الموضوع: الانسجنيا بعد استخدام ٦ أشهر و ١٦٠٠٠ كم

لاحول ولا قوة الا بالله
ان شاء الله خير وتتحل المشاكل وانا مقدر احساس ان العربيه جديده وسعرها غالى ويظهر فيها عيب موضوع صعب
وبصراحه انا كنت ناوى اشتريها بس من الشكاوى اللى ظهرت منها صرفت نظر عنها

و ديه حتبقي اخر اوبل اشتريها الاقيها من التوكيل ولا عيوب الصناعة في حاجة اساسية زي التيل

المشاركة الأصلية كتبت بواسطة احمد فهمى

ردي يعتبر مكرر اولآ ربنا يعوض عليك فى ال300 الف معلش انا اسف فى التعبير بس ببساطه شديده كان فى فيلم فى اوائل الالفينات اسمو Big Fish لتيم بورتون وده مخرج عالمى طبعآ والرقابه فمصر رفضت عرضو مش ﻷنو فيلم خارج لا كان ردهم جميل جدآ انه لا يتوافق مع العقليه المصريه وبعيدآ عن مضمون الفيلم اللى هو عادي جدآ لكن التعبير عجبني وده اللى المفروض الجمارك تراعي فى الناس ان فى عربيات لا تتوافق مع مصر ولا توكيلات مصر ولازم يتوقف استيرادها انا حذرت الناس ومفيش فايده لا اسنرا ولا انسيجنيا ولا مرسيدس اللى هى احترمت نفسها وقفلت مصنعها فمصر دى عربيات لا تقل عن 95 اوكتين واللى فمصر 95 هو اصلآ 92 او 90 غير الميه والجاز اللى بيضيفو على البنزين فى محطات كلنا اتنصب علينا منهم ....
اذا القصه مشاكلك مش هتتحل ﻷنها مشكلة بلد لا عربيه ولا انت نفسك وكيل مستهتر بالناس ومش هيجيبلك حقك وهيمرمطك لحد فترة الضمان ما تخلص وبعدها هتشوف وش ملوش حل يعنى لو روحت تقولو فى نتشه يقولك فتيس وب80 الف او عيب كنترول وب30 الف ومش موجود وضحايا الايزى ترونيك فى كل مكان عربيه كانت ب240 الف وبتتباع ب100 الف بالعافيه لو حاله نضيفه نفس الوضع لباقى الموديلات وانا اتفقت مع ملاك الاسترا والانسيجنا مستنى اخبار مواتيرهم والعربيه عامله 100 الف كيلو مع البنزين ال92 منصور يقول عادي الكركره والكلام ده وعادي برضو افضيلك زيت المتور ومية الريداتير وامشيلك شويه حلوين بالعربيه لكن هتخرب بعد مشوار ....
ردى لنقطه واحده صوت التخبيط اول ما تدور ده صوت البوابات ﻷنها ضغط هو وبتفتح لوحدها لما تبطل العربيه وتقفل اول ما تدور صوتها عالى فكل اوبل وده عدم جودة صناعه ...
والتيل والطنابير برضو عيب صناعه خصب عن اي حد يقول غير كده دى عربيه ما مشيتش اصلآ وبالتوفيق

كلام مليون الميه
المشكله ان اصحاب العربيه مش عاوزين يقتنعوا ان العربيه فيها مشكله وفاكرين كلمنا معاهم اننا عاوزين نعيب فى العربيه وخلاص انا الغرط من كلمنا المصلحه علشان يعرفوا ياخدوا حقهم من التوكيل وهما لسه فى الضمان ما يحصلش معاهم زى الى حصل معانا ملاك الفيكترا سى والاسترا h لما عربيه ب300 الف وفيها المشاكل ديه والتوكيل مش عاوز يعترف بالعيوب الى فى العربيه فكل واحد حر الواحد كل ما يتكلم مع واحد من ملاك الانسجنيا ندخل فى جدل جامد زى ما اكون بشتمه بامه فبكرة الايام تثبت الصح مين

الحقيقة الموقع هنا مختلف ... الناس هنا غاوية العربيات وبالتالي مستواها الفني في فهم السيارة و مشاكلها و لهم القدرة علي التفكير في حلول. ده هو المرجو احنا عارفين ان العربية فيها عيوب ... الحل ؟ الكل يبيع ؟ مش حل لكن ممكن اسأل أهل الخبرة؛ البنزين ال٩٢ ينفع يضاف عليه اي ماده لنحسين فعاليته؟ هل يفضّل استخدام منظف للرشاشات و غيره و لو ينفع اي اقتراح لأنواع معينة و كل كام كلم؟. موضوع التيل و الطنابير، هل حقيقي ان التيل متوقع يستهلك في ١٥٠٠٠ كلم باستهلاك طبيعي؟ هل ممكن التيل يفس الطنابير .... ممكن نعرض المشاكل المتفق عليها و نستفيد من أهل الخبرة هنا الحقيقة انا استغربت من قلة المكتوب عن العربية دي فنياً خاصة ان الملاك محتاجين مساعدة لفهم المشاكل و إيجاد حلول. جزيل الشكر للكل و يا مسهل نلاقي حلول مفيدة.

المشاركة الأصلية كتبت بواسطة حسام فتحي

الإخوة الأفاضل الموضوع ده هو تجربتي الشخصية مع الانسجنيا أرجو ان يفيد وان تفيدني ردودكم.

العربية معي من آخر يونيو ٢٠١٤، انا بدأت ببنزين ٩٥ لمدة شهر و نصف و بعد كده اصبح صعب لسفري لأماكن ليس بها ٩٥. اداء السياره كان خرافي سلاسة و سحب رائع.

نقلت ل٩٢ بعد حوالي شهر و نصف وبدأ الأداء يسوء الي ان غيرت الي ٩٥ تاني من حوالي شهر بعد قراءة موضوع للاستاذ منسق أوبل عن أثر ٩٢ السييء علي الموتور. الأداء تحسن فعلا لكن الغريب اني باقرأ لملاك آخرين انهم بيستخدموا ٩٢ و ممكن مرة في الشهر ٩٥ وسعيدين جداً باداء السيارة. انا اصبح عادي عندي انقل للمانيوال علشان أعدي سيارة او أسرع قليلاً.

من او يوم وانا لاحظت ضعف التكييف و كتبت هنا و في كل صيانة كنت اشكو منه. مع صيانة ال١٥٠٠٠ بنفس المركز قيل لي ان "خرطوم التكييف به ثقب و محتاج تغيير ، ولأنه غير موجود ذهبت الأسبوع التالي وتم التغيير، ما زلت اشكو من ضعف التكييف :) وقالوا ان التبريد يكون جيد لما تضبط الحرارة اقل من ٢٠ ....بعد ثاني و ثالث يوم كنت حاسس بتبريد ولان الجو برد أصلا بطلت اجربه. امس هواء المروحة أبرد منه لابد من رحلة تانية مع التوكيل. الغريب ان احيانا يدخل هواء ساخن من المروحة مع إغلاقي للهواء من الخارج!!! افتح و أقفل تاني يظل هكذا لدقائق و يرجع يدخل هواء ساخن آخرين عندهم نفس الملحوظة.

الفرامل ... بدأت اسمع صفارة من قبل ال ١٠٠٠٠ كلم و عند صيانة ال ١٠٠٠٠ طلبت الكشف عن سبب الصرير مع الفرامل ... نظفوا التيل و ...... و بدأت الاحظ هزة مع الفرامل. عند صيانة إل١٥٠٠٠كلم و بعد تكرار الشكوي النتيجة ان التيل "بلط" والدِيسْك او الطوابير الأمامية "اتلسعت" بحسب مصطلحات المهندس. لابد من تغييرهم تماماً لكن الضمان رد ان الطنابير خارج الضمان و تكرر الرد نفسة عند مركز منصور للصيانة إللي بآخر ميدان الرماية. الي عرفته ان دي مشكلة متكررة مع عربيّات كتير و بدون خوض في تفاصيل كثيرة ساءني ان مهندسي منصور كانوا بيتكلموا و كلن دي مشكلة استخدام و ان الطنابير او الديسكات خارج الضمان. ده بالنسبة لي عيب خطير و تصرف غير مسؤل غير ان المهندس قال لي ان العادي اننا نغير التيل عند ١٥٠٠٠ كلم. مع ان التيل تقريبا جديد و غير متآكل.

في صوت واضح لزنة وكأن في موتور صغير بيزن مثل دينامو لعبة مثلا يدور، وده ملحوظ حتي ٢٠٠٠ (ر ب م) قابلت شخص في التوكيل بنفس الشكوي.

احيانا عند التدوير صباحاً أسمع تخبيط داخل السيارة و كأن في حاجات مرتبكة و بتخبط ... ولان وصف ده صعب ما علقتش و امس وجدت بعض المالكين بِيَتَندروا علي ده و يقولوا "قطة الانسجنيا المحبوسة" طبعا في حاجة غلط.

احد الملاك من يومين شكي من ان العربية ما دارتش معاه، أخذها التوكيل علي ونش و قالوا له انها محتاجة تغيير موتور و طه مُغطي بالضمان - حسب ما فهمت- لكن رفضوا اعطاءه اي تقرير بهذا الشأن وهو مستاء جداً طبعاً.
طبعاً هناك بعض الايجابيات و هي الاوبشن الكثيرة بالسيارة لكن من وجهة نظري كمستخدم ان ده ممكن يكون سبب معظم مشاكلها لانها مصممة لاوروبا و جوها اكتر من عندنا. لو عندي الاختيار تاني اكيد حافر في حاجة غيرها.

أرجو ان يكون الملخص أعلاه مفيد للبعض و دي تجربتي انا و ممكن جداً يكون غيري لهم وجهة نظر اخري ولهم كامل الاحترام.

سياسة الصوت العالى وقلة الادب بتجيب نتيجة فى الحالات دى
منصور مصمم انه يقضى على الباقى من سمعة اوبل فى مصر