الموضوع: شعورك كان ايه مع أول دوسة بنزين في سيارتك الميجان او الكليو ؟!!؟

بسم الله الرحمن الرحيم.

اسمحولي ابدأ انا بقصتي مع الميجان من صيف 2005 وقرار الشراء كان عامل ازاي وقتها ويا رب لو طولت ما اكونش ممل والناس تنام .

وقتها كنت لسه في السعوديه وقررت انزل استقر في مصر وتوكلت على الله رتبت اوراقي وكله تمام ناقص بس شراء سياره مناسبه متوسطه وعائليه ومريحه و 1600 CC بحد أقصى عشان الجمارك والكلام ده كله .......وعاوز اقول نقطه مهمه هنا مش هاقول قرار الشراء من هناك كان خطأ لكن وقتها واعتقد كل من جرب يعيش بره مصر فتره كبيره اكتر من 5 سنين هايكون حس اللي هاقوله ده ....... كان وقتها شعوري ووالدي بجانبي ان لازم نجيب العربيه من السعوديه لأن الحاجات دي مش مضمونه في مصر !!! الوكلاء في مصر تعبانين وبيجيبوا العربيه فرز عاشر ...وبيشيل من كماليات العربيه كتير وكلام كتير اوي يمكن كان صح وقتها لكن دلوقتي انا شايف الموضوع مختلف الى حد كبير .....المهم بدأت رحلة البحث عن هذه السياره المناسبه للعيله واستمرت حوالي شهر انا والوالد في صولات وجولات من تويوتا لي هيونداي لي كيا كل الماركات تقريباً اللي موجوده.مش هاطول في الجزء ده اكتر من كده عشان ماخرجش من الموضوع الاساسي المهم باختصار انا تعرفت على الميجان بالصدفه حيث ان في الوقت ده كانت الرينو في السعوديه عباره عن معدات ثقيله وتراكتورات وكلام من ده لكن عربيات صغيره مكانش ليها اي تواجد هناك.......مره وحيده شفت كليو هناك وكانت دليفري بيتزا دومينوز !!!

ننتقل لما بعد قرار الشراء . بعد حروب عديده مع الوالد في اقناعه ان العربيه دي كويسه ماتقلقش منها......هو كان مبهور جداً بيها لما شفناها لكن تصوروا انت دلوقتي هاتشتري عربيه ماشفتهاش قبل كده في البلد اللي انت فيها تقريباً اول عربيه تتباع في جده حيث مكان سكني وقتها فا ده كان شيء مقلق جداً لكن قصاد ده امكانيات العربيه غريبه فعلاً وقتها ......طبعاً انا كمان قلقان لكن بحاول اشجع والدي ونفسي كانت مغامره وقتها لكن كان بداخلي شعور انها لن تخذلني ابداً والحمد لله تم المراد وتم شراء العربيه في شهر 8 / 2005 اول فئه مانيوال 1.6 لتر كان سعرها 45.000 ريال !!!! كانت ارخص من الكورولا اول فئه برضه .والاغرب ارخص من الالنترا !!!!!! طبعاً الحاجات دي دلوقتي يمكن بقولها على سبيل التندر لكن لكم ان تتخيلوا وقتها وقع الحاجات دي عليا كان ايه ؟؟ وجع بطن طبعاً وقلق شديد لأن ازاي سعرها كده ؟؟ ليه ؟؟ فيها ايه العربيه دي يخللي سعرها اقل من عربيات زيها او اقل في الامكانيات كمان ؟

يوم الاستلام

توكلت على الله صحيت الصبح صليت الفجر ودعيت ربنا ولبست ونزلت شغلي الساعه 10 جالي تليفون اتفضل شرفنا استلم عربيتك جاهزه ان شاء الله..........كلمت والدي .......
انا / بابا انا هاتوكل على الله انزل استلم العربيه محتاج حاجه ؟
بابا / استنى يابني شويه .........بص خللينا بكره احسن ؟
انا / يا بابا لو مشغول انا هاروح انا مش مشكله ؟
بابا / بابني احنا ورانا ايه بلاش خلليها بكره وهاجي امشي وراك بعربيتي .....( تقريباً كان خايف تتقلب بيا فجأه او حاجه فاكان بيحاول يأخر خطوة الاستلام الى ابد غير مسمى )
انا / يا بابا هو انا رايح اجيب عربيه تاتا ....(.تاتا دي شركه هندي بتعمل مراوح وشفاطات وعربيات برضه بس نقل ).انا هانزل يا بابا سلام عليكم.
بابا / اللهم لا اسألك رد القضاء ولكن أسألك اللطف فيه امري لله يابني هاجي معاك .

نزلت قابلت الوالد وهو على استحياء جاهز يا رامي ؟
انا / جاهز لايه يا سيدي بس هو انا رايح احارب ؟
الوالد / طيب توكلنا على الله .

