تواجدهم في سوق العالمي الجودة والتكنولوجيا هي رأس مال الالمان سعرها متوافق مع سعرها في أوروبا
واضيف راحة الركاب ومتعة القيادة والاداء علي الطرق ااسترا تكتسح متور ecotech 115 حصان موتور عالي التقنية وعزم اقوي من موتور كورولا وفتيس اوتو 6 سرعات رائع واكثر ما يميز اوبل استرا
توكيل منصور اقل من االفطيم في الاداء ولكنه ملتزم بالضمان وللعلم توكيلات مصر كلها سيءة لضعف جهاز حماية المستهلك امام الشركات الكبيرة
الكورولا عربية لا تساوي سعرها واغلى من الدول الاخري وبها عيوب ولكن شعبيتها وثقافة الناس تجعل المشتري لا يري هذه العيوب الا من يعرف معنى كلمة سيارة
موتور الكورولا ذو 122 حصان لا غبار عليه ومجرب في موديلها السابق بدون مشاكل ولكن اقل تكنولوجي من استرا
فتيس cvvt موفر واقتصادي ويجعل السيارة اقل استهلاكا للوقود وهذا هو هدف تويوتا في موديل كورولا معيار الاقتصاد
قطع الغيار والصيانة السيارتين متساويين
عيوب
1- السيارة ضعيفة من الخارج وحساسة جدا كصاج ودهان ضعيف وده هيؤثر على رونقها بعد سنتين او ثلاثة
2- تم تعديل ارتفاع السيارة لكي يناسب شوارعنا (اول مره اشوف هكذا تعديل في تاريخ السيارات في العالم) حسابات الثبات والتعليق للسيارة اختلفت وشكل السيارة اختلف من الخلف ومن الجانب وزي ما يكون وشها في الأرض، وده حصل لأن موضوع الأرتفاع حرج وهيكون مسمار في نعش هذه السيارة ذات الشعبية الواسعة يعني إرضاء لذوق المستهلك وده في رأيي خطأ فادح ولم يحدث في دولة أخري لنفس الموديل
3- الخامات الداخلية للتابلوه والفرش ما بين متوسطة ورديئة واقل من مستوي تويوتا المعروف وهذا بسبب التقفيل التركي ونسبة المكونات التركية (اليبان هزروا في الموضوع ده) ولي رأيي ان تركيا فاشلة في صناعة السيارات والصناعات المغذية لها
فيه شكاوي من الفرامل واصوات من التابلوه والعزل والتكييف اقل كفأة من موديلات كورولا السابقة
وانا بعتذر اني قارنت اليباني بالألماني على رغم من جودة اليباني لكن احنا بنتكلم على معقل وبلد السيارات في العالم
ملحوظة هيكل اوبل استرا تم تصميمه ليتحمل محرك تربو قدرته 180 حصان واسترا تميل لمعيار الرفاهية اكثر من معيار الاقتصاد عكس كورولا
انا فعلا حصرت الموضوع علي العربيتين دول لاني بدور علي الاعتماديه لاني هاستخدم العربيه في شغلي وانا بسوق كتير يعني مينفعش معايا عربيه زي الهوبدا لانها واطيه جدا وال a7 صحبي جابها وجابت موتور بعد 25 الف كيلو وقالولوا اصل ده عيب بنزين رغم انه بيحط 92 زي ماقالولوا .
