الموضوع: عايز ابيع الميجان

المشاركة الأصلية كتبت بواسطة Ahmed A.Maksoud

معلش يا باشا........قدر الله و ما شاء فعل.

بس أنا عاوز أقولك أن بعض الناس هنا عارفة أني كان معايا ميجان فى الإمارات و كانت برضه فيها قصة الأولسيهات دي......و فضلت ماشية من ساعة ما جبت العربية فى 2010 لحد ما بعتها لواحد صاحبي قبل ما أرجع و إلي يومنا هذا لسه ماشية معاه من غير ما يعمل الأولسيهات.......و ماشية حوالى 150 ألف كم دلوقتي ما شاء الله.

كل المطلوب منك أنك تبص بصة على مستوى الزيت كل أسبوع و أنت قاعد جوة العربية و لو نقص تزوده.

كون أن أنت عندك منورتش لمبة الزيت حتى......ده معناه أن العربية كان ملعوب فى ضفيرتها و دي حاجة كلنا بنقول نبعد عنها.

موضوع ان الميجان أعطالها كتير ده عن نفسي محصلش معايا فى 9 سنين غير حوالي 4 مرات ( بتكلم هنا عن الأعطال اللى بتوقف العربية تماماً أو بتخليها ماشية مش بكل قوتها زي الكويل مثلاً)

الميجان مشكلتها اللى أدت لأنخفاض سعرها هي كتر الإشاعات.......خد عندك الكلام اللى أنا سمعته بودني
1- صيانة ال 60 ألف ب 6000 جم ( الكلام ده فى 2005 و كانت الصيانة ساعتها فعليا بحوالي 2000 جم)
2- العربية دركسيونها بيسوجر و هيا ماشية و مش بتعرف تحود و بتعمل حوادث قاتلة
3- عربية واحد مع صاحبي فى الشغل.....صاحبي بيقولي دي جابت فتيس و العربية مكملتش 15 ألف كم و التوكيل مش راضي يغيره........سألت معرفة فى التوكيل على العربية دي....خصوصاً أنها تبع شركة كبيرة شاريين من التوكيل عربيات كتير......الراجل أكدلي أن الفتيس لازم يتغير و أنهم مش هيعملوه على حسابهم علشان صاحبها أخد بيها حجر كبير من تحت كسر الفتيس !!!!!!!!!

و الكلام اللى أنا قريته على النت كان
1- العربية دي بيجيلها فيرس
2- تكلفة الكارت فى التوكيل 36 ألف جم
3- العربية كل فترة بتقف و مش بترضى تمشي غير لما تحملها على ونش و توديها التوكيل.

ده اللى أنا فاكره حالياً..........تخيل بقى لما واحد ملهوش خبرة في العربيات يسمع الكلام ده ؟
تخيل لما واحد ميعرفش حاجة فى العربيات يركب العربية و تكتبله Service Now هيقول بين و بين نفسه أيه العربية البايظة دي.

مشكلة العربية دي......أنها عربية ذكية في سوق الناس مش عاوزة فيه وجع دماغ....يعني أيه العربية تقولي أنها عاوزة تتسرفس ؟ مالها اللانسر و الكورولا اللى بيمشوا من غير ما يقولوا حاجة و الدنيا فلة ؟ مع كامل أحترامي ليهم طبعاً.

يعني أيه العربية تقولي gearbox over heating و أنا ماشي 180 على طريق شرم لمدة نص ساعة و تحذرني ؟ أيه الغم ده ما تسيبني أكمل زي ما أنا عاوز و اللى يحصل يحصل و أبقى أكلم حد يجي يقطرني و خلاص!!

هي دي مشاكل العربية الحقيقية اللى أدت فى الأخر لأنخفاض سعرها.

أخر حاجة......بالنسبة لموضوع الأوروبي......لأ.....أختلف معاك
الأوبل أسترا مكنش فيها مشاكل ؟
كل فولكس فاجن و خصوصاً من أول ال DSG مفيهوش مشاكل ؟
الأوكتافيا مكنش مشهور عنها أنها بتجيب كمبرسور تكييف و عقل فتيس ؟
البي أم موديلات 99 لحد 2001 كانت مشهورة بمشاكل الفتيس.
أخويا كان معاه سي موديل 2005 برة مصر و في نفس السنة كان فيها مشاكل في الأيرباج و فضلت كذا يوم على ما التوكيل صلحها و في 2010 جابت كمبرسور تكييف و التوكيل صلحه على حسابهم و في 2011 باظ و مكنش نافع معاه تصليح و أضطر يغيره و بعد كده باعها.

كل الأوروبي محتاج معاملة مختلفة شوية عن الكوري و الياباني......محتاج أهتمام في مقابل أنك بتلاقي - عادة - ثبات أعلى.....أمان أعلى.....تقفيل أعلى.....جودة أعلى......عمر أفتراضي لقطع الغيار أعلى.

