الموضوع: ما هو تقيمك للفلوانس فيس ليفت بعد مرور عام على نزولها

المشاركة الأصلية كتبت بواسطة Tamer Elkateb

بصراحة انا مش غاوى العربيات الفرنساوى بشكل عام لكن المنتدى هنا بدأ يزغلل عينى على الفلوينس. لكن بعد ما قريت كتير وجدت مجموعة كبيرة من العيوب بعضها ممكن يقضى على تنافسية العربية من اساسها. انا هاحاول هنا اقدم ملخص لعيوب العربية بعد بحث مفصل واعتقد الناس ممكن تتناقش فى هذه العيوب بشكل محايد. انا بصراحة عندى مشكلة ان كل واحد يشترى حاجة فى مصر يحاول يقنع نفسه وغيره ان دى احسن حاجة فى الدنيا علشان كده اتمنى الردود تبقى محايدة وموضوعية.

العيوب باختصار هى:

1. نقص الزيت وعلاجها عن طريق تغيير الموتور بمعرفة التوكيل وفى نظرى دى كارثة
2. مشاكل فى عمود الدركسيون وعلاجها عن طريق تغييره بمعرفة التوكيل
3. فجوة الإستجابة أو التأخر في الإستجابة للضغط على بدال البنزين
4. مشاكل فى اختيار نوع الزيت المناسب للعربية وصوت العربية العالى نتيجة كده
5. اصوات وتزييق من التابلوه
6. اكصدام ضعيف نوعا ما بيحصل له تقشير للدهان بسرعة
7. عزل متوسط المستوى

حضرتك عضو جديد لسه النهارده اهلا بك فى المنتدى :)

بس حضرتك واضح انك مش متابع اخبارها من فتره طويله .
1- موضوع الزبت ده انتهى من فتره طويله يمكن من 7 شهور . اقرا الموضوع ده هايفيد معلوماتك

http://www.nilemotors.net/Nile/433260-a.html

2- ده برضه ظهر فى عربيتين فى شهر يناير اللى فات و التوكيل غيره فى يومها تحت الضمان و من غير اى مشكله و كانت منهم عربية المهندس هانى منسق القسم و ممكن كمان يجاوبك شخصيا لازالة اى تخوفات :)

3- جبتها منين دى الفجوه دى ههههه . هو حضرتك ما سوقتش عربيات فتيس cvt قبل كده ؟ انصحك جرب .

4- نوع الزيت ده احتكار فى كل التوكيلات و بيستخدموا توتال و عادى غير النوع مش مشكله يعنى ..

5- تزييق ازاى برضه فى التابلوه ؟ المفروض انه العربيه معايا بس مش باسمع حاجات الا لو مشيت فى اماكن مكسره هاتكون الاصوات زيها زى الكوروﻻ و المرسيدس و اى عربيه تانيه هاتتبهدل فى شوارعنا .

6- عند حضرتك الملاك ممكن يردوا عليك فى موضوع عزل الصوت ده و اغلبهم ركبوا عربيات كتير من نفس الفئه و اعلى . حضرتك هاتقارنها بايه بالظبط فى مستوى عزل الصوت ؟

7- الاكصدام بيقشر على اساس انه بقية العربيات اكصداماتها مش مدهونه و اى حكه فيها ما بتقشرش ؟ :))

اهلا بك عضو جديد فى المنتدى :))

المشاركة الأصلية كتبت بواسطة tamer elkateb

شكرا استاذ ياسر على اهتمامك وردودك. انا مش متخصص فى السيارات بس انا باعتمد على معلومات من منتديات السيارات. انا هامسك نقطة نقطة للسهولة.

1- اتمنى يكون موضوع نقص الزيت انتهى على كده. الرابط بتاعك كان مفيد جدا بس اتمنى انهم يكونوا بيقولوا الصدق. اعتقد كمان ان الافضل الواحد يبعد عن المستعمل ويخليه فى المضمون. بالمناسبة هو اول موديل فى الفيس ليفت هو 2013 ولا 2014.

2- ممكن اعرف مصدر معلومتك عن موضوع عمود الدريكسيون وازاى عرفت انه فى عربيتين بس! فى كذا مناقشة على المنتدى هنا ومنتديات تانية الناس بتقول فى حالات كتير.

3- لا بصراحة انا مسقتش عربية بفتيس cvt قبل كده. المعلومة بالمناسبة جاية من منتدى تانى ومن شخص بيقول على نفسه متخصص وعمل على العربية test drive.

4- المشكلة مش فى ماركة الزيت بس. المشكلة ان التوكيل مش عارف اللزوجة المناسبة للموتور وده مؤشر مش كويس ويدل ان التوكيل مش فاهم فى العربية اللى بيبيعها.

5- مشكلة التزييق دى بالذات موجودة بكثرة على المنتديات ولو حضرتك دورت شوية هتلاقى عشرات النقاشات على الموضوع ده. ومش معنى انه مش موجود فى عربية حضرتك انه مش موجود. بالعكس ده بيدل ان العربية مفيهاش consistency او adequate quality control ,بالتالى كل عربية بتطلع بشكل.

6- موضوع العزل ده خاص بالصوت والريحة وبرضه موجود فى عدة نقاشات على المنتدى ده ومنتديات اخرى. المقارنة كانت بشكل اساسى مع السيفيك و الكورولا.

7-برضه موضوع الاكصدام موجود فى حتت كتير. كل الاكصدامات بتقر لكن فيه بيتقشر بسهولة وفيه لا. ده بالظبط زى ما تقول ان كل العربيات الصاج بتاعها بيتأثر لما تتخبط لكن فيه عربيات صاجها بيستحمل شوية وعربيات لو ريحت عليها بايدك الصاج بيطبق. اتمنى تكون الفكرة وصلت.

:) كل نقطك ناقشتها فى بوستى السابق و اتناقش هنا برضه على المتتدى كتير .

اهلا بك :))