من فضلكم العطل العجيب دة من اية

**sameh_se** · 14-01-2015 08:16 AM

السلام عليكم ورحمة الله وبركاته
من يومين ركنت العربية عادى خالص و جيت تانى يوم ادور العربية حلفت ميت يمين ماهى دايرة و البطارية نامت من التدوير المهم رحت امبارح للكهربائى و غيرت طقم بوجيهات و سلك البوجيهات و كانت العربية بسم الله ما شاء الله و درات تمام .
ركنتها وجيت النهار دة العربية الصبح وانا رايح الشغل دارت عادى خالص بس عملت حاجة غريبة كل ما ادوس بنزين العربية تكتم و تنتش منى لدرجة انها ممكن تقف ما تمشسش و شوية تظبط دقيقة او دقيقتين و ترجع تانى و الى يجنن انها على السلانسية تمام و ذى الفل بس اجى ادوس بنزين تكنم و مترضاش تسحب و لازم احايلها على شان تمشى ممكن تكون اية يا جماعه tps ولا حساس كرنك و لا حساس كولنت ولا ايه .
انا هتجنن .شكرا لكم و اسف على الاطالة

**احمد فهمى** · 14-01-2015 08:45 AM

دي مش اعراض حساس كرنك وحاسس انها طرمبة بنزين

**pepo2011** · 14-01-2015 09:01 AM

باشا غاااالبا طرمبة بنزين ثم الاحتمال التاني البوابة والرشاشات بس الميكانيكي يعمل اختبار الطرمبة الاول لو تمام يشوف الاحتمالات التانية

وربنا معاك هو عيب رخم انا عارف بس بسيطة انشاء الله

**mido3_gho** · 14-01-2015 09:11 AM

الجزء الاولانى غير التاني ياباشا

اعتقد الاول شغل بواجي وبطارية وإتصلحت

الجزء التاني طرمبة بنزين او شوف فلاتر البنزين .. والله اعلم

**Mecha** · 14-01-2015 09:49 AM

جعانة بنزين ,وشوف الموبينة
واضح الصيانات مش تمام

**Haitham Gamal** · 14-01-2015 11:06 AM

انا الموضوع دة حصل معايا مرة وطلعت ان العربية عندي متلتة
انا عارف انك غيرت البوجيهات بس حاوت تشوفها مرة تانية
يمكن في البوجيهات اللي انت جبتها فيها واحد قاطع

**sameh_se** · 14-01-2015 11:33 AM

المشاركة الأصلية كتبت بواسطة haitham gamal

انا الموضوع دة حصل معايا مرة وطلعت ان العربية عندي متلتة
انا عارف انك غيرت البوجيهات بس حاوت تشوفها مرة تانية
يمكن في البوجيهات اللي انت جبتها فيها واحد قاطع

العربية امبارح كانت زى الفل الموضوع دة حصل النهار دة الصبح على غيار الريق .
انا برجح موضوع طرمبة البنزين حد يعرف اسعار .
و هى تيجى استيراد ولا جديد .
و شكرا مرة تانية