انا والله لا اخدت بالى ولا اقصد اى اهانة لأى حد وانا والحمدلله بحترم الناس كلها وكفاية انى الاقى حد اهتم ورد عليا بنصيحة
يا سيدى براحة بس انا مش باتريق ولا حاجة . انا بس عايز اوصلك ان اللى باقولهولك نتيجة خبرة وتجربة مع العربية عشان دى عربيتى . مش بافتى وخلاص. الاقى ردك انك عايز حد يكون معاه العربية يفيدك؟؟ انا بس بانقلك تجربتى و رأيى بحيادية والله ودى مجرد نصيحة . وحقك عليا لو فهمت انى باتريق
سيات ليون الفئة التانية تحفة شكلا و موضوعا ....تسارع و ثبات و شكلها وهمي
ياسيدى والله انت على عينى وراسى والموضوع كله سوء تفاهم ,, انا معرفش خالص انها عربيتك ولا فهمت ده ولما قلت انى عايز حد راكب العربية مش قصدى خااالص انك بتفتى كان قصدى انى بدور على تجربة حقيقية بدون اى سوء نية او تشكيك فى كلامك ,,, عارف هاقولك حاجة ,,, انا قبل المشاركة دى عملت مشاركة تانية كنت بسأل عن الكورولا وكنت بقول انها عجبانى بس حاسس ان سعرها كتير عليها وان فيه فرق سعر بينها وبين عربيات تانية محترمة حوالى 20 او 25 ألف جنيه وسألت الناس عن رايهم هى تستاهل الفرق ده بينها وبين الفلوانس او الشارك او الأمبريزا او السنترا ؟؟ ,,, ومش عايز اقولك الردود المتناقضة والفتاوى واى واحد يقول اى حاجة فى اى حتة (والله مش قصدى انت) بس بجد تعبت ونفسى الاقى نصيحة بأمانة وبحياد ومن حد فعلا يمتلك الفلوانس او الشارك او السنترا وماخدتش بالى خالص انها معاك - طب هاضرب لك مثل - فيه ناس معاها كورولا 2015 المفروض انها متعدلة ارتفاعات وتلاقيه بيشتكى ان العربية لسه واطية وبتحك وناس كتير بتقول نفس الشكوى وتلاقى واحد ينط لك ويقول ان العربية عمرها مابتحك فى المطبات - ناس تقولك ان صاجها خفيف وناس تانية تقولك صاج تقيل وممتاز ونفس الكلام على الفلوانس ناس تشكر وناس تشتم وتحس ان نادر اوى لما تلاقى حد امين فى رأيه - مرة اخيرة ماتزعلش وده سوء تفاهم مش اكتر وبالمرة بقى قولى ايه اخبار التوكيل معاك
يا فندم ولا يهمك وانا مقدر الحيرة اللى انت فيها , وعايز اقولك نقطتين بس قبل ما ارد عليك فى موضوع التوكيل:
اول حاجة, سواء جيبت الشارك او الفلوانس او السنترا او الكورولا ف كلهم عربيات محترمة اوى ومش هاتندم لو جيبت اى واحدة فيهم ومش هاتحس بالفرق الفظيع, ف مهما كان اختيارك فى الاخر هاتكون كسبت صفقة رابحة, حط ده فى دماغك وانت هتلاقى نفسك اهدى فى اتخاذ القرار, الفكرة ان كل عربية منهم ليها ميزة نسبية عن الاخرين بتميزها (شوية بس) عنهم, وكل واحد بقى بيروح للميزة اللى بيستريحلها او بيحتاجها اكتر, نصيحتى ليك روح اركب كل عربية فيهم حتى لو مش هاتسوقها واللى تستريح فيها اشتريها على طول ( لان زى ما قولنا كلهم عربيات محترمة), لان برضه موضوع الراحة النفسية بيفرق كتير, وممكن تكون عربية امكانياتها هايلة بس تقعد جواها ماتستريحلهاش.
تانى حاجة ان المثل بيقول انه لولا اختلاف الذواق ل بارت السلع , يعنى الناس اللى بتقول اراء متناقضة على نفس الحاجة مش شرط يكون بيفتوا ( مع اننا كمصريين بنفتى كتير) هو زى ما قلتلك اختلاف اذواق وثقافات, ف شوف انت الحاجة اللى تفرق معاك اكتر.
بالنسبة للتوكيل, هما فى العموم محترمين ومتعاونين الى حد كبير, بس طبعا فى الاخر ده وكيل مصرى ب ادارة مصرية, اسعاره زى كل التوكيلات التانيةممكن يفرق 50 جنيه اقل او اكتر بس فى الاخر كلهم بيشتغلونا, بس هو بصراحة احسن من ناس كتير بمراحل ( منصور وغبور مثلا).
نقطة اخيرة بس, بالنسبة للسحب بتاع الفلوانس بأكدلك تانى انه مدهش ومش ببالغ والله, انا ساعات كتير بابقى ماشى وعايز اعمل كيك داون او افرق عن اللى جنبى بكتير بادوس والاقى نفسى باتشد لقدام والاقى اللى كان جنبى بقى ورايا بكتير اوى وانى قربت البس فى اللى قدامى باحاول الجم العربية بالعافية .
معلش طولت عليك ولو فى اى استفسار تانى انا تحت امرك
ربنا يخليك واشكرك على وقتك ومجهودك وانت طبعا بتتكلم صح بالنسبة لموضوع الراحة النفسية وانى لازم اركب العربيات دى ,, وانا ما اختلفتش معاك فى ان كلهم عربيات محترمة بس بصراحة وبصرف النظر عن الراحة النفسية انا شايف الكورولا سعرها مبالغ فيه مش اكتر ,, بس هحاول اعمل بنصيحتك واركب العربيات دى
ياحبى انا عارف انا بس قلت اهزر مش أكتر وانشاء الله ربنا هيوفقك وهتجيب احسن عربية انا فضلت محتار 3 شهور لحد ماستقريت على النيو قاشقاى وحجزت ولسه قدامى مش أقل من 4 شهور لما أستلم فا قصدى انك على مهلك متستعجلش ومتقلبش دماغك كتيير والعربية اللى ليك نصيب فيها هتركبها انشاء الله