الموضوع: تقرير حجز و استلام و ترخيص نيو لوجان 2015

بسم الله الرحمن الرحيم

كل سنة و انتم طيبين بمناسبة المولد النبوي الشريف و بمناسبة السنة الجديدة

حبيت انقل لكم التجربة اللي مريت بيها في استلام و ترخيص سيارتي الجديدة ( نيو لوجان الفئة الثالثة ) ـ

نبدأ بسم الله

1- بعد دراسة و بحث و كمية اسئلة و استشارات استمرت حوالي 4 شهور في عالم السيارات استقريت على نيو لوجان و دا طبعا في حدود امكانياتي المادية .. و دا غير طبعا السؤال في المعارض و عند الوكيل عن السيارات اللي كنت بقارن بينها و آخر 3 سيارات كنت بفاضل بينهم كانو شيفروليه افيو - رينو لوجان - BYD f3

2- المعارض ميزتها انها بتسلمك فوري و بيكون في اوفر برايس من 3000 لحد 5000 جنيه و انت و شطارتك و دا طبعا بينفع للي مزنوق في عربية و معندوش وقت يستنى بالشهور على ما يستلم

3- ميزة الوكيل انه بيديلك العربية بسعرها الرسمي بدون اوفر برايس بس طبعا في مدة انتظار مش بتقل عن شهر و مش بتزيد عن 3 شهور و على حسب وكيل كل ماركة

4- رحت يوم 25 نوفمبر اللي فات لوكيل الشركة المصرية العالمية للسيارات في شارع 26 يوليو و حجزت نيو لوجان ب4000 جنيه .. الموظف فرجني على عربية كانت معروضة عنده و طبعا كلمني عن الاوبشن اللي فيها و مضيت معاه استمارة الحجز و كان مكتوب فيها مدة التسليم 12 اسبوع ( يعني 3 شهور )

5- بعد 4 اسابيع الوكيل اتصل بيا و قالي مبروك عربيتك وصلت بدري عن ميعادها بس اللون مش متوفر في لون فضي و نبيتي بس تحب تستنى لحد ما اللون بتاع حضرتك يوصل ولا تختار لون من الموجود .. اترددت شوية و بعدين اختارت الفضي و امري لله و كان بنفس السعر اللي كنت متفق عليه يوم الحجز

6- قبل الاستلام بيوم رحت دفعت بقية المبلغ و يوم الاستلام رحت في المعاد المفترض وصول السيارة فيه و للأسف مكانتش لسه وصلت و قعدت مستني ما يقرب من 3 ساعات لحد ما الهانم وصلت بالسلامة الساعة 10 بالليل يوم 29-12 اللي فات

7- طبعا كشفت على كل العربية ( كشافات و مساحات و فرش و اطمنت ان كل الوظايف فيها شغالة و مفيهاش خدوش ولا تجريح ) و استلمنا مع العربية جواب المرور و صورة الافراج الجمركي و عقد الاستلام و مكتوب فيه رقم الشاسية و الموتور و بعدين اخدناها و توكلنا على الله و طبعا القرآن الكريم اول حاجة شغلناها فيها .

8- اول لمبة نورت كانت لمبة البنزين .. طلعنا على بنزينة في شارع جامعة الدول فولنا منها

9- صوت الموتور كان عالي شوية في الاول بس مع الاستخدام بيهدى و لسه هيهدى اكتر بعد ما اعمل صيانة ال 1000 كيلو وانزل الزيت القديم اللي فيها

10 - الثبات لحد 130 كيلو كويس و مقبول و طبعا مينفعش اجري اكتر من كدا عشان لسه في فترة التليين

11- العفشة مش ناشفة اوي ولا ناعمة قوي .. مرضية الى حد ما - التكييف جربته و شغال تمام بس طبعا فصلته تاني عشان مينفعش يشتغل قبل 500 كيلو

12- من الحاجات المزعجة في العربية - الانذار اللي بيشتغل اول ما اتحرك لحد دقيقة و نص بسبب عدم ربط حزام الامان - حاجة مستفزة فعلا - دا غير مكان ربط الحزام اللي مزنوق زنقة غبية يمين الكرسي - و برضة فرد الكراسي الامامية بتتفرد ببكرة مش برافعة و دي حاجة مملة - تحديد ابعاد العربية من الصعوبات اللي لاقيتها في الاول بعد كدا اتعودت

13- نظام ال Day light دا اللي مخلي كل الناس مركزة معاك و كل ما حد يشوفك ( اطفي النور يا كابتن ) طب دا مش بيطفي يا جدعان اولع فيه طيب ولا اعمل ايه ( ناقص اعلق ورقة اشرح فيها ان نظام العربية كدا ) :D

