تأجير السيارات

**Dr.eslam gaber** · 25-12-2014 12:02 AM

السلام عليكم ورحمة الله وبركاته
في البدايه أحب أوجه تحيه لجميع من بالمنتدى الجميل ده اللي فادني جداً الفتره اللي فاتت واللي بعتبره مرجعي في سوق السيارات

دلوقتي أنا المفروض هجيب عربيه تقسيط بهدف إني أدخلها إيجار (تعاقد) لضمان ثبات المبلغ الشهري بس ناس كتير بتخوفني من إني أدي العربيه لمكاتب التوكيلات والحاجات دي لكترتهم المريبه وعدم وجود قانون في بلدنا فكنت عايز أعرف إزاي أقدر أأمن نفسي وهل لو حصل حاجه وإتسرقت لا قدر الله التأمين الشامل بيشيلها على إنها سرقه ولا ساعتها أنا اللي ألبسها ؟

ولو حد يعرف مكاتب محترمه موثوق فيها ياريت يقوللي علماً بأني في الإسكندريه.

أتمنى الجميع يشترك ويساعدني ضروري.

شكراً مقدماً.

**Mahmoud_Lutfi** · 25-12-2014 10:00 AM

نصيحة مني بلاش تسلم عربيتك لمكتب

المكاتب مشاكلها كتير

و إذا كان المكتب تعامله كويس و مضمون .. ممكن الزبون اللي ياخد العربية ما يكونش مضمون

و حصلت قبل كدا كذا مرة ان واحد زي حضرتك يكون شاري عربية بالقسط و مسلمها لمكتب

يقوم يجي زبون معندوش ضمير ياخد العربية عشان ينقل فيها مخدرات او ادوية ممنوعة او سلاح او الخ

العربية تتمسك في اول كمين و الزبون يتقبض عليه و العربية تتصادر

و ساعتها المكتب مش هيعرف يعمل لحضرتك حاجة

و هتفضل تسدد في اقساط حاجة ما بقتش تحت ايدك اصلا

فبجد حرام تعمل كدا .. الامر ما يسلمش

و ماتخليش حد يسوق عربيتك الا انت بس

**Karim_Monir** · 25-12-2014 10:53 AM

منصحكش نهائي لمكاتب التاجير
وكمان لو حصلها حاجة يعني سرقه لازم يكون مكتوب في الوثيقه ضد السرقه
يعني مثلا لو اتثبتت بيها التامين مش هايغطيها لانك لازم تكون مزود في الوثيقه ضد السطو المسلح
التامين في مصر بقي بيتلكك عشان ميدفعش فلوس
ولو كل حاجه تمام ومتغطيه في الوثيقه مش هايدوك اكتر من 70% من القيمه السوقيه للعربيه وقت السرقه