الموضوع: رحلة إلى العريش والشيخ زويد, بصحبة مواطن سيناوي ..

لقيت بوست على الفيس بوك كاتبه مواطن سيناوي بيوصف فيه سيناء بشكل بديع
انا رحت سيناء من 7 سنين و شوفت حاجات كتير من اللي بيقولها.. فيه شوية سياسة في النص وفيه بعض السخرية البسيطة. بعتذر للزملاء يتجاوزوا عنهم لان كلامه فعلا يستحق القراءة.


الى كل اللى فاكر الجونه و الغردقه فى سيناء و عمال يفتى و يقرر فى مصير حياة 300 الف مصرى عايشين فى شمال سينا ..انت بدال ما تاخد طريق السخنة و تدخل يمين هاتلف بعربيتك و تطلع على طريق السويس شمال ...و بعدين متدخلش نفق احمد حمدى لو متعود و انت رايح على شرم الشيخ او تحضر حفلة عمرو دياب فى راس سدر ..


هاتكمل لحد طريق الاسماعلية ...هاتروح عند معدية نمرة 6 فى الغالب هاتقف من 3 الى 4 ساعات مستنى دورك و لو متعودتش على الانتظار الا و انت بتعمل بيبى فى الرست هاوس و بتضرب الكابيتشينو ولا السلاش ممكن تاخد عربيتك و تطلع على تفريعة الطريق المودى على القنطرة و بورسعيد ...هاتلاقى كوبرى مهيب عامله اليابانين علشان يربطو قارة اسيا بافريقيا و بيخليك تعدى الى سينا فى 3 دقايق ..متدخلش منه علشان الكوبرى مقفول بقالة سنه لدواعى الامن القومى و متحاولش تستفسر يعنى ايه دواعى امن قومى احسنلك ..


عدى مدخل الكوبرى و متاخدش فى بالك من غرف الاشعه اللى اتبنت علشان تكشف على العربيات و اتصرف عليها ملايين و متسابه من غير ما تتكمل و تشتغل بقالهم 5 سنين ...ادخل بقى على معدية القنطرة ...ها ايه رياك ..بتترحم على التلات ساعات اللى كنت هاتستناهم على معدية 6 فى الاسماعلية ...هنا بقى ممكن تبات ليلتك على المعدية لحد ما تعرف تعدى الشط التانى من القناه اللى العساكر المصريين عدوة فى 10 دقايق بالمراكب المطاطى في 73 ...


ها بتفكر ترجع تانى طريق السخنه ولا لسه عندك طاقه تكمل لشمال سينا اللى عمال تقرر للحكومة تعمل ايه في الزرع و الحجر و البشر ...عديت الحمد لله المعددية و دخلت شمال هاتلاقى مبانى ضخمة جدا على شمالك بمحاذاة القناه ..دى فرع جامعه حسن راتب بعد ما جامعة سينا فى العريش بقت كامل العدد ..ادخل يمين و ابتدى امسك الطريق الساحلى الدولى اللى بتسمع كل يوم عن تفجير مدرعات عليه ...متتوترش انت لسه قدامك حوالى 200 كيلو لحد ما توصل للمنطقه الملتهبه ...


هاتمشى بتاع 80 كيلو لحد ما توصل مدينة اسمها بير العبد و تكون عدين على منطقة بالوظة و رمانة ..شايف على يمينك فى مجدينة بئر العبد مبانى كتيير كلها مزارع كتاكيت ..ايوه دى مزارع الكتاكيت اللى بتربيلك الفراخ اللى انت بتاكل صدرها مشوى مع الخضار سوتية اللى بيجيلك من مزارع الشيخ زويد علشان الخضار بتاع الشيخ زويد انضف الف مره من الخضار المسقى من مية المجارى فى الدلتا و تخوم القاهره ...


بعد ما تيجى تخلص مدينة بير العبد هاتلاقى مبنى ضخم واقف لوحده فى العراء و حواليه كمية مهولة من عمدان الاناره فى ةوسط الصحرا و بينورها كل يوم بليل ...دى بقى المنطقة الصناعية لبير العبد اللى مساحتها مليون متر و خلصو ترفيق 250 الف متر جاهزةة للاستثمار بس الجكومة بعافيه شوية و بقالهم 7 سنين بيطفو العواميد و ينورها من غير ما ينتهو من كراسة الشروط بتاعة الانشطة الاستثمارية و الصناعية فى شمال سينا ...يعنى تقدر تقول دى نواة لمينا جبل على اللى عمل نهضة دبى بس احنا قررنا اننا نفضل نولع فى النور و نطفيه لدرجة ان مدير المنطقة الصناعية اللى تابع للمحافظ مخدش مرتبة بقالة شهرين ...


