الموضوع: اخيــــــــــرا ... فلوانس e3

السلام عليكم ورحمة الله وبركاته

ازيكم يارجالة الفلوانس يااجدع ناس :)

الحمد لله رب العالمين استلمت الجميله فلوانس e3 وبشكر الشباب اللي في المنتدي هنا علي مجهودهم و النصيحه اللي بدون اي مقابل والحمد لله سعيد باختياري الي الآن :) ويارب دايما

بعد لف ودوران وحيره طويله علي معارض العربيات وقرار الشراء اللي كل مره يتأجل لظروف مختلفه استقريت علي فلوانس

في الاول كنت بفاضل بين ثلاث عربيات السيراتو والكروز والفلوانس

السيراتو: سقطتها من حساباتي لان بتنعدم فيها من وجهة نظري القيمه مقابل المال غاليه جدا وكمان عوامل الامان فيها اوبشن ده غير العفشه اللي ناس كتير من اصحابي بيشتكوا منها

الكروز: كنت خلاص هاشتريها وده علشان الثبات اللي بيضرب بيه المثل وعوامل الامان وال esp اللي مش موجود في اي عربيه في الفئه دي بالسعر ده لكن الشكل العام للعربيه من بره ومن جوه مش مقتنع بيه اوي وحسيت ان الاوبشنز قليله شويه وده اللي خلاني اغير قراري

الفلوانس: اول ماركبتها قولت هو ده اللي كان نفسي فيه عربيه بتهتم بعوامل الامان من اول فئه abs, ebd, bas, airbag, bluetooth, multi-function ثبات مرضي جدا وشكل عام اكتر من ممتاز من وجهة نظري داخليا وخارجيا ، استهلاك كويس للبنزين اوبشنز اكتر من اي فئه في نفس الفئه السعريه

الشكل الخارجي 9/10

من وجهة نظري الفيس ليفت افضل من الشكل الاصلي من حيث الشكل الخارجي وان كان التعديل بسيط بس فرق كتير وخلي شكل العربيه افضل


الشكل الداخلي 9/10

شياكة وفخامة الأوروبي بجد اول ماتركب العربيه تحس الاحساس ده علطول .. جودة الخامات معقوله جدا والشكل العام للمقصوره ممتاز .. المساحه الداخليه اكتر من رائعه .. العدادات الديجيتال شكلها حلو جدا .. والتابلوه والطاره مستغلين كويس وشكلهم انيق جدا .. الفرش نص جلد ونص قماش ودي حاجه عجباني جدا وبفكر لو هاعمل فرش هاعمله كده بردو علشان يمشي صيف شتاء

وضعية القياده 9/10

وضعية القياده ممتازه وخصوصا لما تعلي الكرسي شويه وتبقي كاشف الطريق كله وبالنسبه للابعاد سهل تاخد عليها بسرعه والكراسي مريحه جدا


استهلاك البنزين: لسه قيد التجربه بس انا فولت 60 لتر مشي حاليا 360 وفاضل في العداد 340 كيلو كمان مش عارف ده كويس او لا ممكن يتغير او لا الله اعلم :)


الفرامل ممتازه 9/10


النظام الصوتي: بردو لسه قيد التجربه لسه مش عارف اجيب افضل مافيه بس كتقييم مبدئي 8/10


الثبات 8/10

وده علشان انا مش بحب الجري اصلا اخري 160 فالعربيه ثباتها في السرعه دي مرضي جدا بالنسبه لي


عزل الضوضاء 7/10

كويس بس كان ممكن يكون فيه افضل من كده لو كان فيه عازل في الكابوت علشان صوت الموتور


الفتيس والموتور 9/10

الفتيس الحمد لله اكتر من هايل مافيش اي احساس بالنقلات ولا في نتشه ولارجرجه في السرعات البطيئه .. اما بالنسبه للموتور فصوته ناعم بس عالي شويه


العفشه 9/10

احساس غير طبيعي مقارنة بعربيتي القديمه نيو اكسنت كنت حاسس ان انا في مراجيح مولد النبي :) العفشه ناعمه جدا وامتصاص جيد جدا للنقر .. كنت باخد نفس الطريق بعربيتي القديمه كنت بحس ان انا في الملاهي فعلا دلوقتي نفس الطريق ومش حاسس لبمطبات ولا حفر ولا اي حاجه .. الحمد لله

التكييف: طبعا لسه ماشغلتوش علشان التليين فمش هاقدر احكم عليه دلوقتي

التقفيل: بصفه عامه كويس بس يعيبه صوت التزييق الخفيف اللي في الابواب وفي زنه بسيطه جايه من التابلوه مش عارف من ايه .


معلش طولت عليكم بس حبيت اشارككم النقله الحضاريه اللي انا حاسس بيها :D


تحياتي،

المشاركة الأصلية كتبت بواسطة mfraig

تقرير جميل وياريتك كنت طولت اكتر من كده :))
التقارير عموما الواحد مابيزهقش من قرايتها
الف مبروك وربنا يبعد عنك عيون الناس

شكرا ياباشا لذوقك .. الله يبارك فيك .. التقرير اللي جاي اوعدك يكون اطول من كده .. بس خليك فاكر انت اللي قولت :)