ربنا معاك
ﻻزم واسطه
اكيد طبعا الوكيل مطفح اللجنه
ﻻءن تقريرك لو تم اعتماده هايفتح علي الوكيل ابواب جهنم
مصر ام الرشاوي والفساد
عرض للطباعة
ربنا معاك
ﻻزم واسطه
اكيد طبعا الوكيل مطفح اللجنه
ﻻءن تقريرك لو تم اعتماده هايفتح علي الوكيل ابواب جهنم
مصر ام الرشاوي والفساد
معلش هو حضرتك كنت راكب ايه قبل ال 301 ؟
أخر التطورات فى الشكوى المقدمة فى توكيل بيجو بجهاز حماية المستهلك بتاريخ 13 مايو 2015
تقرير اللجنة الهندسية كما كان متوقع فى صالح توكيل بيجو, و بصورة مختصر, ذكرت اللجنة الهندسية - كلية هندسة المطرية - إن سبب الحادث ضغط الكاوتش المرتفع للإطارات الخلفية و الذى يبلغ 40 و من المفترض أن يكون 30 ,و حيث أن السيارة كانت على أرض رملية فأدى ذلك لعدم توقف السيارة فى المسافة المفترض أن تقف بها, و تبين لهم بالفحص (اللى كان بالعين المجردة و بدون تفريغ لبيانات كمبيوتر العربية) عدم وجود خلل بوحدة الإيه بى إس.
أولاً: لم يتم قياس ضغط الكاوتش رغم تواجدى الدائم مع المهندسين
ثانياً: ضغط كاوتشات عربيتى بظبطه دائماً على 32 و هوا الموصى به من قبل الشركة (مش 30) على قائم السيارة لإن عربيتى هاى لاين بكاوتشات ميشلان 16, و لما تعرف إن العربية من بعد الحادثة مباشرة يوم 10 فبراير راحت التوكيل و بعد كدا ركنتها عندى, يعنى على كلام اللجنة الهندسية خلال ما يقرب من 3 شهور ضغط الكاوتشات زاد / طلع من 32 لـ 40 و العربية مركونة, فى الوقت اللى الكاوتشات الأمامية نامت على الأرض من كتر الركنة.
ثالثاً: أنا كنت ماشى على أسفلت مش على رمله عشان العربية تاخد حوالى 4 متر عشان تقف على سرعة أقل من 50 كيلو فى الساعة, إلا إذا كان معدل نبضات وحدة الإيه بى إس فى البيجو 301 قليل أو لإن فعلاً فيه مشكلة فى وحدة إيه بى إس عربيتى اللى إشتكيت منها مراراً قبل الحادث و اللينك فى الصفحة الأولى لشكوتى هنا على نايل موتورز بخصوصها قبل الحادث بشهر فى الوقت اللى التوكيل بإهمال و تقصير متعمد من جانب موظفينهم أكدوا إن كل شئ طبيعى رغم إثبات المشكلة بالتجربة أمامهم.
رابعاً: فين اسباب حدفة العربية شمال لما جيت أدوس فرامل من التقرير الفنى و ده كان سبب بداية الحادثة؟ و خصوصاً إن اللجنة أقرت بإن الكاوتش إنقطع نتيجة إصطدام برصيف (أو صخور فى حالتى) و لم ينفجر زى ما محمد عطية كبير مهندسى توكيل بيجو اصر على مدار ساعات و فضل يقولى إحنا أربع مهندسين و بنقول إنك كنت ماشى على سرعة فوق الـ 90 و لما جيت تدوس فرامل الكاوتش إنفجر و ده سبب حدفة العربية شمال.
خامساً: فين الفحص اللى تم على التيل و الطنابير التالفين المخالفين للمواصفات (رغم إنى قدمت أوراق شكوتى بخصوص التيل للجنة الفحص الهندسى) و اللى إشتكيت منهم فى شهر اكتوبر 2014 فى مركز أبو رواش و مركز غمرة و تم رفض كتابة شكوتى منهم و قدمت شكوى كتابية و صوتيه فيهم للشركة بسبب المشكلة دى؟!
