الأفضل إنك تستخدم نفس الماركة للزيت وللإضافات..

كل الزيوت فعليا عليها إضافات... بمعنى إن مفيش زيت في السوق بدون إضافات إطلاقا... وأول الإضافات اللي لا يمكن الزيت ينزل من غيرها هي محسنات مؤشر اللزوجة.. ودي اللي بتخلي الزيت له رقمين لزوجة زي ما احنا متعودين.

المشكلة الكبيرة.. إن الإضافات لها أنواع كتير.. وممكن أكتر من نوع يأدوا نفس الغرض.. وكل شركة ليها مواد معينة بتستخدمها غير الشركات التانية.

فيه بعض أنواع من الإضافات بتتفاعل مع بعض وممكن تدينا نتائج إيجابية أو سلبية.. والنتائج دي تختلف حسب المادة المتفاعلة...

هل حضرتك عندك فكرة عن نوع الإضافات دي إيه تركيبها الكيماوي؟؟
طيب هل عند حضرتك فكرة عن التركيب الكيماوي للإضافات الموجودة فعلا في الزيت اللي حضرتك بتستخدمه؟؟


أكيد ﻷ

يبقى لو احنا عايزين نحسن من أداء الزيت.. فالأفضل نستخدم نفس الماركة للزيت والإضافات.. علشان نبقى ضامنين - إلى حد ما - إن الإضافات اللي هنحطها مش هتتفاعل بشكل سلبي مع الزيت.


مع العلم...

بعض شركات الزيوت بتقوللك إن زيوتها مش محتاجة إضافات.. بمعنى إن الزيت فيه ما يكفي من الإضافات فعلا.. واحتمال ظهور نتائج سلبية لو حطينا إضافات من عندنا هيبقى عالي... وتخسر الزيت وتخسر موتورك.


...