خلصت مدينة بير العبد و دخلت تانى فى الصحراء الجرداء و شامم هوا البحر و اليود ..بص يمينك هاتلاقى بحيرة البردويل ..واحده من اجمل بحيرات العالم و اكثرهم نقاء اللى اسرائيل ايام الاحتلال لسينا طلعت منها دنيس بردولى اكلت و احتكرت كل مطاعم اوروبا بس احنا الحمد لله بدل ما نطلع منها 30 الف طن سمك فى السنه بنطلع منها 3500 طن بس و بنمنع الصيد فى البحيرة 4 شهور فى السنه الا لو كنت جايب تصريح من لوا حبيبك هناك ...


خلاص قربنا على العريش متقلقش هاتلاقى كمين اسمه كمين الميدان بعد ما تعدى قرية الروضة بشوية و تعدى من على شمالك محمية الزرانيق ..اكبر محمية طبيعية فى مصر و فيها الملاحات اللى بيطلعو منها الملح اللى بيتصدر علشان يدوب التلج فى شوارع اوروبا فى الشتا ...حظك حلو لو وصلت العريش قبل المغرب علشان حظر التجوال لانك لو وصلت بليل فى الغالب هاتبات على كمين الميدان على بعد اقل من 10 كيلو من العريش و استمتع بكثبان الرملة المتحركة و هى بتخش لاحد البوكسر بتاعك ...


هاتدخل العريش هاتلاقى اطلال فنادق كانت زاخرة بالسياحة الاجنبية و السياحة الداخلية ..هاتلاقى نشاط تجارى على استحياء بيلحق يادوبك يجيب اجرة العمال و تكلفه البضاعة قبل ما يقفل علشان الحظر ...هاتلاقى شجر النخيل طالع على البحر فى منظر ابداعى لو كان موجود فى حته تانيه كانو حولوه لاجمل و اشهر شواطى الدنيا ...


كمل بقى بعربيتك لحد ما تخلص الطريق و تقابل مجرى السيل اللى الحكومة صرفت فيه مئات الملاين بعد ما السيل جه فى 2010 خد البيوت و المنشئات الحكومية فى سكته للبحر فى اكبر هدر بيحصل فى التاريخ لمياه الامطار على العكس من الكيان الصهيونى اللى استغل نفس السيل فى انه يحفظها على سدود متدرجة فى جبال النقب مكنته من انه يزرع كل المنطقه و يصدر كل حاجه بتطلع من الارض المباركه الى كل العامل ...


هاتلاقى كبارى مسروق فيها بتاع 100 مليون جنيه و ردية المنظر و الجوهر بتعديك ناحية حته اسمها الضاحية ...كل الكبارى على مجرى السيل مقفوله الا كوبرى واحد بيتلافى مرورك من امام اى مبنى حكومى او سيادى ..يعنى مش هاتعرف تعدى من قدام مبنى المحافظة او فندق الجيش او مكتب المخابرات او مديرية الامن او المستشفى العسكرى و الشوارع كلها مقفوله و اللى عايز يعدى بيقابل يافطة صريحة بتقول اللى هايعدى هايتعرض لاطلاق النيران ...


ربنا كرمك و عديت من كل الطرق الالتفافيه من وسط العريش الى الضاحية علشان ترجع تمسك الطريق الدولى تانى فى ال40 كيلو من العريش الى رفح ..هايقابلك كمين الريسة ..ده الكمين اللى بتسمع انه اتضرب للمرة 257 صباحا و مساء ...مع انك لو عديت بعد الكمين و دخلت شمال فى المدق هاتلاقى نفسك فى شاطىء الريسه اللى ربنا جعل منه صورة مبسطة عن شكل الجنة و هواها سيبك منه لان هاتلاقى نقطة حرس حدود تجيلك تقولك بتعمل ايه هنا و تمشيك ...


كمل بقى على الطريق و عى على الكماين اللى استحدثت من سنه و نص و اللى خلت المسافة من العريش الى الشيخ زويد بدال ما تروحها فى 30 دقيقه الى اكتر من 3 ساعات ده لو متقبضش عليك فى السكه او ما خدتش رصاصة بالغلط بسبب الاشتباه انك ارهابى ..


