شعورك كان ايه مع أول دوسة بنزين في سيارتك الميجان او الكليو ؟!!؟

السلام عليكم ورحمة الله وبركاته.

اخباركم ايه يا وحوش الرينو .........يا رب تكونو في افضل حال ان شاء الله .

المره دي الموضوع غريب شويه لكن ان شاء الله يكون جميل الكلام عن ذكريات امتلاك عربيتك وشعورك كان وقته ايه أول مره تدخل عربيتك ورجل المبيعات بيديلك المفتاح او اللي بيبيعها بيديلك مفتاحها لو شاريها مستعمله.؟؟؟؟
ايه كان شعورك أول ما قعدت على كرسي عربيتك ودوست Start ؟؟
احساسك كان ايه في اول دوسة بنزين ؟؟ كان عامل ازاي مع اول دوسة فرامل وانت وكل اللي معاك في العربيه بيتلزقوا في الزجاج الامامي او مسند الكرسي لركاب الجزء الخلفي ؟ ( حركة الفرامل دي ترحيب من رينو لأي حد جديد عليها ويمتلكها لأول مره لازم لازم يلزق في الزجاج مع اول دوسة فرامل ) :smartass:....
هانتكلم عن المشاعر دي واحاسيسنا كانت ايه وقتها في الموضوع ده ان شاء الله.

النقطه التانيه اللي هانتكلم فيها ان شاء الله هي قرار الشراء نفسه لعربيه عليها اشاعات كتير جداً صحيح دلوقتي ربنا يخليلنا نايل موتورز الناس قدرت تعرف معلومات عن العربيه اكتر لكن زمان ماكانش في اي معلومه عن العربيه دي خالص غير اشاعات وبس ........المهم

ايه شعورك بعد قرار شراء الميجان ؟

بيقولوا في امثالنا ( العيار اللي ميصيبش يدوش ) وماشاء الله الميجان من يوم ما نزلت وهي كل واحد يعدي عليها يديها عيارين في الهواء تحيه :gun_bandana: يعني شويه الكاوتش لازم يتعمله Setup عشان العربيه تمشي.........على شويه من الدركسيون بيعمل AutoLock وانت ماشي .......البوجيه لازم يتعرف عشان العربيه تقراه......الحاجات اللي كتبناها هنا كتير دي................إلخ

تعالوا نتكلم مع بعض ونشارك بعض كلنا تجارب امتلاكنا للرينو وكنا خايفين قد ايه وازاي تحول الشعور بالقلق ده لثقه تامه في العربيه وعشق ليها كده ؟


___________________________
تـــم تغييــــر العنوان بمعرفة الإدارة

إ.م.3

بسم الله الرحمن الرحيم.

اسمحولي ابدأ انا بقصتي مع الميجان من صيف 2005 وقرار الشراء كان عامل ازاي وقتها ويا رب لو طولت ما اكونش ممل والناس تنام :sleeping:.

وقتها كنت لسه في السعوديه وقررت انزل استقر في مصر وتوكلت على الله رتبت اوراقي وكله تمام ناقص بس شراء سياره مناسبه متوسطه وعائليه ومريحه و 1600 CC بحد أقصى عشان الجمارك والكلام ده كله .......وعاوز اقول نقطه مهمه هنا مش هاقول قرار الشراء من هناك كان خطأ لكن وقتها واعتقد كل من جرب يعيش بره مصر فتره كبيره اكتر من 5 سنين هايكون حس اللي هاقوله ده ....... كان وقتها شعوري ووالدي بجانبي ان لازم نجيب العربيه من السعوديه لأن الحاجات دي مش مضمونه في مصر !!! الوكلاء في مصر تعبانين وبيجيبوا العربيه فرز عاشر ...وبيشيل من كماليات العربيه كتير وكلام كتير اوي يمكن كان صح وقتها لكن دلوقتي انا شايف الموضوع مختلف الى حد كبير .....المهم بدأت رحلة البحث عن هذه السياره المناسبه للعيله واستمرت حوالي شهر انا والوالد في صولات وجولات من تويوتا لي هيونداي لي كيا كل الماركات تقريباً اللي موجوده.مش هاطول في الجزء ده اكتر من كده عشان ماخرجش من الموضوع الاساسي المهم باختصار انا تعرفت على الميجان بالصدفه حيث ان في الوقت ده كانت الرينو في السعوديه عباره عن معدات ثقيله وتراكتورات وكلام من ده لكن عربيات صغيره مكانش ليها اي تواجد هناك.......مره وحيده شفت كليو هناك وكانت دليفري بيتزا دومينوز !!!

ننتقل لما بعد قرار الشراء . بعد حروب عديده مع الوالد في اقناعه ان العربيه دي كويسه ماتقلقش منها......هو كان مبهور جداً بيها لما شفناها لكن تصوروا انت دلوقتي هاتشتري عربيه ماشفتهاش قبل كده في البلد اللي انت فيها تقريباً اول عربيه تتباع في جده حيث مكان سكني وقتها :ymca: فا ده كان شيء مقلق جداً لكن قصاد ده امكانيات العربيه غريبه فعلاً وقتها ......طبعاً انا كمان قلقان لكن بحاول اشجع والدي ونفسي كانت مغامره وقتها لكن كان بداخلي شعور انها لن تخذلني ابداً والحمد لله تم المراد وتم شراء العربيه في شهر 8 / 2005 اول فئه مانيوال 1.6 لتر كان سعرها 45.000 ريال !!!! كانت ارخص من الكورولا اول فئه برضه .والاغرب ارخص من الالنترا !!!!!! طبعاً الحاجات دي دلوقتي يمكن بقولها على سبيل التندر لكن لكم ان تتخيلوا وقتها وقع الحاجات دي عليا كان ايه ؟؟ وجع بطن طبعاً وقلق شديد لأن ازاي سعرها كده ؟؟ ليه ؟؟ فيها ايه العربيه دي يخللي سعرها اقل من عربيات زيها او اقل في الامكانيات كمان ؟

يوم الاستلام

توكلت على الله صحيت الصبح صليت الفجر ودعيت ربنا ولبست ونزلت شغلي الساعه 10 جالي تليفون اتفضل شرفنا استلم عربيتك جاهزه ان شاء الله..........كلمت والدي .......
انا / بابا انا هاتوكل على الله انزل استلم العربيه محتاج حاجه ؟
بابا / استنى يابني شويه .........بص خللينا بكره احسن ؟
انا / يا بابا لو مشغول انا هاروح انا مش مشكله ؟
بابا / بابني احنا ورانا ايه بلاش خلليها بكره وهاجي امشي وراك بعربيتي .....( تقريباً كان خايف تتقلب بيا فجأه او حاجه فاكان بيحاول يأخر خطوة الاستلام الى ابد غير مسمى )
انا / يا بابا هو انا رايح اجيب عربيه تاتا ....(.تاتا دي شركه هندي بتعمل مراوح وشفاطات وعربيات برضه بس نقل ).انا هانزل يا بابا سلام عليكم.
بابا / اللهم لا اسألك رد القضاء ولكن أسألك اللطف فيه امري لله يابني هاجي معاك .

نزلت قابلت الوالد وهو على استحياء جاهز يا رامي ؟
انا / جاهز لايه يا سيدي بس هو انا رايح احارب ؟
الوالد / طيب توكلنا على الله .

رحنا التوكيل ودخلت عشان استلم العربيه خلصنا الورق وكله تمام ودخلت العربيه الحمد لله بسلام كل ده لسه جوه التوكيل اول حاجه بهرتني ..... العربيت ترحب بيك وتكلمك بس مش بصوت طبعاً يعني اول ماتدخل تلاقي مكتوب Insert Card And Press Start تحط الكارت يكتبلك
Press Start + Breaks OR Clutch انا طبعاً بفخر وعنتريه زائفه ....شايف يا بابا ؟؟ واخدلي بالك انت عربيتك بتعمل الكلام ده ؟ ؟

بابا / امشي يا بني خرجني من هنا ..
انا / حاضر توكلنا على الله ... جبت أول مشيت مسافه 200 متر ولا حاجه وعند بوابة التوكيل هاسلم موظف الامن اذن الخروج ويفتحلي البوابه ..بهدي بالعربيه عشان اقف المفروض قدام البوابه ....دوست
انا / دماغي معلمه في الزجاج الامامي ومش فاهم اي حاجه الخبطه في الدماغ نسيتني انا فين وباعمل ايه هنا .
بابا / دماغه زي دماغي بالظبط بس باصصلي بقرف وانا مش عارف اقوله ايه .........
انا / معلش يا حاج بابا لسه ماأخدتش على العربيه يعني .
بابا / لا حول ولا قوة الا بالله :036:ربنا يهديك يابني دوس بالراحه شويه.
انا / حاضر يا بابا
موظف الامن / بيني وبينه مسافه كبييييييييييره ومع ذلك انا مصر اديه الاذن الخبطه كانت مأثره عليا فعلاً وبعدين 1 الظهر في جده وصيف يعني الحراره بتاع 60 ولاحاجه. الراجل جه أخد الوصل قلتله اعذرني افتحلي البوابه وابعد انت عنها فالراجل طمني وقاللي ما تشيل هم كل اللي بيستلموا سيارتهم من عندنا بيعملوا نفس الللي انت عملته :smartass:.

المهم روحت والوالد ورايا خطوه خطوه وكله حنيه مفرطه الحقيقه بياخد غرز ورايا مع اني بطيئ بس هو مش عاوز يسيب اي عربيه بيننا المهم وصلنا وانا اعصابي تعبانه وحالتي حاله مش من العربيه من الوالد طبعاً ربنا يطولي في عمره ويكرمه يا رب .

كفايه كده دلوقتي على حضراتكم ولنا تكمله ان شاء الله هاحكي فيها احداث اول يوم بعد الاستلام واول يوم اعمل بيها مشوار كبير وهكذا ان شاء الله .

رامي باشا ... في انتظار البقية علشان مقطعش حبل أفكارك .

