الموضوع: ايه احسن سمك مشوي وفيليه ؟؟

المشاركة الأصلية كتبت بواسطة eslam atia

البربوني في المقلي
السردين الكبير في المشوي ويسلام لو مشوي صاج
الباغة في المشوي
السيجان في المشوي
القطع مشوي ومقلي وسنجاري وصيادية حكااااااااااااااية
الثعابين مشوي مفيش وصف طبعا
اللوت وموسي بس مولعين نار مفيش وصف
الخنزيرة في المقلي بتتسلخ الاول
الغطيان والمكرونة في المشوي ملهمش حل
الشبار الجوابي الاخضر المبطرخ طبعا ملك الشعبي المشوي وعلي فكرة غالي
الشبار الابيض ميكونش مزاااااارع في الشوربة والمقلي والصيادية
الدنيس في المشوي وياريت ميتقرصش عليه في الفرن
القاروس في المشوي لا تعليق
الجمبري والسيبيا البلدي
تسلق الجمبري الجامبو والسيبيا تتبل بالبهارات والثوم وتتقطع شرايح وتتقلي ( هتشم الريحة من اول الشارع ) ومتنساش الطحينة
الموز والشخرم في المشوي واتفرج علي البطاريخ

تمام يا اسلام باشا ده عند ولاد عمنا البورسعيدية ونضيف عليهم احنا السوايسة
اسماك البحر الاحمر لايعلى عليها الغنية بالفسفور واليود والمعادن وافضل من اسماك البحر الابيض بكتيييييييييييييييييييييي ير بالاضافة الى ماسبق مثل:-

الحفارة والاس والنقط مقلى ومشوى للاحجام الكبيرة
البلاميطة والتونة مشوى فى الفرن بعد التنظيف والخلطة وياسلام لو كان بنار الخشب زى زمان
الكسكمرى العريض الاخضر والمبروم الازرق مشوى وقلى
وكمان بنسلقه على البخار لعمل المكريل وهو افضل من المعلب المستورد
ولن تشعر ابدا بطعم الزفارة اللى تحسها فى الماكريل المعلب
الكشر والشعور والمحسنى وقشر بياض مقلى وكمان شوربة حمرا
السيجان والخنزيرة والرقد مقلى وشوربة بيضاء
الخرمان والزرقان مقللى وشوربة بيضاء
القرش والحوت صيدية
الجلامبو السويسى مشوى وصيدية واه من الجلامبو النتيات
الكاليمارى محشية بالخلطة مقللى وبالخل والثوم
السوبيا مقللى وبالخل والثوم وصيدية
الحارت السويسى مقللى وبالخل والثوم
الباغة مقلى ومشوى وبالخل والثوم
السهلية السويسى احلى من البورى مشوية
المرجان السويسى ابو قتب الكبير مشوى والصغير مقللى
الصرع ابن عم المرجان مقللى ومشوى
المحاريات السويسى زى اللوجز والسريديا مشوى والقوقع وبلح البحر واالبوصر.. سلق
ولازم ولابد من سلطة طحينة بالثوم والشطة والليمون معاهم وماتسالش ليه فالطعم حكاية
الصورمباء نوع من لحم المحاريات المجفف على حرارة الشمس والهواء
ده بقى فاكهة البنات ووحمة الستات ويؤكل قطع صغيرة ويمضغ كاللبان وطعمه حكاية تانية
سمكة الصندوق وهى سمكة احفورية يعنى من قبل خلق الانسان
سلق وشوربة بيضاء وهى لذيذة جدا
البراكودا مقللى وصيدية
سمكة الحداية... صيدية ... ولها زيل طويل كالسوط والضربة منه مؤلمة وقد تجرح الجسم
كفاية عليكو كده احسن البحر قرب يفضى و عشان حرام ريقكم مايجريش كتير

السوايسة اولاد البلد موش الوافدين المقيمين لاتاكل او لايقبلوا او نعزف عن اكل ...الشبار او البلطى او القراميط والتعابين لاسباب وجيهه وليس بطرا فهى نعمة من ربنا ولكن
لانها تنمو فى الترع والمصارف الملوثة وتاكل الجيف وكمان تنمو فى المزارع السمكية ويتم اطعامها بالهرمونات ومخلفات ذبح الدواجن بعد ان يتم تعفينها وتتحول لدود يلقى للسمك ليتغذى عليه يعنى سمك الشخرم الصغير الشعبى ابو خمسة جنيه الان افضل من اى سمك اخر نيلى
كمان قد يتم صيد هذه الاسماك برش المبيدات على سطع المياه او صعقها بالتيار الكهربى لبعض الصيادين عديمى الضمير
وكمان لان طعم اسماك البحر افضل من طعم اسماك المياه العذبة
والسوايسة ولاد البلد شطار فى تجهيز المأكولات البحرية
وعمار ياسويس