قولت لزميلتي انا معجب بيكي ؟ محتاج مساعدة

**إنسانة** · 14-12-2014 09:23 AM

المشاركة الأصلية كتبت بواسطة mohamedftw

بس المشكلة ان مش عايزة ادخل في علاقة دلوقتي و عايزة ابقي مع نفسي .. ( و الكلام دة مش معاناة اني عايزة اخسرك )

رايكم اية ؟

حضرتك كنت منتظر رد على علاقة تجمعكم
و الرد : رفض قاطع
بس مش عايزة تحرجك بعد اسلوبك المحترم معاها في الكلام

لا تركنك ولا استبن ولا افتكر دا منطق وحدة جامعية ودا مستوى ردها

**Defender** · 14-12-2014 12:03 PM

بص يابني من الآخر ، لو انت ناوي علي جواز وخطوبة "وعندك الامكانيات لدة" واهلك هتساعدك او موافقاك وعندك دخل خارجي او مخطط مستقبلك وعارف هتشتغل فين يعني ، روح كلمها على انك عاوز تتقدملها واتقدملها

غير كدة فكك لحد ما تشتغل وترسي علي بر.

المشاركة الأصلية كتبت بواسطة ibrahim sallam

عليك بالخطوه التاليه بدون زياده او نقصان وتتلخص في جمله منك لها مباشرة وهي.
(أستاذة فلانه سبق وقلت لحضرتك اني معجب بحضرتك ساكون سعيد جدا بالارتباط بحضرتك وده مش هيكون
سبب ابدا لإنشغالك عن دراستك او تعطيلك في شيء بالعكس انا اتوقع تكون خطوبيتنا دافع لتميزنا وتفوقنا في
دراستنا لاني فعلا حريص على وجودك في حياتي انا مش منتظر رد دلوقتي انا هنتظر ردك بعد اسبوع واتمنى
يكون ردا يسعد قلبي) وتسبها وتمشي ومش تديها اي فرصه لماقطعتك او انها ترد عليك
وفي خلال الاسبوع حاول تختفي عن نظرها

دي اجابة نموذجية تتحط في امتحان :d

**Mahmoud_Lutfi** · 14-12-2014 12:35 PM

اول نصيحة مني ليك

طالما طالب في الجامعة .. هل في آخر سنة مثلا ولا لسه قدامك مشوار ؟

الحاجة التانية

لو متأكد ان ظروفك هتسمح بخطوبة و بداية جواز .. اقطع عرق و سيح دم
و هات لها الموضوع على بلاطة ( انا معجب بيكي و عايز اطلب ايدك في اسرع فرصة ممكنة ) و شوف ردها

الحاجة التالتة

لو اتحججت بأي حجة .. شيفاك كويس بس و اصل و معلش .. يبقى اصرف نظر عنها خالص و التفت لحياتك و مستقبلك

و آخر نصيحة هقولهالك

لو في ايدك وظيفة او باب رزق .. اتقدم حتى لو مش جاهز بنسبة 100% .. اتقدم و ربنا هيساعدك

و ربنا سبحانه و تعالى اخد على نفسه عهد انه يساعد 3 اشخاص

شاب مقبل على الزواج
رجل يسعى لأداء فريضة الحج
رجل مجاهد في سبيل الله

و عن تجربة شخصية .. انا خطبت في شهر يناير اللي فات و كنت محدد لنفسي سنة و اتفقت مع اهل زوجتي على كدا

ربنا سهل لي الامور و كل حاجة تمت في 8 شهور

اهم حاجة صدق النية و الاخلاص

و احذر من التلاعب ببنات الناس .. لأن دا هيقعد لك .. في اخواتك او بناتك لا قدر الله

و ربنا يوفقك للخير و الصواب

**minicooper20** · 14-12-2014 02:49 PM

المشاركة الأصلية كتبت بواسطة أحمد كمال

بتركنك استبن عشان لو لقت عريس احسن ما تبقاش وعدتك بحاجة و لو ما لقيتش تبقى ما خسرتكش ....... فهمت ؟

مش شرط على فكره
زى ما فى الحلو فى الوحش
انتا كده عقدتو من الحوار من قبل حتى ميبقا فيه مره تانيه فيها توضيح
مش يمكن مبتعملش علاقات و مش عايزه تحرجو
و مش يمكن ملهاش فى القصص دى اصلن
و يمكن بتحذ واحد تانى و مرضيتش تكسفو
فى اقترحات كتير غير موضوع الاستبن ده من ضمنهم طبعا حوار الاستبن
لاكن فى اسباب تانيه اكيد

hh · 14-12-2014 03:20 PM

انت اساسا قلت لها انك عايز تخطبها؟؟ أصل هي يمكن فاكراك بتتكلم على ارتباط مش رسمي و بتفهمك انها مش بتحب النظام ده.

