لو بقى معاك فلوس !!

دايما من صغري بسمع جملة (الفلوس مش كل حاجة)

مكنتش مقتنع بالجملة دي أوي ف وقتها بس يمكن كنت حاسس بيها شوية لأني مكنتش شايف العالم على حقيقته !!
بس لما كبرت لقيت إن الكلمة دي مالهاش أي وجود وإن الناس اللي بتقولها بتقولها بس علشان تصبر نفسها مش أكتر
طبعا في ناس دلوقت بتقول لنفسها لآ إزاي انت بتقول إي دي راحة البال والحب ومش عارف إي كدة مبيتشروش بأي فلوس !!

------------------------

طب تعالى معايا نشوف كدة لو بقى معاك فلوس هتعمل بيها إي !!

------------------------

لو بقى معاك فلوس هتشتري شقة ف مكان جديد الرحاب التجمع الزمالك المهندسين وهتنسى عيشة إمبابة وبولاق !
هتصحى على صوت عصافير وتنسى صوت بياع الطماطم اللي بيبيع الكيلو بجنيه !
لو بقى معاك فلوس هتركب تاكسي وبدل التاكسي تجيب عربية وتنسى الميكروباصات والزحمة والأجرة ورا وفي ربع جنيه ناقص !!
لو بقى معاك فلوس هتدخل سيتي ستارز سيتي سنتر كايرو فيستيفال وتتفرج براحتك وتجيب كل اللي نفسك فيه ومش هيييجي ف بالك ايام ما كنت بتدخل التوحيد والنور تتوهم
لو بقى معاك فلوس هتجيب لبسك من نيو بورن سيفينتي كونكريت موباكو
هتجيب جزمتك من كلاركس كات تمبر
هتجيب ساعتك كاسيو إيديفيس سيتيزن رولكس
هتجيب نضارتك أصلية بدل المضروبة
لو بقى معاك فلوس هتقعد على كوستا ستاربكس سوبريم وهتنسى القهوة البلدي اللي كنت بتشرب عليها القهوة باللبن ف المناسبات بس !
لو بقى معاك فلوس هتفطر ف ماكدونالدز وتتغدى ف كنتاكي مؤمن تشيليز ستوديو مصر وسهرتك مع أصحابك الجامدين بتلعبوا ع الإكس بوكس !
لو بقى معاك فلوس هترمي تلفيزيونك القديم توشيبا ال17 بوصة اللي هتشيله بالعافية ترميه م الشباك وهتجيب مكانه سوني 4K
هترمي جهازك القديم أبو رامة 512 وتجيب لاب أبل أو آلين وير
هتغير موبايلك القديم وتجيب Note 4-Htc one-Sony Z3 !!
لو بتحب تصور هترمي كاميرتك الكروب فريم وتجيب فول فريم وتجيب عدسة كانون 70-200 اللي كان حلمك تعمل حقها بس !

لو كان معاك فلوس هتدخل فتح الله مترو كارفور تعمل أحلى شوبينج وتروح بخزين يكفيك شهر قدام
هتاخد كورساتك ف الجامعة الأمريكية والمعهد البريطاني وتفكك م الكورسات المضروبة
هتشترك فى أحلى نادي تقضي فيه وقتك
هتنزل كل يوم فيلم جديد ف سينما مختلفة
هتتجوز واحدة و2 و3 ولو واحدة داستلك على طرف تطلقها وتتجوز 2 بدالها !!
هتقعد ف البيت مرتاح وتبعت إبن البواب يجيبلك طلباتك
هتخرج رحلة سفاري مع أصحابك وتكلم أم أحمد تيجي تروقلك الشقة !!
هترشق ف كل الإيفنتات والرحلات وتلف مصر وتطلع بره مصر براحتك
هتحضر ندوات مؤتمرات مسرحيات حفلات
هتلاقي كل الناس حواليك بتحبك لله ف لله والكل بيقربلك والبنات ملمومة حواليك وأي حد بيعملك حساب
لو بقى معاك فلوس هتستفيد ببنزين ومياه وغاز وكهرباء مدعمين للفقراء وهتدفع فيهم ملاليم ف نظرك !
هتجيب محول نضيف هتعمل إنفرتر ومش هتحس إن الكهرباء بتقطع !
هتقضي صيفك ف الساحل شرم الغردقة السخنة وهتنسى أيام جمصة وبلطيم !!

------------------------

طب لو ممعكش !!

------------------------

مش هتعرف تمشي ف مكان راقي لأنك هتلاقي نظرة إحتقار من الكل حتى محدثين النعمة !
مش هتعرف تتجوز البنت اللي عشت عمرك تتمناها لأن أبوها مش موافق وهيجوزها لواحد هيشيل !!
هتموت من المرض ف المستشفيات الحكومية ولو ممتش من المرض هتموت من الشلل !!
هتفضل تتعلم ف مدارس وجامعات حكومية وبعد ما تخلص مش هتلاقي شغل إلا بكورسات خارجية
هتضطر تتنازل عن كرامتك ف أي وظيفة تشتغلها علشان تقبض ملاليم آخر الشهر !
مش هيبقى ليك ضهر يحميك وأي مشكلة هتعملها بمزاجك غصب عنك هتلبس إسود حتى لو معملتهاش !!

------------------------

للأسف كل حاجة دلوقت بقى أي حد يقدر يشتريها بفلوسه (الراحة – الحب – السعادة – الإستجمام -......)
حتى حقوقك اللي المفروض تاخدها من غير ما تدفع حاجة من صحة وتعليم ووظيفة وعيشة كويسة مش بتلاقيها فى مصر إلا بالفلوس !

الهجرة هي الحل
لأن فى مصر Power is Money

------------------------
Mahmoud Naguib