ربنا معاك ان شاء الله و يظهر الحق
عرض للطباعة
ربنا معاك ان شاء الله و يظهر الحق
أحب أقدم رسالة شكر و تقدير لجميع العاملين على موقع نايل موتورز على حياديتهم و على عملهم المستمر الدؤوب لتبنى قضايا هامة زى قضيتى و قضية الإستاذ محمد مؤمن و غيرنا كتير, و فتح باب الأمل لينا إن صوتنا يوصل للجميع و إحنا بندافع عن حقنا, وفتح باب الأمل لكتير غيرنا إنهم مايستسلموش للضغوط المفروضة عليهم و يدافعوا عن حقهم. بإذن الله بكرا هايكون أحسن.
http://nileup.com/up/uploads/nilemotors_14249481861.jpg
النهارده ده كان رد بيجو مصر على شكوتى على صفحتهم بسبب الحادث الناتج عن عدم عمل الفرامل بسبب إهمالهم و تقصيرهم فى فحص وحدة الفرامل و إصلاح ما بها من عيب, علما بإنى رحتلهم 5 مرات قبل الحادثة باشتكى منها, و لما حسيت إن كلامهم مش منطقى و سليم لجأت لملاك العربيات أسألهم على نايل موتورز قبل الحادثة بشهر:
http://www.nilemotors.net/Nile/454918-301.html
و أحب أقول لبيجو مصر, ولما إنتم أمناء و خايفين على حياة عملائكم, بترفضوا ليه تكتبوا شكوى العملاء من وجود مشكلة فى الفرامل فى اوردر دخول العربية عندكم, و لما رحتلهم بعد الحادثة و قلتلهم سبب الحادثة إن الفرامل مشتغلتش قالولى مش هانستلم العربية و خدها و إمشى, و بعد ساعات من المحاولات الفاشلة فى إقناعى إن الكاوتش الشمال فرقع و إنى كنت ماشى على سرعة فوق الـ 90 رجعوا فى كلامهم إن الكاوتش فرقع (و ده كلام المهندس حسين فى صلاح سالم), و المهندس محمد عطيه طلعلى المكتب و قالى إن حساس الإيه بى إس سجل إنه إتخبط على سرعة 45 كيلو, و لما سألته بعد كدا فى وجود المهندس حسين مسؤل خدمة ما بعد البيع, رجع المهندس محمد عطيه فى كلامه و قال أنا مش فاكر إذا كنت قلت حاجه زى كدا.
و تعالوا بقى نحلل ردهم مع بعض واحده واحده بالأدلة:
"نأسف على الحادث الذي تعرضت إليه و حمدا لله على سلامتك، و يرجى العلم باننا نتعامل مع المسألة بشكل جاد حيث أن سلامة عملائنا الكرام قضية لا نتهاون فيها و رضاء عملائنا من أهم أولوياتنا"
يا سلام على مدى خوف توكيل بيجو مصر على عملائه, بإمارة خرطوم الردياتير اللى كل وقت و التانى واحد من عملاء البيجو 301 يتقطع عنده, و التوكيل عارف إن ده بيحصل عند الترخيص وبالرغم من إننا قدمنا شكوى جماعية للتوكيل بضرورة التنبيه على العملاء الجدد, لكن التوكيل لم يلقى بالاً أو إهتماماً للإمر. و ده يعرض حياتهم للخطر إنك تبقى ماشى على طريق سريع و مياة الردياتير تتصفى و المحرك يسخن لغاية مايطلع دخان و الله أعلم ده ممكن يتسبب فى إيه.
http://www.nilemotors.net/Nile/414445-a.html
http://www.nilemotors.net/Nile/414762-301.html
"و خصوصاً لضخامة الحادث و التكاليف المتكبدة لتصليح السياره بسبب عدم وجود تأمين ."
و هنا بقى, تحية كبيرة قوى للى كتب الجملة دى ... ليه؟ لإنه عايز يوصل إنطباع للناس إنى بقدم شكوى كيدية ضدهم و بحاول ارمى عليهم اللوم - بتبلى عليهم يعنى - لإنى مش عامل تأمين و تكاليف الإصلاح كبيرة, وبصراحة هيا فعلاً التكاليف كبيرة, بس مش بتكلم عن الفلوس اللى طالبنها (60000 جنيه قابله للزيادة بإضافة سعر علبة الدريكسيون), لاااااا أنا بتكلم عن حياتى و حياة أسرتى و حياة الناس اللى على الطريق, اللى بسبب إهمالكم و تقصيركم عرضتم حياتى لخطر الموت, و كان ممكن الحادثة تحصل على الطريق السريع و تبقى حادثة جماعية.
"· تم فحص السيارة فحصاُ شاملاُ و فحص دائرة التوجيه ( الدركسيون ) و دائرة الفرامل و تبين سلامتهم الإ من اثر أصطدام بصخور اسفل باره الدركسيون و بها إلتواء من تأثير صدمة وذلك واضح و جلى لأى مهندس فنى."
