لو كنت رئيساً ؟!!! قرارك الأول : منع توظيف الإناث ؟!!!
لا حولة ولا قوة إلا بالله
دخلت الموضوع علشان أشوف حاجة تانية خاااالص
كان نفسي أقرأ أول قرار يكون :-
القضاء على الفساد و الضرب بيد من حديد على كل فاسد .
إلغاء الوزارات اللي ملهاش لازمة.
تحديد مدة رئاسية فقط لرئيس الدولة اللى هو أنت !!.
عضو مجلس الشعب ملوش أى راتب على منصبه فدا منصب خدمى مش سبوبة .
توصيل كافة المرافق من مياه و كهرباء و مواصلات و غاز طبيعى للمناطق الريفية و المهملة .
كنت فكراك هتفكر في الغلبان ... في الجعان ... في مشكلة الإسكان .
كنت فكراك هتفكر في تشغيل العاطل وتوفر له الزاد .
فكرتك هتفكر في المعونة وتحاول تلغيها علشان إحتقارنا وإهانتنا بسببها وأصبحو هما اللي بيحكمونا .
فكرتك هتفكر في وزارة التعليم وتعديلها .
فكرتك هتفكر في وزارة الصحة وتعالجها .
فكرتك هتفكر إزاي تخلي للمصري قيمة برة بلده ولا يتذل ولا يتهان علشان يعيش بس إنسان .
فكرتك هتفكر في أزمة المياة وأزمة سد أثيوبيا والكهرباء .
فكرتك هتفكر في مشكلة الغذاء والقمح .
جي على من وصى الرسول بيهم ؟؟
خد بالك لا يمكن تكون ست غاوية تهين نفسها في شغل عام أو خاص إلا لأنها محتاجة – مش بتنزل منظرة .
لإن فطرتها الطبيعية بيتها وولادها – لكن لما بتضطر تنزل تشتغل بتكون كمان خايفة على لقمة عشها .
ممكن تكون أرمة أو مطلقة أو حتى متجوزة راجل يعتمد على النساء اللي أنت مش عايز تشغلهن ( وفيه رجالة كتيير أوي بالشكل دا ) .
ربنا يهدينا للصالح .
