الموضوع: مشكلة فى الجنب اليمين لاحظتها ومش لاقيلها حل(ربنا يسترها)

المشاركة الأصلية كتبت بواسطة swimmer25

المرايا اليمين لازم تكون موجودة مع إن مراية الصالون البانوراما بتأدي الغرض بردو
في الخليج بيعلموا تغيير الحارة إزاي
1- إشارة
2- مراية صالون
3- مراية جانبية
4- كتف
5- مراية صالون
إحفظها..إشارة مراية مراية كتف مراية
والكتف إنك تحرك وشك ناحية كتفك تبص على زجاج شباك الراكب الخلفي عشان تكشف النقطة العمياء اللي مش هتبان ولا في مراية الصالون ولا مراية الجنب

بالتوفيق

تمام الطريقة دى نجحت اوى يا بشمهندس ربنا يباركلك يارب مش عارف اشكرك ازاى ويكرمك لانها فادتنى كتير وسوقت اكتر من مرة والحمد لله اتدربت عليها
اخر حاجة انا لما بمشي فى طريق سريع زى مثلا رمسيس بليل باخد الحارة الشمال وبمشي ع التالت حوالى 50 كم وساعات بجيب الرابع واخرى ف الطريق 60 70 عشان ربنا يسترها طبعا فهل كدة كويس ولا ايه عشان بس الحق نفسي لو فى اى حاجة فجاة جت وعشان الدنيا تظبط معايا؟ ولا خطر؟ وربنا يسترها معانا ومعاكوا يارب :)

المشاركة الأصلية كتبت بواسطة swimmer25

تمام جدا مبارك عيك المرايات الجديدة
عود نفسك بقى تعمل الطريقة دي بسرعة بحيث إنك ترجع تبص قدامك عشان متغبش كتير عن الطريق قدامك وقبل ما تعمل الطريقة دي تكون واخد بالك من الطريق قدامك وإن فيه مسافة كافية بينك وبين اللي قدامك وإن مفيش حاجة تخلي الطريق يقف قدام اللي قدامك كمان في اللحظات اللي هتكون فيها مش لاقط اوي الطريق

حاجة تانية..دايما وإنت سايق متبصش على الأسفلت ولا على العربية اللي قدامك ولا على كبوت العربية بتاعك ولا تمسك موبايل ولا تشغل نفسك بأي حاجة في العربية أو برا العربية
دايما بص لقدامك بحيث إنك تكون كاشف 4-5 عربيات ولو عرفت أكتر يبقى كويس

بالنسبة لسؤالك..لو الطريق 3 حارات خليك في النص والسرعة كده كويسة
أما لو الطريق حارتين والطريق فاضي ومفيش حد وراك ممكن تاخد الشمال عادي عشان تتفادي الخارجين من اليمين
ودايما تلقط في المرايات كلها الطريق كله وراك فيه إيه (حتي لو 3 الفجر ومفيش مخلوق في الشارع) ومش لازم ساعتها تعمل الكتف..الكتف بس في نقل الحارة

تمام يابشمهندس عملتها والحمد لله ظبطت معايا جدا ربنا يباركلك بجد ويستر طريقك واتعودت كمان اظبط نفسي وابقى عارف النسب احسن من الاول بكتير بالمرايات وخصوصا الصالون واليمين
ونفعت جدا فى الزحمة وخصوصا شارع رمسيس دة لانى لاقيت الناس كلها داخلة يمين وشمال والاقى اوتوبيس كابس ورايا وعمال يدى فى كلاكسات ومحسسنى انى معطله مع انى ماشي كويس ومش براحة والطريق قدامى واقف اصلا . معرفش ليه مع ان الطريق زحمة بس اللى يكسر يمين عليا بقيت ألقطه بالمرايات وبقيت بتعامل بيها وبقيت اعرف افتح طريق للى ورايا ف عرفت كويس اوى ان الواحد بيسوق قدامه ووراه وخصوصا لو زحمة كتير وبقيت اتفادى بشكل كبير العربيات لو واحد هيكبس عليا ف زحمة
خبرتى زادت الحمد لله فى انى ابقى ماشي ولاقط جناب العربية كلها بس لازم التركيز 100%

الحاجة الوحيدة اللى ضايقتنى انى ابقى ماشي مثلا ع سرعة 70 فى نص الطريق وفجاة الاقى كابس ورايا مكروباصين ولازقين فيا من ورا معرفش ليه ف انا كل اللى عملته انى قمت مدى اشارة شمال لاقيت المكروباص هدى شوية وقمت داخل قدامه وفتحت طريق م النص وعشان كمان ابقى عامل حسابي عشان لو وقفت فجاة ولا هديت ملاقيهوش لبس فيا ودة اللى قالقنى وساعات كمان بشاور بايدي عشان اخليه يعدى من جنبي وميقرفنيش :d
معرفش ايه حكاية العربيات اللى بتلزق ف ضهر الواحد دى :d مع انى مش ماشي براحة وبعدى كويس
ربنا يباركلك يارب انا بجد نفسي اتعلم كل الاساسيات دى لان السواقة فى مصر متعبة جدا ومحتاجة الواحد يعرف قواعد كتير كدة زى نصايح حضرتك لان الغلطة الواحدة بتعمل مشاكل كتير
المفروض بجد تعمل كتاب هتكسب منه ملايين والله :d
وشكرا جدا يا بشمهندس بدعيلك بجد والله لانى كنت حاسس انى مليش نفس للعربية وبحس انى بخاف وبقول يارب ميحصلش موقف بايخ بس الاحساس قل اوى الحمد لله
اسف بقى صدعت حضرتك جدا :)