الموضوع: الحمد لله جت سليمة ... حادث بمدينة بورسعيد!!!

المشاركة الأصلية كتبت بواسطة Ramy_Tantawi

السلام عليكم.

مع ان شهادتي مجروحه هنا لأن تربطني بأيمن صداقه شخصيه خارج المنتدى الا اني يعلم الله اني لست هنا لأبرئ ايمن او ادينه بما حدث ......كل اللي عاوز اوصله ان الموضوع بجد صعب على ايمن كفايه ومش وقته ابداً والله العظيم نفضل نحمل الراجل في ذنب الاتنين اللي ربنا قدر ليهم الاصابه وهمساً في اذن اخواني الافاضل تعالوا نساعد الاول ولو بالكلم الطيب كما اوصانا رسولنا الكريم عليه الصلاة والسلام بعد كده نشوف مين غلطان ..........كمان حاجه فضلت افكر فيها ومازلت الحقيقه ....ليه دائما وانا منكم طبعاً بنشوف المصاب فين ونقول عليه بريء واللي ربنا نجاه يبقى اكيد هو الغلطان والمذنب ولولا ستر الله كان ممكن يحصل الشابين دول على المستشفى هو واخوه بس مش اصابة حادث وانما اصابة ضرب افضى الى عاهه بعد الشر او خلافه من تصرف اهل الشابين .......الحادث حصل 3.30 او 4 الفجر مين شاهد ؟؟ مين شاف ؟؟ مين حكى ؟؟ مين حكم العربيه الحمراء حلوه والغريبه عننا اللي هي ملاكي جيزه ولا قاهره هي اللي غلطانه ؟ وبعدين ايه دخل حمية الوطنيه في الموضوع ؟؟ التصرف ده بلطجه وغير صحيح وصادر عن ناس فقدوا صوابهم نتيجه طبيعيه لما حدث لابناءهم شفاهم الله وعافاهم لكن مش حاجه طبيعيه ابداً ليه نبرر التصرف ده ونقول اصل اهل بورسعيد دمهم حامي ........ايه دخل اهل بورسعيد في المجمل دلوقتي ؟ ؟ انا عارف ان ماحدش قال في حقهم حاجه لكن مش عارف ليه وصلني احساس غريب اننا اغراب وسط بعض حتى .......يعني مفروض اعمل حساب اني نازل انهارده اسيوط عشان اهلها مش عارف مالهم اسماعيليه بقى مش بيطيقوا حاجه اسمها اهلي فلازم اكون واخد بالي مالبسش احمر لحسن يحلوا دمي ولا حاجه ......يا جماعه بنقول ازاي نبقى كلنا عرب يد واحده ودلوقتي احنا جوه بلدنا لسه بنفكر اهلي وزمالك !!!! كام بلد يفصلهم 200-300 كيلومتر ومش قادرين نقبل بعض حتى والموضوع دخل فيه جيزه وقاهره وبورسعيد ..........اكن اللي عمل الحادث ده ملاكي اسرائيل مثلاً !!!!

ما علينا مش عاوز اخرج بره الموضوع واعذروني والله انا لا اقصد اساءه لأي حد والله خير شاهد على ما اقول.

عزيزى رامى
أسمحلى أرفعلك القبعة تحية ليك على كلامك الموزون.....
وبرضه هانى......كلامك صح

أحنا دلوقتى بنتكلم على حاجة حصلت وبعض الأخوة حكم أن أيمن غلطان.....هل ده على أساس أنه ضرب الأتنين على أيديهم عشان يجروا ؟؟؟ ولا هوه فعلاً اللى خلاهم يخبطوا فى بعض ؟؟؟
يا جماعة بالراحة شوية وراعو الحالة النفسية اللى الراجل فيها.......ده الواحد فينا لو خبط كلب فى الشارع و موته بيبقى قاعد مضايق.....ما بالكو بأه بالموقف اللى حصل + أراء بعض الأخوة أن أيمن غلطان.......

مش فاهم بصراحة الناس اللى بتتكلم و تقول ان ايمن غلطان و هو سبب الحادث... هو حد عرف الحادث حصل ازاى اصلا؟؟

انا مش بتكلم عن الغلط فى قرار الشد... هما التلاتة غلطانين بشكل متساوىو ان كنت شايف ان بتوع الهوندا هما اللى شخنوا الاول بس ما علينا... الكل غلط و اخد قرار الشد

اما بالنسبة للحادث فا التاكسى اللى قطع الشارع سبب ارتباك للعربية الفضى... و بدل ما الباشا يمسك فرامل و يحاول يقف قبل التاكسى او على الاقل يخبط فيه و يبقى الحادث بينة و بين التاكسى راح رامى يمين على ايمن زى التكسجية و بتوع المكروباص

الحمد لله ان ايمن الفرامل بتاعتة ممتازة (ربنا يزيد و يبارك) و رد فعلة كان سريع و قدر يلم نفسة فى الوقت المناسب و سحب عربيتة من وسط الهوندتين... يعنى الراجل ملمسش اى حد اصلا و لا خبط حد... و دة ثابت من خلال معاينة الشرطة لعربية ايمن و دة السبب ان تم الافراج عنة و لم يتم ذكرة فى المحضر من اصلة

بتاع الهوندا الحمرا اتظلم فى الموضوع بسبب بتاع الهوندا الفضى اللى رمى عليه... الراجل كان بعيد كل البعد عن الفلم من اصلة لكن القرار الخاطىء لصاحب العربية الفضى دخلة معاه فى الحادث

يبقى و فيه ذنب على حد يبقى على بتاع الهوندا الفضى مش على ايمن... و اذا كان فى حد اتصرف غلط يبقى بتاع الهوندا الفضى

بلاش بقى الناس تتكلم و تقول الخطاء خطاء ايمن و ذنب العيال دى فى رقبة ايمن و الكلام اللى مياكلش عيش دة... مش عشان الراجل خرج سليم يبقى هو الغلطان... موقفكم دة بيفكرنى بموقف لما واحد بعربية يخبط واحد ماشى فى الشارع... تلاقى الناس كلها بتهاجم بتاع العربية... مع ان اللى ماشى على رجلية دة ماشى فى وسط الشارع ولا باصص حوالية ولا اى حاجة... مش عشان هو اللى اتعور يبقى هو المظلوم

و مش عشان ايمن خرج سليم يبقى غلطان... و متحملوش الراجل حاجة هو ملوش ذنب فيها و تقولولة ذنبهم فى رقبتك و زورهم فى المستشفى و الكلام الفارغ دة... دا الراجل كان حيروح فيها لما اتلم علية بورسعيد كلها... عايزينة يروح تانى فين؟؟؟؟؟؟

من الاخر كدة:

الهوندا الفضى: المتسبب فى الحادث و رد فعلة غلط... بهدلت نفسك و اخدت واحد ملوش ذنب فى رجليك و دمرت عربيتين

ايمن: احمد ربنا على الفرامل و انسى بقى حوارات الشد ووجع القلب دى

الهوندا الحمرا: كان الله فى عونك و بعد كدة متجريش و جنبك واحد غشيم عشان ممكن يوديك فى داهية... و الافضل طبعا متجريش اساسا

MMamdouh