الموضوع: استفسارين بخصوص نيسان سنترا ؟

اخي الكريم انا بعتذر لسيادتك اذا كنت حسيت اني بهاجم حضرتك وده غير صحيح ومن الواضح ان حضرتك تعرف اكثر مني في السيارات لانك عارف الاسعار كلها والمميزات بتاعت السيارات .
بس انا ماكنتش بهاجمك او بهاهجم نوع سيارة بعينه .... بس انا كنت بتكلم عن تجربة شخصية حبيت اوضحها للي بيحول يختار بين سيارة واخري لاني كنت في نفس الوضع قبل ما ربنا يوفقني واشتري النيسان السنترا .

بس فيه ملحوظة صغيرة حابب اني اقولها ... مشكلة النيسان السنترا في مصر انها موديل جديد لسة الناس معرفتوش وخايفة منه , عشان كده مبيعاته قليلة في اول نزول ليها وده مش معاناه ان العربية وحشة , وهي نفس مشكلة الموبيلات السامسونج من كذا سنة .... لو الناس تفتكر لما المصريين كلهم كانوا شايلين موبيلات نوكيا واللي كان معاه موبيل سامسونج كان الناس تترياء عليه !!!!! وكلها وجهات نظر وكلها تحترم ....

المشاركة الأصلية كتبت بواسطة ReeMoOo

السلام عليكم
مساء الخير يا جماعه

انا حاليا معايا عربية دايو نوبيرا 2001.. وان شاء الله هغير قريب
وكان لافت نظري اوي السنترا 2015... عاجبني اوي الانسيابيه اللي فيها ومواصفاتها طبعا مقارنه بسعرها وان صعب نلاقي المواصفات دي كلها فعربية بالسعر دا لو هنقارنها بفئتها يعني.

فنا تقريبا عاجبني فيها كل حاجة سواء في التصميم الخارجي او شكلها من جوة.

فنا دلوقتي عندي استفسارين

- الاول :

اللي مقلقني منها بس هو اني مش لاقيه اي حد جربها اقدر اخد منه انطباع عنها، خصوصا موضوع الفتيس الـ xtronic ctv دا

هل هو بيخلي العربية بطيئه جدا وبشكل ملحوظ يعني في الطلعه؟ .. ولا البطئ دا بطئ نسبي ؟
مع العلم ان انا سواقتي بشكل عام بتبقى هاديه. يعني لما بكون على الدولي مثلا مبعديش ال 120-130 بالكتير اوي

هاكون شاكرة جدا لحد يكون جربها وساقها فعلا عشان يديني انطباع عام عنها ويجاوب على سؤالي بالنسبه لموضوع الفتيس دا

- الاستفسار التاني :

هل انا من خلال التوكيل اقدر اركبلها شاشه رؤيه خلفيه؟ .. هل دي متوفره للموديلات المصريه ؟؟



شكرا جزيلا :)

أنا مش معايا العربية علشان كده مش حفتي
بس انا كنت ناوي اجبها و عملتلها تست درايف - حضرتك ممكن تعمليه هو ببلاش و كلمي نيسان لتحديد موعد مع معرض قريب ليكي- انا عملته عند موزع في شارع النزهة بس ناسي اسمه

بس انا اشتريت كورولا الفئة التانية للاسباب الاتية
السنترا فقيرة اوي في الاوبشنز، الخامات الداخلية ممتازة جدا بس الاوبشنز قليلة. يعني الهاي لاين المرايات مش بتضم كهرباء و التكيف مانيوال و كمان اوبشنز تدوير الهوا عبارة عن دراع يدوي، ده اللانسر القديمة بتاعتي )2008) كان زرار. الي يفقع بقه ان التيدا الي ارخص منها فيها الاوبشنز دي !!!!!
العربية دي هي هي التيدا بس سيدان و واسعة و شالوا كام اوبشن منها

نيسان معروفة انها اقوي مواتير في اليباني بي برده اسوأ عفشة في اليباني
الفيتيس x-tronic رائع و من الافضل علي الاطلاق. الكورولا برده CVT و رائع برده
من و جهة نظري هي فيها مشكلتين
مش منتشرة فقطع الغيار ممكن ماتكونش متوفرة
الاوبشنز قليلة اوي علي السعر ده

المشاركة الأصلية كتبت بواسطة reemooo

اولا انا متشكرة جدا لاهتمامكو يا جماعه والله.

