الموضوع: اشكاليه تسخين العربيه ، نسخن و لا لأ !!!

المشاركة الأصلية كتبت بواسطة م أحمد

معلش المعلومة بتاعت " كل السيارات الحديثة اللي تشتغل بنظام “حقن الوقود” والمعروف عاميـًا بالـ”البخاخات” (( من موديلات التسعينات وممكن قبل حتى .. )) لا تحتاج التسخين .. أبداً "

المعلومة دى خاطئة تماما وكل العربيات سواء كاربيراتير او انجكشن تحتاج لتسخين و كمان حتى العربيات الديزل

ليه؟

لان المحرك مصمم على خلوصات معينة بين البساتم و السلندر و بين عمود الكامات و الصبابات عند درجة حرارة معينة لا تزيد اوتنقص

فلو الخلوصات دى واسعة اكتر من حد معين (نتيجة برودة المحرك و انكماش المعدن) بيحدث تهريب للوقود الغير كامل الاحتراق من غرفة الحريق الى الى دورة الزيت مما ينتج عنه تغير خواص الزيت بسرعة الى الاسوأ و تقليل كفاءة التزييت معناها تقصير عمر المحرك

بالاضافة الى ان السيارة و هى باردة كفاءة الوقود المحروق فيها اقل و دا برضه تهدير للوقود

و بالنسبة للخلوصات بين عمود الكامات و الصبابات فتوقيت الاشعال و الماكنةعلى غير ضبطها الطبيعى فى الدرجة السخنة بيقلل كفاءة التشغيل و سحب العربية

ومش كدة و بس فى مجال المواتير الديزل فى الكهرباء ينصح بعدم تشغيلها لاقل من 40 % من الحمل الاقصى ليها علشان موضوع الخلوصات دا و ساعات بيتحط حمل وهمى dummy load لو الحمل الموجود مش هيبقى كفاية لتشغيل الديزل تشغيل ساخن

و شكرا

اتفق معاك إن كل المحركات محتاجة تسخين...

بس المقصود بالتسخين هنا هو الانتظار فترة من الوقت - حوالي 5 دقائق - لحد ما العربية تسخن قبل ما تتحرك بالعربية.

الوضع ده طبعا مرفوض تماما

اتفق مع حضرتك إن الخلوصات ما بتبقاش مضبوطة في بداية التشغيل.. بس تقدر تمشي بالعربية وهي كده بس بدون رفع دوران المحرك لما فوق منتصف مدى الدوران .. يعني حوالي 3000 RPM في معظم المحركات.. وده الموصى عليه في كل الكتالوجات

كان عندي تويوتا كريسيدا 82 (كاربيراتير)... وكان مكتوب في كتالوجها إنه بمجرد دوران الموتور تقدر تتحرك بعد 30 ثانية... بس ما تزودش دوران عن 3000 RPM.. لحد ما العربية تسخن.

بمعنى أصح... عامل السيارة بحرص خلال فترة التسخين.

والكلام ما اختلفش في العربيات الحديثة

الفكرة إنك لما بتمشي بالعربية بتخلي وقود أكتر يتحرق وينتج حرارة أكبر.. وبالتالي الموتور بيسخن بسرعة... على عكس التسخين قبل الحركة... مؤكد إن السيارة هتاخد وقت أطول في التسخين.


ده كله بافتراض إن ثرموستات الكوعة راكب وسليم.. ووقت وصول المحرك لحرارة التشغيل في الحالة دي يفترض إنه ما يزيدش عن 3 دقايق.. خصوصا في أجواءنا اللي تعتبر دافية نسبيا مقارنة بأجواء أوروبا.


أما بالنسبة للغازات اللي بتهرب إلى البلوك في بداية تشغيل المحرك.. المفترض إنها ما تفضلش جوه.. ولازم تطلع من بلف ال pcv ( ودي اختصار لجملة positive cranckcase ventilation valve ) ومنه بترجع تاني إلى مانيفولد السحب وتدخل تتحرق مع البنزين

يمكن لو استخدام العربية بيكون لمسافات قصيرة عالبارد زي كده فعلا الزيت بيتأثر.. مش من الغازات بس.. إنما من بخار المية اللي ناتج من الاحتراق كمان...

إنما لو العربية بتشتغل كل مشوار لمسافة أكتر من 8 كيلو.. تأثير الغازات دي يمكن إهماله.

ده السبب الأساسي لاعتبار إن تكرار التشغيل "البارد" للسيارة يعتبر من حالات الاستخدام الشاقة اللي تستوجب تغيير الزيت بشكل أسرع.


...