تركيب فتحة سقف لأوبل استرا

**اكرم عوض حسن** · 26-10-2014 11:35 PM

حد فكر قبل كدا يركب فتحة السقف بتاعة الاسترا الاصلية بتاعة العربية للعلم ان العربية من غير فتحة

يعني لو حد ركبها يعني ياريت يفيدنا جابها بكام وجابها بسقفها ولا لوحدها مثلا وسعرها يعمل في حدود كام وركبها ازاي

عايزين شوية صور حلوين كدا لطريقة تركيبها علشان تبان انها بتاعة العربية مش ملعوب فيها ومتركبة

علشان عايز اركب واحدة ومتبانش انها مفتوحة في السقف او متبهدلش الدنيا مستني ردود الاوبلاوية

**اكرم عوض حسن** · 27-10-2014 12:06 AM

فين الردود الحلوة طيب!!

**haisam ali** · 27-10-2014 01:05 AM

قدامنا حل من الاتنين ياكبير ولازم سمكرى فوق الفنان بشويه :-

١- هتشتري سقف كامل بتاع عربيتك فيه الفتحه ... ويفك بنط الفابريكه ويركب الجديد برضه تبنيط وده الحل الممتاز لأنك لو جبت سقف سليم اوى وبلون العربيه ممكن مترشش غير المناطق اللى فيها البنط اللى هيا تحت الجرايد بتاعت السقف عندك اصلا

٢- هتشتري سقف كامل بتاع عربيتك برضه فيه الفتحه ... وتقص حوالين الفتحه بتاعت السقف وتفتح عندك على نفس القصه وتسقطها وتلحم ودى هيترش فيها السقف بالكامل ولازم سمكرى مالوش حل عشان يظبط كل حاجه باللملى بمعنى الكلمه

وعموما مفيش احسن من الحاجه اللى على أبوها لها مذاق خاص

أسف للاطاله وبالتوفيق فى اختيارك باذن الله

**dragon1** · 27-10-2014 01:44 AM

انا افضل كده بتاع بلده احسن كمان ليه مهتم اوي بفتحه السقف العربيات بفتحه السثق او المكشوفه دي علشان الاطلاله الساحره للمعمار المحيط والبيئه الجميله وانت حوليك هنا زباله ومعمار متهالك ووشوش ربنا يهديها لو في عربيات مصفحه بتتباع كان الواحد اشتراها احسن ههههههههه بالتوفيق حبيبي

**ahmedkasem** · 27-10-2014 03:36 AM

بلاش احسن عشان الموضوع ده هيعيب العربية وهيقلل من سعر اعادة بيع العربية
والكل عارف طبعا يعني ايه عربية مغيرة سقف
يعني انا لو مكان اللي هيشتريها اكيد طبعا هشك ان العربية كانت مقلوبة قبل كده لا قدر الله عشان كده غيرت السقف
فنصيحة بلاش احسن

**yasser100** · 27-10-2014 09:50 AM

طالما ما اشتريتهاش من الاول فابريكه مع العربيه . ما فيش داعى نهائي تعملها . تقفيلها لا يمكن يكون زى الفابريكه . هاتتبهدل لو فيه مطره او بتغسل العربيه و التراب و قفلها هايكون سئ .

استخدامها حلو لو فى طريق سفر او طرق مفتوحه زى العين السخنه او الساحل الشمالى . لكن داخل البلد نيللللله و هباب اتوبيسات و ميكروباصات و ممكن تلاقى اى حد يرمى عليك حاجه من فوق ههههههه