وهو انا حاليا مفيش سبب حقيقي يخليني ماسكه في السنترا بالعكس...
انا موجوده كل يوم هنا في المنتدى، وكل يوم بستقر على عربيه شكل في نفس الفئه السعريه دي
وبحاول اقرا المشاركات واطلع عليها واكون فكرة عامه عن العربيه

انا في الدوامه دي بقالي اكتر من شهر :)

بس انا اعتقد اني حاليا نوعا ما بدأت اميل للفلوانس بامكانياتها الكتير وسعرها الخيالي!

بصراحه موضوع اختيار عربيه دا موضوع متعب ومرهق لأبعد الحدود :)

مع احترامي للفلوانس بس انا مقتنع بالاتي (انا بسوق من 25 سنة من ايام الجامعة و جربت كتير)
لو عايزة اعتمادية و عربية ماتعطلش يبقي يباني و علي رأسهم الهوندا و التويوتا - عربيات فعلا مابتعطلشي
لو عايزة ركوبة و دلع و احدث تكنولوجي بس ادفعي بقه يبقي الاوروبي و خصوصا الالماني

المشاركة الأصلية كتبت بواسطة ibrahiiimooo

الاستاذ h28174eg المحترم( ارجو من حضرتك تعيد النظر في الاسم علشان المشاركات بعد كده)
اولا يا سيدي الفاضل انا ما علقتش على اداء العربية لان زي ما حضرتك قولت انا مش مالك للعربية و انما اتفرجت عليها اكتر من مرة و بالمناسبة عملتلها test drive اكتر من مرة عند السبع
ثانيا لمل نبقى بنتكلم عن عربية ب ١٧٥ الف يبقى احنا مش بنتكلم عن السيراتو و الالنترا و انما بنتكلم في فئة تانية مقارنة السنترا حتبقى مقارنة ظالمة جدا ليها نظرا للفقر الشديد في الخامات و الاوبشن مثلا
الشارك ( و بدون اي تعداد للمزايا و اولها التقفيل الياباني مش التيلاندي) الهاي لاين ب١٦٨ الف ارخص من السنترا
الفلوانس ( لو فضلنا نقول الاوبشن الي فيها مش حانخلص) الهاي لاين ب ١٨٠ الف اغلى ٥ الاف جنيه فقط من السنترا و ماتور و فتيس و تكييف ياباني من نيسان علشان الناس اللي بتخاف من الفرنساوي اللي بقى في العربية بدي و اوبشن بس
الكورولا الفئة التانية ب ١٧٠ الف و فيها اوبشن اكتر من السنترا و خصوصا الesp
الاسترا ( برضه بدون اي تعداد للمزايا عن السنترا) ب ١٨٠ الف
الفورد فوكس ( بالمناسبة اخي العزيز عايز تتفرج على عربية بجد في الخامات و التقفيل و الجودة روح بص على الفوكس مرة واحدة بس) التريند بلس ( اللي بنفس فقر السنترا مع اختلاف جودة الخامات و التقفيل لصالح الفوكس بمراحل) ب ١٧٨ الف جنيه
السؤال بقى اشتري السنترا ليه؟؟؟
المسالة ان نيسان بقت بتبيع عربيات باسعار مبالغ فيها لمجرد العلامة التجارية و ثقة الناس في المنتج الياباني لاعتماديته المتوقعة بس ده ما يبررش ارتفاع السعر مقابل الخدمة و الاوبشن المتدني الواحد لما هيشتري عربية هيشتري منتج مش سمعة
عايز تتاكد من كلامي قارن مبيعات التيدا الجديدة ( النسخة الهاتشباك من السنترا و كمان اوبشنها اكتر و كفاية التكييف التتش الي مش موجود في السنترا بكل الفئات) بمبيعات مثيلاتها في نفس الفئة السعرية و حتلاقي انها مش محققة مبيعات تذكر
سؤال غتت هو ايه اللي في السنترا من التكنولوجيا مش موجود في مثيلاتها زي ما حضرتك قولت في المشاركة؟؟؟؟

بصراحة مفيش كلام بعد هذا الكلام المعقول جداً والعملي جداً من جميع النواحي، شكراً لك صديقنا العزيز على هذا التحليل الأكثر من رائع

المشاركة الأصلية كتبت بواسطة h28174eg

لو ممكن ارد علي اسنفسار حضرتك . بالنسبة للسنترا انا اشتريت عربية من شهر وليا تعليق علي كلام الاستاذ اللي بيقول انه شافها في المعرض وطبعا اللي جرب غير اللي شاف .