يا باشا انت راجل فاهم
فيه اشاعات كتير من دى ناس بتقولها قدامى وبضحك
بس انا زي ما قولتلك
الميجان مشاكلها كتير وانا عارف انا بقول ايه
العربيه دى مش بتاعة شغل ومرمطه زي العربيات الكورى واليابانى
دى عايزه معامله اطفال
احنا هنا فى مصر الطرق بتاعتنا كلها زباله
والناس اللى بتركب عربيه تروح بيها شغلها وتسافر بيها وتروح هنا وهنا
فى فرنسا بلد نضيفه وشوارع نضيفه
ويوم ما بتحصل حاجه للعربيه بتروح لناس فاهمه هى بتعمل ايه كويس
احنا هنا حتى التوكيل فيه ناس بتعك فى العربيات عادى يعنى
الخلاصه ان الميجان عربيه مش عمليه فى هذه البلد
اسباب كتير وصلت العربيه للسعر اللى بتتباع بيه دلوقتى
لو انت راجل معاك العربيه من الزيرو ومحافظ عليها كويس وفهمان العربيه هتريحك مافيش كلام
ويوم ما تيجى تبيعها وهى نضيفه هتقع فى ايد واحد مبيرحمش هيبهدل فيها شويه ويبيعها وهكذا
اعطال عربيتك قليله عشان نضيفه ؟
طيب مافيش اولسيلات ضربت منك قبل كده ؟
معملتش شغل فى الفتيس عشان خاطر النتش بتاعه ؟
مغيرتش حساس كرنك حساس كامه ؟
ترس دفيزور عشان صوت التكسير ؟
شريط ايرباج عشان اللمبه نورت ؟
مغيرتش كويل عشان ضرب ؟
هل فيه عربيه كورى او يابانى بيتعمل فيها كده ؟
العربيات الاوروبى انضف وركوبه افضل مافيش كلام
ولكن سامحنى متحاولش تقنعنى ان كل الاوروبى مشاكله زي الميجان
عندك ال a4 ,a5 عربيات نضيفه وركوبتها متقلش عن الميجان ولكن مشاكلها اقل
يا باشا الفرنساوى طول عمره معروف انه مقرف

المشاركة الأصلية كتبت بواسطة تامر.محمد

معلش اعذرني , الانطباع اللي واصلني ان العربية معاك كان حالتها صعبة و حضرتك اسقطتها على الميجان كلها

انا الصراحة مش متخيل ان عربية تتساب اويل سيل بتاعها ضارب لحد ما تفضي الزيت كله و حضرتك متضايق انه فضي !!

معلش خلى حكايه المكنه دى عليا
ايه بقى حكايه الاولسيلات اللى بتضرب كل شويه فى الميجان دى ؟

المشاركة الأصلية كتبت بواسطة Super_Star_h

معلش خلى حكايه المكنه دى عليا
ايه بقى حكايه الاولسيلات اللى بتضرب كل شويه فى الميجان دى ؟

استاذي الفاضل الحمد لله انك بعتها وربنا يباركلك في الفلوس وفي العربية الى هتشتريها ان شاء الله
بس عاوز اوضح لحضرتك حاجه انا الحمد لله عندي خبرة كويسة جداً جداً في الميجان
الميجان مش عربية كثيرة الأعطال ولا اي حاجه اعطالها زيها زي كل العربيات
الميجان مينفعش تتهان وتتصلح عند بلية الميكانيكي وبعدين نرجع نعيب عليها
انا اعرف اكتر صنايعيه الرينو الى في صقر قريش اغلبهم بيستخدمو نظرية Tray and Error حتى الأن لأنهم مش متعلمين هما حافظين
انا شخصيا كان معايا ميجان 2 موديل 2006 كنت جايبها عاملة 148 الف كم وبعتها عاملة 195 الف وعمرها عمرها ماعطلت بيا ولا مره وكل الى عملته فيها خلال الفترة ديه الصيانات العاديه جدا بوجيهات وفلاتر وسيور زيت فقط لاغير بس العربية ديه كانت بتتصين صح وحط تحت بتتصين صح ديه 3000 خط من الزيرو حتى 160 الف كم في التوكيل وكان معايا الفواتير كلها وعملت صيانة 170 بايدي وصيانه 180 عملتها في التوكيل 190 عمتها بايدي واتباعت على 195 بدون اي مشاكل والحمد لله والى اخدها مازال بيكلمني وبيشكرني والعربية معملتش معاه اي مشاكل الحمد لله وعلى فكرة كانت اول فئة اوتو فابريكة بالكامل حتى الأكصدامات ولا تحتاج لرش واتباعت ب 70 الف

حاجه تانيه من واجبي اني اقولهالك انا بعت الميجان بسبب احتياجي للفلوس ولولا كده مكنتش افكر اتخلى عنها وحتى الأن مش مستطعم اي عربية تانيه بعدها ولا عارف استمتع في سواقه اي عربية غيرها وبقيت بسوق لمجرد اني اوصل من مكان لمكان وخلاص
عموما ربنا يوفقك للخير