دا كان بالنسبة لاستلام و تجربة العربية

نيجي بقى للترخيص

1- ( شهادة البيانات ) : رحت الاول مرور بين السرايات ( قريب من محطة مترو البحوث ) عشان اسأل على الافراج بتاعها وصل ولا لسه .. لقيته وصل بفضل الله و الموظف كتب لي رقم الوارد على صورة الافراج و قالي روح على شباك كذا عشان تطلع شهادة البيانات .. لقيت الموظفة بتقولي هات صورة البطاقة و 5 جنيه و استنى ساعة و بعدين روح استلمها من الشباك اللي جنب البوابة

2- طلعت قعدت عالقهوة و استنيت الساعة اللي قالت عليها و كل شوية اسأل على الشباك بره و لقيت الشهادة طلعت بعد حوالي 70 دقيقة انتظار ,.. اخدتها و طلعت تاني يوم على مرور العجوزة (تبع محل اقامتي ) عشان ارخص

3- وصلنا الساعة 8:20 تقريبا وقفت العربية في طابور الفحص عشان انجز وقت و كان معايا واحد صاحبي عشان كل ما الطابور يتحرك يطلع هو بالعربية و اخلص انا بقية الاجراءات

4- دخلت على الخزنة الاول اشتريت ورق ترخيص عربية جديدة و كان ب 45 جنيه - مليت البيانات المطلوبة و سبت بيانات المرور يحطوها هما بمعرفتهم - طلعت على شباك 19 سلمت الموظفة الورق قالتلي اطلع افحص و تعال تاني

5- طلعت على كشك جوا المرور بيبيع طفايات حريق جبت منه واحدة ب 147.5 و جبت شنطة اسعافات و مثلث عاكس ب 90 جنيه و حطيتهم في شنطة العربية و دخلنا على الفحص

6- العامل فتح الكبوت و اخد بصمة الموتور و الشاسية و لزقهم على ورقة الفحص ( الورقة الزرقاء ) و قالي روح للظابط .. الظابط مضى عليهم و قالي روح لمهندس الفحص - مهندس الفحص سألني على الطفاية و قالي طلعها - قعد يدقدق عليها بأرقام معدنية معرفش بتاعة ايه و اداهالي و مضى و ختم على استمارة الفحص و قالي اطلع اركن بره و تعال تاني

7- ركنت بره و رجعت له قالي اطلع للضابط امضي تاني منه و اختم و روح رخص - عملت زي ما طلب مني و طلعت على الست اللي في شباك 19 .

8- الموظفة قالتلي صور البطاقة صورة و هات حافظة ب 12 جنيه و تعال .. جبت المطلوب و رجعت لها - ادتلي ايصالين فيهم 834 جنيه و قالتلي روح ادفع في الخزنة و سلم ايصال منهم لشباك اللوحات المعدنية و هات التاني و تعال - و دي كانت قيمة الضريبة لمدة 3 سنين لعربية 1600 سي سي

9- دفعت و رجعت لها قالتلي انا كتبت لك المهندس للتأمين روح على التأمين الاجباري و تعال تاني - حاضر يا فندم رحت امنت و دفعت 320 جنيه تأمين 3 سنين و رجعت لها - قعدت تشخبط شوية على الكيبورد و قالتلي هتروح على شباك 26 تسلم الملف و بعد ما تستلم رخصة العربية هتروح لشباك اللوحات المعدنية تستلم النمر

10- رحت سلمت الملف زي ما قالتلي الراجل قالي روح استلم رخصتك من شباك كذا ( مش فاكر كام

11- رحت فضلت مستني ما يقرب من ربع ساعة و بعدين لقيت الراجل بينادي اسمي و بيقولي الف مبروك يا باشا ... اخدت الرخصة و طلعت على شباك اللوحات اخدت لوحات مضروبة بستين جزمة شكلها كانت مفكوكة من على عربية لادا بس مكانش في مجال اغيرها

12- طلعت بره لقيت الراجل اللي بيعلق النمر قولتله عايز اعلق يا ريس قالي عينيا يا باشا - و قعد يخرم في العربية و انا قلبي بيوجعني عايز اقوله براحة عليها يا عم دي لسه عروسة :D

اديته اللي فيه النصيب و اخدت العربية و دعيت دعاء الركوب و رجعت على بيتي

و اي سؤال تحت امركم

المشاركة الأصلية كتبت بواسطة ahmed_kh81

الف مبروك. .. وربنا يكفيك شرها. ...
بس ليا سؤال بدور علية
الثبات في السرعة اخبارة اية خصوصا ان في ناس بتشكك في الثبات وانها بتعوم في سرعات اقل من 100 .... وربنا يباركلك

الله يبارك فيك يا رب

تعوم أقل من 100 ؟؟ !! مفيش الكلام دا

انا مشيت بيها 130 امبارح و ثابتة جدا معايا ,, طبعا كان الشيطان بيلعب في دماغي عشان اجري اكتر بس مكانش ينفع عشان لسه في التليين