شوف بقى, احب انا الناس الواثقة من نفسها, زى المهندس محمد عطيه اللى لما رحتلهم بعد الحادثة فضل حوالى 7 ساعات يحاول يقنعنى إن الكاوتش الشمال فرقع و إنى كنت ماشى على سرعة فوق الـ 90 كيلو (و كل شويه يقولى إحنا 4 مهندسين و بنأكد على الكلام ده) ... و لما ثبت على موقفى, أخدنى و رحنا لمقابلة المهندس حسين فى صلاح سالم, اللى فى أول كلامه قال إن الكاوتش مفرقعش (و شهد شاهد من أهلها) ... و قبل ما نروح على صلاح سالم المهندس محمد عطيه طلعلى مكتبه و قالى إن قراءة حساس الإيه بى إس سجل إن العربية كانت على سرعة 45 كيلو وقت الإصطدام, يعنى مش فوق الـ 90 كيلو ... و المؤسف بقى, لما رحتلهم مره تانية بعدها بإسبوع, المهندس محمد تراجع عن كلامه قدام المهندس حسين و قال إنه مش فاكر إنه قالى إن قراءة حساس الإيه بى إس كانت 45 كيلو!!
ولما اصريت يجيب القراءة مرة تانية, نزل من المكتب, و بعديها بشويه المهندس حسين قالى عنده إجتماع, و لما نزلت أدور على المهندس محمد لقيته مشى لإن كان عنده برضه إجتماع, فى الوقت اللى هما عارفين إن الونش اللى هاينقل عربيتى من عندهم فى السكة.
و لما طلبت من المهندسين الموجودين يقرأوا البيانات, قالولى مش هاينفع, ليه؟ أصل كارتيرة الزيت إتخرمت و فضت الزيت و ماينفعش ندور المحرك, ومن غير دوران المحرك مش هانقدر نقرأ بيانات حساس الإيه بى إس ... و كانت دى أخر محاولة عندهم إنى أرضخ ليهم و أتنازل عن حقى و أوافق على التصليح عندهم و بكدا يبقى حقى ضاااااااااع.
"و نحن إذ نؤكد حرص شركة القاهرة و صناعة السيارات الوكيل الوحيد لسيارات بيجو فى مصــر على تحرى الدقة وليس لدينا مانع من إنتداب أى جهة فنية محايدة للحكم و التأكد من سلامة السيارة و كذلك سلامة عملاؤنا الأعزاء. "
و بالفعل أنا قدمت شكوى فى حماية المستهلك و هاطالب بلجنة فنية لفحص العربية, و حالياً على تواصل مع شركة بيجو فرنسا. بإذن الله الحق هايرجع لأصحابه بدعواتكم و دعمكم و تضامنكم.
#بيجو #بيجو_مصر #301 #حادثة #فرامل #توكيل #إهمال #تقصير
* ملاحظة: فيه ناس راحت التوكيل و قالهم المقايسة 60000 أو 80000 جنيه, صلحوا العربية خارج التوكيل بربع تمن المقايسة أو أقل.
لكن المشكلة لما التوكيل يبقى عايزك ترجع تركب نفس العربية اللى فراملها فيها مشكلة, يعنى ربنا سترها عليا و خرجت منها حى أرزق, اروح انا ارمى بنفسى فى التهلكة و أركبها تانى على عيبها.
أنا كتبت شكوتى على صفحة بيجو فرنسا و بعتلهم رسائل, لكن طبعاً هما لازم يراسلوا بيجو مصر يعرفوا منهم إيه الحكاية, وطبعاً كعادة التوكيلات و من خلال التجارب مع توكيل بيجو هايحاول ينيمهم و يقنعهم إن كل شئ تمام التمام.
أرجو من الأخوة و الأخوات الكرام دعم قضيتى و مساندتى بنشرها قدر الإمكان عبر شبكات التواصل الإجتماعية, و ممكن تعملوا لايك و كومنت لبوستات شكوتى على صفحة بيجو فرنسا:
https://www.facebook.com/Peugeot
و انا بلغت بيجو فرنسا بالشكوى الجماعية اللى كنا قدمناها السنة اللى فاتت لبيجو مصر و تم تجاهلها, فياريت تشاركوا لينك الشكوى على صفحتهم عشان يبقوا مدركين لأهمية الموضوع و المشاكل اللى بنمر بيها و توحدنا:
http://www.nilemotors.net/Nile/414762-301.html
http://www.nilemotors.net/Nile/414445-a.html
شاكر لحضراتكم جميعاً تضامنكم و بإذن الله الحق يرجع لأصحابه ... و خلينا فاكرين اللى حصل مع الإستاذ محمد مؤمن "مش هاتجيب بوسه قبل ما تمشى" ... لازم نتضامن مع بعض للدفاع عن حقنا.
انا كتبت كومنت على صفحة الفيس لبيجو فرنسا عن الشكوى من مشاكل فرامل 301 وسوء التعامل من التوكيل ورفضهم الاصلاح
بس حضرتك كاتب هنا لينك الصفحة مش الشكوى
ياربت تعدل اللينكات لتكون الشكوى
شاكر جداً لتضامن حضرتك, أنا حطيت لينك الصفحة لإنى كاتب شكوتى تحت كل بوست هما عاملينه, و ده برضه لينك مباشر لشكوتى فى بوست مستقل على صفحتهم عشان يبقى فيه ردود من عندنا عليه و لايك مباشر. و إن شاء الله خير, وماضاع حق وراءه مطالب.
https://www.facebook.com/photo.php?f...4455290&type=1