الموضوع أكثر من رائع يا رامي.....فكرتني فعلاً أيام ما كنت باشتري العربية

بص يا سيدي أنا حكيتي بدأت لما قررت إني أبيع عربية القديمة الـ504 وأعتقد كلكم أكيد عرفتم العربية دي كنت عامل وحالتها شكلها إيه.....المهم أخذت القرار لأسباب عديدة أهمهم توفير في إستهلاك البنزين عشان أنا كنت خلاص بعزل للتجمع الخامس والمشوار ده ماكنش ينفع فيه البيجو.....جراج العمارة الي كنت ساكن فيها كان جاري عنده عربية كليو وكنت عالطول بشوفه كتير وهو بيركنها وكنت معجب بالعربية دي أوي بس عمري ما قربت منها وأشوف شكلها عامل إزاي من جوه....ومرة باليل قولت أما أقرب من العربية كدة وأشوف عاملة إزاي من جوه....وشي لازق في الإزاز من كتر إعجابي بصالونها وقعدت ألفلف حوليها ساعة وكان القرار......بداء مشوار البحث والسؤال عن الكليو....دخلت على مواقع عربية وإنجليزية فيها تقيم للكليو ومن ضمنهم أيضاً موقع Car Survey الي شجعني كتير على إمتلكها....وطبعاً سألت الجالية المصرية عن موضوع الكليو وكان الرد المعروف......:ANSmile23::2guns: إستخرت ربنا وأخذت قرار البيع.....بس قولت أشوف الأول العربية متوفرة عن طريق الوسيط.....لاقيت كذه عربية في الوسيط والمعارض وكانت كلها هاف أوبشن 2003 ....وأخر معرض شوفت فيه كان عنده واحدة فول أوبشن....فتحلي الباب يا معلم ودخلت برجلي اليمين وإحساس غريب والله....كنت مشدود أوي للعربية وعمال أقول في نفسي هي دي...هي دي.....تاني يوم بعت البيجو وروحت أخدتها في نفس اليوم.....نفس الي حصل معاية أول ما طلعت بالعربية وجيت أدوس فرامل.....هوووووب:011:....إحساسي أول مرة وأنا سايقها كان لا يوصف....كنت طاير من الفرحة وأد إيه كراسيها مريحة أوي وإنت سايق تحسسك إن إنت متحكم في الطريق

الحمد لله ربنا وفقني في قرار شراء الكليو الي كل يوم بيزيد إحترامي لهذه السيارة الجميلة

فى إنتظار البقية يا رامى

موضوع حلو يا أحمد بس أعذرونى مبعرفش أكتب عربى كتير فمشهعرف أحكى
تحياتى للجميع
د/أكمل حمدى عبد الله

مستنيك تخلص القصه :)
الفرامل واااااه من الفرامل

موضوع اكثر من رااااااااااااااااااااائع بجد انا باحيك يا استاذ رامى دائما مواضيعك شيقة وكلامك جميل وتعبيراتك ووصفك للاحداث بيشد اى حد يقراه
انا باقترح عليك فى وقت فراغك طبعا تكتب قصص او مقالات صدقنى هيتباعوا هوا وانا اول واحدة هاتشترى

ايه يا باشا الجمال دا ........ بس بجد الرينو و خصوصاً الميجان سيارة فعلاً جديرة بالاحترام
و عايز نشوف بقية الاحداث

اقتباس:

---

Mohammed_Adel_Amin
رامي باشا ... في انتظار البقية علشان مقطعش حبل أفكارك .

---

جزاكم الله خير يا محمد باشا وآسف جداً على التأخير ..

عمرو باشا شكراً على المداخله وفي انتظار المزيد .

اقتباس:

---

akmal_hamdi


موضوع حلو يا أحمد بس أعذرونى مبعرفش أكتب عربى كتير فمشهعرف أحكى
تحياتى للجميع
د/أكمل حمدى عبد الله

---

جزيل الشكر يا دكتور اكمل وانا اسمي رامي على فكره مش احمد :smartass:...عاذرين حضرتك يا دكتور ولكن لن تفلت من الحكايه ان شاء الله نسمعها على الهواء مباشرة من حضرتك في اول مقابله بيننا ان شاء الله.

اقتباس:

---

human12
مستنيك تخلص القصه :)
الفرامل واااااه من الفرامل

---

شكرا استاذ طارق على الانتظار وآسف جداً على التأخير سامحني .

اقتباس:

---

haneena
موضوع اكثر من رااااااااااااااااااااائع بجد انا باحيك يا استاذ رامى دائما مواضيعك شيقة وكلامك جميل وتعبيراتك ووصفك للاحداث بيشد اى حد يقراه
انا باقترح عليك فى وقت فراغك طبعا تكتب قصص او مقالات صدقنى هيتباعوا هوا وانا اول واحدة هاتشترى

---

جزاكم الله كل خير يا استاذه haneena واشكر اطرائك وتشريفك الموضوع....ووالله الموضوع بجد حلو الحمد لله بتشريفكم ليه ومشاركتكم فيه........نورتي الموضوع يا فندم وفي انتظار حكاية حضرتك حتى لو مش على رينو .

اقتباس:

---

momenhamdy
ايه يا باشا الجمال دا ........ بس بجد الرينو و خصوصاً الميجان سيارة فعلاً جديرة بالاحترام
و عايز نشوف بقية الاحداث

---

جزاكم الله خير يا باشا وشكرا على مرور حضرتك ومداخلتك الرقيقه وان شاء الله بقية الاحداث حالاً.

السلام عليكم ورحمة الله وبركاته.

اليوم الأول بعد الاستلام.

بعد ما ربنا كرمني وروحت من الكابوس المجهد والمضني لمشوار طوله لا يتعدى 10 كيلو من التوكيل للبيت ووالدي العزيز خلفي مباشرة لتأمين وصولي بسلام.

دخلنا البيت وانا في حاله من تعب الاعصاب والارهاق الشديد فا نمت ...... صحيت من النوم وانا باحلم بالعربيه قلت انا لازم انزل اشوفها ولبست ونزلت وكانت ابشع مفاجأه في حياتي مش لاقي العربيه !!!!!!!
العربيه فييييييييييييييييييييين ؟ ؟ ؟ يا شماتة أبله تازه فياااااااا ؟؟؟
العربيه فيين ؟؟؟؟ طب الكوووره فيييين ؟ الراجل بتاع المبيعات لسه كان معايا الصبح وبيقولي لو عربيات جده كلها اتسرقت دي يستحيل تتسرق قلت الله يخربيتك يا فلان ......انا جوايا عمال اقول اتسرقت فين دي ومين هايسرقها اساساً هو حد فاهم دي ايه ؟ ؟ المهم ربنا هداني وقلت الفلف شويه كده يمكن الاقيها ..........المهم بعد بحث مطول لقيت والدي العزيز قام بنقلها من الشارع لجراج الشغل عنده عشان عربيه جديده وكده طبعاً بعد ما ريقي نشف روحي ردت تاني الحمد لله وحرمت من ساعتها انزل في نص الليل ادور على عربيتي ............

صباح اليوم الاول( الفضيحه )

عملي مع والدي في نفس المبنى فا صحيت وانا كلي نشاط ونازل شغلي ووالدي سابقني قاللي تعالى عاوزك........ايوه يا بابا خير ؟ قاللي انا خرجت عربيتي ودخلت الميجان مكانها والمفروض الولد هيغسلها الحقه لحسن يكتر الميه ويبوظ حاجه فيها .......( وصفه للعربيه حسسني انها ممكن تبوش من الغسيل ولا حاجه ) نزلت وخطواتي متسارعه 2 كيلو/شهر وفعلاً لقيت الراجل العسل هايغسل العربيه .......هو اسمراني من الصومال والاماكن دي فالعربي عنده غير مفهوم بالمره لكن بنحاول نفهمه عموماً .

انا / السلام عليكم
الرجل / عليكم السلام .........( أخو هاذي سياره ؟؟؟ ) هل دي سياره ؟
انا / ايوه يا رشيد انت شايفها ايه ؟ تلفزيون !!!!
الرجل / ( ايش نوع هاذي سياره ) نوعها ايه العربيه دي ؟
انا / رينو يا رشيد توكل على الله اغسل يابني عشان ورايا شغل الله يكرمك خلصني .
بدأ رشيد يشتغل وكله حرص وانا احرص وبابا واقف هو كمان وكل اللي يعدي بلا استثناء .
عابر الجراج 1 / السلام عليكم كيفك يا عم رضا...كيف حالك يارامي ...( رضا ده والدي )
الوالد وانا / عليكم السلام اهلا فلان عامل ايه ؟
عابر الجراج 1 / مبارك ان شاء الله السياره ال......ال......ويش نوعها دي يا خووي ؟
الوالد / دي رينو .
عابر الجراج 1 / رينو ؟ ماشاء الله كام سعرها ؟
الوالد / 45.000
عابر الجراج 1 / مصنوعه فين السياره دي ؟
الوالد يميل عليا ويقولي هي معموله فين البتاعه دي ؟ فرنسي يا بابا تقفيل تركي ؟ .....يابني متهببه فين ؟؟؟ فرنسا يا بابا قول فرنسا .
الوالد / دي صناعه تركي :gun_bandana:
انا / ايه يا بابا ده هاتشبهنا من اول يوم كده ............تركي ايه يا سيدي والله رينو فرنسي تجميع تركي .
الوالد / ماشي يابني انا هاطلع اشوف شغلي وخليك واقف لغاية ما رشيد يخلص وخد المفتاح.
انا / حاضر تحت امرك .
فضلت حوالي ساعتين كل اللي يجي يركن يقف معايا يسلم ويسأل ويعزي ويطلع مكتبه.وهكذا لغاية مابقيت مزار سياحي اليوم ده ......على فكره الشركه فيها جنسيات كتيره جداً الامريكي او الاوروبي او الكيني كان عارف العربيه .......الهنود كانوا عارفينها بس اسمها عندهم ميجانيت مش عارف ليه .

طلعت المكتب وكل شويه يجيلي حد يبارك ....... الناس كلها مش عرفاها غير عدد قليل جداً .......اعرف 4 اشخاص مصريين الجنسيه......الاربعه والله باركوا وبعد مبروك على طول طلعوا اشاعاتهم .......واحد قال انا كنت في مصر من شهر العربيه كويسه يا رامي على فكره ومحترمه ....بس عيبها ان ليها ميعاد معين للصيانه لو معملتوش في الوقت الصح العربيه بتقف والكمبيوتر ممكن يمد ايده عليك ولا حاجه.:gun_bandana:...قلت ماشي ان شاء الله نعمل الصيانه في وقتها ايه المشكله ؟ الراجل زهق ومشي.

الزياره الثانيه / مبروك العربيه كويسه وحلوه بس اسمع ان ممعهاش عده في الشنطه ؟ ؟
انا / ايه المشكله عموماً هي فعلاً مافيش مفك فيها او اي عده .
الزميل / ده معناه انك لازم يارامي تروح التوكيل كل يوم الصبح قبل الشغل يابني....دي مافيهاش مسمار اساسًا المهم اكمل واخرج ما في جعبته ومشب الراجل وانا قاربت على البكاء خلاص .

الزياره الثالثه والرابعه نفس المنوال لا اختلاف من حيث الله يعينك وكنت تفكر احسن من كده شويه وربنا يسترها معاك وكلام من ده .

انا هموت من الضحك يعم كفاية حرام عليك

الموضوع جامد جداااااااااااا
:smilielol5:و متابع البقيه , و ليه تعليق على موضوع الفرامل ده فى الكليو !!!!!! اول مره اشوف فرامل باللمس يا جماعه ؟ اى عربيه ركبتها قبل كده بيكون فيها مسافه فى الفرامل الى ديه !!! طبعا انا مش عارف و طالع بالعربيه و بدوس فرامل لاقيتنى اتنطرت قدام !! و الناس الى معايا قلقو منى ,صديقى صاحب العربيه فهمنى على موضوع الفرامل ده بعد ما اعصابى نشفت من الخضه !

Ramy_Tantawi إنت وحش زي العسل و الله يا ريت لو تبعتلي نمرة تليفونك على الخاص عايز رأيك في حاجة

منتظرين بقيت الموضوع والله انت زى العسل يا رامى ولما كنت فى السعوديه هناك فعلا مش معترفين ان فرنسا يتصنع عربيات ركوب مش عارف ليه

موضوع هايل و كالعادة إسلوب أكتر من رائع ذي ما عودتنا دايماً
متابع بإهتمام

انا متخيل موقفك وانتا واقف كل واحد يسألك عن العربية الغريبة دهية ....
على الأقل كان قدامك العربية تشرحلهم عليها , انا كنت بتعرض لموقف مشابه لما اتسأل في السعودية معاك عربية ايه في مصر .
وتلاقيهم عارفين البيجو والستروين تيجي تقولهم رينو يقولك غريبة اول مرة نسمع الإسم ده ..
الظريف مرة واحد بقوله رينو راح اتبهر جدا وقاللي انا بشوفها في التلفزيون وقعد يوصفلي فيها اتاري سعادته كان فاكرها بتاعة الفورملا .. ولا تعليق

السلام عليكم.

