رجاله المنتدي في قطر..اخوكم محتاج رأيكم ضروري

**medo_2060** · 05-11-2014 06:07 PM

المشاركة الأصلية كتبت بواسطة hobiko

ازيك يا محمد بيه :)

بص انا من مناصرى رأى الزميل المحترم أحمد كمال .......... انا برضه مهندس و اشتغلت فى مصر و الأمارات و السعودية

كل كلمة قالها صح و واقعية جدا

بس انا حقولك حاجة ............ هى حالة واحدة فقط لا غير

انت اعزب مش متجوز و لا مرتبط ............ لو الشركة اللى انت رايحها فى الدوحة ديه شركة كبيرة و محترمة و ليها اسم فى المجال بتاعها .......... حتفرق معاك الخبرة اللى حتاخدها منها فى الcv بتاعك و حتتعلم و يبقى ليك وزن و خبرة و حتطور نفسك

حقولك روح ........ على اساس ان ديه خطوة فى حياتك تتبهدل فيها و تتعب مقابل خبرة و علم يخلى الخطوة اللى بعديها احسن بكتير و تعوضك عن اللى فات

لكن لو الشركة عادية او صغيرة و مش حتفرق معاك ولا علما و لا خبرة

يبقى ملهاش تلاتين لازمة

و اهم حاجة فى كل ده ............... استخير ربنا كذا مرة و ادعى كتير

و بالتوفيق و النجاح :)

ازيك ياباشا :)
فين ايام مواضيع السياسه والثوره فضينا مبقاش غير سيره السفر ههههههه
انا معرفش ان كانت شركه كبيره وليها اسم ولا لا الي اعرفه كله ان ليها فروع في دول عربيه بس والهيد اوفيس في دبي و مشاريعهم في منشآت كبيره برضه زي مطار حمد وغيره
ربنا يعمل ما فيه الخير ان شاء الله ودعواتك بالتوفيق يا زميل الكفاح :)

**achillie** · 08-11-2014 12:14 AM

يا جماعه ضلمتوها في وش الرجل ليه ؟ بشروا ، بص يا أستاذ ، الشغل هناك اكيد متعب بس انا عايز افهم حضرتك ان الشغل متعب في اي حته في الدنيا الا مصر لان غالبيه الناس شغالين موظفين صيع من ٩ الصبح ل ٢،٥ الظهر و ده ما اسموش شغل ده اسمه مرقعه و صدقني انا اشتغلت في ٣ دول و الله اكتر شعب مبيشتغلش هم احنا ، لكن لو عايز تبني نفسك لازم تتعب و تشتغل بجد و تفكك من جو الموظفين بتاع مصر ، ٧٠٠٠ ريال ايوه ما يجيبوش بيت لكن تقدر تاخد أوضه في شقه مع صحابك ب ١٠٠٠ ريال و تجيب كورولا ٢٠١٥ ب ١٢٥٠ ريال و هتصرف اكل ١٥٠٠ ريال و الباقي في جيبك ، و صدقني انا بنصحك لوجه لله عايز تبني نفسك يبقي تبقي رجل و تتعب و تشتغل و صدقني ربنا هيكرمك لان ربنا كريم جداً ، لكن لو أخدت طريقه الفشله في التفكير مش هتعرف تعمل حاجه .

**yuong313** · 09-11-2014 03:50 PM

اخي صاحب الموضوع

كل شيء له سلبياته وايجابياته حقولك بعض الحاجات بما اني كنت عايش في قطر مدة طويلة

- بما انك عازب فده شيء كويس في المرحلة الاولي
- مرتبك فوق ال 6000 وده يخليك تقدر تجيب زوجتك بحسب قانون العمل
- قطر بلد عائلي من الطراز الاول امان لاتتخيله شعب طيب وكريم فوق الوصف
- البلد صغيرة جدا يعني لو قلت فلان الفلاني حيقولك تاريخ حياته الكل عارف بعضه اجنبي او مواطن
- بما ان الحالة الاقتصادية والسياسية في مصر مؤثرة علي مزاجك العام فده يدفعك الي السفر وانا اؤيدك حتي لو بمبلغ بسيط في البداية
- سنك صغير وده حيخليك تكتس خبرة تقدر بعد كدة تنقل لشيء افضل وعندي نماذج كتير جدا لاصحابي سافروا علي وظائف صغيرة وماشاء الله عليهم دلوقت ومثل انك لو رحت صغير حتفضل صغير مش مظبوط
- السكن هو اغلي شيء ومش معني كدة ان مفيش فرص ممكن تلاقي استوديو اوضة وصالة برة الدوحة ب 2500 ريال وباقي كل شيء بيدبر عقبال ماتاخد علي الشغل الجديد والبلد وتعرف الدنيا تقدر بعدها تشق طريقك ومش معني انك مش مرتاح في شغل انك حتطرد برة مش كل كفيل ظالم وتقدر تنقل كفالة وبسهولة وكمان تقدر اعارة وبسهولة برضوا بس كله بموافقة الكفيل طالما لم تسرقه او تعمل عمل جسيم تضر بالعمل او صاحبه

باختصار توكل علي الله وانتا هنا مش خسران كتير يعني مش ماسك وظيفة في شركة كبيرة او مركز مرموق علشان تكون حساباتك مش مظبوطة

ده راي واحد كان مقيم في قطر واتمني العودة لها لولا ( اني في وظيفة لو تركتها ساندم العمر كله عليها ) بس