الموضوع: تقرير سريع عن الrenault sandero step way auto. 2015

السلام عليكم ورحمه الله وبركاته
الحمد لله ربنا كرمنى واشتريت step way للمدام وطبعا عشان هيا مش بتسوق كويس فغالبا انا كل يوم اللى بنزل بيها وعمال بعلمها السواقة وطبعا عراك وحرقة دم و اعصاب ربنا ما يكتبها على حد وربنا يسترها علينا كلنا

انا كنت حابب اتكلم عن كماليات العربية وكمان المميزات والعيوب
اولا كماليات العربية

1-العربية مزودة بموتور 1600 cc وده 16 صباب مش 8 و ال horse power اعلى 109 مش 90 زى المانوال.
2-عوامل الامان : العربية مزودة بعدد 2 air bags ونظام فرامل BAS و abs و auto lock للابواب بمجرد ما العربية تمشى والمفروض فيها immobilizer بس انا مش شايف اى علامه عليه فى التابلوه وطبعا front & back seat belt وتنفع كمان child car seat.
3-العربية فيها شاشة تاتش ٧ بوصة تشغل عليها map , navigation "GPS , media , radio , Bluetooth ووصلة aux & usb.
4-العربية مزودة بكمبيوتر رحلات و الطارة multi function للتحكم فى المكالمات والاغانى وخلافه.
5-امكانية التحكم فى مستوى ارتفاع كرسى السواق وارتفاع طارة الدريكسيون.
6-الكنبة الخلفية قابلة للطى فابتدى مساحة حلوة للشنط عند الحاجة.
7-اصوات تحذيرية عند ترك ابواب مفتوحة او رفع الهاند بريك اثناء التحرك او ترك انوار العربية عند ايقافها ودى ميزة مهمة جدا.
8-ضبط المرايات الجانبية بالكهربا ووجود اشارات بالمرايات.
9-العربية مزودة ب speed limiter & cruise control وده مفيد جدا فى حالة السفر.
10-العربية عالية جدا عن الارض ومصفحة من تحت وده طبعا ميزة كويسة جدا يعنى مفيش مشاكل مع الحفر والنقر والمطبات.
11-حجم الشنطة شايفه مرضى جدا بالنسبة لعربية هاتش باك وكمان فيها حامل للكوريك ومفتاح العجل مكانه عبقرى بصراحة.
12-امكانية التحكم فى مستوى ارتفاع النور العالى وده برده ميزة كويسة جدا.
13-تقفيل الموتور محترم جدا ومنظم اوي وكمان الكابوت الامامي بيترفع ب PISTON مش بسنادة بصراحة حاجة محترمة اوى.
14-العربية عفشتها ناعمة ومريحة ونازلة بكاوتش good year مش وحش ومش متعبة للضهر.
15-العربية من جوه حجمها كويس يعنى مش ضيقة زى معظم الهاتش باك و ممكن تاخد عدد وكمان سهلة فى الركنة عشان حجمها الخارجى مش كبير.
16-المرايات الجانبية قوية اوى وقابلة للحركة فى عكس الاتجاه فاده بيديها حماية لو اتخبطت فى الاتجاه العكسى.
17-العربية شكلها رياضى اوى وتصميمها ثورى وشبابى وده عطيلها قيمة عالية يعنى شكلها فخم : ).
18-فرش العربية شيك اوى بس للاسف قماش مش جلد وده معرض انه يتبهدل بسرعة.
19- توكيل العربية من احسن التوكيلات فى مصر وده من خلال تعاملى مع شركة eit فى عربيتى الكيا ودى ميزة مهمة وفروع الصيانة كويسة ونضيفة.
20- العربية عليها اقبال عالى وانتشرت جامد فى وقت قياسى وده اكيد حينعكس على سعر اعادة البيع.
21- لعمل unlock للابواب الخلفية لازم من قدام وده ميزه مهمة اوى لو عندك اطفال اشقيا زى اللى عندى.
22- العربية مزودة ب daytime light وده مزاول الناس كلها وانا معاهم كل شوية حد يقولى اقفل النور وانا ماشى حاجة مسخرة بجد

