الموضوع: ايه احسن اتوماتيك زيرو لاتزيد عن 120 الف جنيه ؟؟ محتار وأرجو المساعدة

شكرا عالرد لكن انا بصراحة مبحبش ال BYD خالص...

طيب ايه رأيكوا في ال Briliance FRV؟؟ سعرها تحفة 97000 اوتوماتيك.. وياترى ايه الفرق بينها وبين ال FRV Cross اللي سعرها 104000 ؟؟ هل فرق السعر يستاهل؟؟ وياترى هي ضيقة ولا تشيل برضو 5 ركاب عادي؟؟ بصراحة بفكر اجيبها..

ولا اجيب افيو اتوماتيك ب 103000 وخلاص؟؟!! انا عارف ان الافيو وحشة بس مش عارف هي وحشة اوي كده ولا لأ؟؟ انا بس بقول اني لو فكرت ابيع بعد 5 سنين مثلا مش هخسر كتير فيها لأنها شيفروليه برضو وأكيد مش هتخسر زي الصيني؟ ولا انا غلطان؟؟

الخلاصة:
يعني مزنقش نفسي و اجيب FRV اتوماتيك ولا أزنق نفسي شوية صغيرين واجيب FRV Cross أو أفيو؟

ولا أزنق نفسي شوية اكتر واجيب برسونا أو أدور عالاوبترا الكوري 2014 او الصني الشكل القديم (لو لقيت منهم يعني) ؟؟؟؟؟؟؟؟؟؟؟؟

مش لازم تكون سيدان المهم متكونش ضيقة..

احب افكركوا اني معايا اساسا فيرنا 2010 فول اوبشن بس مانيوال.. وانا تعبت من السواقي في الزحمة ونفسي اسوق اتوماتيك علشان اريح رجلي شوية...

لسه محتار افيدوني افادكم الله... شكرا

لو مكانك اجيب افيو اوتوماتيك وخلينى فى المضمون . مهما كانت عيوبها بس هاترحمك من المخاطرة بعربيات اعتماديتها مش متجربة او تطلع فيها عيوب جوهرية . هات الافيو دلوقتى ولما ربنا يكرمك قدام وتعرف تجيب حاجة اعلى ابقى بيع الافيو وهاتجيبلك سعر كويس . وهى فيها كل اللى انت عايزه تقريبا . وبالتوفيق

اوبترا او صني ,, الاتنين واسعين و منتشرين و اعاده بيع اكدي معقوله ,, بس اسمع اوبترا تاكل بنزين ,, لكن الصيني جه انا معرفوش بس ممكن تسال عشان لو العربيه بتفتح بقها علي بدري يبقي ملوش لزمه و كمان اعاده البيه اكيد مش قوي

المشاركة الأصلية كتبت بواسطة hugan

لو مكانك
اوبترا الشكل القديم اوتو
صني الجديده او القديمه
بي واي دي

هل الاوبترا الشكل القديم يوجد بها وسائل امان

المشاركة الأصلية كتبت بواسطة m-sabry

السلام عليكم،
أعضاء المنتدى الكرام انا عضو جديد ومحتاج مساعدة لأني محتار جداً.. عاوز أجيب عربية زيرو أتوماتيك بس مش عاوز أدفع أكتر من 120 ألف وده بالكتير أوي (مش هقدر أزود جنيه) وياريت لو كان التمن أقل طبعاً لأني هضطر أستلف..

عاوز عربية سيدان وتكون عائلية (تشيل 5 راكب مستريحين) بس برضو بنكهة شبابية (لو كان ينفع يعني) لأني شاب وبحب برضو اجري لما اكون لوحدي.. لاتقل عن 1500 سي سي ولا تقل عن مثلا 90 حصان لأني متعود على الفيرنا وموتورها القوي وهتصعب عليا نفسي اوي لو سقت عربية ضعيفة.. وياريت صيانتها وقطع غيارها تكون مش غالية (ممكن متوسطة بس بلاش الغالي)..

انا اساساً معايا فيرنا مانيوال فول اوبشن موديل 2010 ودي كانت اول عربية اركبها.. وبصراحة بحبها جداً وصعبان عليا ابيعها بس مشكلتي الوحيدة إني خلاااااااااااااص تعبت من السواقة المانيوال خصوصاً في الزحمة.. انا بسوق كتير في شوارع زحمة زي شارع الهرم ووسط البلد والبلد كلها اساسا بقت زحمة حتى الدايري والمحور.. رجلي خلاص تعبتني وكرهت دواسة الدبرياج والسواقة المانيوال..

أفيدوني أفادكم الله...
شكراً

والله انا كنت محتار شكل حضرتك وبعد ماشوفت فى منتدى نايل مورتورز الرائع واعضاء المنتدى المحترمين جدا
افتنعت الحمدالله نيو صنى وان شاء الله هتكون سوبر صلون وده يعتبر نفس السعر الى 123 الف
واهم حاجه انا كنت بدور على فى اى عربية وسائل الامان
وربنا يوفقق