• megane_man / بعد الشر على حضرتك والحمد لله ان كلامي خفيف عليكم ومبهج لهذا الحد ....... اشكر تشجيعك الكريم.

• MohabSaeed / اشكر حضرتك وشرف لي ان الموضوع يستحوذ على اعجابكم يا فندم واتفق معاك جداً في حساسية فرامل الرينو .

• احمد عبدالله / ربنا يكرمك يا باشا وان شاء الله هابعتك لحضرتك رقمي على الخاص ويشرفني اتصال حضرتك في اي وقت ان شاء الله.

• mahamedaraby / جزاكم الله خير يا محمد باشا والحمد لله لقيت حد راح السعوديه وشاف اللي شفته لاني توقعت اعتراض من ناس هاتقول ازاي يعني مش معروفه للدرجه دي ؟ ؟

• farahat / استاذ فرحات جزيل الشكر كفايه بس مرور حضرتك على الموضوع من بره كده انت راجل محترم ولك باع في تحليل الرينو على الجانب الفني طبعاً والجانب التسويقي والسوقي ومواضيع حضرتك منوره القسم ولا يختلف عليها اتنين.....ربنا ما يحرمني من تشجيعك يا فندم ابداً .

• Mohammed_Adel_Amin / محمد باشا ........ جايلك يا كبييييييييير استنى عليا اخلص بس عشان انا منتظر منك مداخلات كتير اولاً لانك ميجان 1 يعني الاقدم بيننا من حيث الموديل ا ثانياً برضه اعتقد انت اقدم واحد فينا معاه ميجان ربنا يباركلك يا باشا .

و ن ت ا ب ع

الكلام أخدني وماتكلمناش لسه عن شعوري ايه اول ما ركبت انا هأجل النقطه دي للآخر عشان ماقطعش تسلسل الموضوع .

بعد احداث اول يوم زاذ الضغط عليا وعلى اعصابي حيث عدم اقتناع الوالد بالعربيه او على الاقل تخوفه منها وهو معذور طبعاً لما سمع عنها من اقاويل ......وضغط الناس ولذلك كان القرار اني هاطلع العربيه من الجراج عشان كل ما حد هيشوف هيسأل ويعرف العربيه بتاعة مين ويطلع يعزي المهم طلعتها بره وطلعت وانا عندي نفس القدر من الارهاق والاعياء من مجرد الكلام والاتقاد الموجه للعربيه اللي الناس مش عارفاها اصلاً ولا انا نفسي لسه جربتها عشان ارد عليهم او ابرهن عن اي حاجه المهم طلعت نمت بتاع 7 ساعات قيلوله بريح بس جسمي يعني عادي :smartass:.
المهم صحيت على 8 كده تقريباً خرجت وكلي نشاط وبأعلى صوت قلت لاسرتي .
انا / انا قررت نخرج كلنا انهارده بالعربيه الجديده .
بابا / انا قايم اصللي المغرب .
ماما / وماله يا حبيبي ليه لأ...غالباً صابها نفس اللي صاب بابا من قلق .
اخي الاصغر / اوك واقترب مني ( يابني مش كنت تاخد لفتين بيها لوحدك الاول بدل ما كلنا نتلزق في الازاز مع بعض زي امبارح ).
انا / لا حول ولا قوة الا بالله .......انا هادخل اجهز نفسي

************************************************** *********

نزلنا كلنا الحمد لله ووصلنا للعربيه بسلام . الحمد لله من الشكل الوالده واختي قالوا انها جميله وشكلها محترم والكل ينظر لبابا ويقول .....يا بابا مخوفنا ليه منها ماهي كويسه ماشاء الله اه.
الوالد / هو انا قلت حاجه .
انا / آه يا عالم غريب وبشر اغرب وسرحت بتاع يومين تلاته كده بافكر في حال الدنيا والناس وازاي احنا دائما ما نحكم على الاشياء لظاهرها فقط دون لا تجربه ولا حتى محاوله لاكتشافها . ( طبعاً انا سرحت وقت اقل من كده بكتير بس عشان الحبكه الدراميه). :smartass:

ربنا هداني الى اني لازم اقنع الناس دي بالعربيه لازم انا خلاص هايجرالي حاجه المهم الشوراع في السعوديه حدث ولا حرج من نظام لوسع الشارع لسرعاته .........المهم الفكره اللي جات اني امشي بسرعه شويه وافرمل جامد على الاقل الوالد يحس ان العربيات دي فيها أمان احسن من اللي في تصوره.

انا / ماشي على حوالي 50 واشاره قدامي خضرا
بابا / في اشاره يا رامي شايفها .
انا / فين دي يا بابا انا مش شايف حاجه .
بابا / يابني مش وقت هزار على ماتوصل ليها هاتكون حمرا هدي من دلوقت.
انا / ما تقلقش يا بابا خالص .
فراااااااااامل
انا / واخد بالي بقى فاملزقتش في الازاز المره دي :smartass:
بابا / واخد باله برضه بس عاوز ينزل من العربيه بأي تمن
باقي الركاب في الخلف / موجودين الحمد لله بس بترتيب مختلف يعني اللي كان شمالي بقى يميني واللي في النص كانت اختي الصغيره لقيتها متعلقه في دراعي .

اللي حصل مش زي ماكنت برضه متصور فا انقلب ضدي برضه العربيه وقفت ماشاء الله بطريقه غريبه ... حسيت ان الاسفلت اتقشر من تحت العربيه والله من كتر ثبات الفرمله لكن اللي حصل ولا يخفى على ملاك الميجان لو دوست فرامل على سرعه كده هتقف وفي الآخر تسمع صوت حتة زحلقه ثم يبدأ الوحش الاستاذ ABS في رزع الطنابير رزعتين في السريع كده فا الزحلقه تختفي والعربيه تقف مره وحده وفي زأير كده بيطلع من التوقف المفاجئ...........هذا ما حدث لي بالظبط والتعليق .
انا / ها ؟
ماما / ها ايه يابني عاوز ايه ؟ هي العربيه باظت ولا مالها عملت كده ليه ؟
اخويا / كريزة ضحك ومش عارف يقول اي حاجه .
اختي الصغيره / انا عاوزه اروح خلاص مش عاوزه اخرج.
بابا / شتيمه رقيقه لابنه الكبير ( انا ) وبعدين هو ايه الدربكه اللي حصلت دي يابني ؟ انا حاسس ان في حاجه في الطنابير او مشكله .. انا مش قلتلك يابني خللينا في اللي نعرفه ........حسبي الله ونعم الوكيل
انا / لسه هاشرح بقى وافهم .........بصراحه كسلت المهم كملت مشواري والحمد لله أخدت على العربيه ورجلي اتظبطت على الفرامل وكله بقى تمام.

المشوار حوالي ساعه طبعاً الساعه دي ماشيين في الشارع سواح راكبين مارد واقع من كوكب بلوتو . اللي بيشاور علينا واللي بيعقد ما بين حاجبيه واللي بيقلب وشه. (دي الناس اللي بره العربيه وانطباعهم عنها).

انتهت الخروجه الاولى بالعربيه على خير الحمد لله وتعدلت نسبة الخضه عند الوالد وتحولت الى شيء من الاعجاب البسيط باتزان العربيه على الطريق وفي المنحنيات وثقتها من نفسها وهي تتمختر على طرق مدينة جده الطرق هناك حرير بجد ماشاء الله والعربيه عفشتها ما شاء الله ناعمه جداً فاتحس وانت ماشي ان العربيه ماشيه بدون عجل ........مافيش صوت موتور ولا صوت كاوتش ولا صوت شارع ولا صوت اي حاجه .
وكان الاعجاب مضاعف من الركاب في الخلف لأن العزل في الخلف مضاعف وكانوا مرتاحين جداً الحمد لله ووقعوا في غرام الست من اول خروجه والحمد لله .

كان التعليق من والدي كا معارض برضه هو
انا ليه حاسس يابني اني راكب GameBoy ؟ وفعلاً ده كان شيء ملفت لي انا كمان ان العربيه اصوات التنبيه فيها مختلفه عن اي عربيه تانيه على الاقل بالنسبه لي وبعدين الاصوات كتير
لو فتحت الباب وسايب النور او سايب الكارت .
بعد ال 120 بتدي صوت عامل زي المنبه .
الاشاره صوتها غريب مش Tick Tick زي العربيات الطبيعيه .

المهم ان الحمد لله انا طلعت اليوم ده وكنت قرير العينين والى حد كبير مبسوط الحمد لله وفي غاية الرضا .

انا عارف طولت عليكم لكن والله انا بافتكر معاكم كل التفاصيل اللي حصلت وزي ما عمرو قال في مداخلته الذكريات دي جميله وانا والله مفتقدها دلوقتي واكيد حضراتكم زيي ..... هاستأذن حضراتكم تكتبوا انتم كمان تجاربكم عشان الموضوع يكون بجد جميل وملون وانا معاكم ان شاء الله هاكتب انطباعاتي وهل خذلتني او لأ ولو ان الاجابه هاتكون معروفه لئن الحمد لله ربنا يديمها علينا نعمه مازال الاعجاب بالعربيه موجود من ملاكها والاطراء مستمر يوم بعد يوم.

تحياتي ,,,,,,,,,,

الله يجازيك خير يا رامي أنا فعلاً مش قادر أبطل ضحك......:laugh6:..:rofl4::rofl4::k32:

بصراحة يا رامى موضوع جميل
و ملئ بالمواقف الكوميدية

فعلا موضوع رائع
:k49:

عمرو عماره باشا ربنا يكرمك ولا تتخيل قد ايه انا سعيد ان الموضوع عاجبكم كده جزاكم الله خير .

شاركي باشا حبيبي الحمد لله ان الموضوع يليق بمستوى الناس هنا والوحوش العزاز على قلبي وطبعاً انت اولهم وفي انتظار مداخلاتكم الاجمل يا باشا وجزاكم الله كل خير على رفع روحي المعنويه .

:018:هو بعد الي انت كتبته ده حد يقدر يقول حاجة لأ يعم لما انت تخلص خالص وعالم الواحد هيقدر يكتب حاجة من الضحك:k48: انا مش عارف أقول ايه سبحان الله أنطبعات الناس واحدة في كل مكان :k48:

بصراحة طريقة سردك للقصة رائع جدا ...
الميجان اللي بتتكلم عنها هي اللي معاك دلوقتي والا دلوقتي واحدة ثانية ؟؟(علشان لو هي هيبقى بيني وبينك نقاش برا الموضوع ممكن يكون على الخاص او بأي طريقة )..

وان شاء الله هحكيلكم قصتي مع الميجان 1 بمجرد اني ألاقي وقت للكتابة .

اقتباس:

---

المشاركة الأصلية كتبت بواسطة megane_man

:018:هو بعد الي انت كتبته ده حد يقدر يقول حاجة لأ يعم لما انت تخلص خالص وعالم الواحد هيقدر يكتب حاجة من الضحك:k48: انا مش عارف أقول ايه سبحان الله أنطبعات الناس واحدة في كل مكان :k48:

---

صحيح ده اللي اكتشفته لما نزلت مصر الانطباعات واحده ورد الفعل واحد الاختلاف فقط في اللغه واللكنه وطريقة التعبير.

