مشكلة في سخونة العربية

**Youssef 3atef** · 02-12-2014 09:02 PM

السلام عليكم .
عندي مشكلة مجنناني بقالها كام شهر العربية لما بتقف في الزحمة بتسخن و لما أجي أمشي بيها الاقي الحرارة نزلت للمعدل الطبيعي ولو ماشي على سرعة عالية بتنزل خالص فعاوز أعرف إيه المشكلة ديه. مع العلم إني غيرت الريداتير و شلت الثرموستات .

**borio1704** · 02-12-2014 10:43 PM

أولا وقبل ما نتكلم في أي حاجة.. لازم ترجع الثرموستات تاني

الثرموستات لو عامل مشكلة ما يخليش العربية تسخن وتبرد

ولو عايز تعرف تفاصيل أكتر ممكن تدخل على الموضوع ده:
http://www.nilemotors.net/Nile/328708-a.html

نيجي بقى نشوف المشكلة جاية منين

ما دام العربية بتسخن في الزحمة يبقى معنى الكلام ده إن التبربد مش كفاية.. وغالبا مروحة الرادياتير فيها مشكلة وبتشتغل متأخر

شوف كمان لو المية بتنقص.. ودي لوحدها ممكن يكون ليها كذا سبب

**borio1704** · 03-12-2014 09:25 AM

ما دام بتقول كلتش المروحة تبقى بتتكلم على موتور بالطول..

هي الدايهاتسو بتاعة حضرتك "فيروزا"؟

عموما.. اختبار المروحة بيبان أكتر من الصوت.. يعني لو عليت الـrpm والعربية سخنة هتلاقي صوت المروحة قوي جدا وكإنه صوت "وحش" كده :)

طيب.. مادام حضرتك زودت مية والعربية ما سخنتش بعدها.. يبقى كفاءة دورة التبريد كويسة... فاضل نشوف المية بتنقص منين.

أول حاجة لازم تشوف مستوى المية في القربة .. بيزيد وينقص ولا ثابت؟؟؟

لإن المفروض المية في القربة تكون مستواها نازل .. ولما العربية تسخن المية تعلى في القربة... وبعدين تنقص تاني لما العربية تبرد.

بعد كده .. تكشف على غطا الرادياتير... لو الغطا قديم يستحسن تغيره.. لإنه ممكن يكون بيهرب بخار مية

لو ضامن غطا الرادياتير.. نشوف خراطيم المية..

خلي بالك إن أي حاجة كاوتش في العربية عمرها 5-6 سنوات بالكتير... فلو ما غيرتش خراطيم خلال الفترة دي.. اعمل حسابك تغيرهم قريب قوي.

ممكن كمان طلمبة المية تكون بتسرب من عند أكس المروحة... ودي إصلاحها تكلفته أكتر من تمنها جديدة.. غيرها علطول لو عرفت إن التسريب منها.

لو كل ده سليم... احتمال كبير تكون طبات الموتور مصدية أو مخرومة.. ودي تكلفتها هي نفسها بسيطة قوي .. بس لازم الموتور يترفع من العربية علشان تتغير.

وابقى طمنا عملت إيه.

...