هاتدخل الشيخ زويد هاتلاقى مبنى حصين بيقولو عليه قسم الشرطة ..هو كان اتهد ايام الثورة بسبب الظلم ايام العادلى و حاليا الظباط اللى فيه لا تجروء انها تخرج راسها من الشبابيك ...حواليه كان زمان فى سوق المدينه الشهير و حاليا هو اطلال و اشباح و ركام ...كمل بقى بعد الشيخ زويد 10 كيلو كمان لحد ما توصل الى رفح ..


المدينة اللى اول ما تقف على الحدود و تشوف عمرانها مقابل العمران فى غزة هاتحس ان رفح هى المتحاصرة مش غزه ..انت وحظك لو عرفت تعدى من ناحية البحر و تشوف اطلال مستعمرة ياميت اللى كانت بتطلع الزهور يوميا لكل اوروبا ..هاتشم ريحة المرمرية و الفواكة اللى عمرك ما عرفت طعمها بجد و الخضار اللى بتفتكره فاكهه ..هاتشوف ناس اتحدت الظروف و الاهمال و التهميش و عملو مزارع زيتون و خضار و فاكهه لو كان فى تنمية من الجولة كانت عملت بيهم المعجزات ..


لما تبقى تروح و تشم هوا البحر فى الشيخ زويد و تتعامل مع اهلها و تاكل معاهم من اكلهم و تعيش معاهم عيشيتهم و تشوف المية اللى مبتوصلش و الكهرباء اللى مبتجيش و الطرق المقفولة و التنمية الغائبة و السرقة الحكومية فى كل حاجه و اى حاجه من اول المستشفيات اللى العيان بيدخل يموت فيها مش يتعالج لحد المدارس اللى دانات القذف العشوائى مخرمة حيطانها ابقى ساعتها اتكلم و اتحزق و صرخ صراخ السكارى فى افتر 8 ابيدوهم عن بكرة ابيهم ...و بكده تبقى شاركت فى الجريمة الكاملة اللى بترتكب فى حق بلدك و اكملت عملية التحول البيولوجى من انسان الى حيوان ....


مش هاقولك ادخل جنوبا للقرى الحدودية المهدية و نجع شبانة و الجورة و البرث و مش هاقولك ان لولا ناس خرجت من القرى دى مكنش جيش بلدنا يقدر يواجه الجيش الاسرائيلى و يحقق عليه انتصارات ..مش هاقولك عن ابهاتهم اللى حمو و عالجو عساكرنا فى 67 و دفعو التمن دمهم علشان يعدوهم الغرب ..


مش هاقولك كام جاسوس طلع من الدلتا و كام جاسوس طلع من اهل سينا علشان تعرف انهم مفرطوش لا فى ارض ولا شرف ..مش هاقولك لو انت عشت و عانيت ربع اللى هما عانوه من شك و تخوين و تهميش و ظلم و بطش و برغم كده لحد اللحظة هما اكتر ناس مجنينين الصهاينه و بيعملو ضدهم عمليات استخبارتية نوعية مساعدة و واجب لبلدهم ومنهم اللى مات و منهم المنتظر برغم اهمال الدولة و عدم حمايتها ليهم لما تغولت الجماعات المتطرفة و هددتهم فلم يجدو فى ظهرهم الا العراء و التجاهل و الاهمال ...فظلمو مرتين ..عندما تركوهم بلا تنمية فريسه للفقر و الجهل و التطرف ...


و عندما قررو يضربو الارهابين فكان الضرب العشوائى من نصيبهم فى اموالهم و بيوتهم و اهلهم ..اللهم احفظ اهلى فى سيناء و احفظ دماء جنودنا و الهمنا الخلاص من منظومة الجهل و التطرف و الفشل و التكبر التى تحيط بنا و تتحكم فى امرنا




طبعا منقول, دا رابط المنشور الأصلي :
https://www.facebook.com/Misry.In.UA...52747000491357

المشاركة الأصلية كتبت بواسطة karim alaa

موضوع رائع و متفق معاه فى كل كلمه هو قال كام معلومه مش سليمه عن نجاح المشاريع زى ميه المطر الى هتزرع الجبل كله بس فعلا موضوع رائع و حقيقى جدا و هو ده اهمال الحكومه فى كل القطاعات و للاسف مستمر :(

ممكن توضيح اكبر للنقاط غير السليمة من وجهة نظرك ؟
انا مهتم افهمها اكتر.