سادساً: فين تفريغ بيانات العربية من التقرير؟ لحظة واحدة ... المتابعين لمشكلتى عارفين إن كلية هندسة المطرية طلبت بيانات العربية من محمد عطية (ممثل توكيل بيجو و الخصم) رغم إخبارى للجنة الفحص الهندسى بإنه قام بقراءة بيانات العربية سابقاً و التى تؤكد صحة كلامى ثم تراجع عن كلامه مرة أخرى أمام الأستاذ حسين مسؤل بلف العملاء, و رغم إخبارى لهم بأن المهندس محمد مجدى أخبرنى حينما أصريت على سحب سيارتى من التوكيل بإن إحتمال بيانات العربية تكون إتمسحت.
سابعاً: أفاد التقرير بأن سبب إنقطاع أحد أسلاك بيانات وحدة الإيه بى إس ( من وسط رزمة أسلاك) هوا الإصطدام بالصخور, رغم إن السلك واضح إنه مقطوع بفعل فاعل و دليل على كدا إن باقى الأسلاك كلها سليمة و السلك مقطوع بصورة مشطوفة. و ده بقى عشان يبقى اللجنة الهندسية عندها عذر إنها تعتمد على تقرير الخصم وهوا توكيل بيجو.
نتيجة الجلسة:
قمت برفض تقرير اللجنة الهندسية جملة و تفصيلاً لعدم صحتة و قمت بتقديم طلب لتحويل قضيتى للنيابة العامة, و قمت بإرفاق كل الأوراق و الفواتير التى تفيد بوجود مشاكل فى أجزاء فرامل سيارتى مثل التيل و الطنابير و وحدة الإيه بى إس و شكوتى منهم سابقاً و تعليل رفض قرار اللجنة الهندسية و عدم الإعتراف بصحة ما جاء فيه لإستناده على معطيات خاطئة مقدمة من قبل الخصم فى القضية و لعدم إستيفاء الكشف الفنى للقواعد المتبعة وفقاً لطبيعة مشكلتى و ما أبلغتهم به من محاولات تحايل التوكيل و إحتمالية حذفة لبيانات العربية.
أتمنى على الله إنى ألاقى منكم مساندة لقضيتى و اللى حضراتكم متابعينها على مدار الثلاث شهور الماضية, للوقوف فى وجه الظلم و الإستهتار و التلاعب بحياة الناس, دى معدتش قضيتى لوحدى, دى قضيتنا كلنا و حياتنا كلنا اللى بتكون فى خطر طول ما الكيانات التجارية زى توكيل بيجو بتتلاعب فى مواصفات أمان العربيات و تهمل شكوى عملائها و تعرض حياتهم و حياة أسرهم للخطر و تفلت من العقاب إستناداً لنفوذها و علاقاتها و إمكانياتها المادية.
انا بذكر الحقيقة و اللى حصل, و اللى مش عاجبه نقدى لأخطائه و ظلمه ليا - و لناس تانية - يبقى يلتزم بعهده بالأمانة فى عمله, و اللى بيقوم بواجبه يستحق كل تقدير و إحترام, و مش هاخاف على أحاسيس واحد مش خايف من ربنا.