اعتقد مشكله a7 كانت في الموتور التربو 1400 ,, لكن هل صاحب حضرتك ده موتور 1600 الجديد ؟؟
الكورولا اذا الوسع يهمك
استرا افضل فخامه اعلى وصاج اقوى
فعلا
بس فى مشكلة فالاسترا اكبر من مجرد التصميم سىء للكرولا
هى انها بتاخد بنزين 95 ودى اكبر مشكلة تواجة ملاك الاسترا لان كلهم زينا بيحطوا بنزين 92 وادخل قسم الاسترا فالمنتدى و شوف
ومش معقولة تباى راكب استرا المانى 2015 و فيها صوت كركرة وانت ماشى
الكرولا + التصميم اللى علية خلاف فهى تمنها مبالغ فية جدا
حاول تدور اكتر وتدخل فالمقارنة موديلات تانية
corolla is better .....more durable and can be resale easily
رأيي المتواضع : أسترا .. متانة وثبات، شكل وإمكانيات، قطع غيار غالية ولكن معمرة ( وفيه إيه قطع غياره مش غالية ) ، مجربة في السوق المصري منذ عدة سنوات وبلا مشاكل تذكر، سعرها منطقي ومعقول وغير مبالغ فيه، ألماني تجميع بولندي يعني كل معايير الجودة الأوروبية، توكيلها عامل عرض كويس حاليا ( موديل 2015 بسعر 2014 )، شغالة بنزين 92 عادي ( وممكن نتأكد من ملاكها ) .. والله أعلم.
لو ليك أسترا
لو ليك وللزمن كورولا
الرأى الأول:
بس هقولك حاجة الألمان رقم 1 فى الصناعات الثقيلة
يعنى لو فاتك الألمانى ....؟
الرأى الثانى:
حسن السوق لا حسن البضاعة
اوبل استرا لو مش هتبيع قريب و لو هتعرف تتعامل مع منصور
توكيل تويوتا من افضل التوكيلات في مصر ودي حقيقه
توكيل منصور ما عجبنيش (عن فرع رابعه وجسر السويس )
يعني مثلا تلاقي اللي شغال في عربيتك بيحدف الفردة بعد ما يفكها وهو شغال يرمي المسدس والعده على الجنط وبهدلتهم لما شفت الموضوع دا ..
توكيل منصور تحس ان كل اللي شغالين فيه اخرهم الشيفروليه
اما كمقارنه بين عربيتين فالاسترا طبعا احلى كعربيه واداء
بس الكورولا مش وحشه ابدا وشيك جدا
معظم الاراء بتقول استرا ..والعقل بيقول كده وان كان اعاده بيعها هيبقى اتقل شويه من تويوتا .. بس واللهى الموضوع ده راحه نفسيه واذواق.. شوف انت مرتاح فين واتوكل على الله .. ربنا يقدملك مافيه الخير ليك
انا مايل للاسترا كتييير بس موضوع البنزين 92 دا قالقنى بصراحة ....... وياريت اى حد من اخواتنا اللى موجودين فمصر وعارف رينج الاسترا بفئاتها يقولى الكماليات الموجودة وسعر السوق الزيرو لانى برة مصر وكنت عاوز اشترى واحدة لما انزل بس مش عارف الاسعار
يا جماعة انا جديد هنا وف نفس الحيرة بين العربيتين والله من كتر الحيرة بقيت مش عارف اعمل اي ساعدوني والنبي
Opel Astra طبعا بدون تردد شياكة وفخامة وانا كنت ناوى عليها كمان شوية بسم الله ماشاء الله عليها بجد عربية خطيرة
أنا بقول الكورولا بقالها سنه ما حدش اشتكى منها و ممكن الهوندا لانها دلوقتي اعلى من الكورولا ارتفاعها تقريبا ١٦.٥
رغم ان انا مبحبش الكورولا وبميل للاوروبي عامة، الا ان الكورولا هي اللي تكسب في المقارنة دي.. الاسترا فيها عيب لا يجعلها سيارة عائلية باقتدار وده لانها ضيقة من ورا. انما الكورولا الجديدة واسعة من ورا بشكل ملحوظ واللي يقعد فيها يشعر بالراحة. بعدين الاسترا لو ركنتها وعديت الشارع وبصيت عليها من بعيد هتلاقيها فيها شبه كبير اوي من هيونداي النترا البومباي القديمة، وبصراحة دي اكتر حاجة فصلتني منها.