اقتباس:

---

المشاركة الأصلية كتبت بواسطة Mohammed_Adel_Amin

بصراحة طريقة سردك للقصة رائع جدا ...
الميجان اللي بتتكلم عنها هي اللي معاك دلوقتي والا دلوقتي واحدة ثانية ؟؟(علشان لو هي هيبقى بيني وبينك نقاش برا الموضوع ممكن يكون على الخاص او بأي طريقة )..

وان شاء الله هحكيلكم قصتي مع الميجان 1 بمجرد اني ألاقي وقت للكتابة .

---

شكراً جزيلاً محمد باشا .........للأسف اللي معايا دلوقتي واحده تانيه.. العربيه بطلة القصه اعلاه انتحرت من كتر اللي اتعمل فيها واتقال عليها !!!!!!:nopity: الوحوش القديمه عارفين الموضوع ده .........عموماً الجزء ده هايكون الخاتمه ان شاء الله ولو اني ماكنتش عاوز اتطرق ليه لان الناس ضحكت الحمد لله لكن مش مشكله كل شيء وليه وقته وقدره الحمد لله .

انا لما قريت كلام رامي والموضوع الصراحة اتشديت اكتب عنه برضه، انا الوضع عندي تقريبا قريب من رامي مع اختلاف بسيط

انا برضه كنت عايش في السعودية واول اجازة نزلتها من السعودية لمصر لقيت مصر غرقانه ميجان والناس كلها راكبنها لدرجة اني قعدت اقول هما الناس كلها راكبنها على ايه، المهم بعدها رجعت السعودية يوم ما وصلت لقيت 2 ميجان هاتشباك واقفين عند العمارة عندي هناك في السعودية واحده لونها اخضر فول اوبشن والتانية سوده بيزك، وفعلا استغربت انهم واقفين قدام العمارة، بعدها بيومين عرفت ان الخضرا بتاعت واحد انا اعرفه وخرجت معاه وركبتها لاول مرة في حياتي، هيا عربيته هاتشباك بانورما بالكامل قدام وورا و2000 سي سي وفيها سيدي تشينجر وهوا مهوس شوية بالموسيقى الهادية ركبت معاه وقفلت الباب ما شاء الله قفلت الباب حاجة تفرح مشي بالعربية ومشغل السي دي على الهادي وبقيت كاني عايش في مكان تاني، البانورما فوقنا والصوت الهادي بجد حسيت اني عايش لوحدي، صوت العربية هادي جدا حاجة ما شاء الله خرافة، مش هطول عليكم ساعتها كنت بستعمل عربية الوالد كانت كابريس 2004 طبعا الفرق شاسع كوزن وكسحب بتتكلم عن 5700 سي سي 8 سلندر.

المهم بعدها قررت اني اسيب الشغل مع والدي وكنت هشتغل في شركة جديدة وبقى لازم يكون معايا عربية مستقلة لاني مش هينفع والدي يبقى من غير عربية، وبدات رحلة البحث كان القرار في الاول هشتري عربية جديدة ولا مستعملة، مش عارف ليه تفكيري كله راح على الجديدة خصوصا اني مكنش عندي عربية في مصر وقولت زي ما رامي قال اشتري عربية من السعودية استخدمخا وبعدين انزل بيها واهي تبقى خليجي، فبقت الفكرة اشتري عربية 1600 سي سي طيب تمام ايه الاختيارات هتلاقي كتير طبعا وكان من ضمنها الميجان، قررت ساعتها لاول مرة اطلب من جاري اسوق العربية دورت العربية ومشيت بيها ولازم ترحيب الميجان دوست فرامل تقريبا جاري جبني من على الكبوت لاني ما كنتش لابس الحزام، قعد يقولي دي فراملها حساسه قوي شوية وتاخد عليها بعد اقل من اتنين كيلو كنت بركن العربية وبشكره لاني بجد مش عارف اسوقها من الفرامل وفضلت على الحال ده تقريبا 3 ايام كل يوم انزل اسوقها معاه وبعدها بدات انا وهوا نلف على المعارض كل ما ادخل اشوف عربية احس انها فقيرة للمواصفات اللي انا شايفها في الميجان وبنفس السعر او اغلى حاجة بسيطة لحد ما حصرت اختياراتي في عربيتين لا غير الميجان او الاوكتافيا A5 روحت اشوف الاوكتافيا لقيتهم في المعرض بيقوليلي معلش ال 1600 محجوزة لمدة 4 شهور قدام ومكنش ينفع استنى وبعد الاستخارة اخدت بابا يتفرج على العربية الميجان معايا دخلنا اتفرجنا كان في السيدان والهاتشباك وبالذات الهاتشباك كانت الوحيدة في السعودية ال 1600 وتكييف تاتش وبانوراما وسيدي تشينجر بس ما عجبتش بابا عشان شنطتها وعجبته السيدان وبالفعل دفعت تمنها 52 الف ريال اتوماتيك بجنوط وقالولي هستلم العربية بعدها باسبوع وفي خلال الاسبوع ده ادوني عربية كليو من التوكيل لحد ما استلم عربيتي واول يوم كلموني عشان استلم العربية روحت بالكليو سلمتهالهم ودلخت لقيتهم لسه مخلصين غسيل العربية واستلمتها يوم 19 فبراير 2006 وعايز اقولكم الطرق هناك بجد مغرية للجري والتوكيل هناك موجود على طريق سريع انا اخدت العربية وقولت لازم اشوف هتوصل معايا لحد 160 ولا لاء وبجد اترعبت لما لقيت نفسي وصلت 200 وده اول ركوبة في عربيتي طبعا موضوع التليين والكلام ده كله مش موجود هناك هناك استلم عربيتك واعمل اللي انت عايزة وبجد ما روحتش اليوم ده كان يوم خميس رحت بيها منطقة اسمها الدمام دي على الخليج وقعدت شغلت موسيقى كلاسيك على الخليج ورجعت بيها سايق لوحدي وانا في قمة استمتاعي ودلوقتي هيا معايا من ساعتها وبجد ما ندمتش نهائي على شراها وبقول يا رب يباركلي فيها

اتمنى اني ما اكونشي طولت عليكم

استاذ رامى لالالالالالالالالالالالا انا غيرت راى حضرتك تنفع كوميديان من الدرجة الاولى بجد انا بطنى وجعتنى من الضحك:k10::k10::k10::k10: خصوصا انى انا عشت فى السعودية كتير وطريقتك فى الكلام بطريقة كل جنسية بجد تموت من الضحك
وفعلا الواحد بيجيله احباط لما يشترى حاجة مختلفة او جديدة والناس تقعد تخوفه منها وتحبطه:eek4::eek4::eek4: وعجبنى قوى وصفك بان الناس كانت بتعزيك بجد حضرتك دمك خفيف جدااااااااااااااا

بجد سردك للقصه أسلوبه شيق و يحبب الناس فالعربيه ، ربنا يحفظهالك مالعين.

اقتباس:

---

المشاركة الأصلية كتبت بواسطة AmroSharafAldeen

بجد سردك للقصه أسلوبه شيق و يحبب الناس فالعربيه ، ربنا يحفظهالك مالعين.

---

+100000000000000000 كده إنت تبقى خالد الصفتي بتاع المنتدى ربنا يباركلك في العربية

ايه يا استاذ رامي الحكايات الجميله دي .....
ربنا يوفقك ويبارك لك في العربية ان شاء الله

موضوع غاية في الجمال زاي صاحبه ....ألف شكر يا رامي باشا و في انتظار المزيد من السرد الشيق :flowers:

أنا حكايتي مع الكليو قصيرة نوعا .....اواخر سنة ٢٠٠٦ أنا كنت في حاجة إلي عربية لقضاء مشاويري في مصر في الأجازات .....كان رانج السعر لغاية ٨٠ ألف .... متطلباتي تبقى عربية اعتمادية و فيها عوامل أمان و ليها توكيل محترم علشان ما غلبش أهلي في الصيانات و كده .......كليو :)

أول مرة اللي فعلا ارتبط فيها بالعربية لما سافرت بيها فايد ربيع ٢٠٠٧ ....كانت يادوبك مخلصة تليين ...العربية مريحة جدا في السفر و ثابتة و سريعة ....الوصلة بتاعة فايد قررت اني أدوس بنزين شوية (عادة أنا ما بعديش ١٢٠ كم ....من زمان أوي ) دوست على الدواسة و بقيت العربية بتنهب الأرض .....سحب هايل على عربية ١٤٠٠ سي سي و ٧٥ حصان .....وصلت ل ١٦٠ و هديت بعديها ....بسم الله ما شاء الله أداء فوق المتوقع من عربية في الفئة ديه و بالامكانيات ديه ....يمكن من يومها و أنا باحبها فعلا ....قبل اليوم ده كان الموضوع إختيار عقلاني أكتر منه أي حاجة تانية :)

محمد باشا مصطفى شرفت موضوعي الغلبان وفعلاً تجاربنا الى حد كبير متشابهه وان كان حظك افضل من اخوك قليلاً ان كان في عربيه او اتنين ميجان بيركنوا عند بيتك انما انا كنت اول واحد وغالباً آخر واحد :saddam:.
اشكر مرورك يا محمد باشا ومتحرمناش من اي حاجه تفتكرها اكتبها على طول .

اقتباس:

---

المشاركة الأصلية كتبت بواسطة haneena

استاذ رامى لالالالالالالالالالالالا انا غيرت راى حضرتك تنفع كوميديان من الدرجة الاولى بجد انا بطنى وجعتنى من الضحك:k10::k10::k10::k10: خصوصا انى انا عشت فى السعودية كتير وطريقتك فى الكلام بطريقة كل جنسية بجد تموت من الضحك
وفعلا الواحد بيجيله احباط لما يشترى حاجة مختلفة او جديدة والناس تقعد تخوفه منها وتحبطه:eek4::eek4::eek4: وعجبنى قوى وصفك بان الناس كانت بتعزيك بجد حضرتك دمك خفيف جدااااااااااااااا

---

انا بجد في غاية الخجل من كلام حضرتك واطرائك الرقيق يا فندم.......وعلى فكره انا حاسس ان حضرتك بتتكلمي عن رامي تاني مش انا ......انا اول مره اعرف ان دمي خفيف ........عموماً كفايه كده عليا لحسن أتغر وماتعرفوش تكلموني بعد كده :k41:.......انا باهزر طبعاً انا والله كل الموضوع اني باسرد احداث حصلت معايا والله لا اكثر ......وانتظروا الحزن جاي في الطريق وهانعيط كلنا مع بعض انا باقول من دلوقتي اه عشان ماحدش يتزنق في مناديل ويدعي عليا اتبرع ولو بمنديل لاخوك رامي.........على فكره انا اسمي رامي بس من غير استاذ ارجوكي....طبعاً اتفق مع حضرتك ان موضوع التخبط ده كان حاصل جداً معايا وهو شيء متعب جداً خصوصاً لما يكون الواحد عكس التيار + ان التجربه كانت وقتها اصعب واصعب لاشتراك الوالد معايا فيها فانا كنت متخوف كمان احس بذنب والدي تجاه التجربه دي لكن الحمد لله ربنا كرمنا آخر كرم.
تحياتي يا استاذه haneena وربنا يجازي حضرتك كل خير على تشجيعك لأخوكي......

اقتباس:

---

المشاركة الأصلية كتبت بواسطة AmroSharafAldeen

بجد سردك للقصه أسلوبه شيق و يحبب الناس فالعربيه ، ربنا يحفظهالك مالعين.

---

شكراً جزيلاً يا استاذ عمرو وجزاكم الله كل خير .