و أكيد طبعاً من التوكيل و اللجنة ناس بتابع اللى بكتبه هنا, و أحب أبعتلهم السلام و التحية لإن المعركة لسه مشوارها طويل ( و ده راجع لإنهم معتقدين إنهم لو فضلوا ثابتين على موقف الباطل يبقى هايكسبوا المعركة), و فى كل الأحوال إحنا قاعدين مع بعض فى مصر (و حتى لو سافرت برا مصر), هانروح من بعض فين ... بإذن الله هاكسب المعركة و هاجيب حقى :)
وأحب اقول اهلا وسهلاً بكل توكيل بيجو اللي ساكتييييييين خالص دلوقتي اللي زمان كانوا مكسرين الكيبورد في المنتدى ههههههههههههههههههه
ربنا ينتقم من كل ظالم مضلل بس ده اللي اقوله لبتوع بيجو اللي هنا في المنتدى علشان عملوا البحر طحينة في العربية دي اول ما نزلت
أكيد كلنا معاك واللي تحتاجه زي ما قولنالك قبل كده انا وباقي الاعضاء هنفيدك بأي شئ بأذن الله
ولا تتنازل عن حقك وانا كنت متوقع ان ده هيحصل وقولتلك ارفض واطلب تشكيل لجنه جديدة وابدأ في اجرائات القضية
ممتاز جداً اللي انت عملته توكل على الله فلا يضيع حق الظالم !!!!!!
ودي فيها ايه دي يعني ؟؟ دي مشكلة فرامل يعني مفيهاش حرافية تدوس على الدواسة العربية تقف :E_braces[1]::E_braces[1]:
انا قبل الـX1 كنت راكب جيتز واكسيل وعربيات غريبة معنى كده اني مكنتش اعرف احرك الـX1 من مكانها !!!!!!
الموضوع مشكلة فرامل مش كماليات !!!!!! دي حاجة ثابته في كل العربيات يا استاذي الفاضل
بص يا استاذنا المحترم
أولا انا سالت صاحب الموضوع عن النقطة دى بغرض هل دى اول عربية تركبها فيها abs ؟ لان فى ناس اعرفها فى اول تعامل ليها مع ال abs حست بخبط فى الدواسة و ما كانوش متعودين على حاجة زى كدة و حصل خضة من الموضوع دا و ممكن تفتكر ان فى مشكلة او حاجة غلط فى العربية ، لان هو بيقول داس على الفرامل ووقفت بعدها ب 4 كتر فهل تردده فى استعمال ال abs ممكن يكون سبب و لا الاسباب اللى ذكرها
ثانيا
مش كل واحد يخالف فى الرأى يبقى تبع توكيل بيجو و الا انا برضه ممكن اعتبر غيرى تبع كيا مثلا و داخلين يقومو بالواجب
الكلام اللى بنكتبه شقى ناس هتحطه فى عربية
عندى سابق معرفة بنظام الإيه بى إس و لا صوته و لا صوت ترزيعه بيخوفنى عشان أشيل رجلى من على الفرامل, و زى ما بيقولوا الغرقان بيتعلق بقشايه, فحتى لو إشتغل مش هاشيل رجلى من على الفرامل لإن مافيش إختيارات تانية, ده غير إنى لا سمعت صوت زحف كاوتش و لا صوت ترزيع التيل على الطنابير (طريقة عمل نظام الإيه بى إس من فتح و إغلاق التيل على الطنابير بسرعة). و الأهم من كل ده, إن لما جيت أستخدم الفرامل العربية مشيت شمال (بداية الخلل و بداية الحادثة), و ده مالهوش تفسير غير عطل فى وحدة الإيه بى إس (اللى بتحتوى على نظام إيه بى دى اللى بيوزع قوة ضغط الفرامل على كل عجلة بصورة منفردة) أدى لإعطاء قوة ضغط على العجلة الشمال أكثر من العجلة اليمين. و انا حاطط فى اول صفحة لينك لشكوتى من وجود مشاكل فى وحدة إيه بى إس عربيتى من قبل الحادثة بشهور و رحتلهم اكثر من مرة و تم إهمال شكوتى منها, زى ما تم إهمال شكوتى من وجود مشاكل فى التيل التالف اللى بيركبوه فى العربية. و ده الشئ المعتاد من توكيل بيجو, إهمال و تقصير لغاية المشاكل ما تكبر و تتعرض حياة الناس للخطر, و تلاعب فى مواصفات العربية لتحقيق مكسب أكبر, و رفض كتابة شكوى العملاء فى أوردرات دخول العربية لو الشكوى متعلقة بالفرامل و الفتيس و المحرك.