الموضوع: تحذير لأصحاب العربيات القديمة..

انا ساكن في العجوزة,
النهاردة كنت قاعد بشرب القهوة في البلكونة, عارفين صباحية يوم الجمعة الجو بيبقى هادي والناس قليّلة في الشارع,
خدت بالي من واحد كده في آخر التلاتينات حاطط فوطة على كتفة واقف جنب عربية 128, فتح الكبّوت بتاعها من برّه كده بخبطة ع الجناب مش عارف ازاي, وقعد يبصّ على مكوّنات الموتور كده كأنّه بيدوّر على حاجة معيّنة..

قلت يمكن صاحب العربية وبشيّك على حاجة..
اتفاجئت ان في ناس ماشيين من بعيد قام الراجل اتربّك كده وقفل الكبوت بسرعة وفضل واقف جنب العربية, الناس عدّت قام فتح الكبوت تاني,

انا قولت يبقى في حاجة غلط في الموضوع.. فضلت متابعه من ورا الشباك لقيته قفل الكبوت بتاع ال128 وراح لعربية تانية قديمة برضه نصر تقريبا راكنه جنبها الناحية التانية..

وبرضه يبصّ يمين وشمال لحد ما يتأكّد ان الشارع فاضي وبنفس الحركة, قام فاتح الكبّوت بخبطة من ع الجنب بكل سهولة كأنه بيفتح كيس شبس, وفضل يدعبس جوّه عايز يسرق حاجة.

انا دمّي فار وقلت لو زعّقت من فوق هيجري ومش هلحقة, قمت لابس الشبشب وواخد معايا brass knuckle زي دي:



ونزلت جري ع السلالم, أوّل ما طلعت لقيته بصّلي وقفل الكبّوت على طول وبيعمل نفسه ماشي في حاله, قمت جاي ناحيته بقولّه خد تعاالى يابن الحرام قام جري على طول ونط من فوق سور مدرسة معرفتش الحقه.

يا جماعة غطّوا عربياتكم, محدّش يستخسر في عربيته غطا ب 150 جنيه. وشوفوا حل لموضوع الكبّوت اللي بيفتح من برّه ده. أجاركم الله من ولاد الحرام.