اقتباس:

---

المشاركة الأصلية كتبت بواسطة احمد عبدالله

+100000000000000000 كده إنت تبقى خالد الصفتي بتاع المنتدى ربنا يباركلك في العربية

---

يا راااااااااجل يا طيب خالد الصفتي مره واحده ..........مش باقولكم انا كده هاتغر :smartass:............ربنا يكرمك يا احمد باشا يا رب ويباركلك .

اقتباس:

---

المشاركة الأصلية كتبت بواسطة momenhamdy

ايه يا استاذ رامي الحكايات الجميله دي .....
ربنا يوفقك ويبارك لك في العربية ان شاء الله

---

جزاكم الله خير يا استاذ مؤمن الحكايه جميله عشان الناس اللي بتقراها اجمل واجمل والله ..........ربنا يبارك لحضرتك يا فندم.

اقتباس:

---

المشاركة الأصلية كتبت بواسطة Chicco

موضوع غاية في الجمال زاي صاحبه ....ألف شكر يا رامي باشا و في انتظار المزيد من السرد الشيق :flowers:

أنا حكايتي مع الكليو قصيرة نوعا .....اواخر سنة ٢٠٠٦ أنا كنت في حاجة إلي عربية لقضاء مشاويري في مصر في الأجازات .....كان رانج السعر لغاية ٨٠ ألف .... متطلباتي تبقى عربية اعتمادية و فيها عوامل أمان و ليها توكيل محترم علشان ما غلبش أهلي في الصيانات و كده .......كليو :)

أول مرة اللي فعلا ارتبط فيها بالعربية لما سافرت بيها فايد ربيع ٢٠٠٧ ....كانت يادوبك مخلصة تليين ...العربية مريحة جدا في السفر و ثابتة و سريعة ....الوصلة بتاعة فايد قررت اني أدوس بنزين شوية (عادة أنا ما بعديش ١٢٠ كم ....من زمان أوي ) دوست على الدواسة و بقيت العربية بتنهب الأرض .....سحب هايل على عربية ١٤٠٠ سي سي و ٧٥ حصان .....وصلت ل ١٦٠ و هديت بعديها ....بسم الله ما شاء الله أداء فوق المتوقع من عربية في الفئة ديه و بالامكانيات ديه ....يمكن من يومها و أنا باحبها فعلا ....قبل اليوم ده كان الموضوع إختيار عقلاني أكتر منه أي حاجة تانية :)

---

يادي النور يادي النور .......... شيكو باشا بنفسه مشرف موضوعي وبيقول عليا جميل كمان ..........يا باشا ربنا يكرمك ويجازيك كل خير ومتفق مع حضرتك بالطبع في تجربة الكليو هي عربيه بالفعل محترمه جداً....اشكر تشريفك لموضوعي يا دكتور هشام ومشاركتنا تجربتك مع الكليو.

السلام عليكم ورحمة الله وبركاته.

عارف اني طولت على حضراتكم لذلك قررت اني انهي قصتي مع الميجان اليوم ان شاء الله عشان باقي الوحوش يشاركونا تجاربهم .

فضلت العربيه معي في السعوديه حوالي شهرين وكانت الحمد لله اروع ما يمكن ولم يكن هناك اي مظهر من مظاهر القلق او الريبه تجاه اعتماديتها اعلم ان المده قصيره جداً لكن الواحد لما بيكون قلقان من حاجه معينه ومنتظر منها السيء اليوم بيكون ليه حسابه وتحس ان الشهر بيعدي سنه المهم جه ميعاد سفري للقاهره لكن للأسف ماقدرتش انزل العربيه معايا وقتها فا تركتها للوالد ونزلت انا القاهره .........

كانت فرصه لوالدي العزيز انه يتعامل مع العربيه لوحده ويغير من نظرته ليها فضلت معاه حوالي شهر وبعدين بعتها لي ورحت استلمتها من السويس وعملت موضوع الجمارك ( كابوووووووس ) عموماً مش هاطول في الجزء ده برضه طلعت بالعربيه من الجمارك ووقفت على اول الطريق وقلت اتكلم معاها كلمتين.

انا عارف انه اشبه بالجنون او هو جنون فعلاً لكن مش مشكله ايه يعني الواحد يكلم عربيته ويطمن عليها !!!!! :k41:

انا / حمد لله على السلام يا ست ميجان انا عارف اتبهدلتي اليومين اللي فاتو دول معلش ان شاء الله نوصل القاهره ونروح البنزينه ونظبط كل حاجه وترجعي عروسه تاني .

انا / عاوز اقولك على حاجه ..... الفتره اللي فاتت صحيح كنتي كويسه معايا لكن ده كان في طرق السعوديه ......هنا الموضوع مختلف شويه طرق اديق ....السواقه اصعب شويه ........ممكن اتعصب على فتيس معاليكي من الزحمه .....المهم يعني استحملي الفتره الاولى بس وان شاء الله تتأقلمي .

انا برضه / ربنا يكرم ان شاء الله ونوصل بالسلامه ......بسم الله توكلت على الله وبدأت رحلة العوده ورجعت القاهره الحمد لله بسلام ورحت البنزينه زي ما وعدت العربيه وغسلتها ولمعتها وكله بقى تمام الحمد لله ورجعت ركنت العربيه وطلعت البيت .

مرت ايام وشهور وعلى شهر يناير 2006 والدي نزل اجازه مصر وكانت وقتها الميجان هي اللي معانا رحنا اسكندريه واسماعيليه ولفينا بيها وخرجنا وانبسطنا الحمد لله وبدأت اثق فيها جداً جداً واعتمد عليها وكل البيت بدأ يرتاح ليها الحمد لله ويكونوا مبسوطين جداً لو انا موجود او فاضي وهانسافر بيها او هانخرج بيها .

وفي يوم ولا اعلم ليه كنت قلقان من اول اليوم وكان ملخبط جداً كان يوم جمعه على ما اذكر وقررت زيارة احد الاقارب في 6 اكتوبر انا والاسره.اول اللخبطه كانت في مين رايح .....يعني فجأه اخويا قال انا مش فاضي ومش هاكون معاكم.........بعد كده مش عارف ايه حصل المهم فضل انا ووالدي ووالدتي.......كنت حاسس ان في حاجه غلط ومش مرتاح والله اليوم ده ابداً لكن طردت اي افكار محبطه في دماغي وتوكلت على الله....بعد ما وصلنا للعربيه فجأه لقيتني مش عاوز اركب الميجان خالص قلت خلاص تعالوا نروح بالعربيه التانيه ماشي ؟ قالوا اي حاجه.
العربيه التانيه مش بتدور البطاريه نايمه.......طيب معلش جبت وصله ودورت العربيه وقلت خلاص كده نتوكل على الله....مامشيتش 500 متر لقيت الكاوتش اللي ورا نام ........
انا / سبحان الله هو في ايه انهارده ؟
الوالد / مش مشكله ارجع البيت وناخد الميجان عشان كده هنتأخر على الناس يا رامي ........وفعلاً رجعت وبدلت العربيه وتوكلت على الله .

وصلنا اكتوبر وزرنا الناس وكله تمام الحمد لله ولم يكن هناك اي مشاكل سوى مشكله بداخلي انا ......... مازلت لا اشعر بالارتياح ولا الطمأنينه ؟ انا مالي انهارده في اييه ؟

المهم قلت اطلع اقعد في الهوا شويه وبعدين جاتلي فكره ادلع العربيه شويه المهم جبت جلانس وفوطه واشتغلت تلميع شويه في الزجاج وشويه في المرايات وشويه في باكيتات الابواب المهم خلصت تلميع العربيه كلها ......فتحت الكابوت مليت قربة المساحات وبصيت على المياه الخضرا وزيت الفرامل وكله تمام وقفلت الكابوت وانا والله غير مرتاح بالمره .........لا حول ولا قوة الا بالله في اييييييييه ؟

دخلت تاني كملت قعدتي مع الناس وتوكلنا على الله رحلة العوده من 6 اكتوبر لبيتنا الساعه 11 بالليل تقريباً .

ماشي في أمان الله والشعور بانقباض القلب في تزايد مستمر .... والدتي كانت جانبي ( لا تحبذ ربط الحزام ابداً )
انا / ماما من فضلك اربطي الحزام معلش استحمليه انهارده .
بابا / حطي الحزام مش مشكله رامي بيتكلم صح الواحد مش ضامن ظروف الطريق برضه .
بابا / انت قلقان من حاجه يا رامي ؟ تحب اسوق انا يابني ؟
انا / ابداً يا بابا مافيش حاجه ما تقلقش . سيبها على الله .
بابا / ونعم بالله. طيب شغل قرآن وامشي بالراحه على مهلك احنا ماورناش حاجه

شغلت القرآن وكملت طريقي وفجأه حدث ما لم اكن اتصوره او اتوقعه حتى ......حادث مروع كنت عملت عنه موضوع بالتفصيل زمان هنا في المنتدى.....المهم قدر الله وماشاء فعلاً باختصار دخلت في عربيه شروكي جايه من الشمال الى اليمين انا دخلت فيها بسرعتي 130 تقريباً وبعدين طارت العربيه بالجنب واخدت عمود نور والحائط الاسمنتي على جانب الطريق كسرته وكان في كشك امن تقريبا اخدته معايا لكن كان الحرس مش موجودين فيه الحمد لله .

طبعاً احنا جوه العربيه عمالين نتفرج على موتنا ولا نملك اي شيء حتى النطق مش قادر عليه شيء غريب جداً...........بعد ماالعربيه استقرت الحمد لله خيم الهدوء دقيقه علينا ماحدش فاهم اي حاجه ولا انا فاهم في ايه اصلاً وهل انا ميت ام حي وانا فين اصلاً ؟ كان دخان الايرباجز عامل سحابه مما اعاق رؤيتي لأي شيء داخل السياره وصوت الانتظار شغال بسرعه تك تك تك تك تك تك ............ايه الصوت ده ؟ في صوت مستمر تييييت تيييت تييييت......ايه ده برضه انا ليه مش قادر ارفع راسي طيب ؟ طب انا قاعد ولا مقلوب ولا ايه ؟
المهم انقطع هذا الصمت الرهيب بصوت والدي فجأه رامي انت كويس ؟ رامي حصلك حاجه ؟ شوف ماما يا رامي ........شوف ماما يارامي ..وفجأه باب العربيه الناس فتحته وبدأت تطمن علينا وتطمنا اننا بخير ان شاء الله ومافيش حاجه .

المهم الحمد لله لم يصب احد بأزي سوى والدي العزيز نتيجة ارتطامه بالكرسي الخلفي لكن الحمد لله اصابه بسيطه ووالدتي وانا جروح بسيطه بسبب الايرباج مش اكتر .
المهم بعد ما جمعت نفسي سيبت كل حاجه ونازل ولقيتني عمال ازعق واقول فين صاحب الشروكي ديي وفضلت اشتم فيه مش فاهم ليه وانا مش عارف هو فين اتاري اللي سايق الشروكي كانت سيده الحقيقه اقل ما يقال عنها انها قمه في الاحترام وتمالك الاعصاب.......نزلت من عربيتها واتصلت بالاسعاف فوراً والنجده والونش وكل ده وانا عمال اشتم في صاحب الشروكي وهي جانبي انا متصور انها فاعل خير وبتساعد مش اكتر بس فجأه لقيتها بتقول اهدى بس انا اللي كنت سايقه الشروكي اهدى الحمد لله كلنا بخير ...........المهم دارت الساعات والاسعاف جه ومشي والاجراءات الروتينيه تمت والعربيتين راحوا القسم باتوا هناك المهم يعني الاجراءات الروتينيه اخدت مجراها..........