بالنسبة للكماليات الناقصة اللى كان من المفروض تكون نازلة بيها بس للاسف الحلو مايكملش


1- العربية غير مزودة بتكييف تاتش.
2-العربية غير مزودة ب parking sensors ولا camera خلفية.
3-العربية غير مزودة بوحدة رفع وانذار.
4-العربية غير مزودة بمرايات ضم كهربا وسخانات للمرايات الجانبية.
5-العربية غير مزودة بنور فى منتصف سقف العربية.
6-العربية غير مزودة بجنوط سبور بس فيها جنط حديد 16 شكله حلو مش وحش بتركبله طاسة شكلها شبه الاسبور اوى.
7-مفتاح العربية شكله تقليدى مش مثلا folding fey او smart card.
8-شنطة العربية مش بتتفتح بزرار من جوه انت بس تعمل unlock وحد يفتحها من بره زى الفلوانس.


عيوب العربية

1-باور الدريكسيون تقيل اوى الصراحة وده رخم شوية فى الركنة بس حلو لو ماشى على طريق سريع.
2- كلاكس العربية فى دراع النور مش فى الدريكسيون وعايز وقت عشان تتعود عليه.
3- مفتاح البنزين من الخارج وده سخيف اوى الصراحة.
4- صوت ماتور العربية عالى وملاحظ حتة بالنهار مع الدوشة وده مش عارف هل بسبب ان العربية لسه فى التليين ولا ايه.
5- وجود نتشة فى الفتيس عند النقلات الى غيار اقل يعنى من التانى للاول مثلا تلاقى العربية كلبشت شوية فى الارض وان كنت اسمع ان النتشة ده موجودة فى معظم العربيات الفرنساوى بس اول مرة احس بيها.
6- وجود بعض الاسلاك اسفل الكابوت بدون عزل جيد وده ممكن يعمل مشكلة وكمان سلك الفانوس الخلفى مكشوف .
7- مخدع السائق ضعيف و مكان التخزين به صغير جدا.
8-وجود الهاند بريك اسفل المخدع وكمان ال lock بتاع الحزام فى مكان ضيق اوى يعنى سخيف شوية.
9-وجود زراير التحكم فى زجاج الكنبة الخلفية فى منتصف العربية وليس فى كرسى السائق.
10- خامات العربية متوسطة وده طبيعى فى الفئة السعرية دى.
11- شكل الفتيس والتكييف البكر مش عاجبنى الصراحة يعنى لو كانوا نزلوا التاتش اكيد كان حيبقى احسن.
12-عدم انارة زراير multi function مع فتح انارة نور التابلوه


انا كمان لاحظت حاجتين زعلونى شوية اول حاجة تقفيل الاكصدام الخلفى مش حلو يعنى فى حتة مفارقة عن حتة وتانى حاجة لقيت ريشة مش موجودة فى هواية التكييف اللى فى السنتر مش عارف بقى دى واقعة ولا مكسورة والباب الخلفى شمال مش بيفتح من جوه بس الصراحة حاجة غبية لما تلاقى عربية جديدة فيها الكلام ده.

ولو افتكرت حاجة زيادة حبقى اكتبها اصلى كتبت الموضوع ده قبل كده كذا مرة واتمسح

تقييمى النهائى للعربية انها كويسة بالنسبة للفئة السعرية وكمان الموضوع بيفرق مع كل واحد على حسب هو كان سايق ايه قبليها يعنى انا مثلا مراتى عجباها العربية جدا عشان اول مرة تسوق بس انا مش عجبانى اوى عشان معايا حاجة اعلى منها ونصيحة اخوية بلاش تشترى باوفر برايس خلى العربيات تخلل شوية فى المعارض عشان يحترموا نفسهم وميزودوش على الناس . واى استفسار انا فى الخدمة وان شاء الله ارفع صور قريب بس لما اديها غسلة حلوة الاول.

تقرير ممتاز