السيارة من برة انسيابية جدا ومش ميالغ في تقاصيلها زي العربيات الموجودة زل السيراتو والالنترا
تاني حاجة من جوة فخمة جدا ونقفبلها اكثر من ممتاز
ثالث حاجة واسعة وعالية عن الارض وعائلية بالدرجة الاولي وبالنسبة للتنكولوجيا فهيا فيها حاجات كتير مش موجودة في مثيلاتها والثبات بتاعها علي الطريق انا جيبت بيها 180 وكانت زي الفل وده بالاضافة للفرامل الجامدة جدا .... بصراحة انا ناوي انزل تقرير مفصل عنا بالصور ان شاء الله ... وشكرا

انا بفكر في السنترا و لو حضرتك عملت تقرير يبقي أفدتني جدا لأني ما قرأتش ليها و لا تقرير .

حعمل ان شاء الله تقرير قريب بعد ما اكمل الالف كيلو.العربيه تكييفها جبار رغم انه تاتش وما تضحكوش دي ميزه عشان العيال ميلعبوش في الزراير.العربيه عائليه واسعه بفتحات تكييف خلفيه مواصفات الخليجي الفئه التانيه والتالته.عفشتها قويه وتتحمل وخاماتها متقشرش ولا تشقق في الشمس زي عربيات كتير في فئتها ببساطه فخمه.تنجيد الكراسي مخليها مريحه ووسع الشنطه خيالي.اداءها عالي وخاصه لما تشغل زرار ال sport mode .اما عن استهلاكها للبنزين فهو مرضي جدا جدا.العربيه عائليه في المقام الاول واعتماديه جدا حسب سمعتها في الخليج.وفيتيسها وموتورها متاخد في الفلوينس الجديده وبيفتخروا بيه.لكن اعتماديتها وخاماتها حسموا الامر خصوصا واني كنت راكب قبليها ميجان ٣ ٢٠١١ هايلاين.عربيتي هايلاين على فكره والعزل بتاعها جبار بمعنى الكلمه

المشاركة الأصلية كتبت بواسطة dreslam

حعمل ان شاء الله تقرير قريب بعد ما اكمل الالف كيلو.العربيه تكييفها جبار رغم انه تاتش وما تضحكوش دي ميزه عشان العيال ميلعبوش في الزراير.العربيه عائليه واسعه بفتحات تكييف خلفيه مواصفات الخليجي الفئه التانيه والتالته.عفشتها قويه وتتحمل وخاماتها متقشرش ولا تشقق في الشمس زي عربيات كتير في فئتها ببساطه فخمه.تنجيد الكراسي مخليها مريحه ووسع الشنطه خيالي.اداءها عالي وخاصه لما تشغل زرار ال sport mode .اما عن استهلاكها للبنزين فهو مرضي جدا جدا.العربيه عائليه في المقام الاول واعتماديه جدا حسب سمعتها في الخليج.وفيتيسها وموتورها متاخد في الفلوينس الجديده وبيفتخروا بيه.لكن اعتماديتها وخاماتها حسموا الامر خصوصا واني كنت راكب قبليها ميجان ٣ ٢٠١١ هايلاين.عربيتي هايلاين على فكره والعزل بتاعها جبار بمعنى الكلمه

السنترا مش بتنزل بتكيف تاتش دي الهاي لاين بتاعها بينزل بتكيف مانيوال و كمان اوبشن تغير دوران الهوا و سحبه من بره بدراع زي اي عربية بتعريفة و كمان المرايت مش بتضم كهربا. في عربيه في الفئة السعرية دي مافيهاش الاوبشنز دي؟
العربية غالية جدا علي الاوبشنز الي فيها
العربية مبيعاتها في مصر قليلة جدا جدا و ده يضع علامة استفهام كبيرة علي قطع الغيار في المستقبل
و في الاخر كل واحد حر يشتري الي عايزه و يتحمل نتيجة قراراته
علي فكرة انت لما بتشتري عربية تجيب عربية ليها سوق في مصر، يعني ممكن عربية تحفة و مالهاش سوق زي السوبارو دي عرية هايلة هايلة يعني و مابتعطلش بس مالهاش سوق مش هاعرف ابيعها.