بعد حوالي 3 ايام شحططه من القسم للنيابه عشان العمود اللي اتكسر في آخر اليوم الثالث اتصلت بالتوكيل 12 بالليل !!! قلت للي رد عليا عربيتي عامله حادثه ومش هاعرف اسيبها في الشارع ... قاللي لو حضرتك معاك ونش هاتها التوكيل والامن هايستلمها منك حتى لو الفجر وحمد لله على سلامة حضرتك .......شكرت الراجل ورحت سملت العربيه التوكيل وروحت على الفجر البيت.
فضلت قاعد في البيت حوالي اسبوع مش مستوعب ابداً ايه اللي كان بيحصل وان خلاص موتنا كان على الحافه اوي كده لكن مكتوب قدراً اني ما اموتش لا انا ولا اسرتي العزيزه اعز ما املك في الدنيا وما فيها .

بعد الاسبوع قلت لازم ازور التوكيل واشوف هاعمل ايه في العربيه رحت وشفت منظرها عشان افهم ايه اللي حصل ........... كانت الاضرار
اصابة في الموتور
اصابه في الشاسيه
اصابه في عمود الدركسيون طبعا وملحقاته لأن الموتور طلع من مكانه اصلاً
اصابه في العفشه الاماميه بالكامل مساعدين ومقصات وكله كان متني تحت العربيه
كابوت + رافرف + باب امامي شمال + زجاج امامي + زجاج جانبي امامي .

دخلت قابلت مدير الورشه.....
انا / لو سحمت عاوز اعمل معاينه لعربيتي عامله حادثه.
المهندس / حمد لله على سلامتك يا فندم ... حضرتك اي عربيه في اللي بره
انا / الفراني الغامق يا فندم .
المهندس / الخليجي ؟؟ قلتله نعم هي دي ......الراجل بص وقالي هو حضرتك اللي كنت سايق ؟ قلتله الحمد لله نعم انا ....... حضرتك جرالك اي حاجه ؟ في اي اصابه ؟ قلتله ابداً الحمد لله .
المهندس / نفس عميق طيب اتفضل معايا لو سمحت نبص عليها .
المهندس / شوف يا استاذ رامي احنا وكيل ونقدر نصلح اي حاجه ان شاء الله لكن في الحاله اللي قدامي دي التصليح هايكون مكلف جداً ......هو حضرتك مأمن مع مين ؟
انا / للأسف مالحقتش أأمن اصل العربيه لسه مابقيلهاش شهرين معايا في مصر الحمد لله .
المهندس / لا حول ولا قوة الا بالله . انا مش عارف اقول لحضرتك ايه قدر الله وماشاء فعل والحمد لله ان حضرتك كويس .
انا / الحمد لله اللهم لا اعتراض انا راجل مؤمن الحمد لله وعمري ما هزعل على حاجه زي كده في الاول والاخر قدر الله سبحانه وتعالى ..
المهندس / باختصار العربيه دي عشان تتصلح هاتتكلف فوق ال 80 الف ده في التوكيل ولو هاتعملها بره التوكيل كل اللي هاتصلحه هيكل السياره فقط لكن موتور وشغل ميكانيكا يفضل نعمله احنا لحضرتك لضمان كفاءة السياره مع العلم برضه للأمانه ان حتى لو حضرتك وافقت على الاصلاح العربيه هاترجع بكفاءه 80 % على الاكثر .
انا / ماكنتش عارف ارد انا شايف الخساير في العربيه ومافيش حاجه سليمه بس مش عارف ليه كان آخر حاجه متوقعها اني اسمع الكلام ده.
فضلت ساكت الراجل قاللي عموماً خد وقتك يا فندم واحنا تحت امرك والعربيه واقفه هنا في امان وماتشيلش هم اي حاجه فكر براحتك واحنا تحت امرك في اي وقت.
انا / شكرا جزيلاً يا باشمهندس على تعاون حضرتك جزاكم الله خير.

روحت البيت وانا في دماغي مليون حاجه ومش عارف افكر في اي حاجه ولا اقرر ......... خلاص العربيه هارميها يعني ولا ايه انا مش فاهم ؟ دي عامله 5000 كيلو ......لا حول ولا قوة الا بالله .......وصلت البيت ومع المشاورات مع اصدقائي والوالد قررنا حاجتين.
الاول نعاين حد تاني غير التوكيل يصلح .
التاني اني ابيعها خرده .

وحدث اللي قلت عليه المهم باختصار عشان كفايه كده على حضراتكم كان القرار الاقرب وقتها هو البيع خرده .......شوية حديد مش عربيه بعت العربيه وكانت دي آخر مره اشوف فيها الميجان اللي اخدت الشغل ده كله والنقد ده كله والاشاعات دي كلها والسخريه دي كلها و و و و و .

كان ما لفت انتباهي حاجه غريبه جداً اشد المعارضين ليها كان والدي اعزه الله واكرمه..........بعد الحادثه الصعبه دي هو شاف جيل تاني من عربيات واجراءات امن وسلامه ركاب فا اصبح بعدها من اشد المعجبين بيها وعلى حد قوله ( العربيه راحت خالص واحنا طلعنا سلام بخدوش بسيطه ) عاوزين ايه تاني ؟ والله ده لو بي مليون جنيه ماتساويش اصابة رامي او والدته او لا قدر الله وفاة حد منا ...............بنوع من الدرامه خلليني اقول راحت الميجان اللي كل الناس عارضت شراءها في وقتها للبرهنه عن حاجات كتير وترسيخ مفاهيم اكتر اهمها عندي انا على الاقل ان الامان شيء قيم جداً ولا يثمن بأموال قارون والله العظيم .

*********************************************

انا خلصت حكايتي مع الميجان لكن هناك جانب مشرق في الخاتمه الحزينه دي وهو ان بعد سنه ربنا كرمني وقلنا نشتري عربيه تانيه ونستخير الله وربنا يكرمنا ان شاء الله .
الوالد / ربنا كرمنا الحمد لله يا رامي ممكن نجيب عربيه تانيه دلوقتي .
انا / ربنا يرزقك وايانا يا بابا بالحلال دائماً ان شاء الله تحب ننزل نتفرج على حاجه معينه ؟
الوالد / لأ مافيش داعي انا عيني رايحه على حاجه معينه .
انا / ماشي يا بابا توكلنا على الله ان شاء الله اخلص شغل بكره وننزل نشوف . الا هو ايه اللي بتفكر فيها يا بابا صحيح ؟ اكيد نيسان صني انا عارف هي عجباك من زمان .
الوالد / لا يابني احنا هانجيب ميجان ان شاء الله ؟
انا / نعم ؟؟؟؟ ميجان ازاي يعني يا بابا حضرتك واعي للي بتقوله ؟ يا راجل قول كلام غير ده .
الوالد / باتكلم بجد ان شاء الله نشوف حاجه كويسه ولو قسط حتى بس تكون ميجان ان شاء الله عربيه محترمه .
انا / سبحان مغير الاحوال ........

اخيراً تمت حكاية العبد لله بما تحوي من كوميديا كما رأيتموها حضراتكم والعهده على الراوي و حزن ووجع قلب في النهايه لكن الحمد لله على كل شيء وعاوز اقول حاجه اخيره بس نصيحه يعني .........الحسد شيء مذكور في القرآن وتأثيره شديد جداً ارجوكم اكثروا من قراءة المعوذتين والاذكار والدعاء الخالص لله سبحانه وتعالى فهو خير حافظ لعباده .

والسلام عليك ورحمة الله وبركاته

رامي باشا .. الموضوع رائع جدا .. والحمد لله على السلامة (مع انها جاية متأخرة)
والله يا ابني انا عشت الموضوع وانا بقرأه , وسبحن الله بتحصل حاجات في حياتنا عمرنا ما كنا نتوقعها او نتخيلها .

أنا هحكيلكم قصتي مع الميجان 1 , واللي كانت حدوتة اللي ملهوش حدوتة أياميها ,
كل قرايبي وصحابي يقولو محمد ساب كل العربيات اللي شافها وراح خد الميجان واللي بالمناسبة كانت أقدم موديل فيهم (شاريها مستعملة ).

أول الحكاية كانت في 2004 لما نويت اشتري عربية مستعملة علشان اقضي اغراضي بيها هنا في مصر وخصوصا اني متعود على سواقة السعودية فكنت مش مرجح اني اشتري عربية جديدة وابهدلها معيا .

بعد موافقة الوالد لقيته بيقولي انا هبعثلك على البنك 30 ألف تشتريلك عربية كويسة ...أحاول أفهم فيه ان العربيات في مصر سعرها غالي وهو مش مقتنع , يا عم الحج انتا سايب البلد من عشرين سنة والدنيا اتغيرت يقولي لأ كفاية عليك 30 ألف .
وبعدين في الورطة دهية !! بعد ما كان معايا عربية كابريس فخمة في السعودية أركب خردة هنا في مصر !!

المهم لقيته من نفسه بيقولي انا كلمت تاجر عربيات وعرفت مستوى السوق عامل ازاي وعايزك تنزل ليه وتقعد معاه وهو عنده عربيات حلوة وميهمكش الفلوس . قلت هييييه الحمد لله انتصرنا :7bteen: كلمت الراجل و رحت المعرض بتاعه وكان الحوار الآتي ..

هو : والدك كلمني وقالي انه عايز عربية اوروبي أو لو اضطريت يبقى ياباني علشان تستعملها هنا في مصر ..
أنا : تمام وفعلا انا أفضل الأوروبي .
هو : طيب خد لفة على العربيات اللي قدامك دهية وهسيب معاك موظف من عندي علشان يفهمك الوضع إيه .. قلت تمام , هات ما عندك .
يومها كان قدامي الآتي ... فيكترا 2000 , لانسر 2003 , كورولا 2002 , تيريوس 2002 , ماروتي 2001 , هوند سيتي 2004 ,,(على ما أفتكر ).
قالي هي دهية العربيات اللي توفي طلبك أوروبي أو ياباني ..
وبعد ما أخدت لفة بيهم كنت طبعا متكيف من الفيكترا علشان هي الوحيدة اللي أوروبي بس مش عارف مكنتش متحمس ليها كنت حاسس ان سعرها مش مناسب لإمكانياتها ..
قلتله طيب مش هيجيلك عربيات ثانية ... قاللي في عربية رينو ميجان 2002 اوتوماتيك العربية جديدة وزي الفل وسعرها مش هيقل عن 100 ألف , كان ساعتها الميجان الشكل الجديد لسه بادءة ومكنتش الناس تعرفها قوي . انا عن نفسي مكنتش شفتها على الواقع خالص كنت شفتها على النت بس .. وكنت فاكر الشكل القديم هيبقى قريب منها فاتحمست ليها .
قلتله طيب مفيش منها حاجة أرخص شوية .. قالي أنا فيه واحدة عندي 99 بس جاري مكلمني فيها وهو خدها النهارده علشان يجربها وبكرة هيدفع ..
قلت خلاص ربنا يباركله فيها , وخدت قرار في نفسي إني استنى شوية لحد ما ألاقي العربية المناسبة .

