اول حاجة السلام عليكم وعشمي فيكوا اني الاقي الحل من اهل الخبرة هنا لان انا جيبت اخري مع الميكانيكي والكهربائي

تاني حاجة وهو اني كنت عملت صيانة العفشة وغيرت قاعدة موتور خلفية و اتكلمت عن ده في موضوع سابق من يومين

المهم بقى العربية اتشقلب كيانها اول ما استلمتها وبيحصل فيها الاتي :

اول ما تدور الار بي ام بيفضل يلعب طالع نازل ولو زودت بنزين وهو كده العربية بتبطل وصوت العربية بيعلى ويوطي وممكن بعد شوية الار بي ام يتظبط بس مع المشي بيرجع يلخبط تاني

العربية بتطلع دخنة سودة بطريقة غريبة

لو ماشي بسرعة وهديت العربية بتبطل وساعات في المشي الهادي بتبطل برضو

الميكانيكي اللي عملي الشغل كان شاكك في حساس الاير ماس فجيبنا عربية اخت عربيتي وخلعنا منها نفس الحساس وركبناه عندي ومفيش حاجة اتعدلت

قالي روح للكهربائي يشيك ع الكهربة وروحت وكشف وقالي كله سليم ارجع للمكيانيكي رجعتله وبرضو ولا اي جديد

اخر ما غلبت قولتله اكشف كمبيوتر تاني واخدت الاكواد اللي مكنش عارف يفسرها وقولت اكيد بإذن الله هلاقي تفسيرها هنا لانهم مش راضيين يتمسحوا واكيد هما سبب المشكلة

الاكواد هي:

(P0115-E2 (Ect- circuit malfun-ction

P0410-E1 (secondary Ais -circuit malfunction

ياريت لو حد من الاخوة يعرف تفسير الاعطال دي لان يقولي عليها الميكانيكي مش عارفها وبيقول انها اول مرة تطلعله ع الجهاز ومتعاملش معاها قبل كده

اه العربية بتشرب بنزين وف يومين بس حرقت صفيحة بنزين وزيادة وتعتبر ما مشيتش يدوب من البيت للورشة والعكس والمسافة مش كبيرة

مستني ردودكم ومساعدتكم