ميكانيكى امين دى بحاول اشوف بس انت عارف معظمهم ..... :) ، صوت الكرونة ده يعنى صوت الموتور ؟ انت تقصد ممكن تتفك البوجيهات دى عادى و هتبين حالة الموتور ؟ طيب هتبينه ازاى يعنى ؟
الكارونة دى هيا البطيخه اللى فى العربية من تحت بين العجل الخلفى, دى جواها تروس عايمة فى الزيت لو الزيت قل أو حصل تسريب التروس لاقدر الله بتأكل فى بعضها و تطلع صوت ونه (ونننننن) على السرعات العالية, و بالتدريج الصوت يزيد مع السرعات الأقل لحد متبوظ خالص و تقفش (ربنا يعافينا جميعاً)
و الفتيس بيعمل نفس الصوت بس من قدام.

البوجيهات دى بتتفك عادى جداً و بتتغير من وقت للتانى فى الصيانات الدورية (زى السيور و الفلاتر و الزيوت)
سن البوجية لما يتفك هيقرأ حالة الموتور بنسبة كبيرة بس ده مش هيتأكد غير لما يتفتح كما ذكر الأخ الفاضل.
يعنى لو السن عليه زيت يبقى محتاج شنبر أو جلد صباب. و لو غسلناه بالبنزين و ركبناه هيوصله زيت بعد وقت أد إيه؟ علشان نعرف حالة الشنبر (مبكر و لا متأخر) و صوت المكنة و بخر الزيت ..... كل ده هيقول المكنه حالتها كام فى المياة تقريباً.
الصح إنك لو لاقيتها محتاجة شنبر تسارع بعمله لو جاهز له مادياً.

إوعى و إياك تفتح الموتور عند أى ميكانيكى و خلاص
لازم يكون بيفهم فى العمرات و عمرات اللادا كمان مش أى واحد داهن إيدية شحم و زيت يبقى ميكانيكى.

لو حضرتك من القاهرة أو الجيزة ممكن أرشحلك الميكانيكى اللى بنتعامل معاه, ناس كتير جربته من المنتدى و طلعوا قالوا رأيهم فيه.... راجل قمة الأمانه و الخبرة و أسعارة فى المعقول و كان شغال فى توكيل لادا, يعنى متخصص لادا.
اسمه محمد طلبه , فيه كذا موضوع من تجارب الأعضاء معاه هنا فى القسم.

أعانك الله