العربيه بتفضل شغاله بعد مابطلها

**Sprint king** · 05-03-2015 11:54 AM

السلام عليكم انا عندى العربيه بعد مابطلها بتفضل تكركب كده وتخبط شويه وبعدين تبطل واحد صاحبى قالى مشكلة كهربا روحت للكهربائى قالى لا ده مشكلة مكانيكى روحت للميكانيكى قالى دى الكهربا مش عارف اعمل ايه

**sonaeg** · 05-03-2015 12:03 PM

نفس الموضوع بالظبط كان بيحصل معايا ... لو عربيتك كاربيراتير يبقي الكهربا بتاعتها عايزة تعلي شوية بس مش اوي عشان ماتسقفش.... الموضوع حيختفي بإذن الله

روح للميكانيكي وقوله عليلي كهربا العربية حاجة بسيطة(عن طريق رجﻻش الاسبيراتير) وتابع لحد ما الموضوع يختفي خالص

**Sprint king** · 05-03-2015 01:26 PM

اله يبارك فيك شكرا على الرد السريع والاهتمام هى العربيه كراربراتير فعلا والميكانيكى قالى ده عاوز طقم صيانه واصلاح حاجه زى كده وتقريبا الكربراتير هو اللى عامل المشاكل دى كلها

**sonaeg** · 05-03-2015 01:44 PM

المشاركة الأصلية كتبت بواسطة sprint king

اله يبارك فيك شكرا على الرد السريع والاهتمام هى العربيه كراربراتير فعلا والميكانيكى قالى ده عاوز طقم صيانه واصلاح حاجه زى كده وتقريبا الكربراتير هو اللى عامل المشاكل دى كلها

العفو ..الشكر لله ... هو اللي قلته لحضرتك ده بعد ما غيرت البوجيهات ونضفت الكاربيراتير وغيرت طقم الكهربا ... حضرتك جرب الاول تعلي كهربا العربية الاول مش حياخد دقيقة وتابع

**غزلة** · 05-03-2015 04:12 PM

معنا كده ان في كهرباء زياده يعني العربية فيه avance

**Sprint king** · 09-03-2015 06:50 PM

متشكر ياجماعه بس الكهربائى قالى العربيه كهربتها مظبوطه عيل صغير مش فاهم شكله او الصبى بتاع الكهربائى مش عارف بقى على العموم انا وديت الكربراتير للحج ابراهيم بتاع شبرا وهاخدو بكره ان شالله وهقولكم اللى حصل خد منى 170 جنيه ابن ال ............ مش عارف ليه بس يارب يجى بفايده

**ahmedhosen** · 10-03-2015 12:26 AM

دة كان بيحصل معايا في عربيتي (هيونداي اكسنت 2005) لعبت في مفتاحين جنب الكاربيراتير
تقريبا واحد بتاع الهواء و التاني بتاع البنزين و المشكلة دي انتهت لما وصلت بمفتاح الهواء لوضعية سليمة
اتمني اني اكون فدتك

**Sprint king** · 10-03-2015 10:08 AM

ربنا يخليك يا استاذ احمد ان شالله هعمل اللى قولت عليه واشوف واقولكم

**Sprint king** · 16-03-2015 12:41 PM

الحمد لله ياجماعه المشكله انتهت بس العربيه محتاجه شوية ظبط بس لسه مودتهاش للمكيانيكى بتاعى بس فيه مشكله العربيه مبتحرقش كويس يعنى العربيه بتجيب دخان اسود من الشكمان وبلاقى زى صماد عند فتحة الشكمان هباب يعنى محدش عندو فكره ايه ده يعنى الموتور خفيف ولا الكربراتير هو المشكله ده انا حتى لسه جايبه من عند ابراهيم اللى فى شبرا

**medhat_salama** · 16-03-2015 01:08 PM

السلام عليكم أنا كان عندى نفس المشكله فى سكودا فليشيا .. وذهبت الى الميكانيكى وتم ضبط الكهرباء من ناحية الكربراتير والحمد لله لايوجد كركره فى السيارة ولا عادم أسود يظهر من الجكمان وأنصح حضرتك أن تذهب إلى ميكانيكى