رحنا التوكيل ودخلت عشان استلم العربيه خلصنا الورق وكله تمام ودخلت العربيه الحمد لله بسلام كل ده لسه جوه التوكيل اول حاجه بهرتني ..... العربيت ترحب بيك وتكلمك بس مش بصوت طبعاً يعني اول ماتدخل تلاقي مكتوب Insert Card And Press Start تحط الكارت يكتبلك
Press Start + Breaks OR Clutch انا طبعاً بفخر وعنتريه زائفه ....شايف يا بابا ؟؟ واخدلي بالك انت عربيتك بتعمل الكلام ده ؟ ؟

بابا / امشي يا بني خرجني من هنا ..
انا / حاضر توكلنا على الله ... جبت أول مشيت مسافه 200 متر ولا حاجه وعند بوابة التوكيل هاسلم موظف الامن اذن الخروج ويفتحلي البوابه ..بهدي بالعربيه عشان اقف المفروض قدام البوابه ....دوست
انا / دماغي معلمه في الزجاج الامامي ومش فاهم اي حاجه الخبطه في الدماغ نسيتني انا فين وباعمل ايه هنا .
بابا / دماغه زي دماغي بالظبط بس باصصلي بقرف وانا مش عارف اقوله ايه .........
انا / معلش يا حاج بابا لسه ماأخدتش على العربيه يعني .
بابا / لا حول ولا قوة الا بالله ربنا يهديك يابني دوس بالراحه شويه.
انا / حاضر يا بابا
موظف الامن / بيني وبينه مسافه كبييييييييييره ومع ذلك انا مصر اديه الاذن الخبطه كانت مأثره عليا فعلاً وبعدين 1 الظهر في جده وصيف يعني الحراره بتاع 60 ولاحاجه. الراجل جه أخد الوصل قلتله اعذرني افتحلي البوابه وابعد انت عنها فالراجل طمني وقاللي ما تشيل هم كل اللي بيستلموا سيارتهم من عندنا بيعملوا نفس الللي انت عملته .

المهم روحت والوالد ورايا خطوه خطوه وكله حنيه مفرطه الحقيقه بياخد غرز ورايا مع اني بطيئ بس هو مش عاوز يسيب اي عربيه بيننا المهم وصلنا وانا اعصابي تعبانه وحالتي حاله مش من العربيه من الوالد طبعاً ربنا يطولي في عمره ويكرمه يا رب .

كفايه كده دلوقتي على حضراتكم ولنا تكمله ان شاء الله هاحكي فيها احداث اول يوم بعد الاستلام واول يوم اعمل بيها مشوار كبير وهكذا ان شاء الله .

رامي باشا ... في انتظار البقية علشان مقطعش حبل أفكارك .

الموضوع أكثر من رائع يا رامي.....فكرتني فعلاً أيام ما كنت باشتري العربية

بص يا سيدي أنا حكيتي بدأت لما قررت إني أبيع عربية القديمة الـ504 وأعتقد كلكم أكيد عرفتم العربية دي كنت عامل وحالتها شكلها إيه.....المهم أخذت القرار لأسباب عديدة أهمهم توفير في إستهلاك البنزين عشان أنا كنت خلاص بعزل للتجمع الخامس والمشوار ده ماكنش ينفع فيه البيجو.....جراج العمارة الي كنت ساكن فيها كان جاري عنده عربية كليو وكنت عالطول بشوفه كتير وهو بيركنها وكنت معجب بالعربية دي أوي بس عمري ما قربت منها وأشوف شكلها عامل إزاي من جوه....ومرة باليل قولت أما أقرب من العربية كدة وأشوف عاملة إزاي من جوه....وشي لازق في الإزاز من كتر إعجابي بصالونها وقعدت ألفلف حوليها ساعة وكان القرار......بداء مشوار البحث والسؤال عن الكليو....دخلت على مواقع عربية وإنجليزية فيها تقيم للكليو ومن ضمنهم أيضاً موقع Car Survey الي شجعني كتير على إمتلكها....وطبعاً سألت الجالية المصرية عن موضوع الكليو وكان الرد المعروف...... إستخرت ربنا وأخذت قرار البيع.....بس قولت أشوف الأول العربية متوفرة عن طريق الوسيط.....لاقيت كذه عربية في الوسيط والمعارض وكانت كلها هاف أوبشن 2003 ....وأخر معرض شوفت فيه كان عنده واحدة فول أوبشن....فتحلي الباب يا معلم ودخلت برجلي اليمين وإحساس غريب والله....كنت مشدود أوي للعربية وعمال أقول في نفسي هي دي...هي دي.....تاني يوم بعت البيجو وروحت أخدتها في نفس اليوم.....نفس الي حصل معاية أول ما طلعت بالعربية وجيت أدوس فرامل.....هوووووب....إحساسي أول مرة وأنا سايقها كان لا يوصف....كنت طاير من الفرحة وأد إيه كراسيها مريحة أوي وإنت سايق تحسسك إن إنت متحكم في الطريق

الحمد لله ربنا وفقني في قرار شراء الكليو الي كل يوم بيزيد إحترامي لهذه السيارة الجميلة

مستنيك تخلص القصه :)
الفرامل واااااه من الفرامل

موضوع اكثر من رااااااااااااااااااااائع بجد انا باحيك يا استاذ رامى دائما مواضيعك شيقة وكلامك جميل وتعبيراتك ووصفك للاحداث بيشد اى حد يقراه
انا باقترح عليك فى وقت فراغك طبعا تكتب قصص او مقالات صدقنى هيتباعوا هوا وانا اول واحدة هاتشترى

ايه يا باشا الجمال دا ........ بس بجد الرينو و خصوصاً الميجان سيارة فعلاً جديرة بالاحترام
و عايز نشوف بقية الاحداث