الموضوع: استفسار هااام بخصوص تعلم القياده

هو إنت لو إتعلمت في اليابان فأكيد هتيجي هنا هتحتاج تتعلم من أول وجديد ..لإن هنا في مصر العربيات ماشيه بقوانين مختلفة عن أي قوانين في أي حته في العالم ..فلازم هتلاقي نفسك بتتعلم هنا من أول وجديد ...وخصوصا إنك هنا هتتعلم إزاي تعمل غرز وإزاي تضرب بوز العربيه بتاعتك في الأول قبل اللي على يمينك أو على شمالك يفكر حتى إنه يخش قبلك في الحارة بتاعتك اللي إنت واقف فيها وإنك تدى كلاكسات لعسكري المرور عشان يفتح الإشارة لو إتأخر وإنك لو لقيت إشارة في وقت متأخر ومفيش عسكري واقف تكسرها ..وهتتعلم إزاي تبقى داخل عكس إتجاه وبتقلب نور في وش اللي جاي في طريقه اللي من حقه عشان ما يشوفش غير نور عربيتك فيخاف ويقف لغاية حضرتك ما تكمل عكس الإتجاه بتاعك ..وهتتعلم إزاي تدخل الشارع الجانبي من قدام عربيه واقفه وسده الشارع عشان بيحمل ناس ..وهتتعلم إزاي تتخطى الميكروباصات اللي واقفه في نص الشارع بتحمل وبتنزل ناس ..وقلبك هيجمد بقى بجد .لما تطلع على الزراعي وتلاقي العربيات النقل اللي بمقطوره بيعملوا غرز وسط العربيات عادي ..وعاوز بقى تموت قلبك خالص ..إطلع على الصحراوي وشوف العربيات النقل التقيل وهي ماشيه على سرعات 120 و 130 وبتسابق العربيات الملاكي عادي..وعاوز بقى قلبك يبقى بلك ..يعني خلاص إنت كده ريتشارد قلب الأسد ..روح عند أي مزلقان قطر هتلاقي القطر جاي كده من بعيد وسرينة الإنذار شغاله والمزلقان مفتوح والعربيات بتعدي والغريبه إنك لو وقفت تستنى القطر لغاية ما يعدي هتلاقي اللي وراك شغال كلاكسات بيستعجلك عشان تعدي قبل القطر ما يعدي ..ده غير بقى مهارتك اللي هتكتسبها في تفادي الحفر والبلاعات اللي من غير غطيان ..وعلى سرعات عاليه كمان ..يعني تبقى ماشي على سرعة 100 مثلا وتلاقي بلاعه مفتوحه قدامك من غير غطا ..هنا بقى تبرز مهارتك في مفاداة البلاعة دي ..وكمان هتتعلم لما تلبس مطبات جامده أو تتفاجئ قدامك بمطب خبيث لئيم لعين تعمل إيه في الموقف ده ..وهتتعلم إزاي تعدي بالعربيه بتاعتك وسط سوق فيه ناس كتييييييييييير وفيه ناس فارشه على الأرض ومش سايبه غير حته على قد العربيه بالضبط تعدي فيها وهي نفس الحته دي هي اللي الناس بتمشي فيها برضه ..هتتعلم بقى إزاي تعدي من الحتت دي من غير ما تخبط عربيتك ولا تخبط حد ولا تدوس على فرشه حد على الأرض ...تعالى إتعلم هنا ..هتشوف البدع والعجب العجاب ..آه قبل ما أنسى برضه ..من ضمن الحاجات اللي هتستمتع بيها هنا إنك هتتعلم تسوق العربيه وهي طايره ..لما تاكل مطب عفي في حطه ضلمه والمطب مكانش موجود قبل كده وإنت على سرعه هتتعلم إزاي تمشي بالعربيه وهي طايره بدل ما تمشي بيها على الأرض ..