الصح انك تتكلم معاها دوغري و تقولها نيتك بالظبط و تطلب منها رد واضح بدل ما تقعد تفسر الكلام بمليون طريقة

**khaled_sabry** · 14-12-2014 04:31 PM

مع احترامى لكل الردود السابقه
هل انتا نفسك ناوى تتقدم لخطوبتها دلوقتى ؟؟؟
حضرتك قولت انها زميلتك فى الجامعه - يعنى انتا نفسك لسه طالب فى الجامعه
طيب لو اختك اتقدملها دلوقتى طالب فى الجامعه و عاوز يخطبها - هل حتقبل بيه فى ظل الظروف الاقتصاديه المنيله ؟؟؟
هى واضح انها بنت محترمه جدااا و هى رفضت محاوله تقربك منها لأنها ماشفتشى من وراها غير محاوله منك لل"صحوبيه" حتى لو نيتك سليمه
لأنك لسه طالب و مش حتقدر تتقدملها دلوقتى و حتى لو قدرت اهلها مش حيوافقو غير لما تكون نفسك او على الاقل تلاقى شغل محترم تقدر تفتح بيه بيت

انا لو بنتى اتقدملها شاب بمواصفاتك دى حقوله يأجل الموضوع 3 او 4 سنين

**mohamedFTW** · 14-12-2014 11:25 PM

هي بنت جميلة شوية .. و النهاردة سلمت عليا الصبح .. و كانت طول اليوم بتبص عليا ( اصحابي كانووو بيقولولي كدة ) علشان كنت مش مديها اهتمام شوية .. و هي خجولة شوية يعني بتتكلم معايا علي الفيس كتير بس في الوقع بتتكسف شوية .. في موضوع الخطوبة انا الحمد لله الشقة موجودة و اهلي اكيد هيسعدوني و مفيش عندي جيش الولد الوحيد ... انا مش عايز اقول لما اكلمها اقولها اخطوبها علي طول كنت عايز اعرفها اكتر شوية ... علشان اكون متأكد من شخصيتها شوية قبل مأداخل اهلي معايا في حاجة !

**mohamedFTW** · 15-12-2014 12:54 AM

رأيكم اية ؟؟

**khaled_sabry** · 15-12-2014 08:04 AM

المشاركة الأصلية كتبت بواسطة mohamedftw

هي بنت جميلة شوية .. و النهاردة سلمت عليا الصبح .. و كانت طول اليوم بتبص عليا ( اصحابي كانووو بيقولولي كدة ) علشان كنت مش مديها اهتمام شوية .. و هي خجولة شوية يعني بتتكلم معايا علي الفيس كتير بس في الوقع بتتكسف شوية .. في موضوع الخطوبة انا الحمد لله الشقة موجودة و اهلي اكيد هيسعدوني و مفيش عندي جيش الولد الوحيد ... انا مش عايز اقول لما اكلمها اقولها اخطوبها علي طول كنت عايز اعرفها اكتر شوية ... علشان اكون متأكد من شخصيتها شوية قبل مأداخل اهلي معايا في حاجة !

ماهو ده بالظبط اللى كنت اقصده بالجمله دى

المشاركة الأصلية كتبت بواسطة khaled_sabry

هى واضح انها بنت محترمه جدااا و هى رفضت محاوله تقربك منها لأنها ماشفتشى من وراها غير محاوله منك لل"صحوبيه" حتى لو نيتك سليمه

بص صدقنى انا دلوقتى 33 سنه - لكن كنت فى يوم من الايام 21 برضه و كان فيه بنت عجبانى و كنت برضه عاوز اتعرف عليها اكتر تمهيدا للجواز و الحمد لله الموضوع فشل من اول محاوله التعرف دى

فانا فاهم نيتك كويس و عارف انك ماتقصدشى حاجه غلط - لكن المشكله فى المجتمع بتاعنا و انتشار فكره لو عاوز تتجوز بنت يبقى لازم "تصاحبها" فتره علشان تتعرف عليها كويس
رغم ان نفس المجتمع ده حينهش فى عرضها لما يلاقيها "مصاحبه" واحد حتى لو كانو حيتجوزو
مجتمع متناقض انا عارف - و انا شخصيا ما ادركتش كده غير لما كبرت و اتجوزت كمان

بص انتا كده كده فيه صله بينكم عن طريق الفيس (ماكنشى موجود على ايامنا) يعنى مش حتخاف من فقدان وسائل الاتصال بيها بعد ما تتخرجو
انتا وقف الموضوع على كده لغايه لما تتخرج و بعد كده كلمها و تانى يوم تروح بيتها
لكن موضوع تتعرف عليها اكتر قبل الجواز - ده اسمه "صحوبيه" و دى ملهاش اى عائد غير انك حتنتقص من سمعتها
و لو متخيل ان فتره التعرف دى ضروريه علشان تعرفها كويس - فحقولك لا مالهاش لازمه لإن اى بنت بتعرف تظبط نفسها على المواصفات اللى ترضى الشاب اللى متقدملها و مش حتعرف حقيقتها غير بعد الجواز
لو حتقول امال اخطبها كده على طول !!! - حقولك فترة الخطوبه نفسها هى اللى المفروض تعرف فيها طباعها و تنفع و لا لاء

طبعا انا عارف انا بقولك الكلام ده و انتا فى سرك بتقول ايه الراجل اللى عايش فى العصر الحجرى ده و مش حتنفذ اى حاجه منه