كان يومها يوم عاشوراء و الرجل أصر إني أفطر معاه , وأنا طبعا ما صدقت :banana: ورحت معاه البيت وبعدين لقيته بيشاور وبيقولي هيه دهية الميجان بتاعة جاري اللي بقولك عليها .. قعدت أضور عليها لأني أصلا مش عارف شكلها و الميجان القديمة مكنش عليها علامة رينو من ورا .. المهم بعد البحث والتدقيق لقيتها , ونزلت قعدت ألف حواليها زي الأهبل واقول لنفسي إيه العربية الغريبة دهية ..
قالي أنا بقى هخليك تسوقها وتشوف الفرق بنفسك ما بين العربيات الفرنساوي وباقي العربيات ..
ورن على جاره قاله ارمي المفتاح .. الثاني قال لا أنا قلت أنا اللي هشتريها , هديناه وقلناله يا عم متقلقش هنجربها بس وربنا يباركلك فيها .

ومن أول ما مسكت المفتاح بتاعها وبفتح بالريموت ومش لاقي المسوجر بتاع الباب .. بدأت قصة الحب .

أنا عمري ما هنسى لحظة ما دخلتها وركبت فيها .. حسيت انها عربيتي وألفتها بسرعة جدا .. ولما طلعت بيها مع إني مكنتش متمرس في سواقة الفتيس العادي نظرا لإني متعود على الأمريكي الأوتوماتيك .. بس كانت العربية الوحيدة يومها اللي مبطلتش مني لما طلعت بيها .. أخدت بيها لفة ورجعت واتعقدت نفسيا اني لقيت العربية اللي عايزها بس مش هقدر اشتريها علشان غيري سبقني ..

وانا ماشي قعدت اقوله انا عاجباني الميجان وخلاص هيه دهية العربية اللي عايز اشتريها .. قالي استنى عليه يومين لو لقيت جاري مش جاد هكلمك .
وقد كان .. الأخ اللي كان عايز يشتريها كان عايز يبدلها بتيوتا كورونا مع صاحب المعرض وطبعا كانت الصفقة غير متكافئة فلم يتم البيع .
أنا مصدقت خبر ونزلت أخدتها بدون ما أشوف شكل الموتور عامل إزاي (تخيلو) كل اللي كنت اعرفه عنها هو الظرف اللي كان معاها اللي كان فيه فواتير الصيانة بتاعتها .. العربية كانت مع واحدة خواجايا وكانت بتصلح كل حاجة فيها مش هتتخيلو ان فيه فواتير طالعة ب 7 جنيه علشان مش عارف تغيير حاجة ب 2 جنيه وطبعا مع الضريبة والمصنعية وصلت ل 7 :laugh6:..

معلش أنا حاسس إني طولت عليكم اتمنى انكم متكونوش نمتم مني .. طبعا بعد أسلوب القصة الرائع بتاع رامي هتبقى قصتي قمة الملل .. يلا بقى نصيبكم ولازم تستحملوني .

يعني الواحد مش عارف يقول ايه انا بعض مخلصت قراية فضلت متنح كتابتك مؤثرة جدا حضرتك أتكلمت عن العربية كأنها أخ ليك أو صديق عزيز حضرتك المفروض تكتب روايات كومدي ودراما وكل حاجة زي الأجزاء الأولي لما كنت هموت من الضحك انا دلوقتي حاسس اني عاوز أعيط :k30:والحمدالله ان النهاية كانت سعيدة :k32:

افتكرت موقف ظريف جدا .. مرة وانا في السعودية لقيت والدي بعد ما رجع من الشغل بيقولي شفت عربية جارنا فلان الجديدة .. قلتله لا هيه نوعها إيه .. قالي رينو قلتله أنا أول مرة أعرف ان فيه رينو جديدة كان كل تخيلي عن الرينو انها العربيات القديمة اللي بنشوفها أحيانا نادرة جدا أو الأوتوبيسات والنقل وكنت فاكر ان مصنعها قفل او بيجو اشترته ,عمري ما كنت متخيل اني هكون أحد ملاكها واني هكون متحمس ليها .. وكان يومها أول مرة أشوف الكليو ..
العربية كانت تحفة وفعلا الرينو دائما شكلها بيسبق عصرها كانت الكليو لسه نازلة مش فاكر سنة كام بالضبط ..
ووالدي أصلا لأنه قعد فترة في أوروبا بيعشق حاجة اسمها رينو وكانت عاجباه جدا وقالي اسأل عليها في مصر ,, بس طبعا لما لقى ان موتورها 1200 قالي لا موتورها صغير جدا ..

وموضوع انك تكلم العربية ده يا رامي باشا جميل جدا ... انا الفترة الأخيرة بقيت أكلمها كثير قوي لأنها بقت بتصعب عليه والله .. موديل قديم زي كده ومتبهدلة سفريات وحوادث وأعطال ورغم كده متماسكة وصامدة ربنا يستر عليها وتفضل متماسكة على طوووول..

الحمد لله انك والعائله طلعتوا من الحادث بخير يا استاذ رامى
وال 5 نجوم بتوع الامان دول مش اى كلام برده

أولا شكر كبيييير جدا لرامى على الموضوع و أهم من الموضوع طريقة سرده غاية فى الروعة.... و أنا كنت ناوى آكل و أنا بقرأ لكن ما قدرتش من كتر الضحك...وصف رامى لنظرات و أقاويل الناس هايل...و ولو إنى تأثرت جدا بالحادث فى الجزء الأخير...فداك انت وأسرتك شركة رينو كلها...أهم حاجة البنى آدم...اللى بيبوظ فيه ما ينفعش لا يتصلح و لا ينفع معاه تأمين و لا توكيل...الوكيل الوحيد هو الله...ربنا يحفظنا جميعا.....و طبعا كان قرار متوقع من الوالد إنه لما يفكر فى عربية تانية أكيد هيفكر فى العربية اللى طلعت حلال فيها المدفوع فيها و إنها عربية تحمى ركابها مش شوية كماليات و مناظر بفلوس كتير....

أنا قصتى مافيهاش معاناة كبيرة زى السادة اللى اشتروا الميجان من زمان.....و عادة لا أستشير الكثير من الناس فى القرارات ...الأمور كلها تتم داخل الأسرة....
السيارة سابقة كانت بولونيز 1987 وقت ما اشتريناها (زيرو ) كان عندى 5 سنين فلم أكن مشاركا لهذا القرار و لم أكن مؤيدا له فيما بعد...لكن أنا سوقت العربية دى قرابة ال 70 ألف كيلو فى خلال 4 أو 5 سنوات.....
عندما جاء قرار الاستبدال ( و لم يكن لحظيا بل أتى على مراحل ) و نظرا لطبيعة عملى المرتبط بالسيارات آنذاك، لم تأخذ رحلة البحث طويلا....تصدقو وتآمنو بالله......هو يوم جمعة أخدت فيه الوالدة و أختى فى جولة على عدد لا بأس به من التوكيلات و المعارض فى منطقة مدينة نصر....الطريف إن على آخر اليوم لم تكن الكفة مرجحة لأى من السيارات ( تيريوس-207 - C4 ) ال 3 أكبر المرشحات للمنصب....آخر اليوم كنت فى حيرة بالغة و مش مصدق نفسى...معقول مش هنعرف نطلع بحاجة بعد اللف ده كله...خصوصا إن احنا عارفين عايزين إيه من العربية و أنا عارف العربيات دى كلها كويس.....طلع اللى كانت مش فى بالى "الوحش الفرنسى"...نظرا لندرة الهاتشباك مقارنة بالسيدان اللى كانت مستبعدة تماما نظرا لضخامة حجمها بالنسبة لوالدتى....المهم تانى يوم ( السبت ) كان رئيسى فى الشغل فكرنى بالسبع فى ألماظة و فى نفس الوقت أنا كنت عديت على EIM فرع المعادى الجديدة و شفت عربيتى الحالية....كل اللى عملته إنى وقفت قدام المعرض...نزلت...سلام عليكم....دى بكام...ب 143 ألف....ده آخر كلام...الراجل أكيد استغرب مافيش حد بيسأل على عربية بالشكل ده كأنها فردة شراب مثلا ....لا قولتله يفتحها و لا حاجة...المهم قاللى ممكن 137 ألف علشان هى موديل 2007 و كنا فى 26 أكتوبر 2007 وقتها...قولتلو طيب أنا جاى اللليلة دى مع والدتى علشان تشوفها و أخد نمرتى و أنا مشيت..كلمت والدتى قولتلها هانشوف النهاردة الميجان فى منها هاتشباك بس أنا كنت ناسيها...قالتلى بس دى كبيرة أوى يا هانى...قولتلها معلش شوفي الهاتشباك بس...و فعلا روحنا للسبع أولا لإنه أقرب فإذا ما عجبتهاش يبقى مافيش داعى لمشوار المعادى و الحمد لله أختى كمان كانت موجودة...روحنا عند السبع و لاقينا الأمورة واقفة فى قمة الجمال....لونها flame Red ...full Option ...أخت بتاعت أستاذ أحمد على بس هاتشباك.....ربنا يخليها له و يحفظها من كل شر.....أمى وأختى كنت قايل لهم لو عجبتكم ما تطولوش علشان نلحق نروح المعادى...بس ميييين...قعدو يتغزلو فيها ساعة على الأقل و أنا ما صدقت إنها عجبتهم لكن هيهات أعرف أطلعهم من عند السبع......كده كده أنا ما كنتش عايز ال full Option علشان مش عايز السقف البانوراما و لا الجنوط الألمنيوم ال 16 ...و كل ال 2008 كان full option فيا إما ألحق ال 2007 الباقية يا إما مش عارف كان هيحصل إيه....بعد ما طلعت بالعيلة من عرين " السبع " طيارة على الدائرى على ال 120 لحد المعادى لإنهم كانو فاتحين مخصوص مستنيينى بعد ما كلمونى و أنا فى السكة.....دخلنا...هى دى...انتو شوفتوها من 30 دقيقة....بس دى مش الفول أوبشن....برضه بصة كده علشان تطمئنوا إنها لسة عاجباكو....أنا كل اللى حظيت بيه معاها كان دقيقة واحدة من إجمالى أكتر من ساعة عند السبع....خلال الدقيقة دى كانت وقعتنى فى شباكها على الفور....ريحتها كانت أخاذة..أجمل ريحة لعربية شمتها فى حياتى...مع إنى شميت كتير...لكن دى هى الريحة اللى أتمنى أشمها على طول....أنا شميت ريحة Range Rover مع إنها قوية و غريبة فعلا و لن أنساها...لكن الميجان آآآآآه على ريحتها...أجمل استقبال قدمته لى أى عربية.....بساطة وأناقة متناهية فى آن واحد...كل الكماليت موجودة بدون مظاهرات صاخبة للإعلان عما فى حوزتها.....excellent driving position....رؤية واضحة تماما للطريق و أبعاد السيارة....صالون رحب و شنطة خلفية معقولة بدون التضحية بالحجم المدمج للسيارة من الخارج..... اهتمام بالتفرد فى أدق التفاصبل....لاحظ ال knob بتاع تحريك المرايات...الHand Brake و عصا الفتيس....أماكن التخزين تحت الأرجل...ناهيك عن مسألة الكارت الذى يسهل حمله عن المفاتيح و الرسائب التى تظهر على الشاشة كتعليمات أو تحذيرات...فعلا عربية مصروف عليها فى التصميم و مراعاة لأدق التفاصيل.....هى دى ؟؟؟؟؟؟؟؟.......هى دى.....كل بقى الكلام الفاضى بتاع الكارت بيبوظو مش هتعرف تدخل لو البطارية فضيت و الصلج الفيبر و الهلس اللى بنسمعه ده أنا كنت متأكد إنه النظرة المصرية لأى منتج مغاير للذوق العام...أنا مل ال reSearch اللى كنت عامله هو الوضع عند الحوادث و الأمورة دى كانت ستهم كلهم..هى أول واحدة تاخد 5 نجوم فى اختبارات euroNcap للتصادم الأمامى و شفت المقاطع اللى تثبت الكلام ده... وساعتها قدرت قيمة الفيبر اللى مش عاجب الناس.....مش معقول عربية بالشكل ده ممكن تتحبس جواها ولا براها علشان بطارية الكارت فضيت... وفعلا ساعة الاستلام اتشرح لى الحل البسيط جدا للموقف اللى الناس متعقدة منه.....و ساعة الاستلام كنت فعلا مرهق نتيجة يوم طويل و صاخب لتجهيز الفلوس و استصدار وثيقة التأمين و كانت والدتى معايا طول اليوم...أول ما استلمتها ( من فرع المعادى طبعا ) لفيت علشان أجيب بنزين من Shell على الصف التانى... وبعدين حسيت إن أعصاب ماما كانت مشدودة...فرحت على On the Run اللى فى شارع متفرع من شارع النصر ....على ما أكلنا و شربنا حاجة ساخنة..كانت الأمرو أفضل كتبر... و بعدين روحنا و تانى يوم رخصنا...الحقيقة أنا ما حصليش قصة الفرامل الحساسة دى لإنى كنت عارف إن أكيد العربية دى استجابتها غير البولونيز تماما فكنت مراعى و لازلت "أداعب الدواسات بأطراف قدمى لا أكثر"... بل و تأتى الاتجابة أنعم و أسلس من الطلب.....انبهار كبير حسيت بيه مع العربية دى...كفاية العزل الممتاز كأنى من ركاب الدرجة الأولى على متن رحلة عبر المدينة المزدحمة المشحونة و الممتلئة بأناس أعصابهم مشدودة و على حافة الانفجار و أنا باتفرج عليهم كأنى أشاهدهم على الشاشة غير عابىء بالطريق المزدحم و أصبحت الرحلة للعمل فى حد ذاتها نزهة و السيارة تحولت من وسيلة انتفال إلى و سيلة امتاع......ناهيك عن كونها فتاة مطيعة مستجيبة دائما لرغبات السائق..عايزينك تفسحينا للشغل و على مهلك و نشم سوا عبير الصباح....عينى يا سيدى....احنا اتأخرنا يا حلوة فطيران على الشغل...انت تأمر و أنا أنفذ.....و فى كل الأحوال هناك وفر فى القوة و المتعة و الابهار محتفظة به فى حوزتها و مش بيطلع غير عند الحاجة.... لن أنسى الفزع عند عمل مساحات الزجاج الأمامية و الخلفية عند سقوط الأمطار و قد ايه القيادة فى المطر داخل تلك الساحرة الصغيرة شىء ممتع و آمن و دايما حاسس بيها زى ما تكون عارفة انا الدنيا بتمطر و واخدة بالها حتى لو انت تحذلقت أو قمت بتصرف طائش...كل يوم معاها فى حدوتة...قمة التواصل بين الألة و الانسان...بل الانسان اللى فكر و صنع الآلة و الانسان اللى اشتراها لإنها لمست احتياجاته و لبت تطلعاته...لم أكن أتخيل فى يوم إنى أشترى حاجة ب 135 ألف فى يوم واحد و كل اللى قضيته معاها دقايق معدودة....لكن الشىء جيد الصنع لا يحتاج لفحص و تمحيص..الجواب بيبان من عنوانه...مرة اتسألت " لو الأيم رجعت بيك سنة للوراء ..هل كنت لازلت اشتريتها".....أعتقد إنى لو كنت اكتشفتها بعد ما اشتريت حاجة تانية كنت زعلت أوى.....سبحان الله الذى علم الانسان ما لا يعلم و الذى هدانى إلى تلك المحبوبة التى اعتبرها الفرد الرابع فى عائلتى....و أكيد جعلها سبب لانضمامى لأعز مجموعة من الشخصيات ( الوحوش ) :original:

