الموضوع: بين الاخذ بالاسباب و اراده الخالق

المشاركة الأصلية كتبت بواسطة زهير فكري

انا شايف المشكله استاذ hitman , ان حضرتك شاعر انك بذلت مجهود جبار والعائد قليل ولا يتناسب مع الجهد او الهدف اللي انت مخطط له ,,, بالتالي في حوار داخلي جواك بيقول ازاي انا راجل مجتهد و بسعي و بدعي ربنا و ممكن واحد تاني عاصي و تلاقيه وصل لأحسن من الهدف بتاعك و عداك كمان .....
بالتالي بيبقي جواك لوم داخلي تجاه الله ( اللهم سامحني ) و بتقول جواك ازاي ده يحصل ؟؟؟؟ والدنيا ماشيه ازاي ؟؟؟؟ و مليون سؤال بيطرح نفسه و الاجابه مش مقنعه ؟؟ و بتوصل لحاله من عدم الاتزان ....
هو الحسبه مش كده .... اللي بيحصل ان ده فساد البشر , بمعني ان لو اخدنا مثال انك عاوز تشتغل او توصل لوضع وظيفي معين وهتكون ليك استفاده ماديه ومعنويه .... الجواب المنطقي لشخصيه صحيه محترمه هو اني هشوف متطلبات المنصب ايه و استعد له .. تمام ... و بناءا عليه لو المنصب ده محتاج skills مش عندك زي دراسه معينه او الي ذلك هتعمله ..... تمام ؟؟ وبعد التعب ده كله تلاقي النتيجه ان واحد تاني خد الوظيفه !!!!!! طب ازاي وانا دارس و محبوب و ملتزم في شغلي وبصلي وبصوم و ما بعملش كبائر ... الخ والتاني ده ضايع وبتاع ستات و الدنيا ماشيه معاه زي الفل ....... الجواب هيكون كالاتي انت فرضت ان عشان المنصب ده عشان اوصل له محتاج ادرس .. سليم ... بس اغفلت نقطه ممكن تكون مهمه والوظيفه محتجاها زي العلاقات الشخصيه والقدره علي الاقناع ... يعني لو اخدنا وظيفه المبيعات في شركه مالتي ناشيونال ,,, حضرتك شايف ان الناس دي التوب في الشركه , بالتالي انت بقي عندك طموح انك تبقي في المكان ده , فورا حضرتك اخدت دبلومه تسويق في الجامعه الأمريكيه ...في احسن من كده ؟؟ و خلصتها ... بس اغفلت نقطه مهمه ان الوظيفه كوظيفه محتاجه اهم موهبه وهي القدره علي الاقناع ودي موهبه مش عندك ... مش قصور او عيب فيك .. او انت خجول زياده عن اللزوم ... والمهم انك ما اخدتش الوظيفه ... يبقي النتيجه انك ما اتظلمتش انت تقديرك خاطيء و ما كملتش الأخذ بالأسباب في حاله لو حد لفت انتباهك قبل ما تدرس و تكمل في المشوار وقالك ان انت مش مؤهل للمنصب ده ... لكن لما تكون جميع متطلبات الوظيفه موجوده عندك بشهاده المحيطين او بخبره سابقه و تلاقي واحد تاني خدها عشان قريب المدير او المدير فاسد فعايز واحد فاسد زيه عشان الدنيا تمشي و لم ينظروا للكفاءات ... فده اسمه فساد و ظلم صريح .... وهنا الاراده الالهيه بتدخل ومعني تدخل الاراده مش هو انك هينزل ملك من السما او يحصل شيء غير طبيعي او معجزه يخليك تتولي المنصب ....ربنا بيشلهالك لان ربنا اقسم بعزته و جلاله ان ينصر المظلوم ولو بعد حين ... وهنا دور الايمان بيتدخل و ثق تماما ان الله سيعطيك فترضي ... ممكن دلوقتي او حتي بعد 10 سنين ..... و صدقني والله العظيم الكلام ده عن تجارب شخصيه ... طالما انك اخلصت النيه تجاه امر معين و تطلبه صدقا ويقينا و تعلم جيدا في قراره نفسك انك بذلك اقصي امكاناتك للوصول للهدف ده وما اتحققش لظروف خارجه عن ارادتك .... في اللحظه دي يجب ان ننحني امام قدره الله التي لا يعجزها شيء وثق تماما ان الله لا يمنع عن عجز حاشا لله او انك تقيس منعه او حرمانه كعلاقات البشر ببعضهم اذا رضوا اعطوا واذا غضبوا منعوا ....و ما تحاولش تستخدم لفظ لو ..كان حالي كذا او ظروفي كذا .. لأن هذا اسي علي ما فاتك .... العبره يا صديقي العزيز ان الله يحاسبنا علي افعالنا وعلي نعمه التي اعطاها لنا فان كنا مؤمنين بالله نحترم نعمه و ندعوه الا يحرمنا منها ... و نستخدمها فيما يحقق الصلاح والفلاح ...وتأكد تماما اننا نسعي للحصول علي النعمه لنرضي اي ان الرضا هو الهدف والنعمه هي الوسيله ...بالتالي عندما يمنعك الله الشكل او التصور الذي رسمته في خيالك وتسعي للوصول اليه لترضي في النهايه .. فانه حتما سيعطيك لتصل الي مرحله الرضا في النهايه ايضا ولكن ليس بنفس السيناريو او الهيئه التي كنت تريدها .

انت قولت الى فى دماغى بالظبط انا مسؤل بشكل او بأخر عن الفشل الى انا فيه ولو بشكل جزىء انا عارف انا غلطت فى ايه وصلنى للنتيجه دى بس لو حاولت اشوف غيرى الى نجحوا ممكن يكونوا ارتكبوا اخطاء افدح زى اتنين مش مزاكرين دخلوا امتحان واحد نجح وواحد سقط لو الى سقط شاف الى نجح ده عمل ايه ممكن يلاقيه زاكر اقل منه بس حظه كويس ان الاسئله جت فى الجزء الى ذاكرة ........... انا بحاول اخرج نفسى من التفكير بالاسلوب الى انا بفكر بيه لكن مجتمعاتنا مليئه بالعبارات الى تغذى الوصول للفكر الى انا وصلتله مبدأ انك ما تلومش نفسك على اخطائك و ترميها على شماعه القضاء و القدر و الاراده الالاهيه الفاظ و عبارات زى اصل ربنا كرمه اصل ربنا بيحبه.... يعنى واحد حصله خير يبقى ربنا كرمه فالعكس يبقى فى الحاله دى صحيح الى حصله شر يبقى ربنا اهانه..........برضه من المصطلحات الغريبه ربنا عايز كده ....يعنى لو حصل ظلم و قتل هل معنى كده ان ربنا راضى عنه ؟ ولو ربنا عايز كده يبقى فيه ظلم هيحاسب الظالم ازاى ؟ .....
كلها مصطلحات غريبه اهالينا و البسطاء و غير المتعمقين فى الدين للى واخدين المواضيع بسطحيه بيرددوها مع انك لو مشيت عليها هتوصل لنتيجه واحده و هى التفكير بالاسلوب الى انت وصفته فى بدايه ردك ..........
المشكله لما انا اقتنعت ان كل مشاكلى سببها اخطائى و وضرورة الاخذ بالاسباب لقيت شيوخ تقول ان ارجاع امور الدنيا للاسباب دنيوية و الاخذ بيها بشكل تام ده نوع من الشرك