السلام عليكم انا مازن من السعوديه
وعايز اقولكم انا كمان حكايتي مع مجونتي
انا كان معايا هوندا سيفيك موديل 95 كنت بحبها جدا لأنها واسعه من جوا وكنت مظبطها اوي لدرجة انه لو شفت عربيتي وجمبها مرسيدس تبص على عربيتي المهم سيبكو منها لأنها دلوقتي ما تسواش وراميها رمية ال.... بعد ما جبت حبيبتي الميجان
انا كنت مسافر شغل برا الرياض لمدة 5 شهور
ولما رجعت بصيت لعربيتي وهيا واقفه بصراحه اتخنقت منها مش عارف ليه وقررت اني اشتري عربيه
بصراحه ما دورتش واخدت عربية واحد من صحابي امشي بيها حالي .... (مش طايق الهوندا خااااااااالص)
المهم محمد اخويا قالي يامازن لقيت واحد هيجيبلك تخفيض جامد من وكالة الزاهد ما تيجي نشوف الرينو الاجونا
فكرت كده وانا مش مقتنع قلت انا مش خسران حاجه تعالى ننزل نشوف وماله ... دخلت الوكاله ورحت على قسم المستعمل .. لقيت الاجونا .. بصراحه شكلها ما عجبنيش ببصلها وواقف جمب طابور من الميجان ومش مقتنع بالاجونا خالص ... المهم قلت لما اخد اللاجونا لفه
خرجت بيها من التوكيل ,, وطبعا زي ماقال رامي الزاهد بيطل على شارع سريع جميل جدا ... مشيت شويه بيها لقيت انه الفتيس مش بيغير الا لما يوصل الار بي ام على ال6 رجعتها وقلت مش عايزها انا مش ناقص مشاكل
وببص للميجان بنص عيني كده .. قلت لمحمد عايز اجرب دي بصلي كده .. وابتسم ,... ركبناها لقيت انها بالكارت ومش عارف ايه اتبسطت , انا كنت سامع انه الميجان بالكارت بس ما جربتهاش قبل كده , المهم شغلت العربيه بسم الله ومشيت خرجت من التوكيل طبعا حاطط الفتيس عالD ومش دايس بانزين خرجت بالراحه ودوست بانزين العربيه كانت جميله وبتمشي مع انها 1600 (بالنسبه للعربيات في السعوديه ولا حاجه) ** ولما جيت اهدي علشان اخد اليوتيرن اتقدمت شويه بجسمي علشان ابص فالمرايه الي عاليمين ودوست فرامل خبطت في الدركسيون ومحمد اخويا بيقولي في ايه مالك؟ ,, قلتله مافيش ,, استغربت انه العربيه فراملها كده قلت تلاقيهم مظبطين الفرامل في التوكيل ومغيرين كل حاجه المهم رجعت العربيه للتوكيل
قلت لمحمد اخويا انا العربيه دي عاجباني اوي ايه رأيك قال والله حلوه تعالى نسأل سعرها بكام سألت قال العربيه دي موديل 2005 وسعرها 20 الف قلتله ليه ومش عارف ايه المهم ما تنسوش التخفيض الي محمد قال لي عليه المهم وصل سعر العربيه 17 الف ريال طبعا انا ما سكتش دخلت لمدير المعرض قلتله دي اخر 2005 عندك خلص وبيعهالي , قال لي خلاص خدها ب 16 قلتله لا انا هاخدها ب 15 قعد يفكر كده وبعدين قالي طيب ماشي طبعا اتبسطت جدا ودخلت دفعت المبلغ علطول وانا واقف وخلصت كل حاجه
بصراحه بعد ما دفعت الفلوس وكل حاجه فكرت قلت ايه الي انا بعمله ده في حد يشوف عربيه ويدفع فلوسها كده من غير ما يفكر,,, محمد قالي مبروك ,,, رديت عليه وانا مخضوض ,,, كنت خايف اني كده ابقى عملت حاجه غلط
الحصل بعد كده انه العربيه قعدت حوالي اسبوعين علشان يخلصو ورقها ,, قلقت اكتر وقلت يمكن ربنا بيعمل كده علشان ما اشتريهاش (مع العلم اني ما استخرتش ولا حاجه )رحت ششفت العربيه وجرتها ودفعت وكل ده في حوالي نص ساعه او ساعه الا ربع
وانا كل يوم اروح التوكيل واقعد في العربيه اشغلها واسخنها واسيبها وامشي ,,, وكل يوم اتخانق معاهم علشان يخلصو ورقها ,, لدرجة اني قررت اني الغي كل حاجه وارجع فلوسي ,قلت اكيد ربنا مش عايزني اخدها , اتصلت بموظف المبيعات ماردش عليا طبعا اتعصبت جدا ورحتلهم تاني يوم علشان اكنسل البيعه لقيته بيقولي تعالى خد عربيتك
ما بقيتش مصدق نفسي ,, انا هستلم عربيتي ,,, يعني مش هسخنها واسيبها لا ده انا هاخدها معايا دخلت وخلصت كل حاجه واستلمت الكارت وقعدت في عربيتي مبسوووووووووط وبؤي مشدود واصل لحد وداني من الانبسااااااط ,, ونسيت كل الافكار الي كانت بتيجي على بالي
ركبتها وسخنتها وامسك السريع يابو ميزو روحت لصحابي طبعا ولفيت عالدنيا كلها ووريتهم العربيه وركبت والدتي ربنا يحفظهالي واتبسطت جدا وانا بقولها ( دي بتشتغل بالزورار يا ماما ) وهيا تقولي ماشاء الله ,,هههههههههههههههههههههههه ههه .... المهم فضلت اشرحلها كل حاجه والعربيه فيها كمبيوتر ومش عارف ايه وواخده جائزة تاني افضل عربيه في وسائل السلامة والكلام ده
الكلام ده كله من حوالي 3 اسابيع طبعا انا مدلع مجونتي اوي
وبصراحه انا مش ندمان بالعكس انا اشتريت عربية رائعه بسعر رخيص جدا
والحمد لله على كل حال وربنا يباركلي فيها ويباركلكم في عربياتكم
هيا دي قصتي واسف عالاطاله
المفضلات