السلام عليكم ورحمة الله وبركاته.

ازيكم يا وحووووووووووووش يا رب الكل يكون بأفضل حال.

المتألق محمد عادل / نورت الموضوع بمداخلتك والله يسلمك يا باشا هي مش متأخره ولا حاجه جزاكم الله كل خير.وبما انك تمتلك الميجان 1 ومن 2004 تستحق بجداره لقب المالك الاقدم بيننا لمعشوقة الوحوش الميجان ....حكاية ال 30 الف دول فكروني برضه بأول ايام نزوحي من السعوديه الى القاهره:gun_bandana: كنت جاي عشان ادخل ثانوي مش عارف ليه المهم كان والدي متصور ان 5-6 الاف يجيبو عربيه حلوه كده نجري بيها في البلد ............طبعاً كان خيال علمي بالنسبه لي ده غير اني كنت بانزل مصر اشوف العربيات احس اني وقعت من سنة 95 لي 70 مش عارف ليه كان دايما ده شعوري والله اول ما انزل مصر .

الحقيقه بما انك معاليك اقدم واحد فينا اسمحلي اسألك واقولك ايه اللي خلاك اول ما قررت تجيب عربيه تفكر في الاوروبي على طول من غير ما تعدي على الياباني ؟ خصوصاً انك كنت في السعوديه يعني الاوروبي هناك مش معروف اطلاقاً.

ربنا يبارك لك في عربيتك يا محمد باشا ويكفيك شرها وحافظ عليها وهي هتحافظ عليك وبهدل فيها زي مانت عاوز وانا متأكد ان شاء الله مش هاتعمل معاك حاجه كده ولا كده ان شاء الله لأنها بجد اصيله .

• megane_man حضرتك بجد لا تتخيل كلامك قد ايه مفرحني وانا والله لا قاصد اكون كوميدي ولا درامي ابداً الموضوع كله باختصار اني قاعد باحكي حكايتي بس وانا مرتاح لأني بجد حاسس اني وسط عيلتي وحبايبي .....وبجد والله العربيات صحيح هي آله في الاول والآخر ولا تشعر ولا تأكل لكن فكرة التخاطب والتواصل معاها ده ليه تأثير كبير طبعاً مش على العربيه هو بيكون رد فعل عكسي وبيأثر علينا احنا تاني لكن ببساطه هو فعال جداً حضرتك هاتجرب ان شاء الله الاحساس ده مع الميجان بتاعت حضرتك ربنا يبارك فيها ويحفظهالك من كل سوء ان شاء الله......وبرضه ما تنساش تشرفنا بحكايت حضرتك مع الميجان انا خلاص خلصت اه عشان تكتب زي ما حضرتك قلت .

• blazer / جزاكم الله كل خير يا فندم واشكر مداخلتك الكريمه وشرفت الموضوع.

• هاني باشا / الشكر لأجمل اعضاء واجمل صحبه الواحد بجد عرفهم واتعامل معاهم ربنا يديمها علينا نعمه يا رب .

اما بخصوص مداخلتك الجميله فا اسمحلي اقولك اني بدأت اغير من سعادتكم لأن اسلوبك في الكتابه بجد هايل جداً واختيارك لمفردات معينه بيكون صح جداً وينم عن قدر كبير من الثقافه والمعرفه عندك فا احييك الاول على ده .

بخصوص بقى العامل المشترك بين الوحوش وهو الست ميجان فا فكرة انك اعجبت بيها على طول ده شيء جميل وواضح انك فعلاً ما اخدتش وقت في التفكير اذا كانت كويسه ولا لأ ودي شجاعه تحسد عليها بجد ....كمان وصفك لريحة العربيه الجديده وترحيبها بيك بجد شيء جديد جداً والحمد لله حسسني اني مش مجنون لاني فضلت وقت كتير عمال آخد بالي من حاجات في العربيه عبيطه لكن مبهجه جداً تفاصيل دقيقه للغايه لكن بتفرق جداً مع الواحد وياسلام على موضوع المطر ده وانت جوه العربيه........

مداخله اكثر من رائعه يا هاني باشا واضافه ثريه لموضوع المتواضع جزاكم الله خير يا باشا.

في انتظار تجارب الوحوش فييين الناس ؟ ؟

اقتباس:

---

المشاركة الأصلية كتبت بواسطة Ramy_Tantawi

• هاني باشا / الشكر لأجمل اعضاء واجمل صحبه الواحد بجد عرفهم واتعامل معاهم ربنا يديمها علينا نعمه يا رب .

اما بخصوص مداخلتك الجميله فا اسمحلي اقولك اني بدأت اغير من سعادتكم لأن اسلوبك في الكتابه بجد هايل جداً واختيارك لمفردات معينه بيكون صح جداً وينم عن قدر كبير من الثقافه والمعرفه عندك فا احييك الاول على ده .

بخصوص بقى العامل المشترك بين الوحوش وهو الست ميجان فا فكرة انك اعجبت بيها على طول ده شيء جميل وواضح انك فعلاً ما اخدتش وقت في التفكير اذا كانت كويسه ولا لأ ودي شجاعه تحسد عليها بجد ....كمان وصفك لريحة العربيه الجديده وترحيبها بيك بجد شيء جديد جداً والحمد لله حسسني اني مش مجنون لاني فضلت وقت كتير عمال آخد بالي من حاجات في العربيه عبيطه لكن مبهجه جداً تفاصيل دقيقه للغايه لكن بتفرق جداً مع الواحد وياسلام على موضوع المطر ده وانت جوه العربيه........

مداخله اكثر من رائعه يا هاني باشا واضافه ثريه لموضوع المتواضع جزاكم الله خير يا باشا.

في انتظار تجارب الوحوش فييين الناس ؟ ؟

---

أخجلتنى بردك الكريم:sweatdrop:........وربنا يديم المحبة بين الوحوش دائما
الموضوع مش شجاعة أوى على قد ما المهم الواحد لازم يكون عارف هو أولوياته بالترتيب ايه... ومستعد بتنازل بقدر ما عن بعض الجوانب...المشكلة اللى بتتعب بعض الناس فى شراء حاجة غالية زى العربية هو التصور الخاطىء إنه من الممكن شراء الكمال بالسعر ده....و طبعا ده مستحيل..إنك تمسك بتلابيب الأرض بإيدك و تبقى زى المقولة " مغسل و ضامن جنة " ده شىء مستحيل ...
كل صانع له أسلوبه فى تصنيع و تقديم المنتج و لا يسع أى منا سوى الاتكال على الله أولا و أخيرا....و دايما المال الحلال ما يضيعش و مهما حصلت خسائر نقول الحمد لله لإن كان ممكن الأمور تكون أسوأ زى ما حصل معاك مثلا...أى نعم العربية راحت لكن فداكم كلكم من أذى كبير لولا ستر ربنا...الواحد بيشوف حوادث تافهة و الناس ممكن تروح فيها...

بالنسبة لريحة العربية هى لازلت موجودة حتى اليوم بالرغم من مرور عام كامل و لو انها مش بنفس القوة زى ما كانت جدبدة لكنها لازلت موجودة و لازلت باعتبرها كلمة صباح الخير اللى الميجان بتوجهها إلىً و لازال اعتزازى بجودة الصناعة مستمر.....
فى شوق لمقابلتكم جميعا غدا ان شاء الله و فى انتظار المزيد من الإضافات إلى موسوعة " أنا و ميجانتى" و "أنا و الكليو بتاعتى ":smartass: