ميجان 2 عربية بنت ناس

**inlotfy** · 29-01-2015 02:05 PM

اولا انا سعيد بانضمامي للمنتدى الرائع
ثانيا لاني اصبحت من ملاك ميجان 2 حبيت اشارك رأيي معاكم
لاني عشت في اوروبا اكتر من 10 سنين فكل العربيات اللي ركبتها كانت اوروبي ومعظمها فرنساوي بداية من البيجو 207 مرورا بالسيتروين واخيرا ميجان 1
لما رجعت مصر كنت محتار اشتري ايه..ولاني مش من انصار شراء العربيات الزيرو وخصوصا في مصر (مجرد قناعة شخصية ليها اسبابها) فكان في دماغي الاوروبي
منكرش اني في الاول اتفاجئت وانا بدعبس على النت ان العربيات الكوري اغلى من البيجو والستروين والرينو في المستعمل وبصراحة مكنتش فاهم السبب لحد ما واحد صاحبي حاول يقنعني بمميزات الكوري من حيث رخص الصيانه وقطع الغيار وخلافة وكان كل ما يتكلم يقولي لو جبت اوروبي مش هتقدر تبيعه

اولا انا مش تاجر عربيات عشان افكر في البيع كل شهر انا مببعش العربية الا اذا لقيت مصاريف صيانتها زادت عن حدها

باختصار اخذت القرار وعجبتني جدا الميجان 2 وبالفعل اشتريتها ولسه معايا وسعيد بيها للغاية
رائي المجمل في العربية الميجان انها عربية بنت ناس ولازم اللي يشتريها يبقى فاهم ده كويس جدا
ومع مرور الايام اكتشفت اني كنت صح
عربية محترمة وفيها كل وسائل الراتحة وامان
الصيانه عادية ومش مكلقة زي مهو شايع
انتشارها في الشوارع معقول جدا

اخيرا والاهم انها بتلبي كل احتياجاتي من حيث الراحة والامان والفخامة والعملية والاعتمادية
حاجه لاحظتها من مالك العربية القديم انه عمره ما حاول يقرأ كتالوج العربية لدرجة انه مش عارف معظم امكانات العربية
فعلا عربية مظلومة نتيجه لثقافة متوارثة اغلبها مبني على السمع

**fepsceasar** · 29-01-2015 02:25 PM

احييك على طريقة تفكيرك بتعكس فعلا انسان مثقف وواع ..مش واحد ماشي ورا كلام الصنايعية السكة والتجار بيلعبوا فى دماغه

**albasha** · 29-01-2015 03:10 PM

ألف مبروك وربنا يباركلك فيها إن شاء الله
فعلاً الميجان سياره بنت ناس يعني عايزه إهتمام وهتاخد منها أداء فوق الرائع

**yasser100** · 29-01-2015 03:11 PM

كلام جميل لناس فاهمه , انا طول عمرى اقول انه الماركات دى لناس و ثقافه معينه .

حتى الان العربيه دى لما اشوفها بتعدى باكون عايز ابص عليها لجمال تصميمها اللى مش بيقدم .

**mfraig** · 30-01-2015 05:33 PM

حتى بعد مابعتها عشان بهدلتني معاها كل مابشوفها في الشارع بحس اني مركبتش ولا هركب بعد كده الا لو جبتها تاني او جبت فلوانس

**تامر.محمد** · 31-01-2015 02:05 AM

كلام جميل و منطقي .... فعلا العربية دي اتظلمت ظلم بين , من اللي ما ركبوهاش , و من كتير اوي من اللي ركبوها و طلبوا منها اعتمادية الياباني و اداء الالماني و رفاهية الفرنساوي و رخص قطع غيار الكوري بتاع زمان

و الحق ,, انها كعربية لو حسبنا اللي اتعمل فيها في السوق هنلاقيها محترمة جدا

بنركب لها مقص تركي ب200 جنيه , و مقص اللانوس اظن ب400 جنيه .... و مش عاجبة ناس كتير :)