اقتباس المشاركة الأصلية كتبت بواسطة m_m_sh_a مشاهدة المشاركة




أحيه ...حضرتك عايز العامل يطلب أو يبقى من مطالبه تغيير الإدارة ...يا نهار ..إنت عاوز تحبسنا ولا إيه يا عم ؟؟؟تقدر حضرتك تطالب بتغيير الإدارة ..وأنا بتكلم على حضرتك كمواطن عايش في البلد ..سؤال بعد إذنك عاوز إجابه ليه ..تقدر حضرتك تطالب بتغيير الإدارة بتاعة البلد ؟؟؟؟......علطول هتبقى إرهابي وداعشي وإخواني ..إحنا برضه اللي شغالين في الشركات كده ..لو طالبنا بتغيير الإدارة هتبقى محرضين وإرهابيين ومخربين ..وبعدين رؤساء مجالس إدارة الشركات دول آآآآآآآآآآآآآخر ترس في المنظومة ..المنظومة ياباشا بادئه بالترس الكبيييييييييييييييييييير وبتمر بمجموعة تروس كتييييييييييييير ..بتنتهي بقى برؤساء مجالس الإدارات ..أو يمكن مديرين الإدارات ..أو يمكن كمان الموظف الفاسد المرتشي اللي قاعد على مكتبه وفاتح الدرج بتاعه ..ولله الفضل والمنه ..أنا مش من اللي فاتحين درجهم ...تعالى بقى طالب بتغيير الترس الكبييييير ..طيب طالب بتغيير الترس اللي تحت منه ..طيب اللي تحت منه ..طيب طالب بتغيير أصغر ترس في المنظومة ...ها هاي ..طيب ما هي المنظومة لسه موجوده ..بقلك إيه يا سيدي الفاضل ..خلينا ساكتين ..وياريت حضرتك كمان تسكت...عشان لو إتكلمت ..حضرتك عارف تهمتك إيه من دلوقتي ..وعادي ..دكاترة طب وأساتذة جامعات وبنات طالبوا بتغيير الإدارة ..وحضرتك عارف هما فين دلوقتي

حضرتك فى حاجه مش واخد بالك منها ان انت مش مطلوب منك تطالب بتغيير الاداره انما لو فى دليل على فساد مش مطلوب غير انك تكشف الموضوع بال3 طرق اللى انا ذكرتهم شكوى اداريه او قضائيه واقل حاجه اعلاميا "ويندرج تحت اعلاميا نشر الموضوع فى مواقع التواصل " على الاقل تكون عملت حاجه انما انت شايف ان المنظومه كلها فاسده وشايف ان كل التروس من اكبرها لاصغرها فاسد وسايب الوضع على هذا الاساس ومش عايز تغيره يبقى حتى "لو انت مش بتقوم بعمل فاسد" انت مشارك فى الفساد برضاك بالوضع وحتى لو غيرنا الترس الكبير "زى محصل قبل كده" حتفضل باقى التروس مش عايزه تتغير

وزى محضرتك فكرتنى بايام ما بعد ثوره 25 يناير وان الناس كانت على استعداد للتغيير تفتكر ليه الوضع متغيرش فى ولا شركه موجوده فى فتره ما بعد الثوره اقولك لان الناس كلها افتكرت زى حضرتك كده ان بتغيير الترس الكبير المنظومه تتصلح لوحدها وده مش صح لان المفترض ان التغيير يحصل من تحت لفوق لان كل انسان مفترض يبدأ بنفسه وبعدين باسرته وبعدين فى مجتمعه الصغير لحد ميوصل للقمه لان لازم تعرف ان اى مسؤل هو واحد من المصريين فلو هو فاسد فده لانه اصلا كان موظف صغير فاسد ومحدش حاسبه ولو اداره فاسده فده لان الاداره دى لما كانت صغيره كانت فاسده ومحدش حاسبها وبالتالى كل جيل حيشتغل فى المنظومه حتى "لو زى مانت بتقول مش فاسد" حيتحول طالما سايب نفسه لفاسد ويكبر لحد ميكون رئيس الاداره وساعتها يفضل برضه الموظف الصغير مستنى انه الاداره اللى تتغير وميعرفش ان حتى لو الاداره اتغيرت حييجى من زمايله برضه فاسد تانى

حضرتك شايف ان فى ظل الوضع الحالى صعب تغيير الاداره بلاش تغير الاداره بس لما تشوف موظف فاسد معاك حاول تتحرك انما غير كده يبقى خلاص خللى الوضع يبقى على ما هو عليه ومنستناش تغيير
اسهل حاجه انك تغير رأس الهرم "سواء بفعل او بقضاء من الله"ولكن التغيير ده "كما اثبتت لى الايام" مش بيصلح مجتمع اصلاح المجتمع بيبدأ بالفرد فالاسره فالمجتمع .


اخيرا حضرتك بتقول انك تتمنى انى اسكت وده انا مش قابله تماما لانه مش منطقى ان اى حد بيقول حاجه مش عاجباك يبقى تقوله اسكت والا اقبل برضه ان غيري يحجر عليك ويسكتك ويا ريت تامل كلمه حضرتك دى وانت حتعرف ليه اى اداره لو انت اتكلمت حتعاقبك لانك انت شخصيا مش قابل حد يخالفك فلو بقيت مدير فى يوم ما اظن برضه انك مش حتقبل حد يشتكيك او حتى يختلف معاك .
حضرتك انا حتوقف عند المشاركه دى فى مناقشه حضرتك طالما دى رغبتك ولكن حتابع الموضوع وحتكلم فيه بشكل عام لطرح وجهه نظرى الشخصيه .
تحياتى .